བོད་སྐྱོད་གོམ་བགྲོད་པ་ཚེ་བརྟན་རྡོ་རྗེ་མ་བུ་གསུམ་བཞུགས་སྒར་ནས་སྤྱི་ལེ་ ༢༣༠ ཙམ་གྱི་ས་ན་མུ་མཐུད་མདུན་སྐྱོད་བྱེད་བཞིན་འདུག་ལ། དེ་རིང་ཞོགས་པར་ཅན་ངྷི་གྷར་གྲོང་ཁྱེར་ནང་འབྱོར་ཏེ། ས་གནས་བོད་རིགས་སློབ་ཕྲུག་ཁག་ཅིག་གི་རོགས་རམ་འོག་གསར་འགོད་ལྷན་ཚོགས་བསྡུ་བཞིན་ཡོད་པ་དང་། སང་ཉིན་ཞོགས་པ་མུ་མཐུད་དུ་ལྡི་ལི་ཕྱོགས་སུ་གོམ་བགྲོད་གནང་རྒྱུ་ཡིན་འདུག
དེ་རིང་སྔ་དྲོར་འདི་གའི་གསར་འགོད་པས་ཁ་པར་བརྒྱུད་ཚེ་བརྟན་རྡོ་རྗེ་ལགས་ཀྱི་གཅུང་མོ་རང་ལོ་ ༡༨ ཡིན་པ། བུ་མོ་ལྷ་མོ་སྐྱིད་ལགས་སུ་ལམ་བར་ནས་དཀའ་ངལ་ག་རེ་འཕྲད་ཡོད་མེད་བཅར་འདྲི་ཞུས་སྐབས་ཁོ་མོས། “ དེ་རིང་ང་ཚོ་ཅན་ངྷི་གྷར་ལ་འབྱོར་སོང་། ལམ་བར་ནས་རྐང་པ་ཞེ་དྲག་ན་སོང་། དེ་མ་གཏོགས་དཀའ་ངལ་ཆེན་པོ་འདྲ་འཕྲད་མ་སོང་། ང་ཚོ་དགོང་མོ་རྟག་པར་རྒྱ་གར་ལྷ་ཁང་ནང་ཉལ་བ་ཡིན། ང་ཚོར་ཟ་ཡ་འཐུང་ཡ་མང་པོ་ཡོད” ཅེས་བརྗོད་བྱུང་།
ཡང་ཁོ་མོར་ཁྱེད་ཅག་གི་ལས་འགུལ་ནང་མཉམ་ཞུགས་བྱེད་མཁན་བྱུང་ཡོད་མེད་དྲིས་སྐབས། “ད་བར་གཅིག་ཀྱང་བྱུང་མ་སོང་། འཚམས་འདྲིར་ཡོང་མཁན་དང་། ཟ་མ་སྐྱེལ་མཁན་མང་པོ་འདུག ཁ་ཤས་ཀྱིས་དངུལ་གྱི་རོགས་རམ་གནང་གི་ཡིན་ལབ་སོང་། ངས་བསམ་ན་ཁོང་ཚོས་སྒོར་མོ་བསྟེར་རྒྱུ་ལས། ང་ཚོ་དང་མཉམ་དུ་རྐང་པ་རྒྱག་ཐུབ་ན་ཡག་པོ་འདུག་དྲན་སོང་། བོད་ནང་བར་འགྲོ་མ་ཐུབ་ཀྱང་བདུན་ཕྲག་གཅིག་གཉིས་དང་། ཡང་ན་ཟླ་གཅིག་གཉིས་རེར་འགྲོ་ཐུབ་ན་ཡག་པོ་འདུག”ཅེས་བརྗོད་བྱུང་།
ཁོང་མོར་ལམ་བར་ནས་རྒྱ་གར་མི་མང་ཚོས་ལྟ་སྟངས་གང་འདྲ་འདུག་ཅེས་དྲིས་པར། “རྒྱ་གར་བ་ཚོས་ཡག་པོ་བྱེད་ཀྱི་འདུག རྒྱ་གར་ཉེན་རྟོག་པ་རེ་ཟུང་གིས་ལམ་ཁ་ནས་ལག་འཇུ་བྱས་ཏེ་རྒྱབ་སྐྱོར་གྱི་རྣམ་འགྱུར་སྟོན་སྐབས་སེམས་ཤུགས་འཕར་གྱི་འདུག ང་ཚོ་རྒྱ་གར་ས་མཚམས་དཀའ་ངལ་མེད་པར་བརྒལ་ཐུབ་རྒྱུ་རེད། བལ་ཡུལ་ནང་ནས་དཀའ་ངལ་འཕྲད་སྲིད་ཀྱང་། ཇོ་ལགས་ཀྱིས་རེ་བ་ཁ་ཤས་བཏོན་པ་དེ་དག་མ་འགྲུབ་བར་དུ་ང་ཚོས་ལས་འགུལ་མཚམས་འཇོག་བྱ་རྒྱུ་མིན” ཞེས་བརྗོད་བྱུང་།
ཕྱི་ཚེས་ ༡༦ ཉིན་སུ་ཇཱ་བོད་ཁྱིམ་སློབ་གྲྭའི་དབུ་འཛིན་དངོས་གྲུབ་དབང་ཕྱུག་དང་སློབ་སྤྱི་བསོད་ནམ་སྲི་ཆོས་གཉིས་ཀྱིས་ཟ་མ་ཁྱེར་ཏེ་ཁོང་མ་བུ་གསུམ་ལ་འཚམས་འདྲིར་བསླེབས་ཡོད་འདུག་ལ། སྐབས་དེར་དངོས་གྲུབ་དབང་ཕྱུག་ལགས་ཀྱིས་བུ་མོ་ལྷ་མོ་སྐྱིད་ལ། “དཀའ་ངལ་ག་རེ་འཕྲད་ན་སློབ་གྲྭའི་ངོས་ནས་རྒྱབ་སྐྱོར་ཞུ་ངེས་ཡིན། གལ་སྲིད་གོམ་བགྲོད་ཐད་དཀའ་ངལ་འདྲ་འཕྲད་དེ་ཕྱིར་ཡོང་དགོས་པ་ཆགས་ན། འཕྲལ་དུ་སློབ་གྲྭར་འབྲེལ་བ་བྱོས་དང་གནས་ཚུལ་ག་རེ་ཡིན་ཡང་ཐབས་ཤེས་བྱེད་ཆོག”ཅེས་ཡོད་བརྗོད་འདུག་པའི་ཐད། ལྷ་མོ་སྐྱེད་ལ་ཚོར་སྣང་གང་འདྲ་བྱུང་ཡོད་མེད་དྲིས་པར་ “ང་ལས་འགུལ་ནས་ཐོན་ཏེ་ཕྱིར་སློབ་གྲྭར་འགྲོ་རྒྱུའི་བསམ་བློ་མེད། འོན་ཀྱང་། སློབ་གྲྭའི་དབུ་འཛིན་གྱིས་དེ་འདྲ་གསུང་སྐབས། ད་བར་སུ་ཇཱ་སློབ་གྲྭ་བཀའ་དྲིན་ཆེན་པོ་ཡིན་ལ། ད་དུང་ཡང་ང་ལ་རྒྱབ་སྐྱོར་གནང་གི་འདུག་བསམ་ནས་དགའ་ཚོར་དང་ཡིད་འགུལ་ཆེན་པོ་ཐེབས་བྱུང” ཞེས་བརྗོད་བྱུང་།
གསར་འགོད་པ། བནྡེ་སྐྱབས།
རྗེས་སུ་ཡི་རངས་ཡོད།
བྱེས་སྡོད་བོད་པ་ཚོ་ད་ལྟ་བཟའ་མི་འདི་གསུམ་པོ་དང་བསྡོངས་ནས་བོད་དུ་བསྐྱོད་ན་བོད་དོན་འགྲུབ་རྒྱུ་ཐག་ཇེ་ཉེར་གྱུར་ཡོད།དེ་དུས་གཞིས་ལུས་བོད་མི་ཚོ་ཡང་ཡར་ལངས་ནས།ཟླ་བ་གཅིག་ལྷག་རྗེས་སུ།ཨ་རི་གཙོས་པའི་ནུབ་ཕྱོགས་རྒྱལ་ཁབ་ཁག་གིས་མི་ཆོས་རིང་ལུགས་དང་འགྲོ་བ་མིའི་ཐོབ་ཐང་ལ་ཁ་གཡར་ནས་ཁོ་ཚོའི་དགྲ་ནག་པོ་རྒྱ་ནག་ཡེ་ནས་གཏོར་ཆོགདེ་དུས་བོད་ལ་རང་བཙན་མིན་ཡང་རང་སྐྱོང་ཐོབ་ཐུབ་པ་ཡིན།
མདུན་སྐྱོད་ཀྱི་གོམ་པ་རེ་རེ་ནི་བོད་མི་རིགས་ཀྱི་ཆོད་སེམས་རེ་རེ་དང་། དཀའ་ངལ་དང་སེམས་ཚག་ཡོད་ཚད་བོད་མི་རིགས་ཀྱི་ད་ལྟའི་གནས་སྟངས་ཁོ་ན་ཡིན། ཁྱེད་ཅག་ལོ་རྒྱུས་ཀྱིས་དེད་དེ་དམིགས་འདུན་ལ་སླེབས་ཐུབ་པར་ངས་ཡིད་ཆེས་བྱེད་རྒྱུ་ཡིན།
ཁྱེད་མ་བུ་གསུམ་སྤྱི་ལེ་༢༣༠སར་སླེབས་པ་ལ་འཚམས་འདྲི་བཀྲ་ཤིས་བདེ་ལེགས་ཞུ་བ་དང་ཆབས་ཅིག་ཁྱེད་མ་བུ་གསུམ་གྱིས་བསམ་དོན་ཡིད་བཞིན་དུ་འགྲུབ་པའི་སྨོན་འདུན་ཞུ།
ངས་སྔོན་མར་བསམ་ཚུལ་ཞུས་དོན་བཞིན་ཁྱེད་ཀྱི་སྲིང་མོ་བལ་བོའི་ས་ཐོག་ཏུ་གོམས་བགྲོད་མ་གནང་ན་ལེགས། བལ་བོའི་དམག་མི་སོགས་སྤྱོད་པ་ཧ་ཅང་ངན།
གངས་ཅན་པའི་མ་བུ་གསུམ་ལ་མཚམས་འདྲི་ཞུ་བ་དང་། ཁྱེད་མ་བུ་གསུམ་གྱི་གོམ་སྒྲ་ནི། མི་རིགས་ཤིག་གི་ལས་དབང་གྱེར་བཞིན་པའི་སྐྱོ་གླུ་བཞིན། རྣ་བའི་བུ་ག་བརྒྱུད་དེ་ཟུར་གསུམ་སྙིང་དབུས་སུ་བབས་ཐེངས་རེ་རེར། སྐྱོ་བའི་སྨུག་སྤྲིན་ཀློང་ནས་མིག་ཆུ་དབང་མེད་དུ་ཤོར་འགྲོ་གི ཡིན་ན་ཡང་ཁྱེད་རྣམས་པའི་བསམ་དོན་འགྲུབ་པའི་སྨོན་འདུན་འདི་ཙམ་ལས་ཅི་ཡང་ཕུལ་མ་ཐུབ།
བལ་བོད་ས་མཚམས་ནས་ཉེན་རྟོག་པས་ཁྱེེད་གསུམ་བཟུང་གི་རེད།དེ་དུ་སྐད་ཆ་གང་བཤད་ད་ལྟ་ནས་གྲ་སྒྲིག་བྱ་ན་ལེགས།
ཁྱེད་མ་སྨད་གསུམ་གྱིས་བསམ་དོ་ཡིད་རེ་ལྟར་འགྲུབ་པར་སྨོན།