དེ་རིང་ཕྱི་དྲོར་རྡོར་གདན་སྣེ་ལེན་ཁང་གི་ཚོགས་ཁང་དུ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས། བོད་ནས་ཕེབས་པའི་ཆོས་ཞུ་བ་ ༨༠༠༠ བརྒལ་བར་གསུང་བཤད་གནང་སྟེ། ང་ཚོའི་འཐབ་རྩོད་དེ་བདེན་པ་དང་ཡང་དག་པའི་ངོ་བོར་གནས་དང་མི་གནས་དེ། ང་ཚོའི་འཐབ་རྩོད་ཀྱི་ཐབས་ལམ་དེ་འཚེ་མེད་ཞི་བའི་ལམ་འབའ་ཞིག་ལ་འགྲོ་ཐུབ་མིན་ལ་རག་ལས་ཡོད་ཟེར།
དེ་རིང་ཕྱི་ཚེས་ ༨ ཉིན་གྱི་དགོང་དྲོའི་ཆུ་ཚོད་ ༦ དང་ཕྱེད་ཀའི་སྟེང་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས་གནས་མཆོག་རྡོ་རྗེ་གདན་གྱི་སྣེ་ལེན་ཁང་གི་ཚོགས་ཁང་དུ། བོད་ནས་ཕེབས་པའི་ཆོས་ཞུ་བ་ ༨༠༠༠ ལྷག་ལ་བཙན་བྱོལ་བོད་མིའི་བྱུང་རིམ་དང་ཤེས་ཡོན། ཆོས་དང་རིག་གཞུང་། ཆབ་སྲིད་གནས་སྟངས། གཞིས་ཆགས་ཀྱི་འཚོ་བ། ལམ་དབུ་མའི་སྲིད་བྱུས། བོད་རྒྱ་འབྲེལ་མོལ། ༧གོང་ས་མཆོག་གི་སྐུ་དབང་རྩིས་སྤྲོད་དང་ཡང་སྲིད་ཕེབས་ཕྱོགས། དོལ་རྒྱལ་བསྟེན་པའི་སྐྱོན་གནས་བཅས་ཀྱི་ཐོག་བཀའ་སློབ་གནང་སོང་།
ཟམ་གདོང་རིན་པོ་ཆེ་མཆོག་གིས་༧གོང་ས་མཆོག་གི་སྐུ་དབང་རྩིས་སྤྲོད་གནང་བའི་བརྒྱུད་རིམ་དང་དེའི་རྒྱབ་ལྗོངས་ངོ་སྤྲོད་དང་འབྲེལ་ནན་གྱིས་གསུངས་དོན། “ ད་བར་སྐྱབས་མགོན་རིན་པོ་ཆེའི་མཚན་གྱི་གཟི་བརྗིད་འོག་གནས་ཚུལ་མང་པོ་ཞིག་རང་བཞིན་གྱིས་ཡལ་འགྲོ་བཞིན་ཡོད། མ་འོངས་པར་མིང་ཙམ་ལ་བརྟེན་ནས་སྐུ་ངལ་བྱུང་བ་ཡིན་ན། རྒྱལ་བ་རིན་པོ་ཆེའི་མཚན་གྱི་གཟི་བརྗིད་མེད་སྐབས་སྐུ་ངལ་འཕྲད་སྲིད་པའི་རྒྱུ་མཚན་ལ་གཟིགས་ཏེ། ཁོང་གིས་བཀའ་སློབ་གནང་བ་ལྟར་དབྱིན་ཡིག་ནང་མིང་ག་རེ་ཡོད་པ་བོད་ཡིག་ནང་བཟོས་པ་རེད། དེ་ལྟར་གནང་བ་ཡིན་ན། གཞུང་གི་གནས་བབ་ལ་འགྱུར་བ་མི་ཐེབས་པ་དང་། རྒྱལ་སྤྱིའི་ཐོག་རྙོག་དྲ་མི་ཡོང་བ། བཙན་བྱོལ་སྒྲིག་འཛུགས་དགའ་ལྡན་ཕོ་བྲང་གཞུང་གི་རྒྱུན་དེ་མུ་མཐུད་སྡོད་རྒྱུར་ཕན་ཐོགས་ཡོད་སྟབས། མིང་དང་ཚིག་ཙམ་ལ་གནད་འགག་ཆེན་པོ་མ་རྩིས་པ་རེད། ༢༠༡༡ ཕྱི་ཟླ་ ༥ པའི་ནང་གི་དམིགས་བསལ་གྲོས་ཚོགས་ཀྱི་བཅའ་ཁྲིམས་བསྐྱར་བཅོས་སྐབས་མིང་དེ་དབྱིན་བོད་གཉིས་དང་མཐུན་པ་བཟོས་པ་རེད། ཁ་ཤས་ཀྱིས་༧རྒྱལ་བ་རིན་པོ་ཆེས་བཙན་བྱོལ་བོད་གཞུང་མེད་པ་བཟོས་པ་རེད་ཟེར་བ་དང་། ཁ་ཤས་ཀྱིས་རྒྱལ་བ་རིན་པོ་ཆེས་གཞུང་འཛིན་སྐྱོང་གནང་རྒྱུའི་ཐུགས་འདོད་ཡོད་པ་མ་རེད་ཟེར་བ་དེ་བདེན་པ་མ་རེད་ ” ཅེས་གསུངས་སོང་།
ཡང་ཟམ་གདོང་རིན་པོ་ཆེ་མཆོག་གིས་མུ་མཐུད་དུ་༧གོང་ས་མཆོག་གིས་བོད་མིའི་ཆབ་སྲིད་འཛིན་སྐྱོང་འགན་དབང་ལས་བགྲེས་ཡོལ་གནང་ཡོད་ནའང་། དགའ་ལྡན་ཕོ་བྲང་གཞུང་གི་ངོ་བོར་འགྱུར་བ་གང་ཡང་ཐེབས་མེད་པའི་སྐོར་གསུངས་དོན། “རྒྱལ་བ་སྐུ་ཕྲེང་བཅུ་བཞིའི་ནང་དགུང་ལོ་ ༡༦ ནས་བོད་ཀྱི་ཆབ་སྲིད་ཐུགས་འགན་བཞེས་ཏེ། དགུང་ལོ་ ༧༦ བར་མི་ལོ ༦༠ རིང་བོད་ཀྱི་ཁྲིམས་མཐུན་གཞུང་སྐྱབས་མགོན་རིན་པོ་ཆེ་གཅིག་པུས་སྐུ་ལས་བསྐྱོན་ཏེ། དཀའ་ངལ་དང་ཛ་དྲག་གང་འདྲ་འཕྲད་ཀྱང་། འཛིན་སྐྱོང་གནང་ཐུབ་ཡོད་པ་རེད། བོད་ཀྱི་བྱུང་རབས་ལ་ཕྱིར་བལྟས་བྱས་ན། སྔོན་གྱི་ཆོས་རྒྱལ་ནས་རྒྱལ་བ་སྐུ་ཕྲེང་ན་རིམ་དང་། ས་སྐྱའི་ཁྲི་རབས་ན་རིམ། གཙང་པ་སྡེ་སྲིད་དང་ཕག་གྲུའི་སྡེ་སྲིད་སོགས་གང་ལ་བལྟས་ཀྱང་། སྲིད་སྐྱོང་གཅིག་གིས་ལོ་དྲུག་ཅུའི་རིང་ཆབ་སྲིད་བསྐྱངས་པ་ཞིག་བྱུང་མྱོང་ཡོད་པ་མ་རེད། སྔར་བྱུང་མ་མྱོང་བའི་བོད་ཀྱི་གནས་བབ་དཀའ་ངལ་ཆེ་ཤོས་ཀྱི་སྐབས་སུ་ཐུགས་འགན་བཞེས་པ་རེད། མཐའ་མ་ཐུགས་འགན་རྩིས་སྤྲོད་གནང་བ་རེད། སྒྲིག་འཛུགས་རྒྱུན་གནས་ཡོང་བ་དང་སྒྲིག་འཛུགས་དེང་རབས་དང་མཐུན་པ། རྒྱལ་སྤྱིའི་སྟེང་སུས་བལྟས་ཀྱང་ཚང་མས་ངོས་ལེན་གནང་བ་མ་གཏོགས། སྐྱོན་བརྗོད་བྱ་རྒྱུ་མེད་པ་ཞིག་སྲོལ་བཏོད་གནང་ཡོད་པ་རེད། སྐྱབས་མགོན་རིན་པོ་ཆེས་ཆབ་སྲིད་སྐུ་དབང་རྩིས་སྤྲོད་གནང་བ་དེ། དགོས་པ་རྒྱུ་མཚན་གཙོ་བོ་གཅིག་བོད་དོན་བདེན་མཐའ་མ་སེལ་བར། བཙན་བྱོལ་བོད་མིའི་ཆབ་སྲིད་སྒྲིག་འཛུགས་དེ། ངེས་པར་དུ་རྒྱུན་མཐུད་དགོས་པ་ཧ་ཅང་གལ་ཆེན་རེད། སྒྲིག་འཛུགས་དེ་གནས་མ་ཐུབ་ན། བོད་དོན་བདེན་མཐའ་སེལ་ཆེད་རྒྱལ་སྤྱིའི་སྟེང་ལས་དོན་བསྒྲུབ་རྒྱུའི་ལམ་ཁ་མེད་པ་ཆགས་འགྲོ་ཡི་ཡོད། བོད་ནང་ཆབ་སྲིད་ལས་དོན་བྱེད་ཐུབ་ཀྱི་མེད་པ་གསལ་པོ་རེད། ཕྱི་ལོགས་སུའང་། ཆབ་སྲིད་ལས་དོན་ག་རེ་བྱས་ཀྱང་། གཞུང་འབྲེལ་མ་ཡིན་པའི་ཚོགས་པ་ཞིག་གིས་བྱ་ཐུབ་ཀྱི་ཡོད་པ་མ་རེད། ༧རྒྱལ་དབང་ལྔ་པས་ཕྱག་བཏབ་པའི་ལོ་ ༣༦༠ བརྒལ་བའི་བོད་ཀྱི་ཁྲིམས་མཐུན་གཞུང་དེ། མ་ཉམས་པར་སྡོད་རྒྱུ་དེ་གལ་ཆེན་པོ་རེད། སྲིད་དོན་གྱི་ཐོག་ནས་གལ་ཆེན་པོ་རེད། སྤྱི་ཚོགས་ཀྱི་ཐོག་ནས་གལ་ཆེན་པོ་རེད། དེ་བཞིན་བྱུང་བའི་ཐོག་ནས་ཀྱང་གལ་ཆེན་པོ་ཆགས་ཡོད་པ་རེད། གཞུང་དེ་ང་གཅིག་ལོར་རྒྱ་ནག་གིས་བོད་ལ་དབང་བསྒྱུར་བྱས་སྐབས་ཀྱང་དགའ་ལྡན་ཕོ་བྲང་གཞུང་མེད་པ་ཆགས་མེད་ལ། གཞུང་དེར་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱིས་ས་གནས་གཞུང་ལ་ངོས་འཛིན་བྱས་ཡོད། གྲོས་མཐུན་དོན་ཚན་ ༡༧ ནང་དུའང་། ༧གོང་ས་མཆོག་གི་སྐུ་དབང་དང་དགའ་ལྡན་ཕོ་བྲང་གི་གནས་བབ་ལ་འགྱུར་བ་མི་གཏོང་བ་དེ་བརྗོད་ཚིག་ནང་གསལ་པོར་བཀོད་ཡོད། བཙན་བྱོལ་དུ་འབྱོར་རྗེས་ང་ཚོ་དམངས་གཙོའི་ངོ་བོར་ཕྱིན་པ་རེད། དམངས་གཙོའི་ངོ་བོར་ཕྱིན་རྗེས་ཁྲིམས་མཐུན་གཞུང་དེ་ཕུན་སུམ་ཚོགས་པ་དང་། ཡར་རྒྱས་ཕྱིན་པ་མ་གཏོགས་དེར་ཉམས་རྒུད་སྤུ་ཙམ་ཡང་ཕྱིན་མེད་ ” ཅེས་གསུངས་སོང་།
མཐར་ཁོང་གིས་བོད་ཀྱི་འཐབ་རྩོད་དེ་འཚེ་མེད་ཞི་བའི་འཐབ་རྩོད་ཐོག་འགྲོ་དགོས་དོན་སྐོར་ལ་གསུངས་རྒྱུར་ “བོད་མི་རིགས་ཀྱི་གཞི་རྩའི་འཐབ་རྩོད་དེ་བདེན་པར་གཞི་བཅོལ་བ་ཞིག་དང་། སངས་རྒྱས་ཀྱི་བསྟན་པ་དང་འབྲེལ་བ་ཡོད་པའི་གནས་སྟངས་ཤིག་ཆགས་ཡོད། བོད་མི་རིགས་དང་སངས་རྒྱས་ཀྱི་ཐེག་པ་གསུམ་དང་རྒྱུད་སྡེ་བཞི་བར་འབྲེལ་བ་ཟབ་མོ་ཆགས་ཡོད་པ་རེད། གངས་ཅན་ལྗོངས་ལ་སངས་རྒྱས་ཀྱི་བསྟན་པ་ཉམས་ན། དེ་འདྲའི་ཚང་ལ་མ་ནོར་བའི་བསྟན་པ་དེ། ནང་པའི་རྒྱལ་ཁབ་གཞན་པའི་ནང་ཡོད་པ་མ་རེད། ཐེག་པ་རེ་རེ་དང་གྲུབ་མཐའ་རེ་རེ། ཡང་ན་ཆོས་ཚན་རེ་ཟུང་ཙམ་ལས་ཚང་ལ་མ་ནོར་བའི་བསྟན་པ་མེད་བསྡད་པ་ཞིག་རེད། དེ་ཡིན་དུས་བོད་མི་རིགས་དེ་འཇིག་རྟེན་སྤྱི་ཡོངས་ཀྱི་ཁེ་ཕན་དང་འབྲེལ་བ་ཡོད་པ་ཞིག་ཡིན་སྟབས། ང་ཚོའི་འཐབ་རྩོད་དེ་བདེན་པ་དང་ཡང་དག་པའི་འཐབ་རྩོད་ཆགས་ཡོད། ང་ཚོའི་འཐབ་རྩོད་དེ་བདེན་པ་དང་ཡང་དག་པའི་ངོ་བོར་གནས་དང་མི་གནས་དེ། ང་ཚོའི་འཐབ་རྩོད་ཀྱི་ཐབས་ལམ་དེ་འཚེ་མེད་ཞི་བའི་ལམ་འབའ་ཞིག་ལ་འགྲོ་ཐུབ་མིན་ལ་རག་ལས་ཡོད་ ” ཅེས་གསུངས།
གསར་འགོད་པ། དཔལ་ལྡན་གྱིས་རྡོ་རྗེ་གདན་ནས།
ཁྲི་ཟུར་ཟམ་དོང་རིན་པོ་ཆེ་མཆོག་གི་སྙིང་སྟོབས་དང་མཛད་རྗེས་དེར་བསྔགས་བརྗོད་བྱ་འོས་པ་ཞིག་མཐོང་།
བླ་མ་འདིས་ལོ་ངོ་ཧྲིལ་པོ་བཅུའི་རིང་ཆབ་སྲིད་བསྐྱངས་རིང་སྐྱོན་ཆ་ཡོད་པའི་གནད་ལུགས་ཁ་ཤས་ཤིག་འགྲེལ་བརྗོད་བྱེད་ཀྱིན་ཡོད་མོད་རྩ་བའི་ཆ་ནས་བླ་མ་འདི་པའི་ཆོས་སྲིད་གཉིས་ཀྱི་ཐད་ལ་སྙིང་སྟོབས་རྨད་དུ་བྱུང་བ་ཞིག་ཡོད།
འདི་ཡང་བོད་མི་རིགས་སྤྱི་དང་། ནང་བསྟན་ཆོས་ལུགས། རིག་གཞུང་། སྐད་ཡིག་དང་བཅས་པའི་བསོད་ནམས་ཀྱི་བསྐལ་བ་ཞིག་ཡིན། མཁས་དབང་འདི་ཡང་སྐུ་ཚེ་ཡུན་དུ་བརྟན་པའི་སྨོན་འདུན་ཞུ།
དྲ་གྲོགས་རིག་པ་ཅན་ལ་ཞུ་རྒྱུ། ཡིག་ནོར་ཤོར་མེད། ཞུ་ནོར་ཡང་བྱས་མེད།
གསར་འགོད་པ་ལ་ནོར་བཅོས་མ་བྱས་སྔོན་ལ་སོ་སོའི་ཡིག་ནོར་ལ་ལྟོས།
རྒྱལ་བའི་དགོངས་པ་བོད་ནང་དུ་གསལ་བཤད་གནང་བ་བཀའ་དྲིན་བླ་ལྷག་ཏུ་ཆེན། འོན་ཀྱང་རྒྱལ་བ་རང་ཉིད་ཀྱིས་གསལ་བཤད་གནང་བ་ལས་ལྷག་ཞིག་ཁག་པོ་རེད།
གལ་ཆེ་ཤོས་བོད་ནང་དུ་བཤད་དུས་སྐད་ཆ་ཁ་མི་སྒྱུར་རྒྱུ་འདི་རེད། མང་པོ་ཞིག་གིས་སོ་སོའི་འདོད་ཕྱོགས་སུ་བསྒྱུར་ནས་འགྲེལ་བཤད་བྱེད་ཀྱི་འདུག་པས་དེ་ནི་རྩ་བ་ནས་ཡག་པོ་མ་རེད།
དངོས་ནས་རེད་ཤག ཆོས་འཕེལ་ལགས།
རྒྱལ་དབང་བཅུ་བཞི་བ་བགྲེས་ཡོལ་ཏུ་ཕེབ་པ་ཙམ་མ་རེད. ཏཱ་ལའི་བླ་མ་ན་རིམས་ཀྱིས་དབང་བསྒྱུར་རམ དགའ་ལྡན་ཕོ་བྲང་བགྲེས་ཡོལ་ལ་ཕྱིན་པར་འདོད
སྔ་མའི་སྲིད་གཞུང་གི་རྒྱུན་དང་སྲིད་གཞུང་ཡིན་མིན་ལ་དོགས་པ་དང་འདོད་མི་འདོད་ཀྱི་དབང་གིས གསལ་གཤད་ཡང་དང་ཡང་དུ་གནང་དགོས་བྱུང་བར་བསམ་ན. འུ་ཅག་གནས་ལུགས་རང་ཞེན་ཆེ་བའི་གླེན་པ་ཨུ་ཚིག་ཅན་དག་དང.
གསར་འགོད་པ་སྐུ་ཞབས་དཔལྡནལགས་ལ་གུས་ཞུ། བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་མཆོག་གིས་ཞེས་(མཁས་དབང་ཟེརབའི་ཐ་སྙད་འདི་སྦྱར་ན་ལེགས།
མཁས་དབང་ཁོང་གི་བཀའ་སློབ་དྲ་ཐོག་ལ་བཀོད་པ་ཐུགས་རྗེ་ཆེ།
ང་ཚོའི་འཐབ་རྩོད་དེ་བདེན་པ་དང་ཡང་དག་པའི་འཐབ་རྩོད་ཆགས་ཡོད། ང་ཚོའི་འཐབ་རྩོད་དེ་བདེན་པ་དང་ཡང་དག་པའི་ངོ་བོར་གནས་དང་མི་གནས་དེ། ང་ཚོའི་འཐབ་རྩོད་ཀྱི་ཐབས་ལམ་དེ་འཚེ་མེད་ཞི་བའི་ལམ་འབའ་ཞིག་ལ་འགྲོ་ཐུབ་མིན་ལ་རག་ལས་ཡོད། གསུངས་འདུག
གྲོས་མཐུན་དོན་ཚན་ ༡༧ ནང་དུའང་། ༧གོང་ས་མཆོག་གི་སྐུ་དབང་དང་དགའ་ལྡན་ཕོ་བྲང་གི་གནས་བབ་ལ་འགྱུར་བ་མི་གཏོང་བ་དེ་བརྗོད་ཚིག་ནང་གསལ་པོར་བཀོད་ཡོད། བཙན་བྱོལ་དུ་འབྱོར་རྗེས་ང་ཚོ་དམངས་གཙོའི་ངོ་བོར་ཕྱིན་པ་རེད། དམངས་གཙོའི་ངོ་བོར་ཕྱིན་རྗེས་ཁྲིམས་མཐུན་གཞུང་དེ་ཕུན་སུམ་ཚོགས་པ་དང་། ཡར་རྒྱས་ཕྱིན་པ་མ་གཏོགས་དེར་ཉམས་རྒུད་སྤུ་ཙམ་ཡང་ཕྱིན་མེད།
བོད་ཀྱི་ཆོས་བ་སྐོར་གཅིག་གིས་ཟེར་ན། གནས་སྐོར་དང་དུས་དབང་གི་དམིགས་ཡུལ་དང་མཐུན་བཀའ་སློབ་སེམས་དུ་ཕན་ཤོས་གྲས་གཅིག་ནི་ས་སྐྱ་གོང་མ་རིན་པོ་ཆེའི་བཀའ་སློབ་དེ་རེད་ཟེར་གྱི་འདུག འོན་ཅང་དུས་བབ་ཚང་གི་ཕྱོགས་འཛིན་གོག་ཏོ་དེས་དྲ་རྒྱ་འདིར་འགོད་མ་ཐུབ་པས་བཀའ་སློབ་དེ་དངོས་སུ་མ་ཐོས་མཁན་རྣམས་ལ་ཞལ་གསུང་བདུད་བརྩི་དེ་མྱོང་བ་སྐལ་བ་མེད་འདུག