རྒྱལ་སྤྱིའི་སྟེང་ང་ཚོར་བདེན་པ་ཡོད་པའི་ངོས་འཛིན་བྱས་ཡོད།

དེ་རིང་གངས་སྐྱིད་ཕྱི་དྲིལ་ཚོགས་ཁང་དུ་བཀའ་སྤྱི་ཐུན་མོང་ཐོག་གསར་འགོད་གསལ་བསྒྲགས་བསྐྱངས་ཏེ། བོད་ནང་གི་ཛ་དྲག་གནས་སྟངས་ཐོག་སེམས་འཚབ་ཧ་ཅང་ཆེན་པོ་ཡོད་པ་དང་། རྒྱལ་སྤྱིའི་ཐོག་ནས་བོད་དོན་ལ་སྔར་ལས་ལྷག་པའི་རྒྱབ་སྐྱོར་གནང་དགོས་པའི་འབོད་སྐུལ་བཅས་ཞུས་སོང་།

དེ་རིང་ཉིན་རྒྱབ་ཆུ་ཚོད་ ༣ དང་ཕྱེད་ཀའི་སྟེང་དབུས་བོད་མིའི་སྒྲིག་འཛུགས་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། བཀའ་བློན་ཁྲི་པ་བློ་བཟང་སེང་གེ་མཆོག་དང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་རྣམ་གཉིས་ཐུན་མོང་ཐོག་བོད་ནང་གི་ཛ་དྲག་གནས་སྟངས་ཐོག་གསར་འགོད་གསལ་བསྒྲགས་ཤིག་བསྐྱངས་སོང་།

གསར་འགོད་ལྷན་ཚོགས་ཐོག་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་བརྗོད་དོན་ལྟར་ན། ད་ལོའི་ལོ་མགོ་ཙམ་ནས་བོད་ཀྱི་ས་ཁུལ་ཁག་ཏུ་ཛ་དྲག་གནས་ཚུལ་བསྟུད་མར་བྱུང་ཡོད་སྟབས། ཕྱི་ཟླ་ ༣ ཚེས་ ༡༤ ཉིིན་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པའི་ཉིན་དང་པོ་ཧྲིལ་བོར་བོད་ནང་གི་གནས་སྟངས་ཐོག་བགྲོ་གླེང་གནང་སྟེ། གྲོས་གཞིའི་གྲོས་ཆོད་དོན་ཚན་ ༨ ཅན་ཞིག་ལ་སྤྱི་མོས་བྱུང་ཡོད་པ་དང་། ཕྱི་ཚེས་ ༡༩ ཉིན་གྲོས་ཚོགས་ཚོགས་འདུ་མཚམས་འཇོག་བྱས་ཏེ། རེབ་གོང་དང་རྔ་པ་ཁུལ་དུ་བོད་མི་གསུམ་གྱིས་རང་ལུས་མེར་བསྲེགས་བཏང་བའི་གནས་སྟངས་ཐོག་བགྲོ་གླེང་གནང་འདུག་ལ། ཕྱི་ཚེས་ ༢༤ ཉིན་གྱི་གྲོས་ཚོགས་ཚོགས་འདུའི་མཐའ་མའི་ཉིན་ཟུར་སྣོན་གྱི་གྲོས་ཆོད་ཁག་ཅིག་ཀྱང་འཇོག་རྒྱུ་ཡིན་འདུག

ཚོགས་གཙོ་མཆོག་གིས་མུ་མཐུད་བརྗོད་དོན་ལྟར་ན། ༢༠༠༩ ལོ་ནས་རྔ་པ་དང་རྟའུ། དཀར་མཛེས། ཆབ་མདོ། ཁྲི་འདུ། ཐེམ་ཆེན། དར་ལག རྨ་ཆུ། རེབ་གོང་བཅས་སུ་བོད་མི་ ༣༠ ཙམ་གྱིས་རང་ལུས་མེར་བསྲེགས་བཏང་ཡོད་པའི་ཁྲོད། མི་ ༢༢ འདས་གྲོངས་སུ་ཕྱིན་ཡོད་པ་དང་། ད་ལོའི་དཔྱིད་གསར་དུས་ཆེན་སྐབས། རྒྱ་ནག་ཉེན་རྟོག་པ་དང་དྲག་ཆས་དམག་མིས་བོད་རིགས་མང་ཚོགས་ཁྲོད་གང་བྱུང་མེ་མདའ་བརྒྱབ་སྟེ། བྲག་མགོ་རྫོང་དུ་མི་ ༤ དམར་གསོད་དང་། གསེར་རྟར་མི་ ༢ ། ཛམ་ཐང་དུ་མི་ ༡ ། མགོ་ལོག་པདྨ་རྫོང་དུ་མི་ ༡ བཅས་ཁྱོན་མི་ ༨ དམར་གསོད་བཏང་ཡོད་འདུག དེ་བཞིན་དུས་དབང་སྐབས་རྒྱ་གར་ནས་བོད་དུ་ལོག་མཁན་ཚོར་རྒྱ་བལ་ས་མཚམས་སུ་རྒྱ་ནག་ཉེན་རྟོག་པས་འདྲི་བརྩད་ཀྱིས་ཅ་དངོས་བཙན་འཕྲོག་བྱས་ཡོད་པ་མ་ཟད། བོད་ནང་འབྱོར་རྗེས་ལྷ་སར་བོད་མི་བརྒྱ་ཕྲག་དུ་མར་བཙན་གྱིས་ཆབ་སྲིད་སློབ་གསོ་སྤྲད་ཡོད་འདུག་ལ། ཁམས་དང་ཨ་མདོ་ནས་ཡིན་པའི་བོད་མི་མང་པོ་ཞིག་ལྷ་ས་ནས་ཕྱིར་སྤོས་བཏང་ཡོད་འདུག

དེའི་རྗེས་བཀའ་བློན་ཁྲི་པ་བློ་བཟང་སེང་གེ་མཆོག་གིས་ད་ལོར་བོད་ནང་ཞི་བའི་སྐད་འབོད་སྐབས་རྒྱ་དམག་གིས་མེ་མདའ་བརྒྱབ་སྟེ་མི་ ༨ དམར་གསོད་བཏང་ཡོད་པ་དང་། རྒྱ་གཞུང་གི་མཁྲེགས་འཛིན་སྲིད་བྱུས་འོག་བོད་མི་ཚོར་ངོ་རྒོལ་བྱ་རྒྱུའི་ཐབས་ལམ་གཞན་མེད་པའི་གནས་སྟངས་འོག་རང་ལུས་མེར་བསྲེགས་བཏང་ཡོད་ཅིང་། ཁོང་ཚོའི་རེ་འདུན་༧གོང་ས་མཆོག་བོད་དུ་ཕེབས་དགོས་པ་དང་བོད་མིར་རང་དབང་དགོས་ཞེས་པ་དེ་ཡིན་སྐོར། བཀའ་སྤྱི་གཉིས་ཀྱིས་མཉམ་འབྲེལ་རྒྱལ་ཚོགས་ཀྱིས་བོད་ནང་ཞིབ་འཇུག་ཚོགས་པ་གཏོང་དགོས་པའི་འབོད་སྐུལ་རིམ་པར་ཞུས་ཡོད་པ་དང་། ནེའུ་ཡོག་ནང་བོད་མི་གསུམ་གྱིས་ཉིན་ ༣༠ རིང་ཟས་བཅད་ངོ་རྒོལ་གནང་པ་བཅས་ལ་བརྟེན་ཏེ། མཉམ་འབྲེལ་རྒྱལ་ཚོགས་ཀྱི་སྐུ་ཚབ་ཟས་བཅད་ངོ་རྒོལ་གནང་ཡུལ་དུ་ཕེབས་ཏེ། ཡིག་ངག་གཉིས་ཐོག་ནས་བོད་ནང་ཞིབ་འཇུག་ཚོགས་པ་གཏོང་གི་ཡིན་ཚུལ་གསུངས་ཏེ་བདེན་པ་ལ་ངོས་འཛིན་ཐོབ་ཀྱི་ཡོད་སྐོར་གསུངས་སོང་།

བཀའ་ཁྲི་མཆོག་གིས། “རྒྱ་གཞུང་གིས་བདེན་པ་མེད་པ་བཟོ་བཞིན་ཡོད་ཀྱང་། བདེན་པ་མེད་པ་བཟོ་ཐུབ་ཀྱི་ཡོད་པ་མ་རེད། བདེན་པ་དེར་རྒྱལ་སྤྱིའི་ཁྱོན་ཡོངས་ནས་རྒྱབ་སྐྱོར་གྱི་རྣམ་པ་སྟོན་བཞིན་ཡོད་པ་རེད། བོད་ནང་གི་བོད་མི་ཚོས་རང་སྲོག་བློས་གཏོང་གནང་བ་བཞིན་གྱི་ང་ཚོའི་རེ་བ་འགྲུབ་ཐུབ་ཀྱི་མེད་ཀྱང་། ང་ཚོར་བདེན་པ་ཡོད་པའི་ངོས་འཛིན་བྱས་པ་དེ། གནས་ཚུལ་ཡག་པོ་ཞིག་རེད་བསམ་གྱི་ཡོད། ཉེ་ལམ་རྒྱ་ནག་ཏུ་ཡོད་པའི་ཨོ་སི་ཊོ་ལིའི་གཞུང་ཚབ་ཀྱིས་རྒྱ་གཞུང་ལ་བོད་ནང་ཞིབ་འཇུག་ཚོགས་པ་ཆེད་གཏོང་དགོས་པའི་རེ་འདུན་བཏོན་ཡོད་པ་རེད། རྒྱལ་ཁབ་མང་པོ་ཞིག་གིས་བོད་ནང་གི་ཛ་དྲག་གནས་སྟངས་ཐོག་གདུང་སེམས་མཉམ་སྐྱེད་དང་། སེམས་འཚབ་ཡོད་པའི་རྣམ་པ་བསྟན་པར་ཐུགས་རྗེ་ཆེ་ཞུ་རྒྱུ་ཡིན་ལ། ད་དུང་ཡང་ཁ་ཡོད་ལག་ཡོད་བོད་ནང་ཕེབས་ཏེ། གནས་ཚུལ་རྟོགས་ཐུབ་པ་ཡིན་ན་ཐུགས་ཕན་སོས་ཀྱི་རེད་ ” ཅེས་གསུངས་སོང་། 

གསར་འགོད་པས་བཀའ་ཁྲི་མཆོག་ལ་ཚེ་བརྟན་རྡོ་རྗེ་ནང་མི་གསུམ་གྱི་གོམ་བགྲོད་ལས་འགུལ་ཐོག་བཀའ་འདྲི་ཞུས་པར། “ ལས་འགུལ་ག་རེ་སྤེལ་ཀྱང་བཀའ་ཤག་གིས་ཞི་བ་དང་ཁྲིམས་མཐུན། ཆེ་མཐོང་ལྡན་པ་ཞིག་གནང་དགོས་ཞེས་ལམ་སྟོན་གནང་ཡོད། དེ་གཞིར་བཞག་པའི་ཐོག་ལས་འགུལ་སྤེལ་ན་བོད་དང་བོད་མི་ཚོར་ཕན་ཐོགས་པ་ཞིག་ཡོང་གི་རེད། ཕན་པ་ཞིག་བྱུང་ན་མི་མང་གི་རྣམ་པ་སྟོན་པ་དེར་ངོས་འཛིན་ཞུ་རྒྱུ་ཡིན། མི་སྒེར་དང་གཞུང་འབྲེལ་མ་ཡིན་པའི་ཚོགས་པ་ཚོས་ལས་འགུལ་ག་རེ་སྤེལ་ཡང་། ཚང་མ་བཀའ་ཤག་བརྒྱུད་ནས་འགྲོ་དགོས་པ་ཆགས་ན། ལས་འགུལ་གྱི་གཟི་བརྗིད་ཆུང་དུ་འགྲོ་སྲིད་ཀྱི་རེད། ལས་འགུལ་ཁ་ཤས་བཀའ་ཤག་གིས་བྱ་ཆོག་པ་ཡོད་པ་རེད། བཀའ་ཤག་དེ་ཆབ་སྲིད་ཐོག་གནད་འགག་ཆགས་ཡོང་བའི་སྐབས་ལ། མིའི་ལུང་པ་ལ་ཡོད་པ་རེད། གཞན་དབང་སྟབས་བསྟུན་རེད། མང་པོ་ཞིག་ལ་བསྟུན་ཏེ་ཕྱག་ལས་གནང་དགོས་པ་རེད། ལས་འགུལ་ལ་མི་མང་རང་གིས་རྣམ་པ་སྟོན་ཐུབ་པ་ཡིན་ན། བཀའ་ཤག་གིས་གཟི་བརྗིད་ཆེན་པོ་རེད་བསམ་གྱི་ཡོད་ ” ཅེས་གསུངས་སོང་།

མཐར་རྒྱ་ནག་སྲིད་འཛིན་གཞོན་པ་ཞིས་ཅིན་ཕིན་གྱིས་བུ་མོས་ཧཱ་ཝར་གཙུག་ལག་སློབ་ཆེན་ནང་སློབ་སྦྱོང་བྱེད་བཞིན་ཡོད་སྟབས། བཀའ་ཁྲི་མཆོག་ཞིས་ཅིན་ཕིན་གྱི་བུ་མོར་ཐུགས་འཕྲད་གནང་རྒྱུའི་གོ་སྐབས་བྱུང་ཡོད་མེད་སྐོར་དྲིས་པར། “ ཞིས་ཅིན་ཕིན་གྱི་བུ་མོས་ཧཱ་ཝར་ཊི་སློབ་སྦྱོང་བྱེད་ཀྱི་ཡོད་པ་མ་ཟད། རྒྱ་ནག་དཔོན་རིགས་གཞན་པ་ཚོའི་བུ་ཕྲུག་ཚོས་ཀྱང་ཧཱ་ཝར་ཊི་ལ་སློབ་སྦྱོང་བྱེད་ཀྱི་ཡོད་ས་རེད། ངས་གོ་ཐོས་ལ་ཞིས་ཅིན་གྱི་བུ་མོས་སྲུང་སྐྱོབ་ཀྱི་ཆེད་མིང་བརྗེ་བོ་བརྒྱབ་སྟེ། གསང་བའི་ཐོག་འགྲོ་བཞིན་ཡོད་པ་རེད་ཟེར་གྱི་འདུག དེ་ཡིན་དུས་མོ་ལ་ཐུག་རྒྱུའི་གོ་སྐབས་བྱུང་མ་སོང་། ཡིན་ནའང་། མི་གཞན་པ་ཁ་ཤས་ཀྱིས་ཞིས་ཅིན་ཕིན་གྱི་བུ་མོ་ལ་ཐུག་སོང་ཟེར་མཁན་བྱུང་སོང་ཞེས་གསུངས་བྱུང་།

གསར་འགོད་པ། དཔལ་ལྡན།