གཟའ་སྤེན་པའི་ཉིན་གངས་སྐྱིད་སྤྱི་ཐབ་ཚོགས་ཁང་དུ་ཤེས་རིག་ལས་ཁུངས་ཀྱི་གོ་སྒྲིག་འོག འཛིན་རིམ་ ༡༢ ཐོན་པའི་སློབ་ཕྲུག་ ཚོར་མཐོ་སློབ་ཏུ་སློབ་ཚན་འདེམས་ཕྱོགས་དང་འབྲེལ་བའི་ཟབ་སྦྱོང་ཞིག་སྤྲད་སོང་།
ཁ་སང་ཕྱི་ཚེས་ ༥ ཉིན་གངས་སྐྱིད་སྤྱི་ཐབ་ཚོགས་ཁང་དུ་ཤེས་རིག་ལས་ཁུངས་ཀྱི་སློབ་མའི་མདུན་ལམ་སློབ་སྟོན་སྡེ་ཚན་གྱི་གོ་སྒྲིག་འོག རྒྱ་གར་ནང་གི་བོད་པའི་སློབ་གྲྭ་ཁག་ཚང་མ་ཚུད་པའི་འཛིན་རིམ་ ༡༢ ཐོན་མཁན་གྱི་སློབ་ཕྲུག་ ༡༠༠ ལྷག་ལ། མཐོ་སློབ་འཚོལ་སྟངས་དང་སློབ་ཚན་འདེམས་ཕྱོགས་སོགས་དང་འབྲེལ་བའི་མ་འོངས་མདུན་ལམ་བཅས་ཀྱི་ཐད། ཤེས་རིག་ལས་ཁུངས་ཀྱི་མདུན་ལམ་སློབ་སྟོན་པ་དང་ཆེད་ལས་པ་ཁག་ཅིག་གིས་སོ་སོའི་ཉམས་མྱོང་དང་འབྲེལ་ཏེ། སློབ་ཕྲུག་ཚོར་ལམ་སྟོན་དང་དྲི་བ་དྲིས་ལན་བྱས་སོང་།
ཟབ་སྦྱོང་གི་མཛད་སྒོའི་ཐོག་མར་ཤེས་རིག་ལས་ཁུངས་ཀྱི་སློབ་མའི་མདུན་ལམ་སློབ་སྟོན་སྡེ་ཚན་གྱི་འགན་འཛིན་དང་སློབ་སྟོན་པ་སྒྲོལ་དཀར་དབང་མོ་ལགས་ཀྱིས་ཟབ་སྦྱོང་ངོ་སྤྲོད་གནང་རྗེས། ཤེས་རིག་དྲུང་འཕར་སྟོབས་རྒྱལ་ཚེ་རིང་ལགས་ཀྱིས་སློབ་ཕྲུག་ཚོ་རྒྱ་གར་མཐོ་སློབ་ཁག་ཏུ་སྐྱོད་སྐབས་རང་ཉིད་ཁོར་ཡུག་གང་དེའི་ནང་བོད་པའི་སྐུ་ཚབ་ལྟ་བུ་ཞིག་ཏུ་གྱུར་ཡོད་སྟབས། རྒྱུན་དུ་སློབ་སྦྱོང་ལ་འབད་བརྩོན་དང་སོ་སོའི་བཟང་སྤྱོད་ལ་དོ་སྣང་བྱ་དགོས་སྐོར་གྱི་གཏམ་བཤད་གནང་སོང་།
ཟབ་སྦྱོང་གི་ལས་རིམ་དང་པོའི་སྐབས་འཛིན་རིམ་ ༡༡ དང་ ༡༢ གྱི་སློབ་མ་ཚོར་སོ་སོའི་སློབ་ཚན་གཞིར་བཟུང་སྡེ་ཚན་དུ་དབྱེ་སྟེ། གངས་སྐྱིད་དཔེ་མཛོད་ཁང་གི་ཡིག་སྒྱུར་དང་ཉམས་ཞིབ་ཚན་པའི་འགན་འཛིན་ཆོག་བསྟན་འཛིན་སྨོན་ལམ་ཕུན་ཚོགས་ལགས་ཀྱིས། དེང་གི་འཛམ་གླིང་ནང་བོད་ཡིག་ལ་མདུན་ལམ་ཅི་འདྲ་ཡོད་པའི་སྐོར་དང་། ཤེས་རིག་ལས་ཁུངས་ཀྱི་ཤེས་ཡོན་འགན་འཛིན་རྒྱལ་མཚན་ལགས་ཀྱིས་ཚན་རིག་སློབ་སྦྱོང་གི་གལ་ཆེན་རང་བཞིན་དང་དེའི་མདུན་ལམ་སྐོར། ཚེ་རིང་རྟ་མགྲིན་ལགས་ཀྱིས་ཚོང་ལས་དང་རྩིས་རིག་སློབ་སྦྱོང་གི་གདམ་ཀ་དང་དེའི་མདུན་ལམ་སྐོར། སྒྲོལ་དཀར་དབང་མོ་ལགས་ཀྱིས་སྤྱི་ཚོགས་ཚན་རིག་སློབ་སྦྱོང་དང་དེའི་གལ་གནད་བཅས་ཀྱི་ཐད་གཏམ་བཤད་དང་དྲི་བ་དྲིས་ལན་བྱས་ཡོད།
ཟབ་སྦྱོང་ལས་རིམ་གཉིས་པའི་སྐབས་སློབ་ཚན་བྱེ་བྲག་པ་ཁག་ཅིག་གི་ཐད་འབྲེལ་ཡོད་ཆེད་ལས་པ་གདན་ཞུས་ཐོག རྒྱལ་མཚན་གྱིས་བོད་པའི་སྤྱི་ཚོགས་ནང་དགེ་རྒན་གྱི་གནས་བབ་དང་དེའི་མདུན་ལམ། བཀའ་ཤག་དྲུང་གཞོན་བསྟན་འཛིན་ལེགས་བཤད་ཀྱིས་གཞུང་ཞབས་ལས་བྱེད་ཀྱི་ལས་ཀའི་ངོ་བོ་དང་དེར་ཇི་ལྟར་འཛུལ་ཞུགས་བྱ་དགོས་སྐོར། ཕ་ཡུལ་གསར་ཁང་གི་གསར་འགོད་པ་བསྟན་དར་ཚེ་རིང་གིས་གསར་འགོད་ལས་རིག་དང་དེའི་མདུན་ལམ། དབུས་བོད་མིའི་སྒྲིག་འཛུགས་ཀྱི་གློད་ཀླད་སྡེ་ཚན་གྱི་འགན་འཛིན་རྣམ་རྒྱལ་ལེགས་བཤད་ཀྱིས་གློག་ཀླད་སློབ་སྦྱོང་དང་དེའི་མདུན་ལམ། ཤེས་རིག་ལས་ཁུངས་ཀྱི་སློབ་མའི་མདུན་ལམ་སློབ་སྟོན་སྡེ་ཚན་གྱི་མདུན་ལམ་སློབ་སྟོན་པ་གཞོན་པ་བསོད་ནམས་དཔལ་མོས་སེམས་ཁམས་རིག་པའི་སློབ་སྦྱོང་དང་དེའི་མདུན་ལམ། བཙན་བྱོལ་བོད་མིའི་ཆེ་མཐོའི་ཁྲིམས་ཞིབ་ཁང་གི་ཁྲིམས་རྩོད་པ་བསྟན་འཛིན་རྣམ་རྒྱལ་གྱིས་ཁྲིམས་ལུགས་སློབ་སྦྱོང་དང་། དེང་གི་འཛམ་གླིང་སྤྱི་དང་བྱེ་བྲག་བོད་མིའི་སྤྱི་ཚོགས་ནང་ཁྲིམས་ལུགས་སློབ་སྦྱོང་གི་མདུན་ལམ་བཅས་ཀྱི་ཐད། སློབ་ཕྲུག་རྣམས་སོ་སོའི་སློབ་སྦྱོང་གི་གདམ་ཀ་གཙོ་བཟུང་ཐོག་སྡེ་ཚན་ཁག་ཏུ་བགོས་ཏེ་བགྲོ་གླེང་དང་དྲི་བ་དྲིས་ལན་བྱས་ཡོད་པ་མ་ཟད། ཉིན་རྒྱབ་རྒྱ་གར་གྲོང་ཁྱེར་མ་འདྲ་བ་ཁག་ཅིག་ནས་སླེབས་པའི་མཐོ་སློབ་འགྲིམ་བཞིན་པའི་བོད་རིགས་སློབ་མ་འགས་སོ་སོའི་ཉམས་མྱོང་དང་མཐོ་སློབ་ཡག་ཤོས་རིགས་ངོ་སྤྲོད། སློབ་ཚན་གྱི་གདམ་ཀ་ག་དག་ཡོད་མེད་དང་མཐོ་སློབ་འཚོལ་སྟངས་སོགས་ཀྱི་ཐད་ཉམས་མྱོང་བརྗེ་རེས་བཅས་གནང་སོང་།
ཐེངས་འདིའི་ཟབ་སྦྱོང་ནང་མཉམ་ཞུགས་བྱེད་མཁན་སློབ་ཕྲུག་ཁག་ཅིག་ལ་མ་འོངས་པར་སློན་ཚན་ག་རེའི་སྟེང་འགྲོ་འདོད་ཡོད་མེད་དང་། སློབ་ཚན་དེ་དག་ལ་སློབ་སྦྱོང་བྱ་དགོས་པའི་དམིགས་ཡུལ་དང་རྒྱུ་མཚན་སྐོར་དྲིས་སྐབས། སིམ་ལཱ་གཏན་སློབ་ནས་ཡིན་པའི་སློབ་ཕྲུག་ཤེས་རབ་ཀྱིས་ “ང་རང་འཛིན་རིམ་ ༡༡ དང་ ༡༢ སྐབས་མགྲོན་ཁང་འཛིན་སྐྱོང་དང་ཡུལ་སྐོར་སྤྲོ་འཆམ་རིག་པའི་སློབ་ཚན་བླངས་པ་ཡིན། མ་འོངས་པར་མགྲོན་ཁང་གི་འཛིན་སྐྱོང་རིག་པའི་སློབ་སྦྱོང་སྟེང་འགྲོ་རྒྱུ་ཡིན། དེ་ནི་ང་རང་ཉིད་ཀྱི་དགའ་ཕྱོགས་ཡིན”ཞེས་བརྗོད་བྱུང་།
མཱ་སུ་རི་སློབ་གྲྭའི་ཚོང་ལས་སྡེ་ཚན་ནས་སློབ་མཐར་ཕྱིན་མཁན་སློབ་ཕྲུག་བསྟན་འཛིན་ཀུན་དགའ་ལགས་ཀྱིས་ “ང་རང་གིས་འཛིན་རིམ་ ༡༡ དང་ ༡༢ སྐབས་ཚོང་ལས་རིག་པའི་སྡེ་ཚན་ནང་སློབ་སྦྱོང་བྱས་པ་ཡིན། ད་ལྟ་ཚོང་ལས་དང་ཁྲིམས་ལུགས་གང་གི་ཐོག་སློབ་སྦྱོང་བྱ་དགོས་མིན་ཐེ་ཚོམ་ངང་ལྷག་ཡོད། ངས་ཁྲིམས་ལུགས་ཐོག་སློབ་སྦྱོང་བྱ་ཐུབ་ན་བསམ་བསྡད་ཡོད། དེ་ནི་ང་རང་གི་དགའ་ཕྱོགས་ཡིན”ཞེས་བརྗོད་བྱུང་།
ངྷ་སྟེང་བོད་ཁྱིམ་སློབ་གྲྭའི་ཚན་རིག་སྡེ་ ཚན་ནས་ཐོན་པ་སློབ་ཕྲུག་བསྟན་འཛིན་ཕན་ཐོགས་ཀྱིས་ “ང་རང་དགེ་རྒན་བྱ་འདོད་ཡོད། མ་འོངས་པར་མཐོ་སློབ་ནང་ཚན་རིག་ཐོག་སློབ་སྦྱོང་བྱས་ཏེ་རྗེས་མ་ཚན་རིག་དགེ་ རྒན་ཞིག་བྱ་རྒྱུའི་དམིགས་ཡུལ་བཟུང་ཡོད། དེ་ནི་སོ་སོའི་འདོད་མོས་དང་དགའ་ཕྱོགས་ཡིན་ ” ཟེར།
ཐེངས་འདིའི་ཟབ་སྦྱོང་དུ་ཞུགས་མཁན་སློབ་ཕྲུག་ཚོར་མཐོ་སློབ་ནང་སློབ་ཚན་ག་རེ་ལེན་རྒྱུ་ཡིན་མིན་ཐད་ད་ལྟ་སེམས་ཐག་ཆོད་མཁན་ག་ཚོད་ཡོད་མེད་རྒྱུས་ལོན་བྱས་པར། སློབ་མ་བརྒྱ་ ༡༠ ཙམ་གྱིས་མ་གཏོགས་བརྒྱ་ཆ་ ༩༠ ཡིས་ད་དུང་སློབ་ཚན་ག་རེ་ལེན་དགོས་མིན་སེམས་ཐག་མ་ཆོད་པར་ཐེ་ཚོམ་ངང་ལྷག་འདུག
གསར་འགོད་པ། བནྡེ་སྐྱབས།
ཤེས་རིག་ནས་དེ་ལྟ་བུའི་ཟབ་སྦྱོང་གནང་བ་ནི་རླབས་ཆེ་བའི་བྱ་བ་ཞིག་རེད། འོན་ཏེ། ང་ཚོའི་སློབ་ཕྲུག་རྣམས་ལ་ཐོག་དང་པོ་ཉིད་ནས་བསམ་བློའི་འཐད་སློབ་གསོ་ངེས་ཅན་ཞིག་འཐོབ་བ་བྱ་རྒྱུ་ནི་ཤིན་ཏུ་གལ་གནད་ཆེ་བ་ཞིག་ཡིན་པ་མ་ཟད་དེ་ལྟ་བུའི་སློབ་གསོ་དེ་དམའ་འབྲིང་སྐབས་ནས་འཐོབ་ཚེ། སློབ་མ་རང་ཉིད་ལ་རང་འཚུགས་ལྡན་པའི་དམིགས་འདུན་དང་ལྟ་བ་ཞིག་ལྡན་ངེས་ཡིན་པས་ཕྱིན་ཆད་གཞི་རིམ་སློབ་གྲྭ་ཁག་ནང་བསམ་བློའི་སློབ་གསོ་དང་འབྲེལ་བའི་ཟབ་སྦྱོང་རེ་སྤྲོད་ཐུབ་ཚེ་དེ་ལས་ཀྱང་དགེ་ཕན་ཆེ་བར་མཐོང་།
རེད་རེད་ཉག་ཕྲའི་དུས་སྐབས་འདིར་གསར་ལམ་ལ་དོ་སྣང་བྱས་ནས་འཁུར་མཉམ་ལེན་གྱིས་འཛམ་གླིང་ལ་འགྲེལ་བརྗོད་བྱེད་རྒྱུ་ལེ་རང་གི་གྲོད་ཁོག་དུས་ཚོད་དེ་གལ་ཆེན་པོ།།།
དེ་ཡང་བོད་ཚང་གི་མི་ཞིག་རེད་ ཐོས་པ་དགའ།།།།
སྤྱིར་བཏང་དུས་ཚོད་རྩ་བ་ཆེན་པོ་ཡིན་ཙང། ཉིན་ལྟར་བསམ་ཚུལ་འདྲ་འདོན་བཞིན་སྡོད་ཁོམ་མི་འདུག་ཏེ། ད་ཐེངས་ཀྱི་ཟབ་སྦྱོང་འདི་དངོས་ནས་དགོས་གལ་ཆེན་པོ་དང་རྒྱལ་སྤྱིའི་འགྲོ་ལུགས་དང་མཐུན་པ་ཞིག་ཏུ་མཐོང་སོང་བས། ཟབ་སྦྱོང་གནང་མཁན་དང་ཉན་མཁན་ཚང་མས་རིག་པ་བསྒྲིམས་ཏེ་བློ་རྩེ་གཅིག་ཏུ་སྤུངས་དགོས་པ་གལ་ཆེན་རེད།
མདུན་ལམ་ལམ་སྟོན་བྱས་ན་ད་ཡག་པོ་རེད་ཡིན་ཡང་མདུན་ལམ་ལམ་སྟོན་བྱེད་དགེ་སློབ་གཉིས་ཀྱིས་བོད་སྐད་ཆ་ལ་ཆོ་ལེ་ཞིག་བཤད་བཞིན་དེ་དངོས་གནས་ཚབས་ཆེན་པོ་རེད་།
སློབ་མ་དེ་ཡིན་ན་ཡང་འདྲ་ལམ་སྟོན་མཁས་དབང་ཚོ་ཡིན་ཡང་འདྲ་ཁྱོད་ཚོ་ཚང་མ་ལ་བོད་སྐད་གཙང་མ་བཤད་སྟངས་ལ་ལམ་སྟོན་ཞིག་བྱེད་ན་ཡག་ས་རེད་།
དེ་མ་གཏོངས་བོད་པའི་སོན་རྩ་ཚང་མ་རུལ་རྒྱའི་ཉེན་ཁ་འདུག
ད་ཟབ་སྦྱོང་བྱེད་དེ་ཕན་པ་གང་ཡོང། དེ་སྔར་ཟབ་སྦྱོང་ཨ་ཟབ་ཡང་ཟབ་གནང་ཚར་པ་རེད། གཞོན་སྐྱེས་ཚོ་ནི་ད་དུང་ཡང་རྒྱ་ལམ་ལ་ཉུལ་ནས་བསྡད་ཡོད། དེ་ལས་ཁོང་ཚོར་ལས་ཀ་ཞིག་འཚོལ་ཐབས་བྱེད་ན་ལེགས་ཤོས་རེད།
སློབ་ཚན་ལ་རྒྱུས་མངའ་ཆེ་བའི་མི་སྣ་གདན་ཞུས་ཀྱིས་ལམ་སྟོན་དྲིས་ལན་གནང་བར་མངོན་པར་བསྟོད་དོ།།
དེང་སྐབས་དུས་བབ་ཚང་ལ་གསར་འགྱུར་ཇེ་ཉུང་རེད། གསར་འགྱུར་གཅིག་གཉིས་རེ་བཀོད་པ་དག་ཀྱང་གཞན་གྱི་རྗེས་ལུས་ཁོ་ན་རེད།
ཟབ་སྦྱོང་དེ་ཁ་ཡོད་ལག་ཡོད་ཀྱིས་ཕན་འདོགས་ཡོད་པ་ཞིག་རེད། དེའི་ཐོག་སློབ་གྲོགས་ཚོས་ངེས་པར་དུ་ཐུགས་སྣང་གནང་རྒྱུ་གལ་ཆེ།།
མ་གཞི་སྤྱི་ཚོགས་ཀྱི་གྲུ་ཟུར་ཚང་མ་ལ་བདག་པོ་བརྒྱབ་པ་གསར་འགོད་པ་ཡག་པོ་རེད། ཡིན་ནའང་སློབ་ཕྲུག་ཁ་ཤས་ལ་དྲ་བ་དྲིས་ལན་གནང་བའི་ནང་དོན་ལ་རྒྱུ་མཚན་ཞེ་དྲག་མི་འདུག དུས་བབ་ཚང་གི་གསར་འགོད་པ་དོན་འགྲུབ་བཀྲ་ཤིས་ཀྱི་དྲི་བ་དྲིས་ལན་ཡུན་རིང་ཞིག་ལ་མཇལ་ཐུབ་མ་སོང་ག་རེ་བྱུང་བ་རེད། ཁོང་གི་བཅར་འདྲི་ཁག་ལ་དོན་སྙིང་ཆེན་པོ་ཡོད།
༸གོང་ས་མཆོག་གིས་སློབ་ཕྲུག་ཚོར་དཀའ་ངལ་གྱི་དུས་སུ་སེམས་ཤུགས་ནམ་ཡང་ཆག་མི་རུང་བ་དང་། སེམས་བཟང་པོ་དང་རྣམ་དཔྱོད་གཉིས་དུས་མཉམ་དུ་འགྲོ་དགོས་པའི་ཐོག་རང་ཉིད་ཀྱི་མི་ཚེ་དོན་དང་ལྡན་པ་ཞིག་ཡོང་ཐབས་ལ་འབད་བརྩོད་གནང་དགོས་རྒྱུ་ཞེས་གསུངས་ཤག།།
མི་རྒོད།
༢༠༡༢/༠༤/༢༢ ཉིན་འདོན་སྤེལ་བྱས། བརྩེ་བའི་བསམ་པ་དེ་རྨང་གཞིར་བྱས་ཏེ་རྣམ་དཔྱོད་བེད་སྤྱོད་ཐོག་ཉེ་རིང་མེད་པའི་བྱམས་བརྩེའི་བསམ་བློ་ཞིག་ཡོང་ཐབས་ལ་འབད་དགོས ” ཞེས་གསུངས། ང་ཚོ་ལ་སངས་རྒྱས་སྟོན་པས་བཀའ་ཕེབས་འདུག་ད།།
ཀ་ཡེ་སློབ་མ་རྣམས་ད་ཐོམ་ཐོམ་མ་བྱེད་རང་ལ་ཡོད་པའི་ རྣམ་དཔྱོད་བེད་སྤྱོད་གཏང་སྟེ་རང་མི་རིགས་ལ་ཕན་པ་དང་ རང་ལ་ཕན་པ་གཉིས་ལྡན་ལ་འབད་དགོས་དེ་མིན་ཁྲ་ཁྲ་ཟིང་ཟིང་ང་ཚོའི་ལེགས་བྱང་དང། རིག་གཞུང་མ་རེད། བཀའ་ཁྲི་མཆོག་གི་དབུས་ཤེས་རིག་ལས་ཁུངས་ལ་བཀྲིན་ཆེ་ཞུ། བོད་མིའི་ཤེས་རིག་རྒྱལ་གྱུར་ཅིག།