སུད་སུར་ལོ་སར་གཏོང་གི་འདུག

ཉེ་ལམ་སུད་སུ་རྒྱ་ནག་གཞུང་ཚབ་ཀྱིས་ཛིའུ་རིག་གྲོང་ཁྱེར་གྱི་མགྲོན་ཁང་ཞིག་ཏུ་བོད་ཀྱི་ལོ་སར་སྤྲོ་ཚོགས་བསྡུས་ཡོད་ཀྱང་། ཁུལ་དེའི་གཞོན་སྐྱེས་ཁག་ཅིག་གིས་ངོ་རྒོལ་བྱས་སྟབས་ལོ་སར་སྤྲོ་ཚོགས་ལམ་ལྷོངས་བྱུང་མི་འདུག

ཟླ་འདིའི་ཕྱི་ཚེས་ ༤ ཉིན་སུད་སུ་ཛིའུ་རིག་གྲོང་ཁྱེར་གྱི་མགྲོན་ཁང་ཆེན་མོ་ཞིག་ཏུ། སུད་སུ་བཅའ་སྡོད་རྒྱ་ནག་གཞུང་ཚབ་ཁང་གིས། སུད་སུ་ཁུལ་གྱི་བོད་རིགས་ཚུད་པའི་ཁྱོན་མི་ ༡༠༠ ལྷག་འབོད་འགུག་གིས་བོད་ཆུ་འབྲུག་ལོའི་ལོ་སར་སྤྲོ་ཚོགས་བསྡུས་ཡོད་ཀྱང་། ཁུལ་དེར་གནས་སྡོད་བོད་རིགས་གཞོན་སྐྱེས་ཁག་ཅིག་གིས་ངོ་རྒོལ་སྐད་འབོད་བྱས་སྟབས། ལོ་སར་སྤྲོ་ཚོགས་དེ་ལམ་ལྷོངས་ལྡན་པ་ཞིག་བྱུང་མི་འདུག  

ངོ་རྒོལ་ལས་འགུལ་ནང་ཞུགས་མཁན་སྐུ་ཞབས་འཇམ་དབྱངས་ལགས་ཀྱིས་གསར་ལམ་ཁག་ཏུ་བརྗོད་པ་ལྟར་ན། ལོ་སར་སྤྲོ་ཚོགས་དེར་བོད་ནས་མཚོ་ལྷོ་བོད་རིགས་རང་སྐྱོང་ཁུལ་མི་རིགས་ཟློས་གར་ཚོགས་པ་དང་། མཚོ་སྔོན་ཞིང་ཆེན་གེ་སེར་སྒྲུང་ཟློས་གར་ཚོགས་པ་གཉིས་དང་། དམངས་ཁྲོད་གཞས་པ་ཞང་མོ་མཚོ་དང་མཁར་བྱམས་རྒྱལ། སྒྲོལ་མ་སྐྱིད། གཡུ་སྒྲོན། གཡང་ཅན། རིན་ཆེན་ཚེ་རིང་། སྙིང་རྩེ་རྒྱལ་བཅས་ཁྱོན་མི་བཅུ་གཅིག་འབོད་འགུག་བྱས་ཡོད་འདུག

འཇམ་དབྱངས་ལགས་ཀྱིས་བརྗོད་དོན། “ ལོ་སར་སྤྲོ་ཚོགས་དེར་སུད་སུ་ཁུལ་དུ་བོད་མི་༢༠ཙམ་འཛུལ་ཞུགས་བྱས་འདུག ང་ཚོས་བོད་ཀྱི་རྒྱལ་དར་འཕྱར་བཞིན་ད་ལོར་བོད་ལ་ལོ་སར་མེད་ཅེས་ངོ་རྒོལ་སྐད་འབོད་བྱས་སྐབས། ལོ་སར་སྤྲོ་ཚོགས་སྟེང་ཞུགས་མཁན་བོད་མི་དེ་ཚོ་དོགས་མ་བདེ་བ་གནང་གི་འདུགརིགས་ཁ་ཤས་མི་ཚོགས་ཁྲོད་སྐུང་ནས་སྡོད་ཀྱི་འདུག ང་ཚོས་ངོ་རྒོལ་བྱས་པ་དེར་རྒྱུ་མཚན་གཉིས་ཡོད། གཅིག འདས་པའི་ལོ་གཅིག་རིང་བོད་མི་མང་པོ་འདས་གྲོངས་ཕྱིན་ཡོད་ཀྱང་། རྒྱ་ནག་གཞུང་ཚབ་ཀྱིས་མྱ་ངན་གྱི་ཚབ་ལ་ལོ་སར་སྤྲོ་ཚོགས་བསྡུས་སྟབས། ང་ཚོས་དེར་ངོ་རྒོལ་བྱས་པ་ཡིན། གཉིས། བོད་ནང་དུ་ཉིན་ལྟར་བོད་མི་མང་པོའི་ཚེ་སྲོག་ཤོར་བཞིན་པའི་སྐབས་ལ། སུད་སུར་སྡོད་མཁན་བོད་མི་རེ་ཟུང་རྒྱ་ནག་གཞུང་ཚབ་ཀྱིས་གོ་སྒྲིག་བྱས་པའི་ལོ་སར་སྤྲོ་ཚོགས་ཐོག་ཞུགས་ན་ཤིན་ཏུ་མི་འོས་པ་ཞིག་རེད་སྙམ་སྟེ་ངོ་རྒོལ་བྱས་པ་ཡིན། ” ཞེས་བརྗོད་བྱུང་།

གསར་འགོད་པ། དཔལ་ལྡན།