ཏང་གི་གདོང་རིས་གསལ་སྟོན་གྱི་ཚེ་འབར་སྒྲོན་མེ།

ཚེ་སྲོག་མེ་བསྲེགས་ཀྱིས་བདེན་པ་བདར་བའི་ཞི་རྒོལ་འདི་ནི་རྒྱ་ནག་གི་སྲིད་བྱུས་ལ་འགྱུར་ལྡོག་གི་རེ་བ་ཡོད་མེད་དང་། རྒྱ་གཞུང་དབང་འཛིན་པ་ཚོར་བོད་ལ་དོན་དམ་གྱི་བརྟན་ལྷིང་དང་བདེ་སྐྱིད་ཀྱི་འཚོ་བ་བསྐྲུན་རྒྱུའི་ཆོད་སེམས་ཡོད་མེད་བསྔོག་འབྲུ་བྱེད་པའི་རླབས་ཆེན་གྱི་ཚོད་བགམ་ཐེངས་ཤིག་ཡིན།

                                                                                                འཇིགས་མེད་བློ་གྲོས།

སྤྱི་ལོ་ ༡༩༠༨ ལོར་མའོ་ཀྲུ་ཞི་བུད་མེད་ལུའུ་དང་གཉེན་སྒྲིག་བྱས་ཤིང་། གཉེན་སྒྲིག་གི་བཀོད་སྒྲིག་ཡོངས་རྫོགས་སྲོལ་རྒྱུན་ལྟར་མའོ་ཡི་ཕ་རྒན་གྱིས་བྱས་པ་ལས་མའོ་སྒེར་ངོས་ལ་བུད་མེད་དེ་དང་གཉེན་སྒྲིག་གི་འདོད་འདུན་གཏན་ནས་མེད་ཚོད། བུ་ཕྲུག་གི་འདོད་འདུན་ལ་བརྩི་བཀུར་མི་བྱེད་པའི་སྲོལ་རྒྱུན་གྱི་གཉེན་སྒྲིག་ཆོ་གར་མའོ་གཏན་ནས་ཡིད་མོས་མ་བྱུང་བ་མ་ཟད།  གཉེན་སྒྲིག་གི་བྱ་བ་ཟིན་ནས་ལོ་ངོ་དགུ་དང་བུད་མེད་ལུའུ་གྲོངས་རྗེས་ཀྱི་ལོ་ངོ་བདུན་གྱི་རྗེས།  མའོས།  “རྣམ་ཀུན་རྒྱ་རིགས་ཕ་མ་ཚོས་སོ་སོའི་བུ་ཕྲུག་ལ་བརྒྱུད་ནས་བཙན་གཡེམ་བྱེད་ཀྱིན་ཡོད་” ཅེས་སྲོལ་རྒྱུན་གཉེན་སྒྲིག་གི་ཆོ་གར་འཐད་པ་རྩ་བ་ནས་མེད་པའི་ཆོད་སྡོམ་ཡི་གེར་བཀོད། མའོ་ཡིས་ཕོ་མོ་གཉིས་ཕན་ཚུན་རང་མོས་ཀྱིས་མིན་པར་གཞན་གྱི་བརྒྱུད་སྐུལ་གྱི་ལམ་ནས་འཁྲིག་སྤྱོད་ཀྱི་བྱ་བར་ཞུགས་པ་ནི་དོན་གྱིས་བཙན་གཡེམ་ཡིན་པར་སྡོམ་ཚིག་བཀོད་ཡོད།  

རིགས་ལམ་འདིའི་ཐད་ནས་བཤད་ན། མའོ་དང་མའོ་ཡི་རྗེས་འབྲང་པ་ཚོས་ད་ལྟའི་བོད་ནང་གི་རང་ལུས་མེར་བསྲེགས་ཀྱིས་རྐྱེན་འདས་སུ་སོང་བ་དག་ནི། རྒྱ་ནག་གཞུང་གིས་གསོན་བསྲེགས་ཀྱིས་དམར་གསོད་བཏང་བར་ངེས་པར་དུ་ངོས་འཛིན་དགོས་པར་གྱུར་ཡོད་དེ། ལན་གྱིས་ཟློག་པ་མེད་པའི་མགོ་མཚུངས་ཀྱི་རིགས་པའི་སྟོབས་ལས་གོང་གི་བཤད་སྟངས་དེ། “རྣམ་ཀུན་རྒྱ་གཞུང་དབང་འཛིན་པ་ཚོས་བོད་རིགས་སྐྱ་སེར་ཕོ་མོ་དག་གསོན་བསྲེགས་གཏོང་གི་ཡོད་” ཅེས་པར་འགྱུར་གྱིན་ཡོད།  དེས་ན་ད་ལྟ་ང་ཚོས་གཞིས་བཞུགས་སྤུན་ཟླ་ཚོར་ཚེ་སྲོག་མེར་བསྲེགས་གྱི་ཞི་རྒོལ་མཚམས་འཇོག་རོགས་ཞེས་རེ་སྐུལ་ཞུ་བའི་ཧུར་བརྩོན་ངང་ཙམ་ཀློད་དེ།  རྒྱ་གཞུང་དབང་འཛིན་པ་ཚོར་ཉེས་མེད་བོད་མི་སྐྱ་སེར་གསོན་བསྲེགས་ཀྱི་གདུག་རྩུབ་སྲིད་བྱུས་མཚམས་འཇོག་བྱེད་རོགས་ཞེས་འབོད་སྒྲ་ཤུགས་ཆེ་རུ་གཏོང་བའི་དུས་སུ་སླེབས་ཡོད།

ཚེ་སྲོག་མེ་རུ་བསྲེགས་པའི་ཞི་རྒོལ་འདི་ལས་ལྷག་པའི་བོད་དོན་བདེན་པ་བདར་ལུགས་ཤིག་མེད་ཅིང་། མིའི་སེམས་གཏིང་གི་མངོན་འདོད་ཅི་ཡིན་ར་སྤྲོད་ཀྱི་བརྒྱུད་ལམ་ཚད་མཐོ་ཤོས་ཀྱང་འདི་ཁོ་ན་ཡིན་ལས་གཞན་དུ་མ་མཐོང་མོད། རྒྱ་གཞུང་གིས་ཐེངས་འདིའི་ཞི་རྒོལ་ལ་རྣམ་འགྱུར་ཅི་འདྲ་ཞིག་སྟོན་མིན་དེ་རྒྱ་གཞུང་གིས་དོན་དམ་བོད་ཐོག་འཛིན་པའི་སྲིད་བྱུས་ཀྱི་ངོ་བོ་ཇི་འདྲ་ཡིན་མིན་དང་བོད་མིའི་དགོས་འདུན་ལ་དང་ལེན་བྱེད་འདོད་ཡོད་མེད་གསལ་སྟོན་གྱི་གོ་སྐབས་གལ་ཆེན་ཞིག་ཡིན། དེས་ན། རླབས་ཆེན་ཞི་རྒོལ་མགོ་བརྩམས་ནས་རྒྱུན་རིང་སོང་ཟིན་ཞིང་། བོད་མིའི་ལུས་སེམས་ཀྱི་གདུང་ཤུགས་ཇེ་དྲག་ཏུ་འགྲོ་བཞིན་ཡོད་ཀྱང་།  རྒྱ་གཞུང་གིས་ཡ་ལན་ཙམ་སྤྲོད་རྒྱུ་ཕར་ཞོག དྲག་ཤུགས་དང་གཏུམ་སྤྱོད་ཉིན་རེ་བཞིན་ཆེ་རུ་གཏོང་བཞིན་ཡོད་པའི་གནས་བབ་ལ་བལྟས་ན། གུང་ཁྲན་ཏང་ལ་དོན་དམ་བོད་ཐོག་ལེགས་བཅོས་ཀྱི་འཆར་སྣང་དང་གཅེས་སེམས་ཅི་ཙམ་ཡོད་མེད་ཧྲིལ་གྱིས་བསྟན་ཡོད་ལ། དུས་འདི་དང་བསྟུན་ཏེ་ང་ཚོས་གུང་ཁྲན་ཏང་ལ་བཅོལ་བའི་གཉིས་ཕན་གྱི་ཕུགས་འདུན་དེ་ཡང་འགྲུབ་རྒྱུ་མེད་པའི་རྨི་ལམ་ཞིག་ཡིན་མིན་གྱི་དྭོགས་སློང་གཏིང་ཟབ་ཀྱིས་གནང་དགོས།

བོད་རྒྱའི་དཀའ་རྙོག་སེལ་བའི་ཞི་མོལ་གྱི་དགོས་མཁོ་དེ་ཡང་བོད་རྒྱའི་བར་མིག་མཐོང་ལག་ཟིན་གྱི་དཀའ་ངལ་ཛ་དྲག་ཆགས་བཞིན་པའི་སྐབས་སུ་དོན་འཁྱོལ་བྱ་དགོས་མོད། མེར་བསྲེགས་དང་མེ་མདའ་འཐབ་པའི་གནས་བབ་འོག་བོད་རྒྱ་ཞི་མོལ་གྱི་དགོས་མཁོ་བརླགས་སོང་བ་ཡིན་ན། བོད་རྒྱ་ཞི་མོལ་ནི་བོད་རྒྱའི་དཀའ་རྙོག་སེལ་བྱེད་ཀྱི་ཐབས་ལམ་ཞིག་མིན་པར། བོད་རྒྱའི་འགན་ཡོད་མི་སྣ་ཚོས་དུས་བདེ་ཞོད་འཇགས་སྐབས་གླེང་སློང་བྱ་རྒྱུའི་ལྟ་གྲུབ་ཙམ་དུ་འགྱུར་སོང་བ་རེད། དེར་བརྟེན། ད་ལྟ་ནི་དོན་དངོས་ཀྱིས་བོད་རྒྱ་ཞི་མོལ་ལ་ང་ཚོའི་བསམ་བློའི་ནང་གི་བོད་རྒྱ་ཞི་མོལ་ལ་ཡོད་པའི་གནས་བབ་དང་རིན་ཐང་ཨེ་ལྡན་གྱི་དྭོགས་སློང་ནན་ཏན་བྱེད་པའི་དུས་སྐབས་ཤར་ཟིན་པ་ཡིན་སྲིད་ལ།  རྒྱ་གཞུང་ལ་མཚོན་ན་བོད་རྒྱ་ཞི་མོལ་ཟེར་བ་ནི་ནམ་རིང་འཁྱོལ་ཐབས་ཀྱི་སྒྲུང་ངོ་མ་ཞིག་ལས་གཞན་ཅི་ཡང་མིན་པ་དང་། ཞི་མོལ་གྱི་སྒོ་མོ་དུས་ནམ་ཡང་ཡངས་པོར་ཕྱེ་ཡོད་ཟེར་བར་ཆབ་སྲིད་ཀྱི་དགོས་མཁོ་ཞིག་གི་རིན་ཐང་ལས་གཞན་གྱི་དོན་སྙིང་ཅི་ཡང་མེད་པའི་ར་སྤྲོད་གཙང་མ་བྱས་པར་ངོས་འཛིན་རུང་སྲིད།

དེང་སྐབས་རྒྱ་གཞུང་གིས་ཕྱོགས་གཅིག་ནས་བོད་མི་ཞི་རྒོལ་བའི་ཐོག་མེ་མདའ་འཁྱེར་ནས་མཆོང་བཞིན་ཡོད་ལ། ཕྱོགས་གཅིག་ནས་བོད་རང་སྐྱོང་ལྗོངས་ཁུལ་གྱི་དགོན་སྡེ་དང་གྲོང་ཁུལ་ཡོངས་སུ་རྒྱལ་གཅེས་ཆོས་གཅེས་ཀྱི་སློབ་གསོ་དང་ལག་བསྟར་གྱི་ལས་གཞི་འཁྱེར་ནས་རྒྱུག་གི་ཡོད། འདི་ལྟར་བོད་ཀྱི་སྐད་ཡིག་སློབ་གྲྭའི་ར་སྐོར་ལས་རྒྱང་འཕུད་གཏོང་གང་ཐུབ་བྱེད་ཅིང་། དགོན་སྡེ་ཁག་ལས་དོན་རུ་ཁག་གཅའ་སྡོད་ཀྱི་གནས་གཞིར་བསྒྱུར་བཞིན་པ། ཞིང་འབྲོག་ས་ཁུལ་དུ་ཕུགས་བརྟན་རང་བཞིན་མིན་པའི་དཔལ་འབྱོར་གྱི་བསླུ་བྲིད་ཤུགས་ཆེན་གཏོང་པ་སོགས་བོད་ཁམས་རྒྱ་ཁམས་སུ་སྒྱུར་བྱེད་ཀྱི་ལས་དོན་ཁག་ཚ་ཚ་འུར་འུར་གྱིས་སྤེལ་རྒྱུར་སྐུལ་འདེད་གཏོང་བ་ཁོ་ན་ལས།  མ་བཅོས་སེམས་ཁོང་ནས་སྒྲོག་གིན་པའི་བོད་མིའི་འབོད་སྒྲ་དང་ཚེ་སྲོག་མེ་སྒྲོན་གྱི་ཞི་རྒོལ་ལ་རྒོལ་རྡུང་གཏོང་རྐྱང་བྱེད་པའི་གནས་བབ་འདིས།  དེ་སྔོན་༸གོང་ས་སྐྱབས་མགོན་ཆེན་པོས་རྒྱ་ནག་གི་སྲིད་བྱུས་མུ་མཐུད་དེ་མུར་གནས་ཚེ་ལོ་ངོ་བཅོ་ལྔ་ཙམ་གྱི་དུས་ཡུན་ནང་བོད་ཀྱི་རིག་གཞུང་རྩ་སྟོང་དུ་འགྱུར་སྲིད་པར་གསུངས་པའི་ཚོད་དཔག་དེ་གཏན་ནས་ནོར་མེད་པའི་ར་སྤྲོད་མངོན་གསལ་རེད།

ད་ལྟ་ཁོ་བོར་དངངས་སྐྲག་ཅིག་ཡོད་པ་ནི་ད་ལྟའི་བོད་ནང་གི་ཚེ་སྲོག་མེ་སྒྲོན་གྱི་རླབས་ཆེན་ཞི་རྒོལ་དེ་ཁ་ཕྱོགས་གང་ཞིག་ཏུ་འགྱུར་མིན་དང་དེའི་མཇུག་འབྲས་ཅི་འདྲ་ཆགས་མིན་གཉིས་ཡིན། རང་སྲོག་མེ་ལ་བསྒྲོན་ཏེ་བདེན་པ་བདར་བའི་སྤྱོད་པ་ལས་ཚད་མཐོ་བའི་ཞི་རྒོལ་བྱེད་སྟངས་ཤིག་ཕལ་ཆེར་མེད་ལ། རླབས་ཆེ་ཤོས་ཀྱི་ཞི་རྒོལ་འདིས་བློ་ཡིད་ཚིམ་ངེས་ཀྱི་མཇུག་འབྲས་ཤིག་འདྲེན་མ་ཐུབ་ཚེ། ཕན་ཚུན་གཉིས་ཕན་དང་འཚེ་མེད་ཞི་བའི་འཐབ་རྩོད་ཀྱི་ནུས་ཤུགས་ལ་དྲི་རྟགས་ཤིག་བསླེབ་ངེས་ཤིང་། འབྱུང་འགྱུར་ཁ་བ་རི་པའི་ན་གཞོན་ཚོས་རྒྱལ་ཁབ་དང་མི་རིགས་ཀྱི་འཐབ་རྩོད་བརྒྱུད་རིམ་ཁྲོད། བགྲོད་ལམ་གང་འདྲ་ཞིག་འདེམས་མིན་ལ་རྨང་གཞིའི་འགྱུར་ལྡོག་ཆེན་པོ་ཞིག་འགྲོ་སྲིད།

ཐེངས་འདིར་དབུས་བོད་མིའི་སྒྲིག་འཛུགས་ཀྱི་བཀའ་ཤག་དང་གྲོས་ཚོགས་སུ་རེ་འདུན་ཞིག་ཞུ་རྒྱུ་ནི། ད་ལྟའི་བར་སྒྲིག་འཛུགས་ཀྱི་སྣེ་འཁྲིད་འོག་གདུང་སེམས་མཉམ་སྐྱེད་དང་བདེན་དོན་དྲིལ་བསྒྲགས་ཀྱི་ལས་དོན་སྣེ་མང་སྤེལ་བ་བོད་རིགས་སྤྱིའི་གཟི་བརྗིད་ཅིག་ཏུ་ཚོར་ཀྱི་ཡོད་ལ། ང་ཚོའི་ནུས་སྟོབས་དང་འཁོས་དཔག་གི་ཚད་གཞི། ཡུལ་དུས་ཀྱི་གནས་བབ་ནས་བཤད་ན་ཡང་ཧ་ཅང་ཡག་པོ་བྱུང་ཡོད་པ་ལས། ལབ་གླེང་གི་གཞི་རྩ་ཡོད་པ་ཞིག་ཏུ་ངོས་འཛིན་ཞུ་ཡི་མེད། འོན་ཀྱང་ད་དུང་ང་ཚོར་མ་འདང་པ་དང་འཐུས་ཤོར་གྱི་ཞན་ཆ་ངེས་པར་དུ་ཡོད་པའི་གནས་བབ་ལ་ངོས་ལེན་དགོས་ཤིང་རྟོག་ཞིབ་ནན་ཏན་བྱ་དགོས།  ད་ལྟའི་བོད་ནང་གི་གནས་བབ་སྤྱི་དང་ལྷག་དོན་བདེན་དོན་དྲིལ་བསྒྲགས་ཀྱི་ཚད་གཞི་རང་རེའི་སྤྱི་ཚོགས་ཀྱི་ཁྱབ་ཁོངས་ལས་བརྒལ་ཏེ་རྒྱལ་སྤྱི་རང་བཞིན་ཅན་དུ་བསྒྱུར་བར་ལས་དོན་གལ་ཆེན་ཞིག་གང་དག་ཅིག་ལྷག་ཡོད། དེ་ནི་རྒྱལ་སྤྱིའི་གྲོས་ཚོགས་ཁག་གི་བོད་དོན་རྒྱབ་སྐྱོར་ཚོགས་པའི་ཚོགས་མི་དང་བོད་དོན་ཉམས་ཞིབ་པ། རྒྱལ་སྤྱིའི་ཐོག་གི་དྲག་ཆེན་གསར་ལམ་ཁག་གི་མི་སྣ། རྒྱ་རིགས་དམངས་གཙོ་དོན་གཉེར་བ། དེ་བཞིན། རང་རེའི་གཞུང་གི་ཆབ་སྲིད་སྣེ་མོ་བ་རྣམ་པ་དང་། གཞུང་འབྲེལ་མིན་པའི་ཚོགས་སྡེ་ཁག་གི་མགོ་འཁྲིད། བོད་པའི་ཆོས་ལུགས་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པ་བཅས་གནད་ཡོད་མི་སྣ་ཁོ་ནའི་གྲུབ་པའི་ཚོགས་ཆེན་ཞིག་ཨ་རིའི་རྒྱལ་སའམ་ཡུ་རོབ་གྲོང་ཁྱེར་ཆེ་གྲས་ཤིག ཡང་ན་རྒྱ་གར་གྱི་རྒྱལ་ས་ལྡི་ལི་གང་རུང་ཞིག་ནས་སྐོང་ཚོགས་གནང་དགོས་ཤིང་། ཚོགས་ཐོག་གི་བརྗོད་གཞི་ནི། བོད་ནང་ཞི་རྒོལ་གྱི་འབྱུང་རྐྱེན་དང་གནས་བབ། རྒྱ་ནག་གི་ཆབ་སྲིད་རང་བཞིན། བོད་ནང་གསར་འགོད་ལས་རིགས་ཀྱི་གནས་སྟངས།  དགོན་སྡེ་ཁག་གི་རྨང་གཞིའི་ལམ་སྲོལ་ལ་བསྒྱུར་བཅོས་བྱེད་པའི་ཆབ་སྲིད་ཀྱི་མཇུག་འབྲས་སོགས་གསར་འགོད་ལས་རིགས་དང་བླ་སྤྲུལ་རྣམ་པ་ཀུན་ལ་ད་ལྟའི་གནས་བབ་ལ་འབྲེལ་ཆགས་ཡིན་པའི་བརྗོད་གཞི་གལ་ཆེན་ཁག་འཇོག་དགོས། ཚོགས་ཆེན་འདི་འདྲ་ཞིག་མགྱོགས་མྱུར་གྱིས་སྐོང་ཚོགས་ཐུབ་པ་ཡིན་ན། བོད་དོན་ལ་ནང་དོན་དང་དྲིལ་བསྒྲགས་གཉིས་ཐད་ནས་ཐོད་བརྒལ་རང་བཞིན་གྱི་ཕན་འབྲས་རླབས་ཆེན་ཞིག་སོན་ཐུབ་པའི་དགེ་ཚན་ལྡན་ཡོད།།