ཆེ་བཞག་ཆུང་འདྲོགས་ཀྱི་རྣམ་འགྱུར་ཐབས་རྡུཊ་ཤིག

རང་དབང་རྒྱལ།

༢༠༡༡ ལོ་སྟེ། བོད་མི་རིགས་ལ་མཚོན་ན། ཆབ་སྲིད་ཀྱི་ངོས་དང་རིགས་ཞེན་གང་གི་ངོས་ནས་བསམས་རུང་། ཆེས་གཏིང་ཟབ་པའི་ངོས་འཛིན་ཞིག་དང་ཆེས་བློས་བཏང་ཆེ་བའི་དམིགས་བསལ་གྱི་ལོ་ཟླ་ཞིག་རེད། དེ་ཡང་། བོད་ཀྱི་ལོ་རྒྱུས་ཁྲོད་བྱུང་མ་མྱོང་བའི་ཆབ་སྲིད་ཀྱི་དབུ་ཁྲིད་དེ། མང་གཙོའི་ལམ་སྲོལ་གྱི་ཐོག་ནས་སྐྱབས་བཅོལ་བོད་མི་རྣམས་ཀྱིས་འོས་འདེམས་བྱས་པའི་གྲུབ་འབྲས་ནི། རྒྱལ་སྤྱིའི་སྡིངས་ཆ་དང་རྒྱ་གཞུང་གི་མིག་སྔར་སོགས་ལ། སྔ་ན་མེད་པའི་བོད་ཀྱི་མི་རབས་གསར་བའི་འགན་འཁུར་གྱི་རྣམ་འགྱུར་དེ། ཆེས་གཟི་བརྗིད་དང་ལྡན་པའི་ངང་ནས་འབུར་དུ་ཐོན་དང་འཐོན་བཞིན་པ་མ་ཟད། ཕྱོགས་དང་ཟུར་ངོས་མི་འདྲ་བ་གང་མང་ཞིག་ནས། དེ་འདྲའི་ངོས་འཛིན་དང་གདེང་འཇོག་བྱས་དང་བྱེད་ཀྱིན་པ་ནི་དོན་དངོས་དང་མཐུན་པ་ཞིག་མ་ཡིན་ནམ། འདིས་བོད་མི་རིགས་ལ་མདུན་ལྗོངས་གསར་བ་ཞིག་གི་དབུ་ཁྱུད་བསྐྲུན་སོང་།

གཞན་ཡང་། འདི་ལོར། གཞིས་བཞུགས་སྤུན་ཟླ་གང་མང་ཞིག་གིས་བློས་བཏང་དང་ཆོད་སེམས་བརྟན་པོའི་སྒོ་ནས། ཆོས་སྲིད་གང་གི་ངོས་ནས་གཞིགས་རུང་། ཆེས་རིན་ཐང་ལྡན་ཞིང་རྩ་ཆེ་བའི་རང་སྲོག་རང་ལུས་དྲོད་མོ་དེ། བཟོད་གླགས་བྲལ་བའི་དམར་བོ་མེ་ལ་བསྒྲོན་ནས། རྒྱལ་སྤྱི་དང་དྲང་བདེན་སྐྱོང་བའི་གཞུང་སྒེར་ཚོགས་སྡེ་སོགས་ཀྱི་སྤྱན་ལམ་དུ། བོད་མི་རིགས་དང་བོད་ཀྱི་རིག་གཞུང་གི་རང་དབང་དང་ཐོབ་ཐང་། འདྲ་མཉམ་སོགས་རྦད་དེ་རྒྱ་གཞུང་གིས་བཙན་འཕྲོགས་བྱས་ཡོད་པ་སྟེ། ཨུ་ཐུག་ཐབས་ཟད་ཀྱིས་སྒོ་ནས་གསལ་སྟོན་དང་བདེན་དཔང་བྱེད་ཀྱིན་པ་མ་ཡིན་ནམ། འདིས་བོད་མི་རིགས་ལ་ཁ་ཕྱོགས་ཡོད་པའི་འཐབ་རྩོད་བྱེད་སྟངས་ཤིག་དང་གདེང་སྤོབས་བརྟན་པོ་ཞིག་གི་རྩ་བ་བཙུགས་སོང་།

འོན་ཀྱང་། བར་གླགས་འདི་ནས། བཙན་བྱོལ་བའི་གནས་ཚུལ་སྤྱི་དང་བྱེ་བྲག་ལ་ཕྱིར་རྟོག་ཅིག་བྱས་ན། ཡ་ང་ཞིང་ཐང་ཆད་པའི་གནས་ཚུལ་ཆེས་ཐབས་རྡུགས་མང་པོ་ཞིག་འཕྱུར་གྱིན་པ་འདི་ལ་ཕྱི་ནང་སུ་ཞིག་གིས་བལྟས་རུང་། དེ་ནི། གལ་གནད་ལ་ཐུག་དུས། མཐུན་སྒྲིལ་གྱི་ངར་ཤུགས་ཞན་ཞིང་མཉམ་འབྲེལ་གྱི་འགན་འཁུར་མེད་པའི་སྐྱབས་བཅོལ་བའི་ནང་ཉམས་གུ་དོག་པོ་དེ། སྤྱི་འགྲེམས་བྱས་པ་དང་གཅིག་མཚུངས་མ་རེད་དམ། ལྷག་པར་དུ། སྐབས་འདི་འདྲ་ཞིག་ལ་ཁ་ཤེད་ཆེ་བའི་སྐྱབས་བཅོལ་བའི་ཡིག་འབྲི་བ་ཁག་ཅིག་གིས། བོད་མི་རིགས་དང་དེའི་རིག་གཞུང་གི་སྲོག་དབུགས་རྟ་རྔ་འདྲ་བོ་ལ་གསོན་ཤུགས་རྒྱས་པའི་ཆེད་དུ། ཐབས་ཟད་ཨུ་ཐུག་གིས་སྒོ་ནས་རང་ལུས་མེ་རུ་བསྒྲོན་པ་དེ། སྟོན་པ་དང་བསྟན་པའི་དགོངས་དོན་ལ་མཐུན་མིན་གྱི་དགོས་མེད་གླེང་གཞི་ཆེན་པོ་ཞིག་བཟོས་སོང་། རྣམ་འགྱུར་སྟོན་སྟངས་འདི་ནི། བཙན་བྱོལ་བའི་རྩོམ་པ་པོར་ཁས་འཆེ་བ་རྣམས་ཀྱིས་གལ་གནད་ཀྱི་ཕྱོགས་སུ་དབྱེ་ཞིབ་དང་འགན་ལེན་བྱེད་ཀྱིན་མེད་པ་དེ་རང་ཤུགས་ཀྱིས་གསལ་བཤད་བྱས་སོང་།

ད་རུང་། ཛ་དྲག་གི་དུས་སྐབས་འདི་ཞིག་ལ། རྒྱ་གཞུང་གིས་རང་རྐུབ་ཐེད་པོ་དེ་གསུབ་རྒྱུའི་ཆེད་དུ། ངན་ལངས་དུ་ཤོར་བའི་དྲིལ་བསྒྲགས་རྫུན་མ་སྔ་ཕྱིར་སྤེལ་དུས། སྐྱབས་བཅོལ་བའི་ཡིག་འབྲི་བ་དང་མཆན་འདེམས་པ་ཁག་ཅིག་ནི། དེའི་རྗེས་སུ་སྙེག་གིན་སྙེག་གིན་རྒྱ་གཞུང་གི་དགོས་མཁོ་ལྟར་སྒྲུབ་མཁན་གང་མང་བྱུང་སོང་ལ། ཞོར་དུ། ཆོས་བརྒྱུད་ནང་ཁུལ་ལ་དཀྲུགས་ཤིང་བྱེད་མཁན་ཆེས་མང་པོ་ཞིག་ཀྱང་བྱུང་ཡོད། འདི་ནི། བསྙོན་འཛུགས་བྱས་པ་ཡེ་ནས་མིན་ནོ།། དཔེར་ན། 《ཁ་བརྡ་》ཟེར་བའི་དྲ་ཚིགས་དང་དེའི་མཆན་བུ་རྣམས་ལ་ཞིབ་བཤེར་ཞིག་བྱོས་དང་། གསལ་བོ་དག་པོ་ཞིག་ཆགས་ངེས་ཡིན། མ་གཞི་ནས། དེའི་དྲ་བདག་དང་དྲ་འཇུག་རྣམ་པའི་ངོས་ནས་ཡིན་རུང་། འདི་ལྟར་ཅམ་འཇོག་དང་སྣང་མེད་དུ་གཏོང་དགོས་པའི་དམིགས་ཡུལ་གང་ཡིན་ནམ། རང་དབང་དང་མང་གཙོའི་ཁྱད་ཡོན་ལ་བསམས་ནས་གུ་ཡངས་བྱས་པ་ཞིག་ཡིན་རུང་། དེ་ཡང་ཁྲིམས་མཐུན་ལུགས་མཐུན་གྱི་ཚད་ཐིག་ཅིག་ཡོད་པ་ལས། མཐུན་སྒྲིལ་ལ་གནོད་ཅིང་ཆོས་བརྒྱུད་ཕན་ཚུན་དཀྲུགས་པ། གཞིས་བྱེས་གཉིས་ཀྱི་མཉམ་རུབ་གཏོར་བ་སོགས་གང་བསམ་ཅི་འདོད་ཀྱི་བསམ་སྤྱོར་ཤུགས་ཆེ་ན། རང་དབང་དང་མང་གཙོའི་ཕན་ཡོན་གྱི་ལྡོག་ཟླར་ཤོར་སོང་བ་མ་ཟད། བོད་ཀྱི་ད་ལྟ་དང་མ་འོངས་པའི་མདུན་ལྗོངས་སུ་གནོན་སྐྱོན་ཐེབས་ཀྱིན་པ་མ་ཡིན་ནམ། འདིས་སྐྱབས་བཅོལ་བོད་མི་རྣམས་ཀྱིས་རང་དབང་དང་མང་གཙོ་ལོངས་སུ་སྤྱོད་སྟངས་ཀྱི་ལག་ལེན་སྐྱོ་བོ་དེའི་ཟུར་ངོས་ཤིག་བསྟན་སོང་བ་མ་ཡིན་ནམ།

དེ་ལས་ཀྱང་ཡིད་སྐྱོ་བ་ཞིག་ལ། འདི་ལོའི་སུམ་བཅུའི་དུས་དྲན་ནས་བཟུང་ད་ལྟའི་བར་དུ། གཞིས་བཞུགས་སྤུན་ཟླ་གང་མང་ཞིག་གི་ངོས་ནས། མི་རིགས་དང་རིག་གཞུང་གི་ཚེ་སྲོག་སྐྱོབ་པའི་ཆེད་དུ་སེམས་ཐག་གཙང་བཅད་ཀྱིས། རང་ལུས་མེ་རུ་བསྒྲོན་མཁན་གཅིག་རྗེས་གཉིས་མཐུད་ཀྱི་ཛ་དྲག་གི་གནས་ཚུལ་མུ་མཐུད་ནས་ཇེ་མང་དུ་འགྲོ་བཞིན་པའི་སྐབས་འདིར། མི་སེམས་རུལ་བའི་ཤར་ཁུག་ཟེར་བ་འདིས། ཆེད་མངགས་ཀྱིས་དོན་ཆུང་དོན་ཆེན་ལ་བསྒྱུར་བའི་སྐབས་འཚོལ་བའི་བསམ་སྤྱོར་དེ་གང་སར་བཀྲམས་དུས། སྤྱི་ཟུར་མིང་འཁུར་ཆབ་བྲག་གིས་ཀྱང་། གཞིས་བཞུགས་བོད་མིའི་ཛ་དྲག་གི་གནས་བབ་ལ་གཞིགས་ནས། བཏོན་དང་འདོན་གྱིན་པའི་ལས་འགུལ་སྤེལ་ཕྱོགས་ཀྱི་རང་ཚུགས་གློ་བུར་དུ་འགྱུར་ནས། ཤར་ཁུག་ཟེར་བའི་མི་སྒེར་གཅིག་པོའི་ཕྱོགས་སུ་མཆེད་སོང་། ད་རུང་། བཙན་བྱོལ་བོད་མིའི་རྩོམ་པ་པོ་མཐུན་ཚོགས་ཀྱི་མིང་དེ་སྒེར་གཅོད་ཀྱིས། བསྒྲགས་གཏམ་གྱི་མདུང་རྩེ་རང་གཞུང་དང་ཆབ་སྲིད་ཀྱི་དབུ་ཁྲིད་ཕྱོགས་སུ་གཏད་སྟངས་ལ་བལྟས་ཡོང་ན། ད་ནི། ཁོང་ལ་སྤྱི་ཟུར་དང་རྩོམ་པ་པོའི་མིང་དོན་དང་མ་མཚུངས་པ་རང་གིས་བཤམས་སྟོན་བྱས་སོང་། འདི་ལ། རྒྱུ་མཚན་ཡོད་དེ། སྤྱི་ཟུར་ཞིག་ཡིན་དུས་སྤྱི་མི་ཆགས་ཡོད་པ་རེད། དེས་ན། སྤྱི་བའི་གནད་དོན་འདི་སྒེར་བ་ལས་གལ་ཆེན་མི་བརྩི་བའི་དགོས་དོན་གང་ཡིན་ནམ། ད་དུང་། རྩོམ་པ་པོ་ཞིག་ཡིན་ཕྱིན། གླེང་རིན་ཡོད་མེད་ལ་གཞིགས་ནས། དྲང་ཚུགས་དང་དབྱེ་ཞིབ་ཀྱི་སྒོ་ནས་ཆུང་བསྐྱུར་ཆེ་གླེང་བྱེད་དགོས་པ་མཁྱེན་རྟོགས་མ་ཡོད་པ་ཡིན་ནམ།

ཡང་། འདི་ལོར། སྙིང་སྟོབས་དང་ལར་ཞེན་ཟབ་པའི་གཞིས་བཞུགས་སྤུན་ཟླ་རྣམ་པའི་ངོས་ནས། རང་ལུས་སྒྲོན་མེ་ལ་བསྒྱུར་ནས་རྒྱ་གཞུང་དང་དེའི་གཏིང་ནག་གི་སྲིད་བྱུས་རྩུབ་པོ་ལ། མཐའ་གཅིག་ཏུ་ཞི་རྒོལ་གྱི་མེ་ལྕེ་འབར་གྱིན་པའི་ཛ་དྲག་གི་གནས་བབ་ལ་གདུང་སེམས་མཉམ་བསྐྱེད་བྱེད་རྒྱུའི་ཚབ་ཏུ། དགེ་འདུན་རབ་གསལ་སོགས་ཤར་ཁུག་གི་ཡུལ་ཕྱོགས་གཅིག་པ་འགའ་རེས། རིས་གཅོད་དཔུང་བསྒྲིལ་གྱི་བསམ་སྤྱོད་ལྷང་ལ་འབུད་ཀྱིན་པ་མ་རེད་དམ། གང་གིས་ཟེར་ན། དགེ་རབ་སོགས་ཀྱིས་ཡག་ཉེས་གང་ཞིག་ལ་འགྲེལ་ཡང་རུང་། གནད་འགག་ཐུག་ས་ནི། ཤར་ཁུག་གི་ཕྱོགས་སུ་ལྷུང་ནས་ཆབ་སྲིད་ཀྱི་སྣེ་ཁྲིད་རྣམ་པའི་གཤིས་སྤྱོད་འཚོལ་བ་ནི། ཞྭ་དཔེ་ལྷམ་འགེབས་རང་རེད། དེ་མིན། ཁྱོད་ཀྱིས། ད་ལོར་ཛ་དྲག་གི་གནས་ཚུལ་དང་འབྲེལ་བའི་རྩོམ་ཡིག་བྲིས་པ་དང་ལས་འགུལ་སྤེལ་ཕྱོགས་ལ་ཐབས་བྱུས་བཏོན་པ། གཞན་ཡང་། མཉམ་རུབ་དང་མཆན་བུ་འདེབས་པ་སོགས་བྱས་ཡོད་དམ། གང་ལྟར། ཁྱོད་ཀྱིས་མཚོན་པའི་ཁ་བརྡ་དང་དུས་བབ་མཆན་འདེབས་པ་རྣམས་ནི། རྐུན་རྒྱབ་ཇག་ལངས་ཀྱི་དཔེ་ལྟར་ལས་ཅི་ཡང་མི་འདུག་གོ །

མ་གཞི་ནས། ཤར་ཁུག་གི་སྒེར་དོན་ཆུང་ཆུང་འདི་མཐར་ཐུག་ན། ཀུན་སྤྱོད་ཡག་ཉེས་ཤིག་ལས་གནད་འགག་ཅི་ཡང་མི་འདུག གང་ཡིན་ཟེར་ན། རང་གཞུང་དང་དེའི་ཆེས་མཐོའི་ལས་ཀྱི་སྣེ་མོར་གཏོགས་པ་རྣམས་ལ་བསམ་ཤེས་དང་བརྩི་བཀུར་བྱེད་དགོས་པ་ནི། རང་དབང་དང་མང་གཙོའི་དཀྱིལ་འཁོར་ན་ཡོད་པའི་འབངས་མི་རེ་རེའི་རང་ཆས་སུ་ངེས་པར་དུ་ཡོད་དགོས་པའི་འོས་འགན་ཞིག་རེད་མོད། འོན་ཀྱང་ཤར་ཁུག་ཟེར་བ་འདིས། རང་ཆེ་རང་རློམ་གྱི་སྒོ་ནས་ཐལ་དྲག་པའི་སྐྱོན་བརྗོད་བྱེད་རྒྱུ་སྔ་ཕྱིར་མང་དྲགས་པས་ན། འཛིན་སྐྱོང་གི་དབང་ཚད་ཐོག་ནས། ཁོའི་ཉིན་གླའི་ལས་ཀ་དེ་ཕྱིར་བསྡུ་བྱས་པ་ཙམ་རེད་མ་གཏོགས་གནས་དབྱུང་གཏོང་བ་ལ་སོགས་ཅི་ཡང་བྱས་ཡོད་པ་མ་རེད་དེ། དགེ་རབ་ཀྱིས་མཚོན་པའི་ཁྱེད་རྣམ་པའི་མདུན་སར་འཛིན་སྐྱོང་བཀའ་ཤག་ལ་དེའི་དབང་ཚད་མ་ཡོད་པ་རེད་དམ། ད་རུང་། ཤར་ཁུག་ལ་ཆོ་འཕྲུལ་རྒོད་སྟབས། སྐྱབས་བཅོལ་བའི་མཆན་འདེབས་པ་ཆེས་མང་པོ་ཞིག་ཁོའི་གཡོ་སྒྱུའི་རྣམ་འགྱུར་གྱིས་བསླུ་བྲིད་བྱས་ཡོད་པ་འདྲ། གང་ཡིན་ཟེར་ན། བསམ་ཚུལ་དང་མཆན་བུ་སྤེལ་དུས། ཕྱོགས་གཉིས་ཀའི་དགེ་སྐྱོན་འཚོལ་རྒྱུ་མ་མཐའི་ཆ་རྐྱེན་ཞིག་ཡིན་རུང་། བསམ་ཚུལ་འདོན་མཁན་དང་མཆན་འདེབས་པ་མང་ཤོས་ནི། ཤར་ཁུག་གི་རྒྱབ་དཔུང་དུ་གཅིག་རྒྱབ་གཉིས་ལངས་བྱེད་ཀྱིན་པའི་རྣམ་འགྱུར་ནི། འུར་འདྲོགས་དང་ཧོར་རྒྱུགས་ལ་དགའ་ཤིང་ཞིབ་འཇུག་རྨེག་མེད་དུ་གཏོང་བའི་སྐྱབས་བཅོལ་བ་ཁ་ཡོད་ལག་མེད་ཁྱུ་ཚོགས་ཤིག་གི་རྣམ་འགྱུར་ལས་ཅི་ཡང་མཐོང་མ་སོང་།

མདོར་ན། གནས་ཚུལ་འདིས། གང་ཞིག་སྟོན་གྱིན་པ་རེད་ཟེར་ན། སྐྱབས་བཅོལ་བ་འདི། ཆེ་བསྐྱུར་ཆུང་འདྲོགས་ཀྱི་གོམས་གཤིས་ཤིག་གི་ནང་དུ་མགོ་འཁོར་ཡོད་པ་གསལ་བོ་མཚོན་འདུག་ལ། ད་རུང་། ཆེ་བསྐྱུར་ཆུང་བསྒྲུབས་ཀྱི་ཕྱོགས་སུ་ལྷུང་ནས་འཐེན་འཁྱེར་གྱི་རིག་རྩལ་བསྒྲིམ་བཞིན་པ་ལས། དགོས་མཁོ་ཡོད་པའི་འགན་འཁྲི་ཞིག་དང་ལེན་བྱེད་ཐུབ་ཀྱི་མེད་པ་གསལ་སྟོན་བྱས་མ་སོང་ངམ། ཐེངས་འདིའི་རྣམ་འགྱུར་འདིས། གལ་གནད་ལ་ཐུག་དུས། སྐྱབས་བཅོལ་བ་འདི་ལ་མཐུན་སྒྲིལ་ཏག་ཏག་ཅིག་མེད་པ་བཤམས་སོང་བ་མ་ཡིན་ནམ། དགོས་གལ་ཆེ་དུས། སྐྱབས་བཅོལ་བའི་རྩོམ་པ་པོ་དང་་ཤེས་ལྡན་པ་འགའ་ཤས་ཀྱི་གོ་རྟོགས་དང་ལག་ལེན་དེ་གཞི་རྒྱ་ཇེ་ཆུང་ལ་སོང་དང་འགྲོ་གིན་པའི་རྒྱུ་རྐྱེན་གང་ཡིན་ནམ། ལྷག་པར་དུ། ཆེ་བསྐྱུར་ཆུང་འདྲོགས་ཀྱི་རྣམ་འགྱུར་ཐབས་རྡུགས་འདི། ང་ཚོར་སེམས་རྩ་གཏད་པའི་གཞིས་བཞུགས་རྒྱ་ཆེའི་སྤུན་ཟླ་རྣམ་པའི་སེམས་ངོར་དང་། ང་ཚོ་སྐྱབས་བཅོལ་བའི་ཁ་སྟབས་ཞན་པོ་ལ་བསྐྲད་མཁན་རྒྱ་གཞུང་གི་མིག་སྔར་གང་འདྲ་ཞིག་ཆགས་ཡོད་དམ།