ཨོ་བྷ་མས་མཚན་མཐུན་གཉེན་སྒྲིག་ལ་རྒྱབ་སྐྱོར།

ཨ་རིའི་སྲིད་འཛིན་གྱི་འོས་བསྡུ་བསླེབ་ལ་ཉེ་བའི་སྐབས་འདིར།ཨ་རིའི་ནང་མཚན་མཐུན་གཉེན་སྒྲིག་ཁྲིམས་མཐུན་བཟོ་རྒྱུར་གླེང་གཞི་ཤུགས་ཆེར་ཡོང་གི་ཡོད་པ་དང་། སྤྱི་མཐུན་ཚོགས་པའི་སྲིད་འཛིན་རོམ་ནའེ་ཡིས་ངོ་རྒོལ་དང་ཨོ་བྷ་མས་རྒྱལ་སྐྱོར་བྱེད་ཀྱི་ཡོད་འདུག

ཕྱི་ཚེས་ ༨ ཉིན་ཨ་རིའི་གྷལ་ལུབ་(Gallup) གསར་ཁང་གིས་ཨ་རིའི་མང་ཚོགས་ཀྱི་བསམ་ཚུལ་བསྡུས་པའི་ཁྲོད་ཀྱི་བརྒྱ་ཆ་ ༥༠ མཚན་མཐུན་གཉེན་སྒྲིག་ཁྲིམས་མཐུན་བཟོ་རྒྱུར་རྒྱབ་སྐྱོར་བྱས་ཡོད་པ་དང་། ཨ་རིའི་ཁཱ་རོ་ལེ་ནཱ་(Carolina) ནུབ་མས་མཚན་མཐུན་གཉེན་སྒྲིག་ཁྲིམས་འགལ་ཡིན་པའི་སྲིད་ཇུས་གཏན་འབེབ་བྱས་པ་བཅས་ཀྱི་སྐབས་དང་བསྟུན། ཕྱི་ཚེས་ ༩ ཉིན་ཨེ་བྷེ་སེ་(ABC) གསར་ཁང་གིས་སྲིད་འཛིན་ཨོ་བྷ་མར་གནད་དོན་དེའི་ཐད་ཆེད་དུ་བཅར་འདྲི་བྱས་སྐབས། ཁོང་གིས་མཚན་མཐུན་གཉེན་སྒྲིག་ལ་རྒྱབ་སྐྱོར་ཡོད་པར་བརྗོད་ཡོད་འདུག ཨོ་བྷ་མ་ནི་ཨ་རིའི་སྲིད་འཛིན་རིམ་བྱུང་གི་ཁྲོད་ནས་མཚན་མཐུན་གཉེན་སྒྲིག་ལ་རྒྱབ་སྐྱོར་བྱེད་མཁན་ཐོག་མ་དེ་ཆགས་ཡོད་ལ། ཨོ་བྷ་མའི་ཁ་གཏད་དུ་ལངས་པའི་ཨ་རིའི་སྤྱི་མཐུན་ཚོགས་པའི་སྲིད་འཛིན་འོས་མི་རོམ་ནའེ་(Mitt Romney) ཡིས་མཚན་མཐུན་གཉེན་སྒྲིག་ཁྲིམས་མཐུན་བཟོ་རྒྱུར་ངོ་རྒོལ་བྱེད་ཀྱི་ཡོད་པ་རེད།

ཨ་རིའི་མངའ་སྡེ་ ༣༡ གིས་མཚན་མཐུན་གཉེན་སྒྲིག་ལ་མོས་མཐུན་མེད་པའི་ཁྲིམས་གཞི་གཏན་འབེབ་བྱས་ཡོད་པ་དང་། མངའ་སྡེ་ ༦ གིས་མཚན་མཐུན་གཉེན་སྒྲིག་ཁྲིམས་མཐུན་དུ་བཟོས་ཡོད་པ་རེད། ཨོ་བྷ་མས་མཚན་མཐུན་གཉེན་སྒྲིག་ལ་རྒྱལ་སྐྱོར་ཡོད་པ་བརྗོད་རྗེས། ཨ་རིའི་ནང་གི་མཚན་མཐུན་གཉེན་སྒྲིག་རང་དབང་ལས་འགུལ་བ་དག་གིས་དགའ་བསུའི་རྟེན་འབྲེལ་ཞུས་ཡོད་པ་མ་ཟད། ཨོ་བྷ་མས་ལོ་རྒྱུས་གསར་པ་ཞིག་བཟོས་སོང་ཞེས་བསྔགས་བརྗོད་བྱེད་བཞིན་ཡོད་འདུག

དེང་གི་རྒྱལ་སྤྱིའི་སྤྱི་ཚོགས་སྤྱི་དང་ལྷག་པར་དུ་ཨ་རིའི་ནང་མཚན་མཐུན་(same sex) གཉེན་སྒྲིག་གི་གནད་དོན་དེ་རྣོ་ངར་ལྡན་པའི་རྩ་དོན་ཞིག་ཏུ་གྱུར་ཡོད་ལ། མཚན་མཐུན་ཆགས་སྤྱོད་དང་གཉེན་སྒྲིག་རང་དབང་སྐོར་གྱི་འཐབ་རྩོད་པའི་ཚོགས་སྡེ་རིགས་མང་པོ་ཡོད་པ་ཟད། ད་ཆར་མཚན་མཐུན་གཉེན་སྒྲིག་གི་གནད་དོན་གྱིས་ཨ་རིའི་ཆབ་སྲིད་དང་སྲིད་འཛིན་འོས་བསྡུར་ཤུགས་རྐྱེན་ངེས་ཅན་ཞིག་སླེབས་བཞིན་ཡོད་པ་རེད།

གསར་འགོད་པ། བནྡེ་སྐྱབས།