ངྷ་ས་དབུས་སྨན་རྩིས་ཁང་ལོ་ ༥༠ འཁོར་བའི་འགྲེམས་སྟོན།

ད་ནངས་པར་རྡོ་རྗེ་གདན་དུ་ངྷ་ས་དབུས་སྨན་རྩིས་ཁང་བརྙེས་ཏེ་ལོ་ ༥༠ འཁོར་བའི་པར་རིས་དང་སྨན་རྫས་འགྲེམས་སྟོན་ཞིག་དབུ་འབྱེད་གནང་སྟེ། མ་འོངས་པར་ཨ་རུ་ན་ཅལ་མངའ་སྡེའི་གཞུང་གིས་བོད་མི་ཚོར་མུ་མཐུད་རྒྱབ་སྐྱོར་གནང་རྒྱུ་ཡིན་ཚུལ་བརྗོད་བྱུང་།  

དེ་རིང་ཕྱི་ཚེས་ ༣༠ ཉིན་གྱི་ཞོགས་པའི་ཆུ་ཚོད་ ༩ དང་ཕྱེད་ཀའི་སྟེང་རྡོར་གདན་མཱ་ཧ་ཡཱ་ན་མགྲོན་ཁང་རྒྱབ་ལོགས་སུ་ཡོད་པའི་བོད་གཞུང་སྨན་རྩིས་ཁང་གི་རས་གུར་ནང་། བོད་གཞུང་སྨན་རྩིས་ཁང་དབུ་བརྙེས་ཏེ་མི་ལོ་ཧྲིལ་པོ་ལྔ་བཅུ་འཁོར་བའི་པར་རིས་དང་སྨན་རྫས་འགྲེམས་སྟོན་ཞིག་དབུ་འབྱེད་གནང་སོང་ལ། མཛད་སྒོའི་སྐུ་མགྲོན་གཙོ་བོར་ཨ་རུ་ན་ཅལ་མངའ་སྡེའི་ཡུལ་སྐོར་སྤྲོ་འཆམ་བློན་ཆེན་འདས་པོ་དམ་པ་རྡོ་རྗེ་མཁའ་འགྲོ་མཆོག་གི་བུ་པདྨ་མཁའ་འགྲོ་ལགས་དང་། དབུས་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་པདྨ་ཆོས་འབྱོར། དེ་བཞིན་དུས་དབང་གོ་སྒྲིག་ཚོགས་པའི་ཚོགས་གཙོ་སོགས་ཕེབས་ཡོད་འདུག

མཛད་སྒོའི་ཐོག་མར་སྨན་རྩིས་ཁང་གི་འགྲེམས་སྟོན་གོ་སྒྲིག་ཚོགས་པའི་ཚོགས་གཙོ་དགེ་བཤེས་བསྟན་པ་བཀྲ་ཤིས་ལགས་ཀྱིས་བརྗོད་པ་ལྟར་ན། ཐེངས་འདིའི་འགྲེམས་སྟོན་ནི་བོད་གཞུང་སྨན་རྩིས་ཁང་དབུ་བརྙེས་ཏེ་ལོ་ངོ་ ༥༠ འཁོར་བར་ཕྱིར་དྲན་བྱས་པ་ཞིག་ཡིན་པ་དང་། འགྲེམས་སྟོན་དེ་ནི་བོད་ནས་ཕེབས་པའི་ཆོས་ཞུ་བ་དང་། ནུབ་ལ་དྭགས་དང་ཕྱི་རྒྱལ་ཁག་ནས་ཕེབས་པའི་ཆོས་ཞུ་བ་ཚོར་བོད་ཀྱི་སྨན་རྩིས་སྐོར་གོ་རྟོགས་སྤེལ་ཆེད་ཡིན་འདུག

འགྲེམས་སྟོན་དེར་སྡེ་ཚན་མི་འདྲ་བ་ ༡༥ ཙམ་ལ་དབྱེ་ཡོད་པ་དག་ནི། ནད་བཅོས་ཉམས་ཞིབ་སྡེ་ཚན་དང་། སྨན་རྩིས་རིག་གཞུང་སྡེ་ཚན། འཛིན་སྐྱོང་སྡེ་ཚན། ཡན་ལག་སྤྱི་ཁྱབ་སྡེ་ཚན། སྨན་རྩིས་མཐོ་སློབ་སྡེ་ཚན། འཇམ་དཔྱད་སྡེ་ཚན། སྐར་དཔྱད་རྩིས་རིག་སྡེ་ཚན། སྨན་སྦྱོར་ཁང་། སྔོ་སྦྱོར་ཉམས་ཞིབ་སྡེ་ཚན་བཅས་རེད།

འགྲེམས་སྟོན་དེའི་ཐད་དགེ་བཤེས་བསྟན་པ་བཀྲ་ཤིས་ལགས་ཀྱིས་བརྗོད་དོན། “ འགྲེམས་སྟོན་འདིའི་ནང་སྨན་རྩིས་ཁང་གིས་མི་ལོ་ ༥༠ རིང་སྨན་རྩིས་གཉིས་ཀྱི་ལག་ལེན་ཐོག་གྲུབ་འབྲས་ག་རེ་བྱུང་མེད་མཚོན་ཐུབ་པར་བྱས་ཡོད། ད་ལོའི་ཕྱི་ཟླ་ ༣ པ་ནས་སྨན་རྩིས་ཁང་གིས་རྒྱ་གར་རྒྱལ་ཡོངས་ལ་སྨན་རྩིས་སྐོར་འགྲེམས་སྟོན་བྱས་ཡོད་ལ། དུས་དབང་སྐབས་འགྲེམས་སྟོན་བྱས་ན་འགྲེམས་སྟོན་གྱི་གོ་སྐབས་མ་རག་པའི་བོད་དང་ལ་དྭགས། ཕྱི་རྒྱལ་ཁག་ནས་ཕེབས་པའི་མང་ཚོགས་ལ་སྨན་རྩིས་སྐོར་ཤེས་རྟོགས་ཡོང་རྒྱུར་ཕན་ཀྱི་རེད། སྨན་རྩིས་ཁང་གི་མཐའ་མའི་འགྲེམས་སྟོན་དེ་ ༢༠༡༢ ལོིའི་ཕྱི་ཟླ་ ༢ པའི་ནང་རྒྱལ་ས་ལྡི་ལིར་མཇུག་བསྒྲིལ་རྒྱུ་ཡིན། གཞན་སྨན་རྩིས་ཁང་གིས་དུས་དབང་སྐབས་རྡོར་གདན་ས་གནས་སྣེ་ལེན་ཁང་དང་། མཆོད་རྟེན་ཆེན་མོའི་མདུན་ཐང་། ཀརྨ་བཀའ་བརྒྱུད། མི་མང་འཛོམས་ས་བཅས་སུ་འཕྲལ་སེལ་ཡན་ལག་སྨན་ཁང་བཙུགས་ཏེ། མང་ཚོགས་ལ་སྨན་བཅོས་རོགས་རམ་དང་། བོད་ནས་ཕེབས་པའི་ཆོས་ཞུ་བ་དང་བགྲེས་སོང་ནད་གཅོང་རིགས་ལ་རིན་མེད་ཐོག་སྨན་སྦྱིན་གཏོང་བཞིན་ཡོད་ ” ཅེས་བརྗོད་བྱུང་།

སྨན་རྩིས་ཁང་གི་དྲུང་ཆེ་ཚེ་རིང་ཕུན་ཚོགས་ལགས་ཀྱིས་བརྗོད་དོན། “ བོད་ཀྱི་གསོ་བ་རིག་པ་འདི་འཛམ་གླིང་སྟེང་ཁྱད་དུ་འཕགས་པའི་རིག་གནས་ཤིག་ཡིན་པ་དང་། རིག་གནས་དེར་རིན་ཐང་ཆེན་པོ་ཡོད་སྟབས་རྒྱ་གར་གཞུང་གིས་ཀྱང་ཁྲིམས་ཐོག་ནས་ངོས་ལེན་གནང་ཡོད་པ་རེད། ང་ཚོའི་འཆར་གཞིའི་ནང་སྨན་རྩིས་མཐོ་སློབ་གསར་འཛུགས་གནང་རྒྱུ་དང་། ཨ་རུ་ན་ཅལ་མངའ་སྡེ་དང་གཞིས་ཆགས་ཁག་ནང་སྨན་རྩ་འདེབས་འཛུགས་བྱ་རྒྱུའི་འཆར་གཞི་སོགས་ཡོད་པ་རེད། ས་ཆ་དང་ཞིང་ཁའི་ཐོག་ནས་དགོས་མཁོ་བྱུང་ན་ཨ་རུ་ན་ཅལ་མངའ་སྡེ་གཞུང་ལ་སྙན་སེང་ཞུ་འཆར་ཡོད། ད་ཆར་ཨ་རུ་ན་ཅལ་དུ་སྨན་རྩིས་ཁང་གི་ཡན་ལག་སྨན་ཁང་ ༦ ཙམ་ཡོད་པ་དེ་ཚོར་དམིགས་བསལ་དཀའ་ངལ་དེ་འདྲ་གང་ཡང་མེད་ ” ཅེས་བརྗོད་བྱུང་།

མཇུག་ཏུ་ཨ་རུ་ན་ཅལ་མངའ་སྡེའི་ཡུལ་སྐོར་སྤྲོ་འཆམ་བློན་ཆེན་པདྨ་མཁའ་འགྲོ་མཆོག་གིས་བཙན་བྱོལ་བོད་མིའི་སྨན་རྩིས་རིག་གཞུང་ལ་གདེང་འཇོག་དང་མ་འོངས་པར་མུ་མཐུད་ཡར་རྒྱས་གཏོང་སྐོར་སོགས་བརྗོད་དེ། སྨན་རྩིས་ཁང་གིས་མཆིན་ནད་བཅོས་ཐབས་ཀྱི་བོད་སྨན་གསར་བཟོ་གནང་བ་དེས་སྡུག་བསྔལ་གྱིས་མནར་བཞིན་པའི་ཉམ་ཐག་ནད་པ་ཚོར་ཕན་ཐོགས་ཆེན་པོ་ཡོད་སྐོར་དང་། དེང་ཕྱིན་དབུས་སྨན་རྩིས་ཁང་ལ་རོགས་རམ་གང་འདྲ་ཞིག་གནང་དགོས་ཀྱང་། ང་རང་གིས་གང་ཐུབ་ཀྱིས་རོགས་པ་གང་ཐུབ་གནང་རྒྱུ་ཡིན་ཚུལ་སོགས་བརྗོད་བྱུང་།

དབུས་སྨན་རྩིས་ཁང་གི་ལོ་འཁོར་འགྲེམས་སྟོན་འདི་འབྱུང་འགྱུར་ཕྱི་ཟླ་ ༣ པའི་ནང་བཞུགས་སྒར་ངྷ་རམ་ས་ལར་གཏོང་འཆར་ཡོད་འདུག  

རྡོར་གདན་གསར་འགོད་པ། དཔལ་ལྡན།