གཟའ་ཟླ་བའི་ཉིན་༸གོང་ས་མཆོག་ལ་འཛམ་གླིང་གི་དངུལ་འབོར་མང་ཤོས་ཊེམ་པེལ་ཊོན་གཟེངས་རྟགས་ཕུལ་ཡོད་ལ། གཟེངས་རྟགས་ཀྱི་བྱ་དགའི་ཕྱག་དངུལ་ཡོངས་རྫོགས་སྤྱི་ཚོགས་བདེ་རྩེར་ཞལ་འདེབས་ལ་བསྩལ་འདུག
ཁ་སང་ཕྱི་ཚེས་ ༡༤ ཉིན་དབྱིན་ཇིའི་རྒྱལ་ས་ལོན་ཌོན་དུ་ཡོད་པའི་སན་ཊི་པའུ་ཁཱ་ཐེ་ཌི་རལ་(St. Paul’s Cathedral) ཡེ་ཤུ་ཆོས་ཁང་དུ་སྐུ་མགྲོན་ ༢༠༠༠ ལྷག་འདུ་འཛོམས་ཐོག སྐུ་ཞབས་ཇོན་ཊེམ་པེལ་ཊོན་(Sir John Templeton) དམ་པ་ཁོང་གི་བུ་ཊེམ་པེལ་ཊོན་ཐེབས་རྩའི་ཚོགས་གཙོ་ཇོན་ཨམ་ཊེམ་པེལ་ཊོན་(John M. Templeton) ལགས་ཀྱིས། ༸གོང་ས་མཆོག་ལ་ ༢༠༡༢ ལོའི་ཊེམ་པེལ་ཊོན་གཟེངས་རྟགས་ཕུལ་ཡོད་ཅིང་། གཟེངས་རྟགས་ཀྱི་ཕྱག་དངུལ་ཨ་སྒོར་ས་ཡ་ ༡ དང་འབུམ་ ༧ ལྷག་ཡོད་པའི་ཁྲོད་ནས། ༸གོང་ས་མཆོག་གིས་ཨ་སྒོར་ས་ཡ་ ༡ དང་འབུམ་ ༥ རྒྱ་གར་ནང་གི་བྱིས་པའི་རོགས་སྐྱོར་ཚོགས་པ་དང་། དེ་འཕྲོས་ཀྱི་ལྷག་དངུལ་རྣམས་སེམས་དང་སྲོག་གི་ཐེབས་རྩ་ཁང་དང་དགོན་སྡེ་ཁག་གི་བོད་པའི་གྲྭ་བཙུན་ཚོའི་ཚན་རིག་སློབ་སྦྱོང་གི་ལས་གཞིའི་ཐད་ལ་ཞལ་འདེབས་སུ་གནང་འདུག
གཟེངས་རྟགས་འབུལ་བཞེས་ཀྱི་མཛད་སྒོའི་ཐོག༸གོང་ས་མཆོག་གིས་གཟེངས་རྟགས་དེ་ནི་ཁོང་རང་ཉིད་ཀྱིས་འགྲོ་བ་མིའི་སྤྱི་ཚོགས་ལ་ཞབས་འདེགས་ཅུང་ཙམ་བསྒྲུབས་པར་ངོས་འཛིན་བྱུང་པ་ཞིག་དང་། ཁོང་རང་ཉིད་འཛམ་གླིང་མི་འབོར་ཐེར་འབུམ་ ༧ ནང་གི་མི་གཅིག་ཡིན་པ་ལས་དམིགས་བསལ་ཅན་གང་ཡང་མིན་ཚུལ། དངུལ་དང་དབང་ཆས་ནང་སེམས་ཀྱི་བདེ་བར་གཏོར་བརླག་གཏོང་གི་ཡོད་པ་དང་། ཁོང་གིས་མུ་མཐུད་འཚེ་བ་མེད་པ་དང་ཆོས་ལུགས་འཆམ་མཐུན་སོགས་ཀྱི་ཐད་ཤུགས་སྣོན་རྒྱག་རྒྱུ་ཡིན་ལ། ལྷག་པར་དུ་ད་ལྟའི་བྱིས་པ་ཚོར་བདག་གཅེས་དང་སློབ་སྦྱོང་ཡག་པོ་སྤྲོད་ཐུབ་པ་ཡིན་ན། མ་འོངས་པའི་འཛམ་གླིང་འདིར་ཁོ་ཚོས་འགྱུར་བ་ཞིག་བཟོ་ངེས་ཡིན་པའི་སྐོར་བཀའ་སློབ་བསྩལ་འདུག
ཊེམ་པེལ་ཊོན་གཟེངས་རྟགས་འདི་ནི། ༸གོང་ས་མཆོག་གིས་ཕྱི་དངོས་པའི་ཚན་རིག་དང་ནང་བསམ་བློའི་ཚན་རིག་གཉིས་ཟུང་འབྲེལ་ཐོག མིའི་སྤྱི་ཚོགས་ལ་ཕན་བདེ་བསྐྲུན་རྒྱུར་གཞན་དང་མ་འདྲ་བའི་ནུས་བ་འདོན་གྱི་ཡོད་པར་ངོས་འཛིན་ཐོག་ཕུལ་བ་ཞིག་ཡིན་འདུག
ཐེངས་འདིར་༸གོང་ས་མཆོག་དབྱིན་ཡུལ་དུ་ཊེམ་པེལ་ཊོན་གཟེངས་རྟགས་འབུལ་བཞེས་ཀྱི་མཛད་སྒོར་ཆིབས་བསྒྱུར་སྐབས། དབྱིན་ཇིའི་སྲིད་བློན་ཌ་ཝེ་ཌི་ (David Cameron) དང་སྲིད་བློན་གཞོན་པ་ནེ་ཁི་ (Nick Clegg) གཉིས་ལའང་མཇལ་འཕྲད་གནང་ཡོད་པ་རེད།
ཊེམ་པེལ་ཊོན་ཐེབས་རྩ་ཚོགས་པ་འདི་ ༡༩༧༢ ལོར་དབྱིན་ཡུལ་གྱི་ཚོང་པ་ཆེན་མོ་སྐུ་ཞབས་ཇོན་ཊེམ་པེལ་ཊོན་ལགས་ཀྱིས་གསར་འཛུགས་བྱས་ཏེ། འཛམ་གླིང་ནང་བསམ་བློ་དང་གསར་གཏོད། ལག་ལེན་གང་རུང་ཐོག་འགྲོ་བ་མིའི་སྤྱི་ཚོགས་ལ་ཕན་བདེ་རླབས་ཆེན་སྒྲུབ་མཁན་རྣམས་ལ་གཟེངས་རྟགས་འདི་འབུལ་བཞིན་ཡོད་པ་དང་། གཟེངས་རྟགས་ཐོག་མ་དེ་ ༡༩༧༣ ལོར་མཱ་ཐར་ཊེ་རེ་སཱ་(Mother Teresa) ལགས་ལ་ཕུལ་ཡོད་ཅིང་། གཟེངས་རྟགས་འདིའི་བྱ་དགའི་དངུལ་ནི་འཛམ་གླིང་ནང་ཕོན་ཆེ་ཤོས་ཡིན་འདུག
གསར་འགོད་པ། བནྡེ་སྐྱབས།
(གནས་ཚུལ་རྒྱས་པ་ཚེས་ ༢༡ ཉིན་གྱི་དུས་བབ་གསར་ཤོག་ལ་གཟིགས།)
སངས་རྒྱས་བཅོམ་ལྡན་འདས་ཀྱིས་འཕགས་པ་འཇམ་དཔལ་གྱི་མཚན་ཡང་དག་པ་བརྗོད་པའི་མདོ་ལས་ཀྱང་ལུང་དུ་བསྟན་པ་འདི་ལྟ་སྟེ།
ཡོན་ཏན་ལྡན་ཞིང་ཡོན་ཏན་ཤེས།།
ཆོས་ཤེས་བཀྲ་ཤིས་བཀྲ་ཤིས་འབྱུང་།།
བཀྲ་ཤིས་ཀུན་གྱི་བཀྲ་ཤིས་པ།།
གྲགས་པའི་བཀྲ་ཤིས་སྙན་གྲགས་དགེ།
ཞེས་འཐིག་རྟེན་འདི་ན་བཀྲ་ཤིས་པའི་ནང་ནས་ཆེས་བཀྲ་ཤིས་པའི་མི་སྣ་དེ་མཚན་སྙན་གྲགས་ས་སྟེང་ཀུན་ཏུ་ཁྱབ་པའི་མི་གང་ཡིན་པ་དེ་ནི་བཀྲ་ཤིས་པའི་ནང་ནས་བཀྲ་ཤིས་པའི་མཆོག་དང་རབ་ཡིན་པ་གསུངས་པ་ལྟར་གྲགས་པའི་བཀྲ་ཤིས་ཀྱི་ནང་ནས་ཆེས་བཀྲ་ཤིས་པའི་མི་སྣ་རྩེ་མོར་སོན་པ་དེ་ནི་བོད་ཀྱི་བླ་ན་མེད་པའི་སྐྱབས་མགོན་༸ རྒྱལ་དབང་ཡིད་བཞིན་ནོར་བུ་མཆོག་ཁོ་ན་ཡིན་པ་དེ་ཡོངས་སུ་གྲགས་པ་ལྟར་ཡིན།
བཟང་པོའི་རྩེ་མོར་སོན་པའི་སྐྱབས་མགོན་ཏྰ་བླ་མ་མཆོག་ནི་བོད་མི་རིགས་ཀྱི་ཡིད་བལིན་ནོར་བུ་ཙམ་ཡིན་པ་སྙོན་དུ་མེད་ཁར་ད་ལྟ་འཛམ་གླིང་འགྲོ་བའི་མི་རིགས་ཀྱི་སྤྱི་ནོར་ཞིག་ཡིན།
ཁོང་ནི་འཛམ་གླིང་མིའི་རིགས་དང་། ཆོས་ལུགས་ཡོངས། ནང་པ་ཡོངས། བོད་རིགས་ཡོངས་རྫོགས་བཅས་ཀྱི་བཀྲ་ཤིས་པའི་ནང་ནས་ཆེས་བཀྲ་ཤིས་རླབས་ཆེན་གྱི་མི་སྣ་བཟང་པོའི་རྩེ་མོར་སོན་པ་དེ་ནི་བསྟན་དང་འགྲོ་བའི་བསོད་ནམས་ཁོ་ན་ལས་གྲུབ་པ་ཞིག་ཡིན།
གང་གི་རྣམ་དཔྱོད་ཤིན་ཏུ་ཡངས་པ་ཡིས། །རྒྱ་ཆེན་ནོར་འཛིན་མ་འདི་བཅིངས་པ་ཡིས། །གྲགས་པའི་བ་དན་འཛམ་གླིང་རྩེ་མོ་ན། །ལྷབ་ལྷབ་གཡོ་འདིས་བདག་སེམས་སྤྲོ་བ་འཕེལ། །
རབ་འབྱམས་རྒྱལ་བ་ཀུན་གྱི་མཛད་པའི་འཁུར།།
སྙིང་སྟོབས་ཕྲག་པར་བཟུང་བའི་རླབས་ཆེན་གྱི།།
འཕྲིན་ལས་ཀུན་ཕན་ནམ་མཁའི་སྙིང་པོ་ཅན།།
བཞེད་པ་ཇི་བཞིན་ལྷུན་གྱིས་འགྲུབ་རྒྱུར་ཅིག།
༸ རྒྱལ་བའི་ཡོངས་འཛིན་ཟུང་གི་གསུང་ཡིན།
རྗེ་བཙུན་འཇམ་དཔལ་ངག་གི་དབང་པོའི་སྐུ།།
སྙིང་རྗེའི་གཏེར་ཆེན་བློ་བྲོས་བཟང་པོའི་གསུང་།།
ཡེ་ཤེས་མཐུ་སྟོབས་གསང་བའི་བདག་པོའི་ཐུགས།།
༸ རྒྱལ་བའི་དབང་པོ་བསྟན་འཛིན་རྒྱ་མཚོའི་སྡེ།།
ཡོངས་རྫོགས་བསྟན་པའི་བདག་པོར་ཞབས་བྟན་གསོལ།།
རྙིང་མའི་ཁྲི་འཛིན་དམ་པ་སྐྱབས་རྗེ་འཁྲུལ་ཤིག་རིན་པོ་ཆེའི་གསུང་ཡིན།
བོད་ཀྱི་བླ་ན་མེད་པའི་༸ གོང་ས་སྐྱབས་མགོན་རྒྱལ་བ་ཐམས་ཅད་མཁྱེན་ཅིང་གཟིགས་པ་ཆེན་པོ་སྐུ་ཡི་འཕྲེང་བ་བཅུ་བཞི་པ་འཕགས་མཆོག་ཕྱག་ན་པདྨོ་འཛམ་གླིང་སྐྱེ་འགྲོའི་བདེ་སྐྱིད་ཆེད་སྐུ་ཚེ་ཁྲི་ལོར་བརྟན་པའི་སྨོན་འདུན་ཞུ།།
དུས་བབས་ཚང་ལ་སྐུལ་བའི་རེ་བ་ཆུང་ཆུང་ཞིག་ལས་གཞན་ཅི་ཡང་མེད་། གོང་ས་མཆོག་བྱ་དགའ་སྩལ་པའི་གནས་ཚུལ་འདི་འདྲ་གལ་ཆེན་པོའི་རིགས་དུས་འགྱངས་མེད་པར་བསྒྱུར་ནས་དྲ་རྒྱའི་ཐོག་དུ་གང་མགྱོགས་ངང་བཀོད་ཐུབ་ན་ལེགས་སྙམ་སོང་གང་ཡིན་ཟེར་གཟེངས་རྟགས་འབུལ་གནང་མཛད་དེ་ཉིན་ཞག་གཅིག་དང་ཕྱེད་ཀའི་རིང་ལ་གནས་ཚུལ་འདི་བཀོད་མི་འདུག་དང་པོ་དེ་ད་ནངས་ཞཽགས་པ་དབྱིན་ཡིག་ནང་མཐཽང་སོང་དེ་ནས་བོད་ཡིག་བསྒྱུར་དགོས་བསམ་ཡང་དུས་བབས་ནང་དུ་མ་བཀོད་གོང་ལ་ཟིན་བྲིས་སུ་བཞག་ན་ཡག་པོ་མཐོང་མ་སོང་བས་བསྒྱུར་མེད་།
དགོང་མོ་ནང་དུ་ལོག་ནས་ཡང་བསྐྱར་ལྟ་དུས་ད་གཟོད་དྲ་དངོས་སུ་བཞག་འདུག།
ངའི་འདི་ལ་བཤད་འདོད་པ་ནི་གལ་སྲིད་མ་འོངས་བར་གསར་འགྱུར་གལ་ཆེན་རིགས་གང་མགྱོགས་ངང་བཏོན་ཐུབ་ན་བཟང་སྙམ།
འདི་ནི་རེ་སྐུལ་ཙམ་ལས་དུས་བབས་ཚང་གི་མི་བུ་སུ་ལ་ཡང་སྐྱོན་བརྗོད་འམ་ཐ་ཚིག་བསྒྲགས་པ་དེ་འདྲ་གཏན་ནས་མིན་། ཐུགས་རྗེ་ཆེ
རྒྱལ་སྲས་བྱང་ཆུབ་སེམས་དཔའ་སེམས་དཔའ་ཆེན་པོ་༸གོང་ས་ཡིད་བཞིན་ནོར་བུ་མཆོག་༸འཕུལ་བར་འཚམས་འདྲིའི་བཀྲིས་བདེ་དུང་ཕྱུར་འབུམ་ཕྲག་ཞུ།།
གསར་འགྱུར་འདི་དེ་རིང་ཞོགས་པ་སྔ་པོ་དབྱིན་ཡིག་ཐོག་བཀླགས་པ་དང་།དགའ་སྤྲོ་ཆེན་པོ་ཞིག་སྐྱེས་ཏེ་དུས་ཚོད་ཀྱི་དབང་གིས་ལམ་སེང་བོད་བསྒྱུར་མ་ཐུབ་ཀྱང་མ་ཞི་དེ་ག་རང་དུས་བབ་ཀྱི་མཆན་འདོག་ས་འདིར་བཏང་ཡང་ད་དུང་སླེབས་མི་འདུག།ཕལ་ཆེར་དུས་བབ་ཚང་གིས་བཀག་པ་ཡིན་པ་འདྲ།གང་ལྟར་ད་ལྟ་འདིར་བོད་ཡིག་ཐོག་གནས་ཚུལ་མདོར་བསྡུས་ཤིག་བཀོད་འདུས་པས་དགའ་པོ་བྱུང་།༸གོང་ས༸མཆོག་སྐུ་ཚེ་བསྐལ་བརྒྱར་བརྟན་ཅིང་བཞེད་དོན་ལྷུན་གྱིས་འགྲུབ་པར་ཤོག