དེ་རིང་ཞོགས་པར་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་དབུས་བོད་མིའི་སྒྲིག་འཛུགས་ལས་བྱེད་འདེམས་བསྐོ་ལྷན་ཁང་གིས། འབྱུང་འགྱུར་ཕྱི་ཟླ་ ༧ ནས་ ༡༡ བར་མཐོ་སློབ་ཐོན་པའི་སློབ་མ་བོད་མིའི་སྒྲིག་འཛུགས་ལས་ཁོངས་སུ་ཞུགས་བློ་ཡོད་རིགས་གྲངས་ ༤༠ ཙམ་ལ་སྦྱོང་བརྡར་སྤྲོད་རྒྱུ་ཡིན་ཟེར།
དེ་རིང་ཞོགས་པའི་ཆུ་ཚོད་ ༡༠། ༣༠ སྟེང་གངས་སྐྱིད་ལྷག་པ་ཚེ་རིང་ཚོགས་ཁང་དུ་དབུས་བོད་མིའི་སྒྲིག་འཛུགས་ལས་བྱེད་འདེམས་བསྐོ་ལྷན་ཁང་གི་འགན་འཛིན་འཇལ་དཔལ་ཆོས་བཟང་དང་དཀོན་མཆོག་བརྩོན་འགྲུས་རྣམ་གཉིས་ལྷན་བཞུགས་ཐོག་གསར་འགོད་གསལ་བསྒྲགས་ཤིག་བསྐྱངས་ཏེ། བཀའ་ཤག་གསར་པའི་དགོངས་དོན་བཞིན་བཙན་བྱོལ་བོད་མིའི་སྒྲིག་འཛུགས་ཀྱི་ལས་བྱེད་སྤྱི་ཡོངས་ཀྱི་སྤུས་ཚད་ཡར་རྒྱས་གཏོང་ཕྱིར། གཞུང་ཞབས་གསར་བསྡུའི་ཚུད་རྒྱུགས་མ་བཏང་གོང་བོད་མིའི་སྒྲིག་འཛུགས་ལ་ཕུགས་གཏན་ཞབས་འདེགས་ཞུ་རྒྱུའི་འདུན་པ་ཡོད་རིགས་ལ་ཟླ་ལྔའི་རིང་བོད་དབྱིན་རྩིས་གསུམ་དང་། གློག་ཀླད། དེ་བཞིན་ལས་ཀའི་སྦྱོང་བརྡར་སོགས་སྤྲོད་གཏན་འཁེལ་ཡོད་འདུག་ལ། ༢༠༡༢ དབྱར་ཁའི་གཞུང་ཞབས་འདེམས་སྒྲུག་ཆེད་མཐོ་སློབ་ཐོན་མཁན་སློབ་མ་ ༤༠ ཙམ་ལ་འབྱུང་འགྱུར་ཕྱི་ཟླ་ ༧ པའི་ཚེས་ཤར་ནས་ཕྱི་ཟླ་ ༡༡ པའི་མཇུག་པར་དམིགས་བསལ་སྦྱོང་བརྡར་ཟབ་ཁྲིད་འཛིན་གྲྭ་ཞིག་ས་རཱ་མཐོ་སློབ་ཏུ་ཚོགས་རྒྱུ་ཡིན་འདུག
ཟབ་ཁྲིད་དེར་མཉམ་ཞུགས་གནང་འཆར་གྱི་སློབ་མ་ ༤༠ དེ་སློབ་ཐོན་ལག་འཁྱེར་དང་ངག་རྒྱུགས་བརྒྱུད་འདེམས་སྒྲུག་བྱ་རྒྱུ་ཡིན་པ་དང་། གཞུང་ཞབས་ཚུད་རྒྱུགས་ནང་སྦྱོང་བརྡར་ཟབ་ཁྲིད་འཛིན་གྲྭར་ཞུགས་ཡོད་མེད་ཚང་མར་རྒྱུགས་སྤྲོད་ཀྱི་གོ་སྐབས་ཡོད་ཀྱང་། ཚུད་རྒྱུགས་ནང་སྦྱོང་བརྡར་ཟབ་ཁྲིད་ཀྱི་སློབ་ཚན་ནས་གང་འཚམ་ཡོང་ངེས་པ་དང་། ཟབ་སྦྱོང་སྐབས་ཚོད་ལྟའི་ཡིག་རྒྱུགས་རིམ་པར་བཏང་པའི་རྒྱུགས་འབྲས་གཏན་འབེབས་ཚད་གཞིའི་གནས་ཚད་ལོངས་རིགས་ལ་གཞུང་ཞབས་ཚུད་རྒྱུགས་སྐབས་བརྒྱ་ཆ་ ༥ དམིགས་བསལ་སྤྲོད་རྒྱུ་དང་། ཟབ་སྦྱོང་སྐབས་གཟེངས་སུ་ཐོན་མཁན་ལ་བརྒྱ་ཆ་ ༧ དམིགས་བསམ་སྤྲོད་འཆར་བཅས་ཡིན་འདུག
སྦྱོང་བརྡར་ཟབ་ཁྲིད་ཀྱི་སློབ་ཚན་གཙོ་བོ་བོད་ཡིག་ཡར་རྒྱས། དམངས་གཙོའི་འཛིན་སྐྱོང་། བཙན་བྱོལ་བོད་མིའི་བཅའ་ཁྲིམས་དང་སྒྲིག་གཞི་ཁག དབྱིན་ཡིག་ཡར་རྒྱས། ལས་ཁུངས་ཡིག་ཆ་འབྲི་སྟངས་དང་གཏམ་བཤད་བྱེད་སྟངས། བོད་མིའི་སྒྲིག་འཛུགས་ཀྱི་དགོས་མཁོ་དང་འཚམ་པའི་རྩིས་རིག ལས་འཆར་བཟོ་སྟངས་དང་ལག་བསྟར་སྟངས་འཛིན་བྱེད་ཕྱོགས། སློབ་གྲྭའི་ཤེས་ཡོན། རྒྱལ་སྤྱིའི་འབྲེལ་བ། གྲོང་གསེབ་ཡར་རྒྱས། མང་ཚོགས་འཕྲོད་བསྟེན་ཡར་རྒྱས། རྩོད་རྙོག་འདུམ་སྒྲིག ལས་བསྡོམས་བཟོ་སྟངས་སོགས་ཀྱི་ཐད་སྦྱོང་བརྡར་ཟབ་ཁྲིད་བྱས་ཏེ། བོད་མིའི་སྒྲིག་འཛུགས་དང་རང་དབང་ཅན་གྱི་ཚོགས་སྡེ་གང་ཞིག་ཏུ་ལས་ཞུགས་བྱས་ཚེ། ལས་ཁུངས་དང་ལས་ཀའི་ཐད་ནས་དཀའ་ངལ་མི་ཡོང་བ་ཞིག་བྱ་རྒྱུ་དེ་སྦྱོང་བརྡར་ཟབ་ཁྲིད་འདིའི་དམིགས་ཡུལ་ཡིན་འདུག
གསལ་འགོད་གསལ་བསྒྲགས་སྐབས་གསར་འགོད་པའི་དྲི་བར་ལན་འདེབས་བྱས་པ་ལྟར་ན། ད་ལྟ་དབུས་དང་ས་གནས་གཞིས་ཆགས་ཁག ཕྱི་རྒྱལ་དོན་གཅོད་སོགས་བོད་མིའི་སྒྲིག་འཛུགས་ཀྱི་ཁྱབ་ཁོངས་སུ་བཀའ་ཤག་གི་བཀའ་འཕྲོད་ཡོད་པའི་སྲི་ཞུ་ལས་བྱེད་ ༦༠༦ ཙམ་གྱི་ས་མིག་ཡོད་ཀྱང་། ལས་ཞུགས་སྲི་ཞུའི་ལས་བྱེད་ ༥༦༡ དང་། ས་མིག་ ༧༥ སྟོང་པ་ཡིན་འདུག ལས་བྱེད་ཕུགས་གཏན་ཡོང་མ་ཐུབ་པའི་དཀའ་ངལ་ཐད་འཇམ་དཔལ་ཆོས་བཟང་ལགས་ཀྱིས་ “དེང་སང་སྔོན་མ་དང་མི་འདྲ་བར་ལས་བྱེད་ཚུད་རྒྱུགས་སྤྲོད་སྐབས་ལས་ཀ་མཐའ་འཁྱོལ་ཡོང་བར་བྱ་རྒྱུའི་དམ་བཅའ་བརྟན་པོ་མེད་ཅིང་། ལས་བྱེད་ཁོངས་སུ་ཚུད་རྗེས་ལོ་གཅིག་གཉིས་ནས་ཕྱི་རྒྱལ་ཁག་ལ་འགྲོ་བཞག་གི་རེད། སློབ་སྦྱོང་ཆེད་ཕྱི་རྒྱལ་དུ་ཕེབས་ཐུབ་ན་ཡག་པོ་ཡོང་གི་རེད། འོན་ཀྱང་། སྒེར་དང་གཞུང་གང་ལ་མཚོན་ནའང་ལས་ཀ་བྱེད་ས་དང་འཚོ་བ་སྐྱེལ་ས་ཕྱི་རྒྱལ་མིན་པ་སོ་སོས་ཤེས་དགོས་པ་དང་། ཕ་མ་ཚོས་ཀྱང་སློབ་སྟོན་གནང་དགོས་རེད་”ཅེས་བརྗོད་སོང་།
ཐེངས་འདིའི་ཟླ་ ༥ རིང་གི་དམིགས་བསལ་སྦྱོང་བརྡར་ཟབ་ཁྲིད་ཀྱི་འགྲོ་གྲོན་ཆ་ཚང་དབུས་བོད་མིའི་སྒྲིག་འཛུགས་ཀྱིས་གཏོང་རྒྱུ་ཡིན་པ་དང་། སྔོན་རྩིས་ལྟར་ན་སྦྱོང་བརྡར་ཟབ་ཁྲིད་དེར་ཧིན་སྒོར་འབུམ་ ༢༥ ནས་ ༣༠ བར་འགྲོ་རྒྱུར་ཚོད་དཔག་བྱེད་ཀྱི་ཡོད་ཅིང་། སྦྱོང་བརྡར་འཛིན་གྲྭར་ཞུགས་བློ་ཡོད་རིགས་ནས་ད་ལོའི་ཕྱི་ ༥ ཚེས་ ༣༡ གོང་དབུས་བོད་མིའི་སྒྲིག་འཛུགས་སྲི་ཞུ་ལས་བྱེད་འདེམས་བསྐོ་ལྷན་ཁང་ལ་མིང་ཐོ་འགོད་དགོས་པའི་གསལ་བསྒྲགས་ཀྱང་གནང་སོང་།
གསར་འགོད་པ། བནྡེ་སྐྱབས།
ཡག་པོ་འདུག རང་ལ་ཡོད་ན་གང་ཡང་བྱས་ཀྱི་མ་རེད། འདྲ་མཉམ་རེད།
ཕྱི་རྒྱལ་བའི་གཡོག་གླར་དམིགས་པ་ལས་རང་གཞུང་ལ་ཞབས་ཞུའི་གོ་སྐབས་རེག་ཐབས་བྱ་ན་ཡག་གི་རེད། ཡིན་ནའང་གསར་འབྱོིར་བ་ཚོར་་་་་་་་་