གཟའ་སྤེན་པའི་ཉིན་ཤིན་ཅང་གི་བདེ་འཇགས་ལས་དོན་སྐོར་གྱི་ཚོགས་འདུ་ཞིག་ཚོགས་ཏེ། ཤིན་ཅང་དམར་ཤོག་དྲུང་ཆེ་ཀྲང་ཁྲོན་ཞཱན་གྱིས་ཤིན་ཅང་ནང་དྲག་རྡུང་ལས་འགུལ་སྔར་བས་ཤུགས་ཆེ་རུ་གཏོང་པ་བརྗོད་འདུག
ཟླ་འདིའི་ཕྱི་ཚེས་ ༢༤ ཉིན་ཤིན་ཅང་ཡུ་གུར་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཀྲང་ཁྲོན་ཞཱན་གྱི་མགོ་འཛིན་འོག་ཤིན་ཅང་བདེ་འཇགས་ལས་དོན་སྐོར་ཀྱི་ཚོགས་འདུ་ཞིག་བསྐངས་ཏེ། ཚོགས་ཐོག་ཏུ་ཀྲང་ཁྲོན་ཞཱན་གྱིས་ད་ལྟ་ཤིན་ཅང་སྤྱིའི་ཆ་ནས་བདེ་འཇགས་བཟོ་ཐུབ་ཡོད་ནའང་། བདེ་འཇགས་ཀྱི་རྨང་གཞི་ད་དུང་བརྟན་པོ་མེད་པ་དང་། ལྷག་པར་དུ་གཞི་རིམ་ས་ཁུལ་ཁག་ནང་བདེ་འཇགས་གནས་སྟངས་སྔར་བཞིན་ཛ་དྲག་དང་རྙོག་འཛིང་ཆེ་བ་བརྗོད་འདུག
ཕྱི་ཚེས་ ༢༦ ཉིན་ཤིན་ཅང་རྒྱ་གཞུང་གསར་ལམ་ཁག་ཏུ་གནས་ཚུལ་སྤེལ་དོན། ཀྲང་ཁྲོན་ཞཱན་གྱིས་ཚོགས་ཐོག་ཏུ་ཕྱི་ལོ་ ༢༠༡༢ ལོར་རྒྱ་ནག་གུང་བྲན་གཞུང་གི་སྐབས་ ༡༨ པའི་རྒྱལ་ཡོངས་དམར་ཤོག་ཚོགས་ཆེན་དང་། དེ་བཞིན་ཤིན་ཅང་ནང་རྒྱ་ནག་གི་སྐབས་གཉིས་པའི་ཨེ་ཤ་ཡ་དང་ཡུ་རོབ་དངོས་མང་འགྲེམས་ཚོང་གཉིས་འཚོགས་དགོས་སྟབས། འབྲེལ་ཡོད་སྡེ་ཁག་དག་གིས་སྤྱི་ཚོགས་བདེ་འཇགས་ཞིབ་བཤེར་ལས་དོན་ནི་ནམ་ཞག་རྒྱུན་གཏན་གྱི་བྱ་བར་བརྩིས་ཏེ་སྒྲུབ་དགོས་པ་དང་། རིམ་པ་སོ་སོའི་ལས་བྱེད་རྣམས་ཀྱིས་ཤིན་ཅང་ཁ་བྲལ་རིང་ལུགས་པར་འཐབ་རྩོད་ཐད་ལངས་ཕྱོགས་བརྟན་པོ་དང་། ཆོས་ལུགས་ཐལ་འཛིན་སྟོབས་ཤུགས་ཀྱི་བྱ་འགུལ་དག་ལ་དྲག་རྡུང་སྔར་བས་ཤུགས་ཆེ་རུ་བཏང་སྟེ། ཕྱི་ལོ་ ༢༠༡༢ ལོར་ཤིན་ཅང་སྤྱི་ཚོགས་ཕྱོགས་ཡོངས་ནས་བདེ་འཇགས་ཡོང་བར་ཁག་ཐེག་བྱེད་དགོས་སྐོར་ནན་བརྗོད་བྱས་འདུག
འདས་པའི་ལོ་གཉིས་ཀྱི་རིང་ཤིན་ཅང་ནང་རྒྱ་གཞུང་ལ་ངོ་རྒོལ་གྱི་ལས་འགུལ་ཆེན་པོ་བྱུང་སྟེ་གནས་སྟངས་ཛ་དྲག་འོག་གནས་ཡོད་པ་དང་། ད་ལོ་ཕྱི་ཟླ་ ༧ ནང་ཤིན་ཅང་དུ་བསྟུད་མར་རྒྱ་གཞུང་ལ་ངོ་རྒོལ་གྱི་གཏོར་རྒོལ་དོན་རྐྱེན་བྱུང་སྟེ་མི་མང་པོ་རྐྱེན་འདས་སུ་གྱུར་ཡོད་ལ། ཕྱི་ལོ་ ༢༠༠༩ ལོར་བྱུང་བའི་མི་མང་ཡར་ལངས་ངོ་རྒོལ་སྐབས་མི་ ༢༠༠ ལྷག་རྐྱེན་དུ་ཤོར་ཡོད་པ་རེད།
འཛམ་གླིང་ཡུ་གུར་མི་མང་འཐུས་ཚབ་ཚོགས་པའི་མགྲིན་ཚབ་པ་ཏིས་ལ་ཞཱ་ཐིས་ལགས་ཀྱིས། ཤིན་ཅང་ནང་བྱུང་བའི་གཏོར་རྒོལ་དོན་རྐྱེན་དེ་དག་ནི་རྒྱ་གཞུང་གིས་འདས་པའི་ལོ་མང་རིང་དྲག་གནོན་སྲིད་ཇུས་སྤེལ་བའི་མཇུག་འབྲས་ཡིན་པ་བརྗོད་ཡོད།
ཀྲང་ཁྲོན་ཞཱན་ནི་རྒྱ་ནག་ཧི་ནན་ཡུས་ཀྲིག་ས་ཁུལ་གྱི་རྒྱ་མི་ཞིག་ཡིན་པ་དང་ད་ལྟ་ལོ་ ༥༨ རེད། ཁོས་སྔོན་ཆད་དམག་ཁུལ་གྱི་ལས་དོན་གཉེར་མྱོང་ཡོད་འདུག ༢༠༡༠ ཕྱི་ཟླ་ ༤ ནང་ཤིན་ཅང་ཡུ་གུར་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ལ་བསྐོས་ཡོད་པ་དང་། སྐབས་དེར་རྒྱ་ནག་དབུས་གཞུང་རྩ་འཛུགས་སྡེ་ཁག་གི་རྒྱུན་ལས་མགོ་གཙོ་ལིས་ཡོན་ཁྲའོ་ཡིས་རྒྱ་ནག་དབུས་གཞུང་གི་ཐག་གཅོད་དྲིལ་བསྒྲགས་དང་། སྲིད་འཛིན་གཞོན་པ་ཞི་ཅིན་ཕེན་གྱིས་གཏམ་བཤད་བྱས་ཡོད་པ་རེད།
གསར་འགོད་པ། ཚེ་རིང་རྒྱལ།
ཚོགས་ཐོག་ཏུ་ཀྲང་ཁྲོན་ཞཱན་གྱིས་ད་ལྟ་ཤིན་ཅང་སྤྱིའི་ཆ་ནས་བདེ་འཇགས་བཟོ་ཐུབ་ཡོད་ནའང་། བདེ་འཇགས་ཀྱི་རྨང་གཞི་ད་དུང་བརྟན་པོ་མེད་པ་དང་། ལྷག་པར་དུ་གཞི་རིམ་ས་ཁུལ་ཁག་ནང་བདེ་འཇགས་གནས་སྟངས་སྔར་བཞིན་ཛ་དྲག་དང་རྙིང་འཛིང་ཆེ་བ་བརྗོད་འདུག ཟེར་བ་བཞིན།
ཡུ་གུར་ཤིན་ཅང་ཙམ་མ་ཟད་བོད་དང་། སོག་ཡུལ་ལ་ཡང་བདེ་འཇགས་ཀྱི་རྨང་གཞི་བརྟན་པོ་མེད་པ་བཟོ་མཁན་གཏེ་བོ་ནི། རྒྱ་གཞུང་གི་ལས་བྱེད་རྒྱ་ཧན་མི་རིགས་ཀྱི་མི་འབོར་སྤོ་ཤུགས་ཆེ་དྲགས་ནས་བྱྱུང་བ་རེད་དོ། །ད་དུང་་་་་་