འཇིག་རྟེན་ཁམས་ཀྱི་རིག་པ་དང་རྣམ་པར་ཤེས་པའི་བགྲོ་གླེང་ཚོགས་འདུ།

བོད་ཀྱི་ལོ་རྒྱུས་ཐོག་ནས་དཔྱད་ཞིབ་བྱས་ན་ཆོས་རྒྱལ་མེས་དབོན་རྣམ་གསུམ་གྱི་སྐུ་རིང་བོད་རང་ཉིད་སྔར་ཡོད་སྟེང་ཕྱིའི་རྒྱལ་ཁབ་ཁག་ནས་ཆེད་ཤེས་རིག་བསྡུ་ལེན་བྱས་ཏེ་ནང་ཆོས་དང་། སྨན། རྩིས། བརྡ་སྤྲོད། རིག་གནས་སོགས་གང་སར་རང་སྐྱ་འཕེར་བའི་ཚད་གཞིའི་སྟེང་དུ་བསྐྱལ་ཐུབ་ཡོད།

འོན་ཀྱང་བོད་བསིལ་བུར་ཐོར་ནས་བཟུང་ད་བར་བོད་རྗེས་ལུས་ཅན་ཆགས་ཡོད། དེང་རབས་ཚན་རིག་དང་། འཛམ་གླིང་གི་ཤིས་རིག་ཐ་དག་ང་ཚོས་བསྡུ་ལེན་བྱེད་ཐུབ་མེད།

ང་ཚོས་དུས་རབས་ཉེར་གཅིག་པ་འདིའི་ནང་དུ་འཛམ་གླིང་གི་ཆབ་སྲིད་རིག་པ། དཔལ་འབྱོར་རིགཔ། སྤྱི་ཚོགས་རིག་པ། དམག་དོན་རིག་པ། ལོ་རྒྱུས་རིག་པ། རྩོམ་བཅོས་རིག་གནས། ཚན་རིག ཆོས་ལུགས་ཤེས་ཡོན། སྨན་རྫས་རིག་པ། ས་དཔྱད་རིག་པ། དངོས་ཁམས་རིག་པ། སྒྱུ་རྩལ་རིག་གནས་སོགས་ཕྱོགས་གང་ས་ནས་བོད་ཀྱི་སྐད་ཡིག་ནང་དུ་ཕབ་ཏེ་རིག་གནས་ཡོངས་རྫོགས་བསྡུ་ལེན་བྱེད་ཐུབ་པ་དགོས།

དུས་རབས་ཉེར་གཅིག་པ་འདིའི་ནང་དུ་ང་ཚོར་འཁྲི་བའི་བླ་མེད་ཀྱི་འགན་འཁྲི་དེ་བོད་ཀྱི་སྲོལ་རྒྱུན་རིག་གནས་མི་ཉམས་གོང་འཕེལ་ཙམ་མ་ཟད་གོང་གསལ་དེང་རབས་འཛམ་གླིང་སྤྱིའི་ཤེས་རིག་ཡོངས་རྫོགས་ཀྱི་སྙིང་བཅུད་བོད་མི་རིགས་ཕ་སྐད་ནང་དུ་རང་སྐྱ་འཕེལ་བའི་བྱས་རྗེས་འཇོག་དགོས་པ་དེ་ཡིན།

དེ་ནི་༸ གོང་ས་མཆོག་གི་དགོངས་པ་རེད་ལ་ཕྱི་ནང་བོད་རིགས་ཚང་མས་བྱེད་དགོས་པ་དང་། བྱེད་ཐུབ་པའི་ལའ་འགན་གལ་ཆེ་གཅིག་ཡིན། དེ་ལས་ལྷག་པའི་ལའ་འགན་ཞིག་ང་ཚོར་མེད།

གང་ཡིན་ཟེར་ན་དུས་ཉེར་གཅིག་པ་འདིའི་ནང་དུ་བོད་རང་བཙན་ཟེར་བ་དེ་ཉི་མའི་རྨི་ལམ་གཅིག་ལ་རང་བཙན་དེ་ད་ལྟའི་དུས་རབས་འདིར་ང་ཚོས་ལེན་ཐུབ་པའི་ནུས་པ་དང་ཆ་རྐྱེན་ཕྱོགས་ཡོངས་ནས་འཛོམས་མེད།

ད་དུང་སྡུག་ས་ནས་བཤད་ན་ཚད་མཐོའི་རང་སྐྱོང་ཟེར་བའི་དགོས་འདུན་དེ་ཡང་ད་ལྟའི་འཆར་ཡོང་ཐབས་རྩ་བ་ནས་མེད། རང་བཙན་དང་རང་སྐྱོང་ཟེར་བ་ལས་འགན་ཆེས་ལྕི་ཤོས་དེ་དུས་རབས་ཉེར་གཅིག་པའི་བོད་རིགས་ཚོས་ལེན་ཐུབ་པའི་སྟོབས་ཤུགས་རྩ་བ་ནས་མེད།

འོ་ན་ང་ཚོའི་ཕྲག་པར་འཁྲི་བའི་ལའ་འགན་གང་ཞིག་ཡོད་ཅེས་ན་ང་ཚོས་སོ་སོའི་ནུས་པ་དཔལག་པའི་ལས་འགན་གང་ཞིག་བསྒྲུབ་དགོས་པ་དང་། གང་ཞིག་བྱེད་ཐུབ་པ། ཇི་ལྟར་བྱས་ཏེ་ལས་དགོས་པ་བཅས་ལ་བསམ་བློ་ཞིབ་ཚགས་བཏང་ནས་འཆར་གཞི་ཡོད་པ་དང་། གོ་རིམ་ཡོད་པ། དེང་ཚོད་ཡོད་པ་བཅས་ཀྱིས་སྒོ་ནས་མི་རིགས་ཀྱི་བླ་མེད་ལའ་འགན་ཁག་དུས་ཐོག་གི་ཆར་ལྟར་བསྒྲུབ་དགོས།

བོད་ཀྱི་དཔེ་མཛོད་ཁང་ནས་ལས་གཞི་དེ་རིགས་སྤེལ་བར་ཡི་རང་མ་བྱེད་ཀ་མེད་རེད། ད་དུང་བསྒྲུབ་དགོས་པའི་ལས་འགན་མང་དག་གཅིག་ང་ཚོའི་མིག་གི་མདུན་དུ་ལྷག་ཡོད།
༸ གོང་ས་མཆོག་གི་ཐུགས་བཞེད་ལྷུན་གྱིས་འགྲུབ་པར་ཤོག རླབས་ཆེན་བོད་རིགས་ཁྲི་ལོར་བརྟན་པར་ཤོག

བགྲོ་གླེང་ཚོགས་འདུ་གཞི་རྒྱ་ཆེ་བ་འདི་ལྟ་བུ་ཞིག་སྤེལ་བ་ལ་བསྔགས་བརྗོད་སེམས་གཏིང་ནས་ཞུ། འདས་པའི་དཔེ་མཛོད་ཁང་གི་ལས་ཕྱོགས་ལ་གཞིགས་ན་དགེ་བཤེས་ལྷག་རྡོར་ལགས་ཚོགས་གཙོར་བསྐོས་པ་ནས་བཟུང་ཡར་རྒྱས་ཀྱི་རྣམ་པ་ཕྱོགས་མང་པོ་ནས་མཐོང་སོང་། དཔེར་ན། དཔེ་དེབ་སྣ་མིན་དཔར་བསྐྲུན་བྱ་རྒྱུ་དང་། སྦྱང་གཞི་འདྲ་མིན་ཐོག་ལ་ཟབ་སྦྱོང་དང་འཛིན་གྲྭ་ཚུགས་པ། དེ་བཞིན་ལྟ་གྲུབ་དང་འབྲེལ་བའི་ཚོགས་འདུ་འདྲ་མིན་བཙུགས་པ་སོགས་ཡིན། ཁོང་དང་དེ་བཞིན་ལས་བྱེད་ཡོངས་ལ་རླབས་ཆེ་བའི་དཀའ་ཚེགས་འདི་ལྟ་བུ་སྤེལ་བ་ལ་ཐུགས་རྗེ་གྲངས་མེད་ཞུ། མུ་མཐུས་ཤུགས་རྒྱབ་རོགས།

སྐབས་འདིར་འཇིག་རྟེན་ཁམས་ཀྱི་རིག་པ་ཟེར་བ་ནི་རྒྱུ་སྐར་རིག་པ་ལ་གོ་དགོས་པ་ཡིན། བགྲོ་གླེང་ཚོགས་འདུ་དེའི་ཨིན་ཚིག་གི་ནང་དུ་ Cosmology and Consciousness ཞེས་བཀོད་འདུག ཚན་རྩལ་རིག་པའི་འཛིན་གྲྭ་དེ་དགོན་སྡེ་ཁག་གི་ནང་དུ་ཚུགས་པ་ནས་བཟུང་གྲྭ་བཙུན་ཁག་གི་ཚན་རིག་གྱི་ཤེས་བྱ་ཐོག་ལ་ལོ་ཤས་འདིའི་ནང་དུ་འགྱུར་བ་རླབས་ཆེན་པོ་ཐོན་གྱི་འདུག འདིས་གྲྭ་བཙུན་ཁག་གི་ནང་པའི་ལྟ་གྲུབ་ལ་ཤུགས་རྐྱེན་ངན་པའི་ཚབ་ཏུ་དཔྱད་རིག་ཙབ་ཏུ་འགྲོ་རྒྱུར་ཕན་ཐོགས་རླབས་པོ་ཆེ་ཐོན་གྱི་ཡོད་པའི་རྣམ་པ་ཞིག་འདུག ཡིན་ན་ཡང་། འགའ་ཞིག་གིས་རྒྱལ་བའི་བཀའ་ཟེར་བའི་ཚིག་དེ་ཁུར་ནས་དགོན་སྡེ་ཁག་གི་ནང་དུ་ཚན་རིག་འཛིན་གྲྭ་བཅུག་ནས་ཚང་མས་སྦྱང་བཅུག་དགོས་པ་བཟོས་དགོས་ཟེར་ནས་ཁྲལ་འགེལ་ཐབས་བྱེད་པ་ནི་ཤིན་ཏུ་ནས་མི་འོས་། ཚན་རིག་དང་རྒྱ་ཡིག་གཉིས་པོ་དེ་དགོན་སྡེ་ཁག་གི་ནང་དང་དོད་ཡོད་མཁན་རྣམས་ལ་སྦྱོང་སའི་ཁོར་ཡུག་བསྐྲུན་ཐབས་བྱེད་དགོས་པ་ལས་ཁྲལ་འགེལ་བ་ནི་དམར་ཤོག་གི་བྱ་སྤྱོད་ཞིག་ལས་མ་འདས། ངོས་རང་ནི་འདི་ལ་རྒྱབ་སྐྱོར་མེད།

ཞིབ་བསྡུར་གྱི་ཉིང་ཁུའི་ནང་པ་སངས་རྒྱས་པའི་བསྟན་པ་རིན་པོ་ཆེ་འདི་ལ་ངེས་ཤེས་དང་ཡིད་ཆེས་དཔྱིས་ཕྱིན་པ་ཞིག་གི་གོ་མྱོང་མེད་ན། ཡིན་ཚོད་དང་རང་བཟོ་ཙམ་གྱིས་སྐད་ཆ་དེ་ཚོས་དུས་ནམ་ཡང་རང་མགོ་རང་བསྐོར་དང་། རང་ཡིད་རང་འབྲིད་ལས་ནུས་པ་གཏན་ནས་ཐོན་མི་ཐུབ་པ་མ་ཚད་སེམས་དང་ཀླད་པའི་དབྱེ་བ་ཡང་དེ་བས་འགྱེད་མི་ཐུབ། ད་རེས་མཁས་དབང་ཚོས་བགྲོ་གླེང་ནི་ནང་ཆོས་ཀྱི་རི་རྒྱལ་ཞེས་པ་དང་རྒྱུ་སྐར་སོགས་ལ་ལྟ་ཞིབ། ནང་ཆོས་ཀྱི་སེམས་རིག་ལ་ལྟ་ཞིབ། ནང་ཆོས་ཀྱི་ལྟོས་གྲུབ་ལ་ལྟ་ཞིབ་བཅས་ཀྱིས་བསྐོར་ཡིན་ཚོད་ལ། ནང་པ་སངས་རྒྱས་པའི་རིང་ལུགས་ཟབ་མོ་འདི་སྒོ་ཀུན་ནས་ཚན་རིག་པའི་ལྟ་བ་ལས་མཐོ་དམན་མི་ཤོར་བ་བྱེད་དགོས་པ་ནི་གནད་ཀྱི་དམ་པར་འཁུམས། དེ་མ་ཡིན་པར་ཨུ་ཚུགས་ཀྱིས་ལུང་འབྲེལ་ཐར་ཐོར་གྱིས་ངེས་ཤེས་ཀྱི་ཕ་ས་ནམ་ཡང་ཟིན་མི་ཐུབ། ང་ཚོས་ངེས་པར་དུ་ཚན་རིག་དང་ཞིབ་བསྡུར་དགོས་ལ། ཚན་རིག་དང་གོམ་འགྲོས་མཚུངས་དགོས། ཚོགས་མི་ཀུན་གྱིས་མཁས་པ་དེ་ཚོའི་རྣམ་དཔྱོད་ལ་རྡོག་རོལ་གཏང་མི་ཉན་ལ། བར་ཡང་མི་ཆོད་པར་ཆ་ཤས་ལེན་ཅི་ཐུབ་དང་། འབྲི་བཤད་རྒྱུས་ལེན་གང་མང་མང་བྱེད་དགོས། ཁོ་ཚོ་རྣམ་རྟོག་གི་མི་བཅུན་ཡང་། རང་ལ་དགོས་ངེས་ཀྱི་རིག་པ་ལེན་མི་ཐུབ་པའི་རྨ་ཁ་གཏོད་པའི་ཉན་ཁ་ཆེན་པོ་ཡོད་པས། ཚོགས་མི་ཀུན་དང་དེ་བཞིན་གྲྭ་སའི་སློབ་གཉེར་རྣམས་ཀྱིས་ཐུགས་གཟབ་གནང་རོག་ཞེས་འབོད་བསྐུལ་ཞུ་གི་ཡོད།།