དགེ་འདུན་པ་ཡང་ཡང་མེར་བསྲེགས་གཏོང་བཞིན་པའི་གཏིང་རིམ་གྱི་རྒྱུ་རྐྱེན་གླེང་བ།

ཕྱི་ཟླ་ ༡༠ ཚེས་ ༢༥ ཉིན། རྒྱལ་སྤྱིའི་རེ་བའི་འབོད་སྒྲ་རླུང་འཕྲིན་ཁང་གིས་ལྷ་སྡེ་གནམ་ལོ་ཡག་ལ་བཅར་འདྲི་ཞུས་ཏེ། དུས་ཡུན་སྐར་མ་ ༡༣ དང་སྐར་ཆ་ ༡༩ ཅན་ཞིག་རླུང་འཕྲིན་ཁང་དེ་གའི་“དུས་བབ་བགྲོ་གླེང”ལེ་ཚན་དུ་རྒྱང་སྲིང་བྱས་པ་ཞིག་འདིར་ཕབ་བསྒྱུར་བྱས་ཡོད།  

བཅར་འདྲིའི་སྔོན་འགྲོའི་ཚན་པར། “ ཤེས་གསལ་ལ་ལོང་ཊོན་དུ་རྟེན་གཞི་བྱས་པའི༼ བོད་ཀྱི་རང་དབང༽བརྒྱུད་ལམ་ལྟར་ན། ད་ལོའི་ཟླ་ ༣ ནས་བཟུང་། དེང་གི་བར་དགེ་འདུན་པ་དང་དགེ་འདུན་པ་ཟུར་བ་དགུ་ཡིས་མེར་བསྲེགས་བཏང་འདུག དེའི་ཁྲོད་དུ་ལོ་ ༢༠ ཡས་མས་སུ་སོན་པའི་བཙུན་མ་བསྟན་འཛིན་དབང་མོ་ལགས་ཀྱིས་ཟླ་ ༡༠ ཚེས་  ༡༧ ཉིན་རང་ལུས་མེར་བསྲེགས་བཏང་ནས་གྲོངས་ཡོད་པ་དང་།  བརྒྱུད་ལམ་ཁག་ལས་བརྗོད་གསལ་དུ་བཙུན་མ་བསྟན་འཛིན་དབང་མོ་ལགས་ཀྱིས་རང་ལུས་མེ་བསྲེགས་བཏང་བའི་གོ་རིམ་ཁྲོད་དུ“བོད་ལ་རང་དབང་དགོས”སོགས་ཀྱི་འབོད་ཚིག་བསྐྱོར་འདུག ཡིན་ནའང་། རྒྱ་ནག་སྐམ་སའི་གསར་འགྱུར་ལྟར་ན། གུང་ཁྲན་གཞུང་གིས་རང་ལུས་མེར་བསྲེགས་ཀྱི་དོན་རྐྱེན་འདི་དག་རྒྱལ་ཁབ་ཕྱི་ལོགས་ཀྱི་དགྲར་འཛིན་སྟོབས་ཤུགས་ཀྱིས་ཆེད་དུ་བཟོས་པའི་བྱ་འགུལ་ཞིག་ཏུ་བཤད། གསར་འགོད་པས་དེའི་ཐད་ད་ལྟ་ཨོ་སི་ཊི་ལི་ཡར་སྡོད་པའི་བོད་ཀྱི་གནད་དོན་ཞིབ་འཇུག་པ་དང་མཐོ་རིམ་ཞིབ་འཇུག་པ་སྐུ་ཞབས་གནམ་ལོ་ཡག་ལ་བཅར་འདྲི་བྱས་ཡོད། གཤམ་ནས་ཚང་མས་གནམ་ལོ་ཡག་ལ་བཅར་འདྲི་བྱས་པར་གསན་རོགས” ཞེས་བཀོད་འདུག

གསར་འགོད་པ། ད་ལོ་རྒྱ་ནག་གི་ནུབ་ལྷོའི་ས་ཁུལ་དུ་བོད་ཀྱི་དགེ་འདུན་པ་བསྟུད་མར་མེར་བསྲེགས་གཏོང་བའི་དོན་རྐྱེན་བྱུང་འདུག་པའི་ཁར། ཛ་དྲག་ནས་ཛ་དྲག་གི་ཕྱོགས་སུ་འཕེལ་བཞིན་པས། ཁྱོད་ཀྱིས་གནད་དོན་འདིར་ཇི་ལྟར་ལྟ་བཞིན་ཡོད་དམ།

གནམ་ལོ་ཡག   ངས་ཀྱང་གནད་དོན་འདིར་དོ་སྣང་ཆེན་པོས་ལྟ་བཞིན་ཡོད། ཐོག་མའི་ཆར་བགྲོ་གླེང་གི་ཁ་ཕྱོགས་རེ་འགའ་ཡང་བརྙེད་སོང་།

གཅིག  དོན་རྐྱེན་འདི་དག་གིས་རྒྱ་དམར་གཞུང་གིས་བོད་ཐོག་བཟུང་བའི་སྲིད་ཇུས་ལ་ཕམ་ཁ་བྱུང་ཟིན་པ་དེ་བསྟན་ཡོད། སྲིད་ཇུས་ཀྱི་ཕམ་ཁར་བསྟུན་ནས་བོད་མི་ཚོས་གཅེས་སྲོག་འབེན་ལ་བཙུགས་ནས་ངོ་རྒོལ་མི་བྱེད་རང་བྱེད་ཀྱི་གནས་སྟངས་ཤིག་ཏུ་གྱུར་ཡོད། མཁས་པ་ལ་ལ་ཞིག་གིས་གནས་སྟངས་འདིར“རེ་ཐག་ཆད་པ”ཞེས་འབོད་ཀྱིན་འདུག ཡིན་ནའང་། ངས་བལྟས་ན་འདིའི་ནང་དུ་མི་རིགས་སྤྱིའི་རང་དབང་གི་ཆེད་ཀྱི་ངོ་རྒོལ་འདུས་ཡོད་པར་མ་ཟད། ཆོས་དད་སྲུང་སྐྱོབ་ཀྱི་འཕག་འཚག་ཀྱང་ཚུད་ཡོད་པས། རང་ཉིད་ཀྱི་ཁེ་གྲགས་དོར་ནས་མི་རིགས་ཀྱི་རང་དབང་རྩོད་ལེན་གྱི་ངོ་བོར་གྲུབ་ཡོད་སྟབས། ལས་སླ་བའི་ལམ་ནས“རེ་ཐག་ཆད་པ”ཞེས་བོས་ན་འོས་ཤིང་འཚམ་པ་ཞིག་མ་རེད། 

གཉིས།  འདི་ནི་སྐད་གྲགས་ཅན་གྱི་བོད་རིག་པ་སྨྲ་བ་བོ་སྐུ་ཞབས་བཀྲ་རྒྱལ་ལགས་ཀྱིས“ས་བྱི་ལོའི་ཞི་བའི་གསར་བརྗེ”འབོད་པའི་ཕྱི་ལོ་ ༢༠༠༨ ལོའི་བོད་ས་ཡོངས་ཀྱི་ཞི་བའི་ངོ་རྒོལ་གྱི་རྒྱུན་མཐུད་རེད། ཚང་མས་ཧ་ལམ་མཁྱེན་གྱི་ཡོད་པ་ནི་ན་ནིང་ས་བྱི་ལོའི་ཞི་བའི་གསར་བརྗེ་ལོ་གསུམ་འཁོར་བའི་དུས་དྲན་སྐབས། བོད་ནང་གི་རང་ལུས་མེར་མཆོད་ཀྱི་དོན་རྐྱེན་ཐོག་མ་རྔ་པ་ས་ཁུལ་ནས་བྱུང་ཡོད། བརྒྱུད་ལམ་ཁག་ལས་ཐོན་གསལ་ལ། སྐབས་དེར་རྔ་པ་ཀིརྟི་དགོན་པའི་ཉེ་འཁྲིས་སུ་དགེ་འདུན་པ་བཀྲ་བྷེ་ལགས་ཀྱིས་སྐུ་ལུས་མེར་མཆོད་ཀྱིས་ངོ་རྒོལ་གནང་སྐབས། དམག་མི་དང་ཉེན་རྟོགས་པས་ཁོང་ལ་མེ་མདའ་བརྒྱབ་ཡོད་འདུག ཡ་ང་བའི་གནས་ཚུལ་དེས་བོད་མི་རྣམས་ཀྱི་སེམས་པར་རྨ་ཁ་ག་འདྲ་ཞིག་བཟོས་ཡོད་པ་ནི་ཚོད་དཔག་བྱེད་དཀའ་བ་ཞིག་རེད།

གསུམ།  བཤད་མ་དགོས་པ་ཞིག་ནི། བོད་མི་ཚོས“འཚེ་བ་མེད་པ”དང“མི་རྟོན་པ”གཅིག་གྱུར་གྱི་སྙིང་སྟོབས་བྱ་སྤྱོད་ཁྲོད་སྤེལ་བཞིན་པ་ཞིག་རེད། དུས་ཡུན་ཐུང་ངུའི་ནང་དུ“མེ་ཏོག་མ་ལི་ཀའི་གསར་བརྗེ”ལྟ་བུའི་ནུས་པ་ཐོན་མི་སྲིད་ནའང་། “གསེར་མདོག་གསར་བརྗེ”ཡི་གོམ་སྟབས་བསྒྱུར་ཟིན་པར་གོ་ཆོག་པ་ཞིག་རེད་ལ། འདི་ནི་རྒྱ་ནག་དམངས་གཙོ་ཅན་དུ་བསྐུལ་བའི་ངོ་རྒོལ་གྱི་རིགས་གཞན་ཞིག་ཀྱང་ཡིན་པས། རྒྱ་མི་ཚོས་ངེས་པར་དུ་ཕྱོགས་འདི་མཐོང་དགོས་ཀྱི་འདུག རྒྱུ་མཚན་ནི་མི་རེ་ངོ་རེ་ལ་གཅེས་སྲོག་རྡོག་རོལ་དུ་གཏོང་ཕོད་པའི་སྲིད་གཞུང་མ་ལག་ཅིག་བརྗེ་བོ་རྒྱག་པའི་འོས་འགན་ཡོད་པ་རེད།

            གསར་འགོད་པ།  རང་ལུས་མེར་བསྲེགས་ནི་ཆོས་དད་དང་འགལ་ལམ། ཅིའི་ཕྱིར་ཁོང་ཚོས་རང་ལུས་མེར་བསྲེགས་གཏོང་བཞིན་པ་རེད་དམ། གནད་དོན་ཅི་ཞིག་གསལ་བཤད་བྱེད་ཀྱིན་འདུག སྤྱིར་བཏང་གི་རང་སྲོག་བཅད་པ་དང་མ་འདྲ་ས་གང་ཡོད་དམ།

            གནམ་ལོ་ཡག  མ་གཞི་ང་རང་ཆོས་ལུགས་ཞིབ་འཇུག་པ་ཞིག་མ་རེད། ཡིན་ནའང་། མཐོང་ཐོས་གཞིར་བཞག་གིས་བཤད་ན། ནང་ཆོས་ཀྱིས་སྲོག་གཅོད་སྡིག་པར་བརྩི་བཞིན་འདུག  དེ་མཚུངས་སུ་གཞན་དོན་གྱི་ཆེད་དུ་རང་སྲོག་བློས་གཏོང་འགོག་གི་མི་འདུག  ནང་བས་སྟག་མོ་ལུས་སྦྱིན་ནི་སྦྱིན་པའི་མཆོག་ལ་བརྩི་བཞིན་ཡོད་ཅིང་། དེའང་སྟོན་པ་ཤཀྱཱ་ཐུབ་པས་ལྟོགས་སྐོམ་གྱིས་མནར་བའི་སྟག་མོ་མ་བུ་དྲུག་སྐྱོབ་ཆེད་སྙིང་རྗེ་ཆེན་པོའི་ལམ་ནས་རང་ལུས་སྦྱིན་པར་བཏང་བ་ཞིག་རེད། དེར་མ་ཟད《དམ་ཆོས་པད་དཀར》ནང་དུ་སྟོན་པ་སྐུ་དངོས་ནས་རང་ལུས་མེར་མཆོད་བཏང་བར་བསྔགས་བརྗོད་གནང་འདུག ཚང་མས་དྲ་རྒྱའི་ནང་བཙལ་ན་རྙེད་ཐུབ་པར་མ་ཟད། ཨིན་ཇིའི་འགྱུར་ནང(Lotus Sutra)འབོད་ཀྱི་འདུག

            ནང་བའི་ལོ་རྒྱུས་ལྟར་ན།  ང་རང་གིས་བརྙེད་སོན་བྱུང་བ་སྟག་མོ་ལུས་སྦྱིན་མ་ཐེ་བའི་དགེ་འདུན་པས་སྐུ་སྲོག་གཞན་དོན་དུ་ཕུལ་བའི་དོན་རྐྱེན་ཐོག་མ་ཕྱི་ལོ་ ༡༩༦༣ ལོའི་ཟླ་ ༦ཚེས་ ༡༡ ཉིན་བེ་ཐུ་ནམ་ནས་བྱུང་ཡོད་ཅིང་།  ཐེག་ཆེན་སློབ་དཔོན་ཆེན་མོ(Thích Quảng Đức)མཆོག་གིས་སྐབས་དེའི་བེ་ཐུ་ནམ་ལྷོ་མའི་སྲིད་གཞུང་གིས་ནང་བར་མནར་གཅོད་གཏོང་བའི་སྲིད་ཇུས་ལ་ངོ་རྒོལ་གནང་བ་ཞིག་རེད་ལ། དེར་བརྟེན་ནས་བེ་ཐུ་ནམ་ལྷོ་མའི་སྲིད་གཞུང་ལ་མང་ཚོགས་ཀྱི་ཡིད་ཆེས་བརླག་ནས་མཐར་བེ་ཐུ་ནམ་བྱང་མའི་སྲིད་གཞུང་གིས་དབང་བསྒྱུར་བྱས་འདུག དོན་རྐྱེན་གཉིས་པ་དེ་བཞིན་ཕྱི་ལོ་ ༡༩༦༦ ལོར་རྒྱ་ནག་གི་ཞིས་ཨན(ཁྲང་ཨན)ཞིང་ཆེན་ནང་བྱུང་འདུག  རིག་གནས་གསར་བརྗེ་ཆེན་པོིས་གནམ་ས་གཡོ་བཞིན་པའི་སྐབས་ཏེ། སློབ་དཔོན་ཆེན་མོ་ལིང་ཆིན་མཆོག་གིས་ཞིས་ཨན་གྱི་ནང་བའི་དགོན་པ་ཞིག་ལ་སྲུང་སྐྱོབ་བྱེད་སླད་སྐུ་ལུས་མེར་མཆོད་བཏང་ནས་ངོ་རྒོལ་གནང་བ་ཞིག་རེད། སྐབས་དེར་ཉུང་མཐར་སློབ་དཔོན་མཆོག་ལ་གཅར་རྡུང་བྱེད་མཁན་གྱི་དམར་སྲུང་དམག་མི་དག་ལ་ཞེད་སྣང་བསླངས་ཡོད་པ་རེད།

            དེ་ནས་བོད་ནང་དེང་སྐབས་བྱུང་བཞིན་པའི་སྐུ་ལུས་མེར་མཆོད་ངོ་རྒོལ་གྱི་དོན་རྐྱེན་ཁག་རེད། ཡིན་ནའང་། བོད་ཀྱི་དོན་རྐྱེན་འདི་དག་གི་ངོ་བོ་རང་དབང་དང་ཆོས་དད་གཉིས་ཀྱིས་གྲུབ་པ་ཞིག་རེད་ལ། སྐུ་ལུས་མེར་མཆོད་ཀྱི་ངོ་རྒོལ་ཁག་ཆོས་དད་དམ་འཛིན་གྱི་བྱ་སྤྱོད་ཙམ་ལས་བརྒལ་ནས་རང་དབང་བརྩོན་ལེན་གྱི་མཐོ་སར་འགྲེངས་ཡོད་པས། བློ་ཡིད་ལ་ཤོང་དཀའ་བ་ཞིག་ཏུ་མཐོང་མོད། བོད་མི་ཚོས་ད་དུང་མུ་མཐུད་ཀྱིན་འདུག

            མདོར་བསྡུས་ནས་བཤད་ན། སྐུ་ལུས་མེར་བསྲེགས་ཀྱི་དོན་རྐྱེན་ནི་ཁོར་ཡུག་དམིགས་བསལ་བ་ནས་ལག་ལེན་ནང་བཏབ་པའི་བྱ་སྤྱོད་ཁྱད་པར་བ་ཞིག་རེད་ལ། དམིགས་ཡུལ་ངོ་མ་ནི་མིའི་རིགས་ཀྱི་ཆེས་མཐོང་དང་འདྲ་མཉམ་བརྩོན་ལེན་གནང་ཆེད་རང་ཉིད་མེར་མཆོད་ལ་བཏང་ནས་བདེན་པ་དང་སྙིང་རྗེ་སླར་གསོ་ཡོང་བའི་འབོད་བསྐུལ་རེད། གཏིང་ཟབ་ས་ནས་བཤད་ན། ཚོང་བས་འཇིག་རྟེན་ལ་ཁ་ལོ་བསྒྱུར་བཞིན་པའི་དེ་རིང་། འདི་ནི་འགྲོ་བ་མིའི་ཐོབ་ཐང་དང་ཁེ་བཟང་བར་གྱི་འཐབ་རྩོད་ཅིག་ཀྱང་ཡིན་པས། མི་ནི་དཔྱོད་ཤེས་ལྡན་པ་ཞིག་ཡིན་མིན་གྱི་འགྲན་སློང་གསར་བ་ཞིག་ཀྱང་རེད།

            རང་སྲོག་གཅོད་པར་མཚོན་ན། ལྟོས་ས་ལྟོས་འཇོག་གིས་རང་སྲོག་གཅོད་པ་ལ་དམིགས་བསལ་བ་དང་སྤྱིར་བཏང་བའི་དབྱེ་བ་ཡོད་པར་སྣང་ཞིང་། དེའང་དམིགས་ཡུལ་གྱིས་ཐག་གཅོད་བྱེད་ཀྱིན་པ་ཞིག་རེད། དེ་རིང་གི་བར་དུ་གཞན་དོན་ཆེད་རང་སྲོག་འདོར་མཁན་ཚང་མར་མིའི་རིགས་ཀྱི་བརྩི་བཀུར་ཐོབ་ཡོད་ལ། དུས་རབས་བཅུ་དགུ་བ་ནས་ནུབ་ཕྱོགས་སུ་ཕོ་མོའི་བར་གྱི་བརྩེ་དུང་ལའང་གོང་བཀུར་ཐོབ་ཡོད་པས། བརྩེ་དུང་གི་ཆེད་དུ་སྲོག་འདོར་མཁན་ལའང་བརྩི་བཀུར་ཐོབ་ཡོད། དེ་བས། ཚང་མས་ནམ་རྒྱུན་རང་སྲོག་གཅོད་དོན་ལ་བརྩད་གཅོད་བྱེད་ཀྱིན་ཡོད་ལ།  འཚོལ་སྒྲུབ་ལས་རྙེད་པའི་དྲིས་ལན་གྱིས་རང་སྲོག་བཅད་པའི་མ་འདྲ་བ་དབྱེ་བཞིན་ཡོད།

            གལ་ཏེ་རང་སྲོག་གཅོད་དོན་སྒེར་དོན་ཏེ། ལས་ཀ་ཤོར་བ། སྐྱ་ཡར་གཅར་རྡུང་། ནག་ཉེས་ཕོག་པར་ཞེད་པ། སྡུག་བསྔལ་ལས་གྲོལ་འདུན་སོགས་སྤྱིར་བཏང་གི་རང་སྲོག་བཅད་པའི་ཁོངས་སུ་འདུ། ཡིན་ནའང་། རང་སྲོག་གཅོད་མཁན་གྱི་གྲངས་འབོར་མང་དུ་ཕྱིན་ན། དེ་ནི་སྤྱི་ཚོགས་ཀྱི་རྒྱུ་རྐྱེན་ལས་བསྐྱེད་པ་ཞིག་ཏུ་ངོས་འཛིན་དགོས་ཀྱི་ཡོད།

            གསར་འགོད་པ། ཨ་རིའི་རླུང་འཕྲིན་ཁང་གིས་བཏང་གནས་ལྟར་ན། རྒྱ་དམར་ཕྱི་འབྲེལ་ཁང་གི་མགྲིན་ཚབ་པ་ལའེ་ཝེ་མེན་གྱིས་བཤད་དོན། ཉེ་ཆར་བྱུང་བའི་བོད་པའི་དགེ་འདུན་པ་མེར་བསྲེགས་ཀྱི་དོན་རྐྱེན་ནི་ཕྱི་རྒྱལ་དུ་ཡོད་པའི་ཏཱ་ལའི་བླ་མའི་རྒྱབ་བསྐྱོར་བ་ཚོས་གུང་ཁྲན་ཏང་གིས་བོད་ལ་དབང་བསྒྱུར་བྱེད་ཀྱིན་པ་མགོ་རྟིང་སློག་སླད་དཀྲོགས་གཏམ་བཟོས་པ་ལས་བྱུང་བའི་བྱ་སྤྱོད་ཅིག་རེད།  ཁྱོད་ཀྱིས་བལྟས་ན་རྒྱ་དམར་གཞུང་གིས་འདི་ལྟར་བཤད་དོན་ཅི།

            གནམ་ལོ་ཡག  རྒྱ་དམར་གཞུང་གི་བཤད་སྟངས་འདིར་ཕལ་ཆེར་དོན་དག་གཉིས་འདུག དང་པོ། ཚོད་དཔག་འདི་ཧ་ལམ་རྒྱ་དམར་གཞུང་རང་སྟེང་གི་ཉམས་མྱོང་ལས་བྱུང་བ་ཞིག་རེད། ཚང་མས་ཤེས་གསལ་ལྟར།  “ སེམས་ཐག་གཙང་བཅད། ཤི་རྒྱུར་མི་སྐྲག ”ཞེས་པའི་ཚིག་འབྲུ་བརྒྱད་ཅན་གྱི་འབོད་ཚིག་འདི་བཞིན་རྒྱ་དམར་གཞུང་གིས་སྔར་མི་རྣམས་ལ་རང་སྲོག་གཅོད་པར་བསྐུལ་སློང་བྱས་པའི་ལོ་རྒྱུས་ཀྱི་ཟིན་བྲིས་སུ་གྱུར་ཡོད། དེ་བས། རྒྱ་དམར་གཞུང་གི་མདུན་དུ་བོད་མིས་རང་ལུས་མེར་མཆོད་གཏོང་བའི་ངོ་རྒོལ་མཐུད་ནས་སླེབས་འཕྲལ་འཛམ་གླིང་མི་དམངས་ཀྱི་བློ་ཁ་གཞན་ལ་བསྒྱུར་བསམ་གྱི་བྱ་སྤྱོད་ཅིག་རེད། དོན་ལ་འདི་ནས་རྒྱ་དམར་གཞུང་གིས་འཐབ་རྩལ་རང་བཞིན་གྱི་ནོར་འཁྲུལ་ཞིག་ཤོར་ཡོད་པར་འདོད། ནང་ཆོས་ཀྱིས་སྲོག་གཅོད་སྡིག་པར་ལྟ་བཞིན་པའི་ཁར། མི་གསོད་པ་ནི་དགེ་འདུན་པས་སྲུང་བྱའི་ཁྲིམས་གཙོ་བོ་གཅིག་ཡིན་ལ། དེ་ལ་འགལ་ན་སྡོམ་པ་ཤོར་ཚར་བ་རེད། འདིའི་ངོས་ནས་བལྟས་ན། ཆོས་ལུགས་མི་སྣས་ཧ་ལམ་བསྐུལ་སློང་བྱེད་མི་སྲིད་པ་ཞིག་རེད། གོང་དུ་བཤད་པ་ལྟར། རང་སྲོག་གཞན་དོན་དུ་འབུལ་བ་ནི་རང་མོས་དང་གཞན་ཕན་གྱི་བྱ་སྤྱོད་ཅིག་ཡིན་པས། སྟོན་པ་ཤཀྱཱ་ཐུབ་པའང་བྱ་སྤྱོད་དེ་ལས་འདའ་ཆོག་གི་ཡོད་པ་མ་རེད།

གཉིས་པ། རྒྱ་དམར་གཞུང་གིས་ཕལ་ཆེར་རྒྱལ་སྤྱིའི་གླེང་ཕྱོགས་བེད་སྤྱོད་ཀྱིས་བཙན་ཚུགས་ངང་རྒྱལ་བ་རིན་པོ་ཆེ་མདུན་དུ་བསྐུལ་ནས་བོད་ནང་གི་ངོ་རྒོལ་མཚམས་འཇོག་བྱེད་པར་རེ་བ་རྒྱག་གི་ཡོད་པ་རེད། གལ་སྲིད་དེ་ལྟར་ལེགས་འགྲུབ་བྱུང་བ་ཡིན་ན། མདེའུ་གཅིག་གིས་ཤ་ཕོ་གཉིས་གསོད་པའི་དཔེ་ལྟར། ཕྱོགས་གཅིག་ནས་བོད་ནང་གི་ངོ་རྒོལ་མཚམས་འཇོག་ཡོང་བ་དང་། ཕྱོགས་གཞན་ཞིག་ནས་ཏཱ་ལའི་བླ་མའི་རྗེས་འཇུག་པས་བསྐུལ་སློང་ཟེར་བ་དེ་བརྒྱུད་ནས་བདེན་པ་ཡིན་པར་སྒྲུབ་ཟིན་པ་ཞིག་རེད།

            གསར་འགོད་པ།  ཁྱོད་ཀྱིས་བལྟས་ན་རྒྱ་དམར་གཞུང་གིས་འདི་ལྟར་བཤད་པའི་རྩ་བ་གང་ལ་ཐུག་ཡོད་དམ།

            གནམ་ལོ་ཡག  འདིར་རྗེས་ཤུལ་གསལ་བོ་ཞིག་སྔོན་མ་བཞག་ཡོད་པ་རེད། དཔེར་ན། ཕྱི་ལོ་ ༢༠༠༨ ལོར་རྒྱ་དམར་གཞུང་གིས་ཨོ་ལིམ་ལུས་རྩལ་འགྲན་ཚོགས་བདེ་བླག་གིས་འཚོགས་སླད་རྒྱལ་བ་རིན་པོ་ཆེའི་སྐུ་ཚབ་གདན་འདྲེན་ལ་ཁ་གཡར་ནས་སྐུ་ཚབ་ཚོ“བྱ་ཚང”ཞེས་པའི་ལུས་རྩལ་ར་བར་ལྟ་བསྐོར་ལ་ཁྲིད་ཡོད་ཅིང་། དེ་ལྟར་རྒྱལ་ཁབ་ཁག་གི་དབུ་ཁྲིད་ཚོས་བོད་ཀྱི་གནད་དོན་སླད་མཛད་སྒོར་མི་ཞུགས་པའི་དམ་བཅའ་ཕྱིར་བསྡུ་མི་བྱེད་རང་བྱེད་དུ་གྱུར་ཡོད། ཡིད་ཕངས་པ་ཞིག་ལ་རྒྱལ་བ་རིན་པོ་ཆེ་ཡིས་ཨོ་ལིམ་ལུས་རྩལ་འགྲན་འཚོགས་ལ་ངོ་རྒོལ་གནང་གི་མེད་པའི་དོན་དངོས་ངོས་ལེན་བྱས་མེད་པའི་ཁར། ལོ་དེར་རྒྱ་དམར་གཞུང་གིས་བོད་ནང་གདུག་རྩུབ་ཀྱིས་དྲག་གནོན་བྱས་པའི་མཇུག་འབྲས་ཀྱང་ངང་གིས་ཡལ་ཡོད།

            སྐབས་དེ་ནས་བཟུང་། བོད་ཕྱི་ནང་གཉིས་སུ་ངྷ་རམ་སཱ་ལས་དོན་དངོས་སུ་བོད་ཀྱི་གནད་དོན་སེལ་ཐབས་གནང་བཞིན་ཡོད་དམ། རྒྱ་དམར་གཞུང་ལ་དཔུང་རོགས་བྱེད་ཀྱིན་ཡོད་ཅེས་པའི་དྲི་བ་འདི་ལྷགས་ཡོད་པ་རེད། ངས་བསམ་བློ་བཏང་ན་ཁོ་ཚོས་གཞི་འཛིན་ས་འདི་རེད།

            གསར་འགོད་པ།  ད་ལྟ་མཇུག་བསྡུས་པའི་རྒྱ་དམར་ཚོགས་ཆེན་བཅུ་བདུན་པའི་ཚོགས་ཐེངས་དྲུག་པའི་སྟེང་། རྒྱ་དམར་གཞུང་གིས་ཤེས་རིག་མ་ལག་བཅོས་བསྒྱུར་ཐད་གཅིག་བསྡུས་ཀྱིས་བགྲོ་གླེང་བྱས་ཡོད་པར་མ་ཟད། “མི་དམངས་ཀྱི་བསམ་བློའི་དགོས་འདུན་མགོ་འཛུགས་ས་དང་རྐང་བ་འབབ་ས་བྱས་ནས་མི་དམངས་ཀྱི་རྩ་བའི་ཤེས་རིག་ཁེ་དབང་ཐད་སྔར་ལས་ལྷག་པའི་ཁག་ཐེག་དང་། ཀྲུང་ཧྭ་མི་རིགས་ཐུན་མོང་གི་བསམ་བློའི་ཁྱིམ་གཞི་བསྐྲུན་དགོས། ” ཁྱོད་ཀྱིས་རྒྱ་དམར་གཞུང་གི་སྐད་མཐོ་བའི་བཤད་སྟངས་འདིར་ཇི་ལྟར་ལྟ་བཞིན་ཡོད་དམ།

            གནམ་ལོ་ཡག  ཁ་གཡང་ཧ་ཅང་གི་གསལ་བོ་དག་པོ་ཞིག་རེད། ཡིན་ནའང་། དོན་དངོས་སུ་ལག་ལེན་དུ་བསྟར་རྒྱུ་ཞིག་ལས་དགོས་དབང་དྲིལ་བསྒྲགས་ཀྱི་དོགས་པ་ཆེན་པོ་འདུག  ངས་ཤེས་ཚུལ་ལྟར་ན། ཚོགས་འདུ་འདི་མ་འཚོགས་པའི་ཡར་སྔོན་གྱི་ཟླ་ ༩ཚེས་ ༢༦ ཉིན། འདི་བཞིན“རྒྱ་དམར་དབུས་ཆབ་སྲིད་རྒྱུན་ལས་ལྷན་ཚོགས་ཀྱིས་ཐག་བཅད་ཡོད་པ་ཞིག་རེད། རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཤེས་རིག་གི་འཕེལ་རྒྱས་ལམ་ཆེན། ཤེས་རིག་མ་ལག་གཏིང་ཟབ་ཀྱིས་བཅོས་བསྒྱུར་གྱིས་སྤྱི་ཚོགས་རིང་ལུགས་ཤེས་རིག་གི་འཕེལ་རྒྱས་ཆེན་མོ་དང་གཡུར་དུ་ཟ་བ་ཆེན་མོར་བསྐུལ་འདེད་གཏོང་བ། ངེས་པར་དུ་སྤྱི་ཚོགས་རིང་ལུགས་ཀྱི་སྔོན་ཐོན་ཤེས་རིག་གི་འཕེལ་ཕྱོགས་རྒྱུན་འཁྱོངས་ཀྱིས་ཚན་རིག་གི་འཕེལ་རྒྱས་དཀྱིལ་སྙིང་དུ་བཟུང་སྟེ། སྤྱི་ཚོགས་རིང་ལུགས་ཀྱི་རྩ་བའི་རིན་ཐང་མ་ལག་འགན་བབ་ཏུ་ཁུར་བའི་ཤེས་རིག་བཅོས་བསྒྱུར”གྱི་བརྗོད་གཞི་ཞིག་ཏུ་གྱུར་ཡོད་པས། ལྟ་བ་གཅིག་གི་སྲ་བརྟན་ལས་ལྟ་བ་སྣ་མང་འཛོམས་པའི་བཅོས་བསྒྱུར་གྱི་མདུན་ལྗོངས་ཤིག་མཐོང་གི་མི་འདུག

             དོན་ལ་འདི་ནི་རྒྱ་ནག་སྲོལ་རྒྱུན་གྱི་ཤེས་རིག་སྙིང་སྟོབས་དང་རྒྱབ་ཀྱིས་ཕྱོགས་པ་ཞིག་རེད་ལ། རྒྱ་དམར་གཞུང་གིས་ད་དུང་ཡང་མར་ཁེ་སི་རིང་ལུགས་ལྟོས་མེད་ཀྱི་བདེན་པར་བཀུར་འདུག “མེ་ཏོག་མཉམ་བཞད”དཀྱིལ་སྙིང་དུ་བཟུང་བའི་སྣ་མང་བསམ་བློའང་རྒྱ་ནག་གི་གནའ་བོའི་སྟོན་དཔྱིད་དམག་འཐབ་དུས་རབས་ཀྱི་ཟིན་བྲིས་ལས་ལྷག་རྒྱུ་རང་རེད། གལ་སྲིད་མི་རྣམས་ཀྱིས་རང་འགུལ་གྱིས་བརྩོན་ལེན་མ་གནང་བ་ཡིན་ན། བསམ་བློའི་རང་དབང་དང་སྣ་མང་འདོད་ཚུལ་ཤོང་བའི་སྤྱི་ཚོགས་ཤིག་ལ་ད་དུང་རྒྱང་ཐག་འདུག

            གསར་འགོད་པ། ཕྱི་རྒྱལ་གྱི་གསར་ལམ་ཁག་ཏུ་ཐོན་པ་ལྟར་ན། རྒྱ་དམར་གཞུང་གིས་དྲག་པོས་ག་དུས་ཀྱང་བོད་ནང་གི་གནད་དོན་ཐག་གཅོད་བྱེད་ཐུབ་རྒྱུ་མ་རེད་ཟེར། ཁྱོད་ཀྱིས་དེའི་ཐད་བསམ་བློ་གང་འདྲ་ཞིག་གཏོང་གི་ཡོད་དམ།

            གནམ་ལོ་ཡག “གྲོས་མཐུན་དོན་ཚན་བཅུ་བདུན” གྱི་ནུས་པ་ཉམས་པ་མཚོན་བྱེད་དུ་གྱུར་བའི་བོད་ཀྱི་གནད་དོན་ཐད་ནས་བལྟས་ན། གོང་འོག་ལོ་ངོ་ ༦༢ རིང་དྲག་པོས་བཙན་གནོན་དང་དྲག་པོའི་བཙན་གནོན་ལ་ངོ་རྒོལ་གྱིས་དེ་རིང་བར་རྒྱུན་བསྐྱངས་ཡོད་པའི་ཁར། ད་དུང་གནོན་ཐབས་མེད་པའི་རྣམ་པ་ཞིག་ཕྱི་ལ་མངོན་ཡོད། རྣམ་པ་འདིའི་ཆ་ནས་སླེབས་པའི་མཇུག་བསྡོམས་ནི“རྒྱ་དམར་གཞུང་གིས་དྲག་པོས་ག་དུས་ཀྱང་བོད་ནང་གི་གནད་དོན་ཐག་གཅོད་བྱེད་ཐུབ་རྒྱུ་མ་རེད” ལ་ལྟ་ཆོག་པ་ཞིག་རེད།

            ངས་ཐེངས་སྔ་མའི་བཅར་འདྲིའི་སྐབས་ཀྱང་བཤད་མྱོང་། བོད་མི་ནི་སྡར་མར་མཐོང་ཆུང་བྱེད་མཁན་གྱི་མི་རིགས་ཤིག་རེད། ཧ་ལམ་འདི་ནི་གདོད་མར་དཔའ་བོར་དད་པའི་སྲོལ་རྒྱུན་ལ་འབྲེལ་བ་ཡོད་པར་འདོད། གང་ལྟར་ལོ་ངོ་སྟོང་ཕྲག་རིང་ལ་ནང་ཆོས་བརྒྱུད་འཛིན་གནང་བ་བརྒྱུད་ནས་དཔའ་བོར་དད་པའི་ཚབ་ཏུ་བླ་མར་དད་པ་གྱུར་ཡོད། ཡིན་ནའང་། ལོ་ངོ་དྲུག་ཅུ་ལྷག་གི་རིང་དུ་རྒྱ་དམར་གཞུང་གིས་བོད་ལ་དབང་བསྒྱུར་བྱས་པ་བརྒྱུད་ནས་བླ་མར་དད་པའི་འདུ་ཤེས་ཇེ་གཉོམ་ལ་བཏང་ཡོད་པར་མ་ཟད། ནང་སྒོས་སུ“པཎ་ཆེན་རིན་པོ་ཆེའི་ཡང་སྲིད་འཕྲོག་རྩོད”ནས་མགོ་བརྩམས་ཏེ། བོད་མི་རྣམས་ཀྱི་འདུ་ཤེས་འཛིན་སྟངས་ཐད་གཡོ་ཁྱོམ་དྲག་པོ་ཞིག་བྱུང་ཡོད། ད་དུང་ཡ་ང་བའི་དྲག་གནོན་དང་དྲག་གནོན་ལ་ངོ་རྒོལ་བརྒྱུད་ནས་རང་བཞིན་གྱིས་བོད་མིའི་སེམས་ཁུང་དུ་གཉིད་ལ་ཤོར་བའི་དཔའ་བོར་དད་པའི་འདུ་ཤེས་དེ་སད་དུ་བཅུག་པ་རེད། མདོར་བསྡུས་ནས་བཤད་ན། དེང་སྐབས་སྣང་ཚུལ་འདིར“བཙན་པོའི་སྙིང་སྟོབས”ཞེས་བརྗོད་ཀྱིན་ཡོད་ལ། ཚུར་མངོན་གྱི་ཐབས་ལམ་ནི“འཚེ་བ་མེད་པ”དང“མི་རྟོན་པ”གཞི་གཅིག་ཏུ་བསྡུས་པའི་བྱ་སྤྱོད་ཀྱི་ཚད་གཞི་ཞིག་དང་ངོ་རྒོལ་གྱི་རྣམ་པ་ཞིག་རེད།

གསར་འགོད་པ། ཁྱོད་ཀྱིས་བལྟས་ན་བོད་ནང་གི་རྩ་བའི་གནད་དོན་ཅི་ཞིག་རེད་དམ།

གནམ་ལོ་ཡག  ངས་བལྟས་ན་དངོས་ཡོད་རྒྱུ་རྐྱེན་གྱིས་བོད་མི་རྣམས་ཡར་ལངས་ལ་བསྐུལ་མ་བྱེད་ཀྱིན་འདུག རྒྱུ་མཚན་ནི་ཉེ་བའི་ལོ་ངོ་ ༦༠ རིང་དུ་རྒྱ་དམར་གཞུང་གིས་སྔར་ཡོད་ཀྱི་བོད་རྒྱའི་དོ་མཉམ་ལ་གཏོར་སྐྱོན་བཏང་ཡོད་པར་མ་ཟད། བོད་མི་རྣམས་ཆབ་སྲིད་ཀྱི་ཐད་ནས་བས་མཐར་དེད་ཡོད་པ་དང་རང་དབང་ལ་རྡོག་རོལ་གཏོང་བཞིན་པ་དང་།  དེའི་ཁར“ནུབ་རྒྱུད་ཐོན་འབྱེད་ཆེན་མོ”དང“མདོ་དབུས་ལྕགས་ལམ”སོགས་ཀྱི་འཛུགས་བསྐྲུན་བརྒྱུད་ནས་ས་གནས་བོད་མི་དང་གནས་སྤོར་བའི་བར་དུ་འཚོ་སྡོད་ཀྱི་འགྲན་རྩོད་མགོ་ཚུགས་ཡོད་ཅིང་། རང་བྱུང་ཁོར་ཡུག་དང་དངོས་ཡོད་གནས་སྟངས་སོགས་རྒྱུ་རྐྱེན་མང་བོ་ཞིག་གིས་བོད་མི་ཆ་སྙོམས་ལ་སློབ་གསོ་རེག་པའི་སྣ་མང་ནུས་པའི་སྤུས་ཀ་རྒྱ་ནག་གི་ནང་ལོགས་ཀྱི་ཞིང་ཆེན་ཁག་ལས་སྐྱོ་ཞིང་། མི་སྒེར་དང་ཚོགས་པ་གང་རུང་གི་འགྲན་རྩོད་ནུས་པ་ཅུང་ཞན་པས། ལྕགས་ལམ་བརྒྱུད་ནས་སླེབས་པའི་ཕྱི་ཡོང་མི་ཚོགས་ས་གནས་བོད་མི་ལས་བརྒལ་གྱི་ཡོད་ལ། ས་གནས་མང་ཚོགས་ཀྱི་འཚོ་སྡོད་ཁོར་ཡུག་ཡ་ང་བའི་གནས་སུ་སྐྱེལ་དང་བསྐྱལ་བཞིན་ཡོད། དབུལ་ཕྱུག་གི་ཧེ་བག་ཤིན་ཏུ་ཛ་དྲག་གི་ཕྱོགས་སུ་འཕེལ་བཞིན་པ་དང་། དབུལ་བོ་མང་ཆེ་བ་བོད་མི་ཆགས་ཡོད།

དེ་མཚུངས་སུ་དཔལ་འབྱོར་འཛུགས་བསྐྲུན་ལ་ཁ་གཡར་ནས་བོད་ནང་གི་ཕུན་སུམ་ཚོགས་པའི་ཐོན་ཁུངས་སྔོག་འདོན་བྱེད་ཀྱི་ཡོད་ནའང་།  མཐའ་མཇུག་ཁེ་བཟང་རེག་མཁན་བོད་མི་མ་ཡིན་པའི་ཁར། ཐོན་ཁུངས་སྔོག་འདོན་གྱི་གོ་རིམ་ཁྲོད་ནས་མང་ན་ངལ་རྩོལ་ལ་དཔག་པའི་གླ་ཆ་ཕྲན་བུ་ལས་རེག་གི་མེད་ཅིང་། ཐོན་ཁུངས་ལས་བསྣོན་བརྒྱུད་རྗེས་ཀྱི་ཁེ་བཟང་ཚང་མ་རྒྱ་དམར་གཞུང་ལ་རེག་ཡོད།

ལྷག་པར་དུ་ཕྱི་ལོ་ ༢༠༠༨ ལོ་ནས་བཟུང་། བོད་མི་ཚང་མའི་སེམས་ཁུང་དུ་དམའ་འབེབས་བྱེད་དྲགས་ཐལ་ཞེས་པ་འདི་ཡང་འཁོར་བསྐྱར་འཁོར་བྱེད་ཀྱིན་ཡོད་ལ། ཐ་ན་ཕྱུགས་རྫི་དང་ཞིང་བ་ལའང་བསམ་ཚུལ་འདི་དེ་ག་རང་ཡོང་བཞིན་འདུག དེ་དང་མཉམ་དུ་ཁེ་དབང་དང་ཆོས་དད། མ་མཐའ་བོད་ཡིག་གི་བཀོལ་སྤྱོད་ཡན་ལ་ཚད་འཛིན་ཐེབས་ཡོད་པས། ཕལ་ཆེར་བོད་མི་རྣམས་སྡུག་བསྔལ་གྱིས་སད་དུ་བཅུག་པ་ཞིག་རེད་ཅེས་བཤད་ཆོིག

བོད་མི་རྣམས་སྡུག་བསྔལ་གྱིས་སད་པའི་མཇུག་འབྲས་དེང་སྐབས་རྒྱ་དམར་གཞུང་ལ་སྤེལ་བཞིན་པའི་ངོ་རྒོལ་གྱི་འབོད་ཚིག་ནང་ཐོན་ཡོད། ཧ་ལམ་ཚིག་གསུམ་གྱི་ནང་དུ་བསྡུས་ཆོག་པ་ཞིག་སྟེ། “བོད་ལ་རང་དབང་དགོས།”“རྒྱལ་བ་རིན་པོ་ཆེ་བོད་ལ་ཕེབས་འཇུག་རོགས།”“བོད་ཀྱི་རྒྱལ་ཁབ་སླར་གསོ”རེད་ལ། འབོད་ཚིག་སྔ་མ་གཉིས་ཅུང་མང་ནའང་། བོད་མི་ཕལ་ཆེ་བ་ཞིག་གིས“བོད་ལ་རང་དབང་དགོས”དང“བོད་ཀྱི་རྒྱལ་ཁབ་སླར་གསོ” གཉིས་ཀྱི་དབྱེ་བ་ཆེར་འབྱེད་ཐུབ་ཀྱི་ཡོད་པ་མ་རེད། དེ་ལྟ་ནའང་། ངོ་རྒོལ་དང་འབོད་ཚིག་གི་བྱུང་བའི་ཁྲོད་དུ་འདས་པའི་ལོ་རྒྱུས་ལས་དངོས་ཡོད་ཀྱི་རྒྱུ་རྐྱེན་ཆེ་བའང་གསལ་བོ་རེད།  མའོ་ཙེ་ཏུང་གིས་ཀྱང“གང་དུ་དྲག་གནོན་ཡོད་ན། དེ་རུ་ངོ་རྒོལ་ཡོད”ཅེས་བཤད་ཡོད་པ་ལྟར་རེད།

མཆན། བཅར་འདྲི་དངོས་རྒྱ་ཡིག་ཡིན་པ་དང་དྲ་ཐག་གཤམ་གསལ་ལྟར་ཡིན།

http://big5.soundofhope.org/programs/1008/201797-1.asp