ཨ་རིའི་བོད་མིའི་ངོ་རྒོལ་སྐད་འབོད།

 མཉམ་འབྲེལ་རྒྱལ་ཚོགས་བཙུགས་ཏེ་ལོ་ ༦༦ འཁོར་བའི་དུས་དྲན་དང་བསྟུན་ནས། ནེའུ་ཡོག་བོད་རིགས་སྤྱི་མཐུན་ཚོགས་པ་དང་། ས་གནས་གཞོན་ནུ་དང་བུད་མེད་ལྷན་ཚོགས་བཅས་ཀྱི་གོ་སྒྲིག་འོག ཕྱི་ཚེས་ ༢༤ ཉིན་གྱི་ཕྱི་དྲོའི་ཆུ་ཚོད་ ༥།༣༠ ཐོག་ནེའུ་ཡོག་ཏུ་ཡོད་པའི་རྒྱལ་ཚོགས་ལས་ཁུངས་མདུན་ཐང་དུ། མདོ་སྟོད་སྤྱི་འཐུས་ཚུལ་ཁྲིམས་བསྟན་འཛིན་དང་བྱང་ཨ་རིའི་སྤྱི་འཐུས་ནོར་བུ་ཚེ་རིང་ལགས་གཉིས་ཀྱིས་སྣེ་ཁྲིད་པའི་ས་གནས་བོད་མི་ ༡༨༠༠ ལྷག་གིས། ཉེ་ལམ་བོད་ནང་འདས་གྲོངས་སུ་ཕྱིན་པའི་བོད་མི་ཚོར་གདུང་སེམས་མཉམ་སྐྱེད་མཚོན་ཆེད། མེར་མེ་ཁྲོམ་སྐོར་དང་ཡིག་ཆ་འགྲེམས་སྤེལ་གྱི་ལས་འགུལ་འདྲ་མིན་སྤེལ་ཡོད་པ་མ་ཟད། སྐབས་དེར་ཚོགས་པ་གསུམ་ཐུན་མོང་ཐོག་རྒྱལ་ཚོགས་ལ་རེ་འདུན་ཁག་ཅིག་བཏོན་པའི་ནང་བཀོད་དོན་ལྟར་ན།  “ བོད་ནང་གི་གནས་སྟངས་ཡར་རྒྱས་ཡོང་ཐབས་དང་བོད་རྒྱའི་དཀའ་ངལ་སེལ་ཆེད་རྒྱལ་སྤྱིའི་སྤྱི་ཚོགས་ནས་རྒྱ་གཞུང་ལ་གནོན་ཤུགས་སྤྲོད་དགོས། མདོ་སྨད་རྔ་པ་ཁུལ་དང་ཀིརྟི་དགོན་པར་བཅའ་སྡོད་བྱེད་བཞིན་པའི་དམག་མི་རྣམས་འཕྲལ་དུ་ཕྱིར་འཐེན། རྒྱལ་ཁབ་ཁག་གི་གཞུང་དང་དབུ་ཁྲིད་ཚོས་བོད་ནང་གི་ཛ་དྲག་གནས་སྟངས་ལ་ཐུགས་འཚབ་ཡོད་པའི་རྣམ་འགྱུར་གསལ་སྟོན་དགོས། རྒྱལ་སྤྱིའི་སྤྱི་ཚོགས་ནས་བོད་ནང་གི་དངོས་ཡོད་གནས་ཚུལ་ཤེས་རྟོགས་ཡོང་ཆེད་རང་དབང་གསར་འགོད་པ་དང་། རྒྱལ་སྤྱིའི་རྟོག་ཞིབ་ཚོགས་པ་ཞིག་བོད་ནང་ཞིབ་འཇུག་ཏུ་བསྐྱོད་ཐུབ་རྒྱུར་སྐུལ་འདེད། རྒྱ་གཞུང་གིས་སོ་སོས་མིང་རྟགས་བཀོད་པའི་རྒྱལ་སྤྱིའི་འགྲོ་བ་མིའི་ཐོབ་ཐང་ཁྲིམས་ཡིག་ལ་བརྩི་བཀུར་དང་། བོད་ནང་གི་ཆོས་དད་རང་དབང་དང་མདོ་སྨད་རྔ་པའི་མི་མང་གཙོས་པའི་གཞི་རྩའི་བོད་མིའི་འགྲོ་བ་མིའི་ཐོབ་ཐང་ལ་བརྩི་བཀུར་དགོས་ ” ཞེས་འཁོད་ཡོད་འདུག

ཐེངས་འདིའི་ཨ་རིའི་བོད་མིའི་ལས་འགུལ་འདི་གཞུང་གི་ལས་ཁུངས་ཁག་གྲོལ་བཞིན་པའི་སྐབས་དང་བསྟུན་ཏེ་སྤེལ་བ་ཞིག་ཡིན་འདུག

དཔལ་ལྡན་གྱིས་བསྡུ་སྒྲིག་བྱས།