གཟའ་ཉི་མའི་ཉིན་ངྷ་ས་མེག་གྷན་ཉིན་སློབ་ཚོགས་ཁང་དུ་༼ མེར་བསྲེཊ་ལས་འགུལ་གླེང་བ༽ཞེས་པའི་བགྲོ་གླེང་ཞིག་ཚོགས་ཏེ། རྒྱ་ནག་ཉམས་ཞིབ་པ་གསུམ་གྱིས་བོད་མིའི་མེར་བསྲེགས་ལས་འགུལ་དང་། རྒྱ་ནག་ནང་ཁུལ་གྱི་རྩོད་རྙོག་སྐོར་ལ་གཏམ་སྤེལ་ཡོད།
དབུ་མའི་ལམ་མི་མང་ལས་འགུལ་ཁང་དང་ངྷ་ས་ས་གནས་བུད་མེད་ལྷན་ཚོགས་གཉིས་ཀྱི་སྒྲིག་འོག་འཛམ་གླིང་ཨ་མའི་ཉིན་མོ་དང་བསྟུན་ཏེ། ཁ་སང་ཕྱི་ཚེས་ ༡༣ ཉིན་གྱི་ཉིན་རྒྱབ་ཆུ་ཚོད་ ༢ པའི་སྟེང་། བཞུགས་སྒར་ངྷ་ས་མེག་གྷན་ཉིན་སློབ་ཚོགས་ཁང་དུ།༼མེར་བསྲེཊ་ལས་འགུལ་གླེང་བ༽ཞེས་པའི་བགྲོ་གླེང་ཞིག་ཚོགས་སོང་། བགྲོ་གླེང་ཐོག་བོད་མི་མང་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་ཀྱིས་རྒྱ་ནག་ཁྲུང་ཆིན་གྲོང་ཁྱེར་གྱི་དམར་ཤོག་དྲུང་ཆེ་པཱོ་ཞི་ལཱེ་ཡི་གནད་དོན་སྐོར་དང་། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་གཞོན་པ་འཇམ་དཔལ་སྨོན་ལམ་ལགས་ཀྱིས་བོད་མིའི་མེར་བསྲེགས་ལས་འགུལ་བྱུང་རྗེས་རྒྱ་གཞུང་གིས་བོད་ཐོག་འཛིན་པའི་སྲིད་བྱུས་སྐོར། ཕྱི་དྲིལ་རྒྱ་ཡིག་སྡེ་ཚན་གྱི་ཉམས་ཞིབ་པ་སངས་རྒྱས་སྐྱབས་ལགས་ཀྱིས་བོད་མིའི་མེར་བསྲེཊ་ལས་འགུལ་ཐོག་རྒྱ་རིགས་ཤེས་ཡོན་ཅན་ཚོའི་ལྟ་སྟངས་བཅས་བཅས་ཀྱི་ཐོག་གཏམ་བཤད་སྤེལ་ཡོད།
མཛད་སྒོའི་ཐོག་མར་དབུ་མའི་ལམ་མི་མང་ལས་འགུལ་ཁང་གི་ཤེས་ཡོན་འགན་འཛིན་བློ་བཟང་ཆོས་འབྱོར་ལགས་དང་། ངྷ་ས་ས་གནས་བུད་མེད་ཚོགས་པའི་ཚོགས་གཙོ་སྐལ་བཟང་གཡུ་སྒྲོན་ལགས་གཉིས་ཀྱིས། བགྲོ་གླེང་ཚོགས་འདུ་དེ་ནི་བཙན་བྱོལ་བོད་མིའི་གཞི་རིམ་མང་ཚོགས་ཁྲོད། རྒྱ་ནག་ཤེས་ཡོན་ཚོས་བོད་མིའི་མེར་བསྲེཊ་ལས་འགུལ་ལ་ལྟ་སྟངས་ཅི་ཡོད་དང་། རྒྱ་ནག་དཔོན་རིགས་ནང་ཁུལ་གྱི་ཆབ་སྲིད་འགལ་ཟླའི་གནས་སྟངས་ཤེས་རྟོགས་ཡོང་སླད་གོ་སྒྲིག་ཞུས་པ་ཞིག་ཡིན་ཚུལ་ངོ་སྤྲོད་གནང་སོང་།
སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་ཀྱིས་རྒྱ་ནག་ཁྲུང་ཆིན་གྲོང་ཁྱེར་གྱི་དམར་ཤོག་དྲུང་ཆེ་པཱོ་ཞི་ལཱེ་ཡིས་དངུལ་ལྐོག་ཟ་བྱས་ཏེ་ཕྱི་རྒྱལ་དངུལ་ཁང་དུ་ཨ་སྒོར་དུང་ཕྱུར་ ༦༠ བཏང་ཡོད་ཚུལ་དང་། ཁོང་ལ་གློག་བརྙན་འཁྲབ་མཁན་དང་གསར་འགོད་པ་ཚུད་པའི་དགའ་རོགས་བུད་མེད་ ༡༠༠ དང་ལྐོིག་འབྲེལ་ཡོད་པ། རྒྱ་ནག་དབུས་ཆབ་སྲིད་རྒྱུན་ལས་ཀྲིག་ཡོང་ཁཱང་དང་ཁོང་གཉིས་ལ་ཞིས་ཅིན་ཕིན་རྒྱ་ནག་སྲིད་འཛིོན་གོ་གནས་ལས་མར་ཕབ་རྒྱུའི་ངན་ཇུས་ཡོད་སྐོར། ༡༩༩༢ ལོར་ཏཱ་ལན་གྲོང་ཁྱེར་དུ་གནམ་གྲུར་མར་ཟགས་ཏེ། རྒྱ་ནག་མཐོ་རིམ་དཔོན་རིཊ་མང་པོ་འདས་གྲོངས་སུ་ཕྱིན་པ་དེ་ཡང་། པཱོ་ཞི་ལཱེ་ཡིས་རང་གི་ཉེས་པ་འགེབས་ཆེད་སྦྱོར་བ་བརྩམས་པ་ཡིན་ཚུལ་དང་། རྒྱ་ནག་དབུས་ཆབ་སྲིད་རྒྱུན་ལས་ཀྲིག་ཡོང་ཁཱང་སི་ཁྲོན་ཞིང་ཆེན་དམར་ཤོག་དྲུང་ཆེའི་ལས་གནས་སྐབས། སྤྲུལ་སྐུ་བསྟན་འཛིན་བདེ་ལེཊ་གཙོས་གསེར་རྟ་ཁུལ་གྱི་བོད་མིའི་གནད་དོན་བཅས་དང་འབྲེལ་ཏེ་གསུངས་རྒྱུར། “ ད་ལོའི་ཕྱི་ཟླ་ ༡༠ ནང་རྒྱ་ནག་དམར་ཤོག་གི་ཚོཊ་འདུ་ཚོགས་ཏེ་གནད་དོན་ཁག་ཅིག་གི་ཐོག་འགྱུར་བ་གཏོང་རྒྱུའི་དུས་ལ་བསླེབས་ཡོད་ཀྱང་། རྒྱ་ནག་དམར་ཤོག་ས་ཡ་ ༨༠ ཡོད་པ་དེ་མང་ཚོགས་ཀྱི་ཁེ་བཟང་ཟ་མཁན་གཅིག་པ་ཡིན་སྟབས། དམར་ཤོག་མགོ་ཁྲིད་ཚོས་ཁོང་ཚོའི་བར་གྱི་གནད་དོན་དང་བསམ་ཚུལ་མི་མཐུན་པ་རྣམས་ནང་ཁུལ་ནས་ཞི་འགྲིག་བྱས་ཏེ། བོད་ཀྱི་གནད་དོན་ཐོག་ཁ་གཅིག་མཐུན་གྱི་ལངས་ཕྱོགས་འཛིན་ངེས་ཡིན” ཞེས་དང་། “ཉེ་ཆར་ཁྲུང་ཆིན་ཉེན་རྟོག་མགོ་བ་ཝང་ལི་ཅོན་དང་། ཁྲིམས་རྩོད་པ་ཁྲིན་ཀོན་ཁྲིན་གཉིས་སྔ་རྗེས་སུ་ཨ་རིའི་གཞུང་ཚབ་ཁང་དུ་ཕྱིན་པ་དེས། དེང་ཕྱིན་རྒྱ་གཞུང་གིས་འགྲོ་བ་མིའི་ཐོབ་ཐབ་ཐོག་གང་བྱུང་བྱ་མི་ཐུབ་པ་གསལ་སྟོན་བྱས་ཡོད་ ” ཅེས་བརྗོད་བྱུང་།
འཇམ་དཔལ་སྨོན་ལམ་ལགས་ཀྱིས་ཕྱི་ལོ་ ༢༠༠༨ ལོར་བོད་ཀྱི་ས་ཁུལ་ཁག་ཏུ་བོད་མི་ཚོས་ལས་འགུལ་རིམ་པར་སྤེལ་ཏེ་ནུས་པ་གང་འཚམ་ཐོན་སྟབས། ༢༠༡༠ ལོའི་ཕྱི་ཟླ་ ༡ ནང་གནད་དོན་དེར་དམིགས་ཏེ། རྒྱ་ནག་དཔོན་རིགས་ཚོས་པེ་ཅིན་དུ་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཟེར་བ་ཞིག་ཚོགས་ཏེ། བོད་ཁུལ་གྱི་དཔལ་འབྱོར་རྗེས་ལུས་དང་སྤྱི་ཚོགས་བརྟན་ལྷིང་མེད་པ་གཉིས། ད་ལྟའི་བོད་ནང་གི་གནད་དོན་ཆེན་པོ་གཉིས་ཡིན་པར་ངོས་འཛིན་བྱས་ཡོད་ཚུལ། གནད་དོན་དེ་གཉིས་ཐག་གཅོད་བྱ་རྒྱུར། བོད་ཁུལ་འཕུར་བསྐྱོད་ལྟ་བུའི་ཡར་རྒྱས་དང་ཡུན་རིང་བདེ་འཁོད་དུ་གཏོང་དགོས་པའི་མཐའ་མའི་གྲོས་ཆོད་བཞག་ཡོད་པ་མ་ཟད། ༢༠༡༡ ལོ་ནས་བོད་རང་ལྗོངས་གཙོས་བོད་ཀྱི་དགོན་སྡེ་ཁག་གི་ནང་ཆབ་སྲིད་ལས་འགུལ་སྤེལ་རྒྱུ་དང་གྲྭ་བཙུན་རྣམས་ལ་དོ་དམ་བྱས་ཏེ། དགོན་པའི་བྱེད་སྒོ་ཚང་མ་རྒྱ་གཞུང་གི་ཁྲིམས་དང་སྒྲིག་གཞིའི་འོག་བཅུག་ཡོད་སྐོར་གསལ་འདོན་གནང་སོང་།
མཐར་ཉམས་ཞིབ་པ་སངས་རྒྱས་སྐྱབས་ལགས་ཀྱིས་རྒྱ་ནག་གི་ཤེས་ཡོན་ཅན་ཚོས་བོད་མིའི་རང་ལུས་མེར་བསྲེཊ་ལས་འགུལ་ཐོག་ལྟ་ཚུལ་ཅི་ཡོད་ངོ་སྤྲོད་གནང་སྐབས། ཐེ་ཝན་གནས་སྡོད་རྒྱ་རིཊ་དམངས་གཙོ་དོན་གཉེར་བ་དང་རྩོམ་པ་པོ་ཝར་ཁེ་ཞི་ལགས་ཀྱིས། བོད་མི་ཚོར་རང་ལུས་མེར་བསྲེཊ་གཏོང་ཐུབ་པའི་སྙིང་སྟོབས་དེའི་རྒྱབ་ན། ཁོང་ཚོར་དེ་ལས་ཆེ་བའི་དཀའ་ངལ་ཞིག་དང་། བཟོད་ཐབས་མེད་པའི་མནར་གཅོད་ཅིག་ཡོད་པ་གསལ་པོར་མཚོན་གྱི་ཡོད་ཚུལ་བརྗོད་དེ། བོད་མིའི་དྲང་བདེན་འཐབ་རྩོད་ལ་རྒྱབ་སྐྱོར་གནང་ཡོད་སྐོར། རྒྱ་རིགས་ཁ་ཤས་ཀྱིས་རྒྱ་གཞུང་ལ་སྙིང་རྗེ་སྤུ་ཙམ་ཡང་མེད་སྟབས་བོད་མིས་མེར་བསྲེཊ་བཏང་ཡང་ཕན་ཐོགས་མེད་ཚུལ་དང་། འཚེ་མེད་ཞི་བའི་ལས་འགུལ་དེ་རྒྱ་ནག་སྲིད་གཞུང་སེམས་འགུལ་ཐེབས་རྒྱུའི་ལས་འགུལ་ཞིག་མིན་པར། མང་ཚོགས་ཁྲོད་འགུལ་སྐྱོད་ཐེབས་པའི་འཚེ་མེད་ཞི་བའི་ལས་འགུལ་ཞིག་ཡིན་སྐོར་ངོ་སྤྲོད་གནང་སོང་།
ཁོང་གིས་མུ་མཐུད་བོད་མིའི་རང་ལུས་མེར་བསྲེཊ་ཐད། རྒྱ་རིགས་ཤེས་ཡོན་པར་ཁས་འཆེ་བ ཁག་ཅིག་གིས་དྲ་ཐོག་ཏུ། “ ད་མེར་བསྲེགས་ཐོངས། མུ་མཐུད་དུ་མེར་བསྲེགས་ཐོངས། ཚང་མ་མེར་བསྲེགས་བཏང་ན་ཡག་ཤོས་རེད་ ” ཟེར་བ་དང་། “ ཀྲུང་གོའི་སྲིད་གཞུང་གིས་ས་སྣུམ་གོང་ཚད་ཆུང་དུ་གཏོང་དགོས་པ་རེད། ས་སྣུམ་གོང་ཚད་ཆུང་ན་བོད་པ་ཚོས་མང་པོ་ཉོ་ཐུབ། དེ་ནི་ཐབས་ལམ་ཡག་ཤོས་དེ་རེད་ ” ཟེར་བ། “ བོད་པ་དེ་ཚོ་གྲོད་ཁོག་རྒྱག་ནས་རང་ཚོད་ཟིན་གྱི་ཡོད་པ་མ་རེད” ཟེར་བ་སོགས་བྲིས་ཏེ། རྒྱ་གཞུང་གི་ལྟ་བ་དང་གཅིག་མཚུངས་ཡིན་པའི་བསམ་ཚུལ་འདོན་མཁན་མང་པོ་ཡོད་སྟབས། རྒྱ་ནག་ཤེས་ཡོན་ཅན་ཚོས་འཚེ་བའི་བསམ་ཚུལ་སྤེལ་བ་དེ་རྒྱ་གཞུང་གིས་དྲིལ་བསྒྲགས་ལས་བྱུང་བ་ཞིག་དང་། གཞི་རྩའི་འགྲོ་བ་མིའི་ལྷན་སྐྱེས་ཀྱི་ཆ་རྐྱེན་མ་ཚང་བ། དངོས་ཡོད་གནས་ཚུལ་མ་ཤེས་པའི་སྐྱོན་ལས་བྱུང་བར་ངོས་འཛིན་བྱེད་ཀྱི་ཡོད་སྐོར་བརྗོད་སོང་།
བགྲོ་གླེང་ཚོགས་འདུའི་མཇུག་ཏུ་དབུ་མའི་ལམ་མི་མང་ལས་འགུལ་ཁང་དང་ངྷ་ས་བུད་མེད་ཚོགས་པ་གཉིས་ཀྱིས། རྒྱལ་གཅེས་པ་འཇམ་དཔལ་ཡེ་ཤེས་ལགས་དང་། གླིང་ཚ་ཚེ་བརྟན་རྡོ་རྗེ་ནང་མི་གསུམ་གྱི་ཚོན་ལྡན་འདྲ་པར་རེ་མང་ཚོགས་ལ་རིན་མེད་ཐོག་འགྲེམས་སྤེལ་གནང་སོང་།
གསར་འགོད་པ། དཔལ་ལྡན།
