བོད་དོན་ལ་རྒྱབ་སྐྱོར་བྱས་ཏེ་རྒྱ་གར་གྱི་བདེ་འཇགས་སྲུང་བ།

རྒྱ་ནག་གིས་མདོ་དབུས་མཐོ་སྒང་གི་རི་ཆུ་ནགས་གསུམ་ལ་བཤུ་གཞོག་ཚད་མེད་བཏང་བ་དེས་རྒྱ་གར་བྱང་ཤར་ཁུལ་དུ་ཤུགས་རྐྱེན་ཆེན་པོ་ཐེབས་ཏེ། རང་བྱུང་ཁམས་ཀྱི་གནོད་འཚེ་སྣ་ཚོགས་འབྱུང་བཞིན་ཡོད་སྟབས། ད་ཆར་བྱང་ཤར་ཁུལ་གྱི་མི་མང་ཕྱོགས་བསྒྲིལ་གྱིས་བོད་དོན་ལ་རྒྱབ་སྐྱོར་དང་རྒྱ་ནག་ལ་ངོ་རྒོལ་བྱེད་དགོས་པའི་བསམ་ཚུལ་སླེབས་བཞིན་ཡོད།

ཉེ་ལམ་ནས་བོད་ནང་གི་ཛ་དྲག་གནས་སྟངས་སྔར་བས་ཇེ་སྡུག་ཏུ་འགྲོ་བཞིན་ཡོད་པའི་སྐབས་འདིར། རྒྱ་གར་བྱང་ཤར་ཁུལ་གྱི་བོད་དོན་རྒྱབ་སྐྱོར་བ་(The Core Group for Tibetan Cause)ཚོས། རྒྱ་ནག་གི་དམག་དོན་རྒྱ་སྐྱེད་དང་མི་སེར་སྤོ་ཤུགས། བོད་ཀྱི་ཁོར་ཡུག་གཏོར་བཅོམ་སོགས་ཀྱི་གནད་དོན་དང་འབྲེལ། རྒྱ་གར་བྱང་ཤར་ཁུལ་དུ་བོད་དོན་ཁྱབ་བསྒྲགས་དང་། མངའ་སྡེ་དེ་དག་གི་མི་མང་རྣམས་རྡོག་རྩ་གཅིག་སྒྲིལ་ཐོག རྒྱ་ནག་གིས་བོད་ལ་དབང་སྒྱུར་བྱེད་པར་ངོ་རྒོལ་དང་གནོན་ཤུགས་སྤྲོད་པ་དང་། ས་ཁུལ་དེ་དག་གི་མི་མང་རྣམས་མཉམ་འབྲེལ་ཐོག་བོད་དོན་རྒྱབ་སྐྱོར་གྱི་ཤོག་ཁག་ཆེན་པོ་ཞིག་འཛུགས་དགོས་སྐུལ་སློང་བྱེད་བཞིན་ཡོད་འདུག  

བོད་དོན་རྒྱབ་སྐྱོར་ཚོགས་པ་དེའི་གོ་སྒྲིག་འོག ཟླ་འདིའི་ཕྱི་ཚེས་ ༢༦ ཉིན་ཨ་སམ་(Assam) མངའ་སྡེའི་གྲོང་ཁྱེར་གྷོ་ཧ་ཊེ་(Guwahati) རུ་༼ བོད་དང་ཧི་མ་ལ་ཡའི་ཁོར་ཡུག་དང་སྣོད་བཅུད༽ཅེས་པའི་བརྗོད་གཞིའི་ཐོག་རྒྱལ་ཡོངས་རང་བཞིན་གྱི་བགྲོ་གླེང་ཚོགས་ཆེན་ཞིག་ཚོགས་རྒྱུ་ཡིན་འདུག་ལ། ཚོགས་ཆེན་དེའི་གོང་དུ་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་བསྐངས་ཏེ། རྒྱ་གར་དང་རྒྱལ་སྤྱིའི་མི་མང་དང་ཚོགས་སྡེ་ཁག་བཅས་ལ་ཉེ་བའི་བོད་ནང་གི་ཛ་དྲག་གནས་བབ་སྐོར་ལ་ཁ་ཕྱོགས་ཏེ། ལས་དོན་ཇི་ལྟར་བསྒྲུབ་དགོས་པའི་འཆར་གཞི་གཏན་འབེབས་བྱ་རྒྱུ་ཡིན་འདུག

ཕྱི་ཚེས་ ༢༦ ཉིན་གྱི་ཚོགས་འདུའི་གྲོས་གཞི་གཙོ་གནད་ཆེ་ཤོས་ཤིག་ནི། རྒྱ་ནག་གིས་བོད་ནང་གང་བྱུང་གཏེར་རྫས་སྔོག་འཁྱེར་བྱེད་བཞིན་པ་དང་། བོད་ཀྱི་ཤིང་ནགས་གཅོད་འབྲེག་བྱེད་ཀྱིན་པ་དེས་རྒྱ་གར་བྱང་ཤར་ཁུལ་ལ་ཤུགས་རྐྱེན་ཅི་ཙམ་ཐེབས་ཀྱི་ཡོད་མེད་གཉིས་ཡིན་འདུག ཨ་རུ་ནཱ་ཅལ་མངའ་སྡེའི་གྲོས་ཚོགས་འཐུས་མི་ཟུར་པ་དང་རྒྱ་གར་བྱང་ཤར་ཁུལ་གྱི་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་པ་སྐུ་ཞབས་ཀིརེ་མའེ་(R K Khrimey) ཡིས་བརྗོད་པ་ལྟར་ན། ཉིན་དེའི་ཚོགས་ཆེན་སྟེང་བཙན་བྱོལ་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་ཀྱང་མཉམ་ཞུགས་གནང་རྒྱུར་གྲ་སྒྲིག་ཡོད་ཚུལ་བརྗོད་འདུག

ཟླ་འདིའི་ཚེས་ ༡ ཉིན་སྐུ་ཚབས་ཀིརེ་མའེ་ཡིས་རྒྱ་གར་བྱང་ཤར་ཁུལ་གྱི་མི་མང་ཚོར་རྒྱ་ནག་གིས་བོད་ལ་དབང་སྒྱུར་བྱས་པར་ངོ་རྒོལ་ལས་འགུལ་ནང་མཉམ་ཞུགས་བྱ་དགོས་པའི་འབོད་སྐུལ་ཞུས་ཡོད་ཅིང་། ཁོང་གིས་ “རྒྱ་གར་བྱང་ཤར་གྱི་ས་བབ་ཐད་ནས་བཤད་ན། རྒྱ་ནག་གི་དབང་ཤུགས་ང་ཚོའི་སྟེང་སླེབ་བཞིན་ཡོད། དེ་བཞིན་བོད་ནང་གི་གཙང་བོའི་ཁ་ཕྱོགས་བསྒྱུར་འཆར་དེས་རྒྱ་གར་ལ་ཉེན་ཁ་ཆེན་པོ་འཕྲད་རྒྱུ་རེད། ཁོར་ཡུག་ཉམས་ཞིབ་པ་ཚོས་བརྗོད་ན། རྒྱ་ནག་གིས་ཡར་ཀླུང་གཙང་པོར་ཆུ་མཛོད་དང་གློག་ཁང་སོགས་ལས་གཞི་འདྲ་མིན་སྤེལ་གྱིན་པ་དེས། རྒྱ་གར་ནང་བཞུར་བཞིན་པའི་བྷར་མ་པུ་ཊི་རཱའམ་(Brahmaputra) ཨ་རུ་ན་ཅལ་ནང་དུ་སཱ་ཡེང་ཆུ་(Siang river) ཞེས་འབོད་པའི་ཆུ་ཆེན་འདིར་ཤུགས་རྐྱེན་ཐེབས་ཏེ་ལོ་རེ་བཞིན་ཇེ་ཉུང་དུ་འགྲོ་ཡོད། ”ཅེས་བརྗོད་ཡོད་ལ། དེ་བཞིན་ཕྱི་ཚེས་ ༡ ཉིན་གྱི་དགོང་མོ་ཨ་རུ་ཎ་ཅལ་མངའ་སྡེ་གཞུང་གི་མགྲིན་ཚབ་པས་བོད་ནས་བཞུར་ཡོང་བའི་སཱ་ཡེང་ཆུ་བོ་ད་ལྟ་ཨ་རུ་ཎ་ཅལ་ནང་ཧ་ལམ་སྐམ་ཚར་ཡོད་ཚུལ་བསྒྲགས་འདུག

གཟའ་ཕུར་བའི་ཉིན་ཨ་རུ་ཎ་ཅལ་མངའ་སྡེའི་སྤྱི་ཁྱབ་བློན་ཆེན་གྱི་ཆབ་སྲིད་སློབ་སྟོན་པ་ཌ་བྷེ་ (Tako Dabi) ཡིས་བརྗོད་པ་ལྟར་ན། ཤར་སཱ་ཡེང་རྫོང་ཁོངས་ཀྱི་ལོ་རྒྱུས་རང་བཞིན་ལྡན་པའི་པཱ་སེ་གྷ་ཊི་ (Pasighat) གྲོང་སྡེ་བརྒྱུད་བཞུར་བཞིན་པའི་སཱ་ཡེང་ཆུ་བོ་ཉིན་དེའི་ཕྱི་དྲོ་བློ་བུར་དུ་ཇེ་ཉུང་ཕྱིན་ཏེ་ད་ཆར་སྐམ་ལ་ཉེ་སྐོར་དང་། ༢༠༠༩ ཟླ་ ༦ ཚེས་ ༩ ཉིན་བློ་བུར་དུ་སཱ་ཡེང་ཆུ་བོ་(མཐོ་ཚད་མི་ཌར་ ༣༠ ) རྒྱས་ཏེ་གོང་གི་གྲོང་སྡེ་དེའི་རྒྱུ་དངོས་ལ་གཏོར་སྐྱོན་ཆེན་པོ་བྱུང་ཞིང་མི་ ༧ ཙམ་རྐྱེན་ལམ་དུ་ཕྱིན་པ་དེ་ནི། རྒྱ་ནག་གིས་ཡར་ཀླུང་གཙང་པོར་བརྒྱབ་པའི་གློག་ཁང་ཆུ་མཛོད་ཅིག་ཤོར་པ་ལས་བྱུང་པ་ཞིག་ཡིན་སྟབས། རྒྱ་གར་དབུས་གཞུང་དང་འབྲེལ་ཡོད་སྡེ་ཚན་ཁག་གིས་ཨ་རུ་ཎ་ཅལ་མངའ་སྡེ་གཞུང་དང་མཉམ་འབྲེལ་ཐོག དཀའ་ངལ་དེ་དག་གི་རྒྱུ་རྐྱེན་ལ་ཞིབ་འཇུག་བྱ་དགོས་པ་ལས། མང་ཚོགས་ཀྱི་འཇིགས་སྣང་དང་སྡུག་སྐད་བཏོན་པ་ཙམ་གྱིས་གནད་དོན་སེལ་མི་ཐུབ་ཚུལ་བརྗོད་འདུག

ཕྱི་ཚེས་ ༢ ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཧོང་ལའེ་(Hong Lei) ཡིས། ཡར་ཀླུང་གཙང་བོའི་བཞུར་རྒྱུན་ཁག་ཏུ་གློག་ཁང་དང་ཆུ་མཛོད་བརྒྱབ་ཡོད་ཀྱང་། དེ་དག་གིས་གཙང་བོའི་ཆུའི་བརྒྱ་ཆ་ ༡ ཙམ་ལས་བེད་སྤྱོད་བྱེད་ཀྱི་མེད་སྟབས། ཡར་ཀླུང་གཙང་བོ་བཞུར་ཡུལ་ཁག་ལ་ཤུགས་རྐྱེན་གང་ཡང་ཐེབས་མི་མི་སྲིད་སྐོར་བརྗོད་འདུག གནད་དོན་དེ་དང་འབྲེལ་ཕྱི་ཚེས་ ༣ ཉིན་བྷེ་ཇེ་པེ་(BJP) ཡི་ཚོགས་གཙོ་ཟུར་པ་རཱ་ཇི་ཎ་ཐི་(Rajnath Singh) ཡིས་སྲིད་བློན་མན་མོ་ཧན་སེན་(Manmohan Singh) ལ་ཡི་གེ་ཞིག་ཕུལ་ཏེ། ཡར་ཀླུང་གཙང་བོའི་གནད་དོན་ཐད་རྒྱ་དཀར་ནག་དང་བྷང་ལཱ་ཌེ་ཤི་བཅས་ཀྱི་བར་རྒྱལ་སྤྱི་རང་བཞིན་གྱི་ཆིངས་ཡིག་འཇོག་དགོས་པའི་འབོད་སྐུལ་ཞུས་ཡོད་འདུག་ལ། ཡི་གེ་དེའི་ནང་ཡར་ཀླུང་གཙང་བོའམ་བྷར་མ་པུ་ཊི་རཱ་གཙང་བོའི་ཁ་ཕྱོགས་སྒྱུར་བཞིན་པ་དང་། གནད་དོན་དེས་ཨ་རུ་ཎ་ཅལ་གཙོས་རྒྱ་གར་བྱང་ཤར་ཁུལ་ནང་ཤུགས་རྐྱེན་ཆེན་པོ་ཐེབས་ཉེན་ཡོད་སྐོར་བཀོད་ཡོད་འདུག

ཀིརེ་མའེ་ཡིས་རྒྱ་གར་ནང་གི་བོད་པ་སྐྱབས་བཅོལ་བ་ཉིས་འབུམ་ལྷག་གིས་རྒྱ་ནག་གི་དབང་སྒྱུར་འོག་བོད་ཀྱི་རིག་གཞུང་རྩ་བརླག་ཏུ་འགྲོ་རྒྱུར་བློ་འཚབ་བྱེད་ཀྱི་ཡོད་པར་བརྗོད་ཅིང་། བོད་དོན་རྒྱབ་སྐྱོར་ཚོགས་པའི་ངོས་ནས་ཨ་རུ་ཎ་ཅལ་མངའ་སྡེ་ནི་རྒྱ་གར་གྱི་ས་ཁོངས་ཤིག་ཡིན་སྟབས། རྒྱ་ནག་གིས་ཨ་རུ་ཎ་ཅལ་ཁོང་ཚོའི་ཁྱབ་ཁོངས་ཡིན་ཚུལ་བསྒྲགས་བཞིན་པར་རྒྱ་གར་གཞུང་གིས་སྔར་ལས་ལྷག་པའི་ལངས་ཕྱོགས་བརྟན་པོ་དང་དྲག་རྒོལ་བྱ་དགོས་པའི་འབོད་སྐུལ་ཞུས་ཡོད་འདུག་ལ། རྒྱ་གར་གྱི་ཁོར་ཡུག་ཉམས་ཞིབ་པ་ཌུ་ཊཱ་(Soumyadip Dutta) ཡིས་ “གལ་སྲིད་རྒྱ་ནག་གིས་ཡར་ཀླུང་གཙང་པོའི་ཁ་ཕྱོགས་རྒྱ་ནག་ཤར་ཕྱོགས་སུ་བསྒྱུར་ཚེ། རྒྱ་གར་བྱང་ཤར་ཁུལ་གྱི་མི་མང་དང་ལྷག་པར་དུ་ཨ་སམ་(Assam) ཁུལ་ལ་བློ་ཡིད་དུ་ཤོང་དཀའ་བའི་མཇུག་འབྲས་ངན་པ་འབྱུང་ངེས་རེད་”ཅེས་ཉེན་བརྡ་བཏང་ཡོད་པ་རེད།

ཡར་ཀླུང་གཙང་པོ་ནི་འཛམ་གླིང་སྟེང་གི་གཙང་བོ་མཐོ་ཤོས་ཤིག་ཏུ་བརྩི་ཞིང་། དེ་ནི་བོད་ནས་རྒྱ་གར་དང་བྷང་ལཱ་ཌེ་ཤི་བརྒྱུད་(Bay of Bengal) རྒྱ་མཚོར་འབབ་པ་དང་། བོད་ནས་རྒྱ་གར་བྱང་ཤར་ཨ་རུ་ཎ་ཅལ་གྱི་ཊུ་ཊེན་(tuting) བརྒྱུད་ཨ་རི་ཎ་ཅལ་ནང་འབབ་སྐབས་ཡར་ཀླུང་གཙང་བོ་ལ་སཱ་ཡེང་ཆུ་བོ་དང་། ཨ་སམ་ནང་འབབ་སྐབས་བྷར་མ་པུ་ཊི་རཱ ། བྷང་ལཱ་ཌེ་ཤིའི་(Bangladesh) ནང་མེ་གྷ་(Mega) ཞེས་སུ་འབོད།

གསར་འགོད་པ། བནྡེ་སྐྱབས།