བོད་མི་ལྔ་ལ་ཁྲིམས་ཆད།

བཞུགས་སྒར་དབུས་སྣེ་ལེན་ཁང་དུ་ཡོད་པའི་གྲྭ་སྐལ་བཟང་ཆོས་གྲགས་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། རྒྱ་ནག་གཞུང་གིས། ༢༠༠༠༨ ལོར་མདོ་སྨད་ཅོ་ནེ་རྫོང་དུ་ཞི་བའི་སྐད་འབོད་སྐབས་ཀྱི་རྒྱ་དར་བསྒྲེངས་མཁན་ཡིན་པའི་ཉེས་མིང་འོག ཅོ་ནེ་རྫོང་མདོ་ཁོག་ཞང་དུ་ཡོད་པའི་ཆོས་དཔལ་ཞིང་བཀྲ་ཤིས་ཆོས་འཁོར་དགོན་པའི་མཚན་ཉིད་གྲྭ་ཚང་གི་རང་ལོ་ ༤༠ ཡིན་པའི་གྲྭ་བསྟན་འཛིན་རྒྱ་མཚོ་ལགས་སུ་ལོ་ ༡༥ ཡི་དུས་བཀག་བཙོན་འཇུག་གི་ཁྲིམས་ཐག་བཅད་དེ་ལན་གྲུའུ་གྲོང་ཁྱེར་གྱི་ཏ་ཧྲ་པེ་ཞེས་པའི་བཙོན་ཁང་དུ་བཙོན་འཇུག་དང་། རྒྱུད་པ་གྲྭ་ཚང་གི་རང་ལོ་ ༢༨ ཡིན་པའི་གྲྭ་བསྟན་འཛིན་རྒྱ་མཚོ་ལགས་སུ་ལོ་ ༡༣  གྱི་ཁྲིམས་ཐག་བཅད་དེ་ཀན་སུའུ་ཏེན་ཞི་གྲོང་ཁྱེར་གྱི་བཙོན་ཁང་ཞིག་ཏུ་བཙོན་འཇུག་བྱས་ཡོད་པ་མ་ཟད། སྐབས་དེའི་ངོ་རྒོལ་སྐབས་མི་མང་གི་སྣེ་འཁྲིད་མཁན་ཡིན་པའི་ཉེས་མིང་འོག མདོ་ཁོག་ཞང་མར་ཙ་སྡེ་བའི་རང་ལོ་ ༣༨ ཡིན་པའི་རིན་ཆེན་ཚེ་རིང་དང་རང་ལོ་ ༢༥ ཡིན་པའི་བསྟན་འཛིན་བཀྲ་ཤིས། ཉིན་པ་ཞང་ཉིན་པ་སྡེ་བའི་རང་ལོ་ ༣༠ ཡིན་པའི་བློ་བཟང་རྡོ་རྗེ་བཅས་གསུམ་ལ་ལོ་ ༨ རེ་ཁྲིམས་ཐག་བཅད་དེ། བློ་བཟང་རྡོ་རྗེ་ཀན་སུའུ་པེ་ཡི་གྲོང་ཁྱེར་གྱི་བཙོན་ཁང་ཞིག་ཏུ་བཙོན་འཇུག་བྱས་ཡོད་པ་དང་། གཞན་གཉིས་ཏ་ཧྲ་བཙོན་ཁང་དང་ཏེན་ཞི་གྲོང་ཁྱེར་གྱི་བཙོན་ཁང་བཅས་སུ་བཙོན་འཇུག་བྱས་ཏེ། ཁོང་ཚོའི་ནང་མི་གཉེན་འབྲེལ་ཚོར་ཟླ་རེར་ཐེངས་རེར་ཐུག་འཕྲད་དང་རྒྱ་སྒོར་ ༡༠༠ ཡན་སྤྲད་མི་ཆོག་པའི་སྒྲིག་གཞི་བཟོས་ཡོད་འདུག

གྲྭ་སྐལ་བཟང་ཆོས་གྲགས་ལགས་ཀྱིས་བརྗོད་པ་ལྟར་ན། ༢༠༠༨ ལོའི་ཕྱི་ཟླ་ ༣ པའི་ཚེས་ ༡༨ ཉིན་ཅོ་ནེ་བཀྲ་ཤིས་ཆོས་འཁོར་གླིང་གཙོས་སེར་སྐྱ་གཉིས་ཀྱིས་ངོ་རྒོལ་ལས་འགུལ་སྤེལ་རྗེས། གྲྭ་བསྟན་འཛིན་རྒྱ་མཚོ་ཆེ་ཆུང་གཉིས་གཙོས་པའི་གྲྭ་བ་བཞི་བྲོས་བྱོལ་དུ་ཆས་ཡོད་ཀྱང་། རྒྱ་ནག་གཞུང་གིས་ཁོང་གཉིས་ཀྱི་ནང་མི་འཛིན་བཟུང་གིས་ཁོང་གཉིས་རྩིས་སྤྲོད་མ་བྱས་ཚེ་ནང་མི་ཚང་མར་ཉེས་པ་གཏོང་རྒྱུ་ཡིན་པའི་བརྡ་ཁྱབ་བཏང་སྟབས། ཁོང་གཉིས་ཀྱིས་ནང་མིའི་བདེ་འཇགས་བསམ་སྟེ་ཉེས་པ་ཁས་ལེན་བྱེད་དགོས་བྱུང་ཡོད་འདུག་ལ། གཞན་གྲྭ་བ་ ༣༠༠ ལྷག་འཛིན་བཟུང་གིས་དུས་ཡུན་འདྲ་མིན་རིང་འདྲི་བརྩད་དང་བཀག་ཉར་བྱས་ཡོད་པ་མ་ཟད།  གྲྭ་བ་ ༢༥༤ ལ་རྒྱ་སྒོར་ ༥༠༠༠ རེའི་ཆད་པ་དང་ས་གནས་མང་ཚོགས་ཁྲོད་དུའང་འཛིན་བཟུང་འདྲི་གཅོད་དང་རྣམ་པ་འདྲ་མིན་གྱི་ཆད་པ་བཅད་ཡོད་འདུག