བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་དབང་རིག་འཛིན་ལགས་ཨ་རི་ནས་ཕྱིར་རྒྱ་གར་གནམ་ཐང་དུ་འབྱོར་འཕྲལ། རྒྱ་གར་ནང་ཡོང་མ་བཅུགས་པར་བཀག་འགོག་གིས་ཕྱིར་ཨ་རིར་བཏང་ཡོད་འདུག
ཁ་སང་དགོང་མོ་ཆུ་ཚོད་ ༡༡ དང་སྐར་མ་ ༩ ཐོག་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་དབང་རིག་འཛིན་ཨ་རི་ནས་རྒྱ་གར་གྱི་ཨིན་རྡི་རཱ་གྷན་ཌེ་གནམ་ཐང་ (Indira Gandhi International Airport) དུ་འབྱོར་རྗེས། རྒྱ་གར་གནས་སྤོར་ལས་ཁུངས་ཀྱི་མི་སྣས་ཁོང་བསྐོར་ཡོད་པ་མ་ཟད། ཚུར་ཡོང་བྱེད་ཀྱི་གནམ་གྲུ་དེའི་ནང་ཕྱིར་ཨ་རིར་བཏང་ཡོད་འདུག གནད་དོན་དེའི་ཐད་དབུས་གཞོན་ནུ་ལྷན་ཚོགས་ཀྱིས་གསར་འགོད་གསལ་བསྒྲགས་ཤིག་སྤེལ་བའི་ནང་། ཚོགས་གཙོ་ཚེ་དབང་རིག་འཛིན་ཁོང་ཨ་རིའི་མི་སེར་ཡིན་ཡང་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོའི་ལས་རྒྱུན་ལོ་ ༥ རིང་རྒྱ་གར་དུ་སྡོད་རྒྱུར་ཡིག་ཆ་ཚང་མ་ཁྲིམས་མཐུན་ཐོག་བཟོས་ཡོད་ཀྱང་། ཐེངས་འདིར་ཁོང་རྒྱ་གར་ནང་ཡོང་མ་བཅུག་པར་ཕྱིར་ཨ་རིར་བཏང་པ་དེ་ནི་རྒྱ་གར་གཞུང་གིས་ཁྲིམས་མཐུན་ཡིག་ཆ་སྤྲད་པ་དེར་ཁོང་ཚོ་རང་ཉིད་ཀྱིས་རྩིས་མེད་རྡོག་རོལ་བཏང་པ་ཞིག་ཡིན་པར་བཀོད་འདུག
ཉེ་སྔོན་ཟླ་ ༡ ཙམ་རིང་ཨ་རིའི་ནེའུ་ཡོག་ཏུ་ཡོད་པའི་མཉམ་འབྲེལ་རྒྱལ་ཚོགས་ལས་ཁུངས་ཨ་མའི་མདུན་དུ། བོད་ཀྱི་གཞོན་ནུ་ལྷན་ཚོགས་ཀྱིས་དུས་ཡུན་ངེས་མེད་ཟས་བཅད་ངོ་རྒོལ་སྤེལ་པར། རྒྱལ་ཚོགས་ཀྱིས་བོད་ནང་མཉམ་འབྲེལ་རྒྱལ་ཚོགས་ཀྱི་རྟོག་ཞིབ་མི་སྣ་དང་རང་དབང་ཅན་གྱི་གསར་འགོད་པ་གཏོང་རྒྱུའི་ཁེ་ལེན་བྱས་ཡོད་པ་ལྟར། ཟས་བཅད་ངོ་རྒོལ་གྱི་ལས་འགུལ་མཚམས་གྲོལ་རྗེས། ཚོགས་གཙོ་ཚེ་དབང་རིག་འཛིན་ལགས་ཕྱིར་རྒྱ་གར་དུ་ཡོང་སྐབས། ཁོང་རྒྱ་གར་གནམ་ཐང་ནས་བཀག་འགོག་བྱས་པ་ཞིག་ཆགས་ཡོད་འདུག
འདི་གའི་གསར་འགོད་པས་ཁ་པར་བརྒྱུད་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་དོན་འགྲུབ་ལྷ་དར་ལགས་སུ། ཚོགས་གཙོ་ཚེ་དབང་རིག་འཛིན་ཁོང་རྒྱ་གར་གནམ་ཐང་ནས་བཀག་འགོག་གིས་ཕྱིར་ཨ་རིར་བཏང་པའི་ཐད། རྒྱ་གར་འབྲེལ་ཡོད་མི་སྣ་དག་གིས་རྒྱུ་མཚན་ག་རེ་བརྗོད་ཡོད་མེད་དྲིས་པར། དེ་ནི་རྒྱ་གར་གཞུང་གི་བཀོད་ཁྱབ་ཡིན་ཚུལ་ལས་གཞན་ཁ་གསལ་རྒྱུ་མཚན་གང་ཡང་བརྗོད་མི་འདུག འོན་ཀྱང་། དེ་ནི་རྒྱ་ནག་གི་སྲིད་འཛིན་ཧུའུ་ཅིན་ཐའོ་རྒྱ་གར་ནང་ཚོགས་འདུར་ཡོང་ཡོད་པའི་སྐབས་འདིར་ཆེད་དུ་བཀག་འགོག་བྱས་པ་ཞིག་ལ་ངོས་འཛིན་བྱེད་ཀྱི་ཡོད་འདུག
གནད་དོན་དེའི་ཐད་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་དོན་འགྲུབ་ལྷ་དར་ལགས་ཀྱིས། རྒྱ་གར་གཞུང་གི་བྱེད་སྟངས་དེར་བློ་ཕམ་ཡོད་པ་ཙམ་མ་ཟད། ད་སྔ་རྒྱ་གར་གཞུང་གིས་རྒྱ་ནག་ལ་བཟུང་པའི་སྲིད་ཇུས་རིམ་པར་ཕམ་ཉེས་བྱུང་ཡོད་པར་བརྟེན། ད་ཆར་རྒྱ་གར་གཞུང་གིས་རྒྱ་ནག་ལ་འཛིན་པའི་སྲིད་ཇུས་ཐད་བསྐྱར་ཞིབ་བྱ་དགོས་པའི་དུས་ལ་སླེབས་ཡོད་ཀྱང་། རྒྱ་གར་གཞུང་གིས་བོད་རང་བཙན་ནི་རྒྱ་གར་ལ་མཚོན་ན་ཁེ་ཕན་ཆེ་བ་ཡོད་པར་མཐོང་ཐུབ་ཀྱི་མེད་པ་དེ་རྒྱ་གར་གྱི་ཕམ་ཁ་ཞིག་ཡིན་པར་བརྗོད་ཡོད་པ་རེད།
གསར་འགོད་པ། བནྡེ་སྐྱབས།
ཨ་མའི་བུ། འདི་རྒྱལ་ཁ་ཞིག་གི་སྔོན་འགྲོ་དང་། ལས་འགུལ་ལ་ནུས་པ་ཐོན་གྱིན་ཡོད་པའི་གཏན་ཚིགས་རེད།
༼རང་ཉིད་ལ་བུ་ཞིག་མེད་སོང་ན། གཞན་གྱི་བུ་དེ་མི་བུ་རེད༽དཔེ་རེད། རྒྱལ་ཁབ་ཡོད་མེད་དང་སྟོབས་ཤུགས་ཡོད་མེད་ཀྱི་ཁྱད་པར་རེད། སྒོར་དགའ་སྟུ་དགའ་ནག་པོ་ཚང་།
སྐད་ཆ་གསལ་པོ་བཟོ་ན་ཡག་པོ་འདུག། མི་འགའ་རིའི་གནད་དོན་འདིར་རྒྱ་གར་རྒྱ་ནག་ལ་སྐྲག་ཚུལ་སོགས་ཁུང་མེད་པ་ལུང་པ་གང་ཞིག་བཤད་ནས་དོན་དངོས་བོད་མའི་སེམས་ཤུགས་བཅག་ཐབས་བྱེད་བཞིན་འདུག། དངོས་ཡོད་ཕྱི་རྒྱལ་གྱི་མི་ཡིན་པ་གང་ཞིག་རྒྱ་གར་ནས་ཕྱིར་ཐོན་ཏེ་ཟླ་བ་གསུམ་མ་ཟིན་བར་སླར་འཛུལ་ཆོག་གི་ཡོད་མ་རེད། གནད་འགག་དེ་རེད། དུས་བབ་ཚང་གི་སྐད་ཆ་འདི་བདག་པོ་རྒྱབ་རོགས
རྒྱ་གར་གཞུང་གིས་བྱེད་སྟངས་འདིའི་ཐོག་ནས་ང་ལ་དོ་སྣང་གཉིས་བྱུང་སོང། དང་པོ། རྒྱལ་ཁབ་སུ་ཡིན་ཡང་རང་གི་གནད་དོན་ལ་ཐུགས་ཡོང་སྐབས་བོད་ཀྱི་རང་དབང་དང་ཐོབ་ཐང་། སྡུག་བསྔལ་སོགས་སྣང་མེད་གཏོང་གི་ཡོད་པ་དང། གཉིས་པ། རྒྱ་གར་སྲིད་གཞུང་གིས་རང་གི་ནུས་སྟོབས་དེ་རྒྱ་ནག་ལས་གཞན་པ་ཡོད་པའི་རང་རྟགས་དེ་སྟོན་གྱིན་ཡོད་པ་དེ་རེད།
ད་རྒྱ་གར་སྟོབ་ཆེན་རྒྱལ་ཁབ་ཡིན་ཀྱང་ བལ་ཡུལ་དང་ཅིག་མཚུང་ཆགས་འདུག ད་མཐའ་མ་ཨེ་ཤ་ཡ་ཚང་མ་རྒྱ་ནག་འོག་ལ་འགྲོ་ཉེན་ཆེ།
ཨ་ཧ་དེ་འདྲའི་རྒྱལ་ཁབ་ཡ་མཚན་ཞིག་རེད་ལ།