ཕྱི་ཟླ་དགུ་བའི་གྲོས་ཚོགས་ངྷ་རམ་ས་ལ་རང་དུ་ཚོགས་ཐུབ་པ་བྱ་རྒྱུ་ཡིན།

བོད་མི་མང་སྤྱི་འཐུས་ལྷན་ཚོགས་ཀྱི་ལས་ཁུངས་དང་གྲོས་ཚོགས་ཚོགས་ཁང་གསར་རྒྱག་དང་ཞིག་གསོའི་ལས་གཞི་མགོ་འཛུགས་བྱས་ཡོད་ཀྱང་། སྐབས་བཅོ་ལྔ་པའི་གྲོས་ཚོགས་ཚོགས་དུས་བཞི་པ་གྲོས་ཚོགས་ཚོགས་ཁང་རང་དུ་འཚོགས་ཐུབ་པ་བྱ་རྒྱུ་ཡིན་འདུག    

ཉེ་ལམ་བོད་མི་མང་སྤྱི་འཐུས་ལྷན་ཚོགས་ཀྱི་ལས་ཁུངས་དང་སྤྱི་འཐུས་རྒྱུན་ལས་ཀྱི་ལས་ཁུངས། སྤྱི་འཐུས་གྲོས་ཚོགས་ཀྱི་ཚོགས་ཁང་བཅས་ཀྱི་ཅ་དངོས་རྣམས་ཆེས་མཐོའི་ཁྲིམས་ཞིབ་ཁང་གི་ཞབས་འོག་དང་། སྔར་གྱི་འཆར་འགོད་དང་འོས་བསྡུ། འཕྲོད་བསྟེན་བཅས་ཀྱི་ལས་ཁུངས་ཁག་གི་ཁང་པའི་ནང་དབོར་འདྲེན་གྱིས་ལས་ཁུངས་གནས་སྤར་ཏེ། ཟླ་འདིའི་ཕྱི་ཚེས་ ༡༥ ཉིན་དངོས་སུ་ལས་ཁུངས་གསར་རྒྱག་དང་ཚོགས་ཁང་ཞིག་གསོའི་ལས་གཞི་མགོ་འཛུགས་གནང་ཡོད་འདུག

ཚོགས་དྲུང་སྟོབས་རྒྱལ་ལགས་སུ་ཐེངས་འདིའི་སྤྱི་འཐུས་ལྷན་ཚོགས་དང་རྒྱུན་ལས་ཀྱི་ལས་ཁུངས་གསར་རྒྱག  གྲོས་ཚོགས་ཀྱི་ཚོགས་ཁང་ཞིག་གསོའི་ཐད་འགྲོ་སོང་ག་ཚོད་ཡོད་མེད་དྲིས་པར་ཁོང་གིས། “  བོད་མི་མང་སྤྱི་འཐུས་ལྷན་ཁང་གི་ལས་ཁུངས་དང་གྲོས་ཚོགས་ཀྱི་ཚོགས་ཁང་དེ།  ༡༩༨༢ ལོར་གསར་རྒྱག་བྱས་པ་ནས་བཟུང་ད་ལྟའི་བར་ཞིག་གསོ་བྱེད་དགོས་བྱུང་ཡོད་པ་མ་རེད། ད་རེབ་ཞིག་གསོ་བྱེད་ཐེངས་ཐོག་མ་ཆགས་ཡོད། ཞིག་གསོ་བྱ་དགོས་པའི་རྒྱུ་མཚན་གཙོ་བོ་སྔོན་མ་ཁང་པ་གསར་རྒྱག་སྐབས་སྤུས་དག་པོ་ཞིག་བཟོས་མེད་པའི་དབང་གིས།  ལོ་འགའི་སྔོན་ནས་ཁང་པའི་ཕྱོགས་ཡོངས་ལ་སེར་ཀ་གས་འདུག་ལ།  སྔོན་མ་ནས་ཁང་པ་འོག་མའི་ནང་ཐིགས་པ་བརྒྱབ་པ་དང་བརླན་ཡོང་བ་སོགས་ཀྱི་དཀའ་ངལ་མང་པོ་ཞིག་འཕྲད་ཀྱི་ཡོད་འདུག  སྤྱིར་བཏང་ད་ལྟ་གནས་སྤོར་སའི་ཁང་པ་དེ་སྔོན་མ་ནས་སྤྱི་འཐུས་ལྷན་ཚོགས་ཀྱི་ཁོངས་སུ་ཡོད་ཀྱང་། གནས་སྟངས་ཀྱི་དབང་གིས་རྩིས་ཞིབ་ལས་ཁུངས་དང་གཞུང་ཞབས་འདེམས་བསྐོ་ལྷན་ཁང་། འཕྲོད་བསྟེན་ལས་ཁུངས་བཅས་ཀྱི་བེད་སྤྱོད་བྱས་པ་རེད། སྔར་ལོ་ཁང་པ་ཚུར་རག་སྟབས་སྤྱི་འཐུས་ལྷན་ཚོགས་ཀྱིས་ལྷན་ཚོགས་ཀྱི་དགོས་མཁོ་ལྟར་ཐོག་བརྩེགས་གཉིས་པ་གསར་རྒྱག་དང་འོག་མ་ཞིག་གསོ་བྱ་རྒྱུའི་གཏན་ཁེལ་བྱུང་སྟེ། བཀའ་ཤག་གི་ངོས་ནས་ཧིན་སྒོར་འབུམ་ ༡༠༠ ཡི་བཀའ་འཁྲོལ་གནང་ཡོད། ཉེ་ཆར་ཁང་པ་བཟོ་མཁན་དང་གྲོས་བསྡུར་བྱས་མཐར་ཧིན་སྒོར་འབུམ་ ༩༣ ཡས་མས་ཀྱི་སྐད་ཆ་བྱུང་ཡོད་ཀྱང་། ང་ཚོའི་ངོས་ནས་སྟེང་འོག་གཉིས་ཀ་ཡོངས་སུ་འགྲུབ་པར་ཧིན་སྒོར་འབུམ་ ༡༠༠ ལྷག་གི་འགྲོ་སོང་ཡོད་པའི་ཚོད་དཔག་བྱེད་ཀྱིན་ཡོད། ” ཅེས་བརྗོད་བྱུང་།

ཡང་ཁོང་ལ་མ་འོངས་པའི་ལས་ཁུངས་ཁག་གི་གོ་སྒྲིག་དང་འཆར་གཞི་གང་འདྲ་ཡིན་མིན་དང་། ད་ལྟའི་ཆར་གྲོས་ཚོགས་ཚོགས་ཁང་ཉམས་གསོ་བྱེད་ཀྱིན་ཡོད་སྟབས། སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཞི་པ་དུས་ནམ་ཞིག་ལ་ས་གནས་གང་དུ་འཚོགས་འཆར་ཡོད་མེད་དྲིས་པར། ཁོང་གིས། “ ང་ཚོའི་ངོས་ནས་ཐེངས་འདིའི་གསར་རྒྱག་སྐབས་ཐོག་བརྩེགས་གཉིས་པའི་ནང་སྤྱི་འཐུས་རྒྱུན་ལས་ཀྱི་ལས་ཁུངས་དང་རྒྱུན་ལས་ཚོགས་ཁང་། མཇལ་འཕྲད་ཁང་། དེ་བཞིན་ཐབ་ཚང་དང་འཁྲུས་ཁང་གསང་སྤྱོད་བཅས་མཐུན་རྐྱེན་ཆ་ཚང་ཡོད་པ་ཞིག་རྒྱག་འཆར་ཡོད་ལ། འོག་ཏུ་སྔར་གྱི་མཐུན་རྐྱེན་ཐོག་ཇེ་ལེགས་སུ་གཏོང་འཆར་ལས་གྲོས་ཚོགས་ཚོགས་ཁང་རྒྱ་སྐྱེད་སོགས་ཀྱི་ལས་འཆར་ཡོད་པ་མ་རེད། ཚོགས་ཁང་ནང་ལ་མཚོན་ན་གཙོ་བོ་འོག་གི་གདན་བརྗེ་བོ་རྒྱག་རྒྱུ་དེ་རེད། དེ་མིན་སྔོན་མ་ལྟར་རེད། ཐེངས་རྗེས་མིའི་གྲོས་ཚོགས་ཀྱི་ཐད་ནས་ཕྱི་ཟླ་ ༩ བའི་བར་འོག་གི་ཚོགས་ཁང་གི་ཉམས་གསོ་འགྲུབ་པར་བྱས་ཏེ། སྐབས་བཅོ་ལྔ་བའི་གྲོས་ཚོགས་ཚོགས་དུས་བཞི་པ་སྤྱི་འཐུས་ལྷན་ཚོགས་ཀྱི་ཚོགས་ཁང་རང་དུ་འཚོགས་ཐུབ་རྒྱུའི་རེ་བ་རྒྱག་གི་ཡོད་ལ།  ཕལ་ཆེར་འཚོགས་ཐུབ་ཀྱི་རེད་བསམ་གྱི་ཡོད། ཚོགས་ཡུན་གྱི་དུས་ཚོད་མི་འགྱངས་བར་སྤྱི་འཐུས་ལྷན་ཚོགས་ཀྱིས་གསར་འགོད་གསལ་བསྒྲགས་གནང་རྒྱུ་ཡིན།  ” ཅེས་བརྗོད་བྱུང་།