ཉེ་ཆར་ཝུན་གྱིས་ཨ་རབ་དམངས་གཙོར་རྒྱབ་སྐྱོར་གྱི་རྣམ་འགྱུར་བསྟན་པ་དེ་ནི། རྡོ་སྣུམ་ཐོན་ཁུངས་མཉམ་སྤྱོད་ཡོང་ཐབས་ཀྱི་འཁྲབ་སྟོན་ཞིག་ཡིན་འདུག
ཕྱི་ཚེས་༡༥ཉིན་རྒྱ་ནག་གི་སྲིད་འཛིན་ཝུན་ཇ་པའོ་ཡིས་སའོ་དྷི་ཨ་རབ་ (Saudi Arabia)རྒྱལ་ཁབ་ནང་ཨི་སི་ལམ་མཉམ་འབྲེལ་མཐུན་ཚོགས་(Organisation of Islamic Cooperation) ཀྱི་དྲུང་ཆེ་ལཱེ་ས་ནོ་ལེལ་དང་ཐུགས་འཕྲད་སྐབས། རྒྱ་གཞུང་གི་ངོས་ནས་ “ཨ་རབ་ནང་མི་སེར་ཐོག་མུ་མཐུད་དྲག་གནོན་བྱེད་བཞིན་པ་མཚམས་འཇོག་གནང་རྒྱུའི་འབོད་སྐུལ་དང་།འབྲེལ་ཡོད་རྒྱལ་ཁབ་ཁག་ནང་མི་མང་གི་བཅོས་བསྒྱུར་རེ་འདུན་ལ་རྒྱབ་སྐྱོར་ཡོད།” ཅེས་དང་།“ས་གནས་ཁག་གི་གཞུང་གིས་སོ་སོའི་ནང་ཁུལ་གནད་དོན་ཐག་གཅོད་ཐུབ་པའི་ནུས་པ་ལྡན་པར་ཡིད་ཆེས་ཡོད།” སོགས་བརྗོད་ཡོད་འདུག ཝུན་ཇ་པའོ་ཡིས་ཨ་རབ་དམངས་གཙོའི་གསར་བརྗེ་ཐད་སྐད་ཆ་ཐུང་ངུ་ཞིག་མ་གཏོགས་བཤད་མེད་ནའང་། དེ་ནི་ཨ་རབ་གླིང་དུ་ “མེ་ཏོག་བ་སྤྲིའི་གསར་བརྗེ་”བྱུང་སྟེ་ལོ་གཅིག་ལོན་ལ་ཉེ་བའི་རིང་།རྒྱ་གཞུང་དཔོན་རིགས་ཚོས་ཡོངས་ཁྱབ་ཐོག་ཨ་རབ་མི་དམངས་ཀྱི་དམངས་གཙོ་གསར་བརྗེ་ལ་རྒྱབ་སྐྱོར་བྱས་པའི་སྐད་ཆ་ཐོག་མ་དེ་ཆགས་ཡོད་པ་རེད།
ཐེངས་འདིའི་ཝུན་ཇ་པའོ་ཡི་གཏམ་བཤད་དེ་ནི་དོན་གཏམ་དང་སྟོང་གཏམ་གང་ཡིན་མིན་དང་། ཉེ་བའི་རྒྱལ་སྤྱིའི་གནས་སྟངས་འོག་ཁོའི་སྐད་ཆ་དེར་རྒྱབ་ལྗོངས་དང་དོན་སྙིང་གང་ཞིག་ཡོད་མེད་བཅས་ཀྱི་ཐད།རྒྱལ་སྤྱིའི་སྲིད་དོན་དབྱེ་ཞིབ་པ་དག་དང་གསར་ལམ་ཁག་གིས་དོ་སྣང་དང་ངོས་འཛིན་སྣ་ཚོགས་བྱེད་བཞིན་འདུག ཧོང་ཀོང་ཏུང་ཞཱང་དུས་དེབ་ཀྱི་གཙོ་སྒྲིག་པ་ཀྲང་ཝེ་ཀོ་ཡིས་ “ ད་ལྟ་ཝུན་ཕྱི་རྒྱལ་དུ་རྒྱལ་དོན་ལྟ་སྐོར་ལ་བསྐྱོད་ཀྱིན་ཡོད་སྟབས།ཁོའི་སྐད་ཆ་ཚང་མ་རྒྱ་གཞུང་གི་ཕྱི་འབྲེལ་སྐད་ཆ་ཆགས་ཡོད་ལ། དེང་སྐབས་ཨ་རབ་ལ་གནམ་ས་བླ་འོག་བརྗེ་བ་ལྟ་བུའི་འགྱུར་ལྡོག་བྱུང་ཟིན་པ་མ་ཟད། སྲིད་གཞུང་གསར་བ་དེ་དག་ལ་རྒྱ་གཞུང་གིས་སྔར་བཞིན་འབྲེལ་བ་འཛུགས་དགོས་ཀྱི་ཡོད་སྟབས།གལ་སྲིད་ཨ་རབ་ཀྱི་དམངས་གཙོའི་འགྱུར་ལྡོག་ངོས་ལེན་མ་བྱས་ཚེ། སྲིད་གཞུང་དེ་དག་དང་རྒྱུན་ལྡན་གྱི་འབྲེལ་བ་ཞིག་འཛུགས་ཐབས་མེད་པར་གྱུར་ཡོད།དེར་བརྟེན།ཁོའི་སྐད་ཆ་དེ་དག་ནི་འཁྲབ་སྟོན་གྱི་སྟོང་གཏམ་རྐྱང་རེད། ”ཅེས་བརྗོད་འདུག
ཉེ་ཆར་ནུབ་ཕྱོགས་རྒྱལ་ཁབ་ཁག་གིས་ཨི་རན་ལ་གནོན་ཤུགས་སྤྲོད་བཞིན་པའི་སྐབས་དང་བསྟུན་ནས། ཝུན་ཇ་པའོ་ཐེངས་འདིར་སའོ་དྷི་ཨ་རབ་དང་།ཨ་རབ་ཨེར་མེ་མཉམ་འབྲེལ་རྒྱལ་ཁབ།ཁ་ཐར་བཅས་རྒྱལ་ཁབ་གསུམ་ནང་ལྟ་སྐོར་དུ་བསྐྱོད་ཡོད་པ་རེད། ཨི་རན་ནི་རྒྱ་ནག་གི་རྡོ་སྣུམ་ཁུངས་མཉམ་སྤྱོད་ཀྱི་རྒྱལ་ཁབ་ཆེ་ཤོས་ཨང་གསུམ་པ་ཆགས་ཡོད་ལ།ཨ་རིའི་ནུས་ཁུངས་ཉམས་ཞིབ་ཀྱི་རྩིས་ཐོ་ལྟར་ན།ཕྱི་ལོ་༢༠༡༠ལོར་རྒྱ་ནག་ནི་ཨི་རན་གྱིས་རྡོ་སྣུམ་ཐོན་ཁུངས་ཕྱིར་འཚོང་བྱ་ཡུལ་ཚོང་ར་ཆེ་ཤོས་དེ་ཆགས་ཡོད་པ་རེད།ཨ་རི་གཞུང་གིས་རྒྱ་གཞུང་གིས་ཨི་རན་ནང་རྡོ་སྣུམ་ཉོ་ཚོང་ཉུང་དུ་གཏོང་རྒྱུ་རེ་བ་བྱེད་ཀྱིན་ཡོད་ལ། ཡུ་རོབ་དང་གཞན་པའི་རྒྱལ་ཁབ་དག་གིས་ཀྱང་ཨི་རན་ནང་རྡོ་སྣུམ་ཉོ་ཚོང་ཉུང་དུ་གཏོང་ཕྱོགས་ཐད་མོས་མཐུན་བྱས་ཡོད་པ་རེད། གལ་སྲིད། རྒྱ་ནག་གིས་ཨི་རན་དང་ཚོང་འབྲེལ་མུ་མཐུད་བཟུང་བ་ཡིན་ན། ནུབ་ཕྱོགས་རྒྱལ་ཁབ་ཕལ་ཆེ་བའི་དཔལ་འབྱོར་སྟོབས་ཤུགས་ཀྱིས་ཁ་གཏད་དང་ངོ་རྒོལ་བྱ་ཡུལ་ཞིག་ཏུ་འགྱུར་རྒྱུ་ཡིན་སྟབས། ཝུན་ཇ་པའོ་དཀྱིལ་ཤར་ཡུལ་གྲུའི་རྒྱལ་ཁབ་གསུམ་ནང་རྒྱལ་དོན་ལྟ་སྐོར་ལ་ཕྱིན་པ་དེ་ནི། རྒྱ་ནག་གི་ནུས་ཁུངས་ཐོན་སྐྱེད་ཐད་ཀྱི་དཀའ་ངལ་སེལ་ཐབས་ཀྱི་ལམ་བུ་གཞན་ཞིག་འཚོལ་ཆེད་ཡིན་པ་རེད།
ཉུག་ཡོག་དུས་བབ་ཀྱིས་ཕྱི་ཚེས་ ༡༤ ཉིན། ཉེ་བའི་བདུན་ཕྲག་སྔོན་མའི་ནང་རྒྱ་གཞུང་གིས་ཨ་རི་གཞུང་གིས་ཨི་རན་ལ་གནོན་ཤུགས་སྤྲོད་འཆར་གྱི་ལས་གཞི་དེར་ངོ་རྒོལ་གྱི་རྣམ་འགྱུར་དང་། ཨི་རན་རྡུལ་མཚོན་འཆར་འགོད་གནད་དོན་ཐད་གྲོས་མོལ་བྱ་དགོས་པ་བརྗོད་ཡོད་པའི་གནས་ཚུལ་སྤེལ་འདུག་ལ། ཨ་རིའི་ཉུག་ཡོག་གྲོང་ཁྱེར་སློབ་ཆེན་གྱི་ཁྲིམས་སྲིད་དགེ་རྒན་ཆེན་མོ་ཞཱ་མིན་གྱིས། “ཝུན་གྱི་སྐད་ཆ་དེའི་ནང་ཕྱིའི་རྒྱལ་ཁབ་ཀྱི་ཐེ་གཏོགས་སླེབས་འཇུག་མི་རུང་བའི་ཚིག་ཟུར་ཐོན་ཡོད་པ་དང་། སྐད་ཆ་དེའི་དམིགས་གཏད་ས་ནི་ཨ་རི་གཙོས་པའི་ནུབ་ཕྱོགས་རྒྱལ་ཁབ་ཁག་དང་། ལྷག་པར་དུ་བྱང་ཆིངས་མཉམ་འབྲེལ་གྱི་སྒྲིག་འཛུགས་བསྟན་ཡོད་པ་རེད། ངས་བསམ་པར་ཝུན་གྱི་སྐད་ཆ་དེའི་ནང་དོན་གཞན་ཞིག་ནི། རྒྱ་གཞུང་གིས་ནུབ་ཕྱོགས་རྒྱལ་ཁབ་དག་གིས་འཛམ་གླིང་དམག་ཆེན་གཉིས་པའི་རྗེས་ཀྱི་རང་བཙན་རྒྱལ་ཁབ་དག་ལ་ཤུགས་རྐྱེན་སྤྲོད་རྒྱུར་ངོ་རྒོལ་ཡོད་པ་བསྟན་འདུག རྒྱུ་མཚན་གཙོ་བོ་ནི་གནད་དོན་དེས་ཐད་ཀར་རྒྱ་ནག་ལ་འཇིགས་སྣང་ཞིག་སླེབས་ཀྱིན་ཡོད་པས་རེད།” ཅེས་བརྗོད་དེ། ཝུན་གྱི་སྐད་ཆ་དེའི་ནང་རྒྱ་གཞུང་ལ་སོ་སོའི་ནང་ཁུལ་སྤྱི་ཚོགས་ཀྱི་དཀའ་ངལ་སེལ་རྒྱུའི་ནུས་པ་ཡོད་ཚུལ་བསྟན་ཡོད་ནའང་། ཁ་ཊ་ཧྥེ་དང་མའོ་བྷ་ར་ཁི། དེ་བཞིན་སི་རེ་ཡཱ་(Syria)བཅས་ཀྱི་གནས་སྟངས་དང་། ཉེ་ཆར་རྒྱ་ནག་ནང་འབྱུང་བཞིན་པའི་ཝུ་ཁཱན་སྡེ་བའི་མཚོན་པའི་གཞི་རིམ་མང་ཚོགས་ཀྱི་ཡར་ལངས་ངོ་རྒོལ་དང་། བོད་ནང་མུ་མཐུད་འབྱུང་བཞིན་པའི་རང་ལུས་མེར་བསྲེགས་དོན་རྐྱེན་བཅས་ཀྱིས། རྒྱ་གཞུང་ལ་ནང་ཁུལ་དཀའ་ངལ་སེལ་བའི་ནུས་སྟོབས་མེད་པ་བསྟན་ཡོད་སྐོར་བརྗོད་འདུག
ཉེ་ཆར་ཝུན་གྱིས་ནུབ་ཨེ་ཤ་ཡ་དང་བྱང་ཨ་ཧྥུ་རི་ཁ་ས་ཁུལ་གྱི་ཞི་བདེ་དང་བརྟན་ལྷིང་ཐད། རྒྱ་གཞུང་དང་ཨི་སི་ལཱམ་མཉམ་འབྲེལ་མཐུན་ཚོགས་ (IslamicCooperation Organization) གཉིས་ལ་སྤྱི་མཐུན་གྱི་ཁེ་ཕན་ཡོད་སྐོར་བརྗོད་ཡོད་པའི་ཐད། དགེ་རྒན་ཆེན་མོ་ཞཱ་མིན་གྱིས་གནམ་འོག་མུའུ་སི་ལཱམ་(Muslim) ཡོངས་རྫོགས་ཁྱིམ་ཚང་གཅིག་ལ་ངོས་འཛིན་གནང་མཁན་གྱི་ཨི་སི་ལཱམ་རྒྱལ་ཁབ་ཁག་དང་། སོ་སོའི་མངའ་འོག་གི་ཨི་སི་ལཱམ་ཆོས་ལུགས་པར་དགྲ་འཛིན་དྲག་གནོན་བྱེད་བཞིན་པའི་རྒྱ་གཞུང་གཉིས་བར། ཨི་སི་ལཱམ་ཆོས་ལུགས་གནད་དོན་ནི་ཕྱོགས་གཉིས་ཀྱི་ཚོང་ལས་འབྲེལ་བའི་འགལ་རྐྱེན་ཆེན་པོ་ཞིག་ཏུ་གྱུར་ཡོད་པའི་ངོས་འཛིན་བྱས་ཡོད་པ་རེད།
ནུབ་ཨེ་ཤ་ཡ་དང་བྱང་ཨ་ཧྥི་རི་ཁ་ས་ཁུལ་ནང་འཛམ་གླིང་གི་རྡོ་སྣུམ་སྤྱིའི་ཐོན་ཚད་ཀྱི་བརྒྱ་ཆ་ ༥ གསོག་ཉར་བྱས་ཡོད་པ་མ་ཟད། འཛམ་གླིང་གི་རང་བྱུང་སོལ་རླངས་སྤྱིའི་ཐོན་ཚད་ཀྱི་བརྒྱ་ཆ་ ༤༠ ལྷག་ཉར་གསོག་བྱས་ཡོད་པ་རེད།
གསར་འགོད་པ། ཚེ་རིང་རྒྱལ།
ཉེ་ཆར་ཝུན་གྱིས་ཨ་རབ་དམངས་གཙོར་རྒྱབ་སྐྱོར་གྱི་རྣམ་འགྱུར་བསྟན་པ་དེ་ནི། རྡོ་སྣུམ་ཐོན་ཁུངས་མཉམ་སྤྱོད་ཡོང་ཐབས་ཀྱི་འཁྲབ་སྟོན་ཞིག་ཡིན་འདུག ཟེར།
ཝུན་ཅ་པོ་ཡིས་གསུངས་རྒྱུར། དེང་སྐབས་འཛམ་གླིང་ཡོངས་སུ་རྙོག་འཛིང་ཆེ་བའི་ལོ་རྒྱུས་རང་བཞིན་གྱི་འགྱུར་ལྡོག་འབྱུང་བཞིན་ཡོད་པ་དང་། ཨེ་ཤ་ཡ་ནུབ་མ་དང་ཨ་ཧྥེ་རི་ཀ་བྱང་མ་ས་ཁུལ་གྱི་གནས་བབ་ལ་ཡང་འགྱུར་ལྡོག་ཆེན་པོ་བྱུང་བ་དེས་ས་ཁུལ་དང་རྒྱལ་ཁབ་འགྲན་རྩོད་ཀྱི་གནས་སུ་ལྷུང་དུ་བཅུག ཀྲུང་གོས་ས་ཁུལ་རང་གི་འཕེལ་རྒྱས་ལ་ཧ་ཅང་ཡིད་འཇོག་བྱེད་ཀྱིན་ཡོད་པར་མ་ཟད། ས་ཁུལ་གྱི་ཞི་བདེ་དང་འཕེལ་རྒྱས་ལ་རོགས་རམ་བྱེད་འདོད་ཡོད་ཅེས་གསུངས།
དོན་ངོ་མ་ཝིན་གྱིས་འདི་ཙམ་ལས་བཤད་མི་འདུག
རྒྱ་ནག་སྲིད་བློན་ཆེན་མོ་ཝུན་ཇ་པའོ་ནི་མཁྱེན་རྒྱ་ཡངས་ལ་འབང་ལ་བྱམས་པ་ཞིག་ཡིན་རབ་ཡོད། དེས་ན་ད་ཐང་གི་སྐད་ཆ་འདི་ནི་དོན་དངོས་ཐོག་ནས་ཡར་རྒྱས་ཀྱི་རྣམ་པ་ཞིག་རེད། རིམ་ཀྱིས་བོད་ལ་ཡང་ལྷོད་ཡང་ཞིག་གཏོང་མི་སྲིད་པ་མ་རེད་སྙམས།
ཝུན་ནི་བསམ་རྒྱ་ཆེ་བ་ཅན་ཞིག་རེད་བསམ་བསམ་འདུག་མོད། མགོ་ཡི་ཞྭ་མོ་དང་། རྐང་གི་ལྕགས་སྒྲོག་ཚ་དྲག་དུས་གོ་སྐབས་ཅང་མི་འདུག་ཀ
དམངས་གཙོར་འདོད་མོས་མེད་མཁན་ཞིག་གིས། དམངས་གཙོར་རྒྱབ་སྐྱོར་བྱས་པ་ནི་འཁྲབ་སྟོན་ཞིག་ལོས་ཡིན་འདོད་ཀི།
ངས་ནི་སྐུ་ཞབས་ཝུན་གྱིས་རྒྱལ་ཕྱི་ནང་གང་སར་འཕག་འཚག་མང་ཙམ་རྒྱག་ཐུབ་རྒྱུར་རེ་བ་བྱེད་ཀྱིན་ཡོད།