དེ་རིང་སྔ་དྲོར་བཞུགས་སྒར་ཀིརྟི་དགེ་རྩ་ཚོགས་པའི་ཚོགས་ཁང་དུ། སློབ་མའི་ཚགས་པར་གྱི་རྩོམ་སྒྲིག་པས་གོ་སྒྲིག་གནང་བའི་རྩོམ་ཡིག་འགྲན་བསྡུར་གྱི་བྱ་དགའ་སྤྲོད་པའི་མཛད་སྒོ་སྟབས་བདེ་ཞིག་ཚོགས་སོང་། སྐུ་མགྲོན་གཙོ་བོར་ས་རཱ་མཐོ་སློབ་ཀྱི་སློབ་སྤྱི་དགེ་བཤེས་འཇམ་དཔལ་གྲགས་པ་ལགས་ཕེབས་འདུག་ལ། གཞན་དགེ་འདུན་ཆོས་འཕེལ་བསམ་བློའི་དཔྱད་རྩོམ་འགྲན་བསྡུར་གྱི་དཔྱད་འདེམས་པ་རྩོམ་པ་པོ་སྤྲེལ་ནག་པ་བློ་གྲོས་དཔལ་བཟང་ལགས་དང་། དོན་འགྲུབ་རྒྱལ་གྱི་རང་མོས་སྙན་ངག་འགྲན་བསྡུར་གྱི་དཔྱད་འདེམས་པ་བུད་མེད་རྩོམ་པ་པོ་གཟུངས་ཕྱུག་སྐྱིད་ལགས་དང་སློབ་མ་སྐོར་ཞིག་བཅས་ཕེབས་འདུག ཚོགས་འདུའི་སྟེང་སུ་ཇཱ་བོད་ཁྱིམ་གྱི་འཛིན་རིམ་ ༡༡ པའི་སློབ་མ་ཤ་བོ་མཆོད་རྟེན་ལགས་སུ་དགེ་འདུན་ཆོས་འཕེལ་བསམ་བློའི་དཔྱད་རྩོམ་འགྲན་བསྡུར་གྱི་ཨང་དང་པོ་ཐོབ་སྟེ་གཟེངས་རྟགས་དང་མཉམ་དུ་ཧིན་སྒོར་ ༣༠༠༠ ཕུལ་སོང་ལ། དོན་འགྲུབ་རྒྱལ་གྱི་རང་མོས་སྙན་ངག་འགྲན་བསྡུར་ཁྲོད་ཀྱི་ཨང་དང་པོ་ཐོབ་མཁན་གྷོ་པ་པུར་བོད་ཁྱིམ་གྱི་འཛིན་རིམ་བཅུ་གཅིག་པའི་སློབ་མ་སེང་གདོང་སྐྱབས་ལ་གཟེངས་རྟགས་དང་མཉམ་དུ་ཧིན་སྒོར་ ༣༠༠༠ བཅས་ཀྱི་བྱ་དགའ་སྤྲད་སོང་།
སྐབས་དེར་སྐུ་མགྲོན་གཙོ་བོ་ས་རཱ་མཐོ་སློབ་ཀྱི་སློབ་སྦྱི་དགེ་བཤེས་འཇམ་དཔལ་གྲགས་པ་ལགས་ཀྱིས། ཐེངས་འདིའི་རྩོམ་ཡིག་འགྲན་བསྡུར་ཁྲོད་བྱ་དགའ་ཐོབ་མཁན་གྱི་སློབ་མ་གཉིས་ལ་བྱ་དགའ་གནང་བ་དང་འབྲེལ། བོད་མི་རིགས་ཀྱི་རིག་གཞུང་དང་གཞོན་སྐྱེས་ཚོའི་བསམ་བློའི་གོ་རྟོགས་སྤེལ་ཆེད་དང་གཞི་རིམ་སློབ་གྲྭའི་སློབ་མའི་སྐད་ཡིག་གི་གནས་ཚད་ཡར་རྒྱས་ཆེད་ཚགས་པར་འདོན་སྤེལ་བྱས་པར་བསྔགས་བརྗོད་དང་། ཐོག་མར་གསར་འཛུགས་གནང་མཁན་ཚོས་དམིགས་ཡུལ་བཟང་པོ་ཞིག་གི་ཐོག་འབད་བརྩོན་གནང་བ་ལྟར། མ་འོངས་སློབ་གྲྭ་ཐོན་པའི་རྗེས་སུའང་ཐོག་མའི་དམིགས་ཡུལ་ལྟར་འགྲོ་ཐུབ་པའི་ཐད་ནས་གསར་བ་རྣམས་ལ་ལམ་སྟོན་གནང་དགོས་པའི་རེ་སྐུལ་བཅས་གནང་སོང་།
ཁོང་གིས་གསུངས་དོན“ བོད་མི་རིགས་ཀྱི་སྐད་ཡིག་སྲུང་སྐྱོབ་བྱེད་བཞིན་པ་དེ་བོད་ལོགས་སུ་འཚོ་གནས་བྱེད་དགོས་ཀྱི་འདུག་ཅེས་རྗོད་ཀྱི་ཡོད་པ་རེད། དེའི་དགོས་པ་རྒྱུ་མཚན་གང་ཡིན་ཞེ་ན། བོད་མི་རིགས་འདིར་འཛམ་གླིང་རྒྱལ་ཁབ་གཞན་དང་མི་མཐུན་པའི་རིག་གཞུང་གང་ཡོད་པ་དེ་མི་རིགས་རང་གི་སྐད་ཡིག་ཐོག་ཡོད་པ་དང་། རྒྱ་ནག་གཞུང་གིས་བཙན་གནོན་འོག་བོད་སྐད་ཡིག་རིག་གཞུང་དང་བཅས་པ་གཏོར་བཤིག་གཏོང་གི་ཡོད་སྟབས། གལ་སྲིད། ང་ཚོས་སྐད་ཡིག་སྲུང་སྐྱོབ་མ་བྱས་པ་ཡིན་ན། ད་ལྟའི་དུས་ཙམ་མིན་པར་མ་འོངས་པར་འཛམ་གླིང་འདིའི་སྒང་གི་རིག་གཞུང་རྩ་ཆེན་ཞིག་མེད་བརླག་ཏུ་འགྲོ་ཉེན་ཡོད། མི་རབས་རྗེས་མ་དག་ལ་བརྒྱུད་སྤྲོད་ཀྱིས་སྐད་ཡིག་རྒྱུན་འཛིན་ཡུན་གནས་ཐུབ་པ་བྱ་ཆེད། སྐད་ཡིག་སྲུང་སྐྱོབ་ཡར་རྒྱས་གཏོང་དགོས་པ་ཆགས་ཡོད། མི་རིགས་ཤིག་རང་དབང་ཐོག་སྐད་ཡིག་སྲུང་སྐྱོབ་བྱེད་པ་ལས་ཁོར་ཡུག་ཅིག་ངེས་པར་དུ་བསྐྲུན་དགོས་སྟབས། མ་འོངས་པར་བོད་མི་རེ་ངོ་རེས་འགན་འཁུར་དགོས་པ་དང་ལྷག་པར་དུ་མི་རབས་གསར་པ་རྣམས་ཀྱི་རང་གི་རིག་གཞུང་ལ་འབད་པ་བྱས་ཏེ་རིག་གཞུང་འཛིན་སྐྱོང་སྤེལ་གསུམ་ལ་རང་ནུས་ཡོད་དགུ་འདོན་དགོས་པ་རེད”ཅེས་བརྗོད་བྱུང་།
སློབ་མའི་ཚགས་པར་གྱི་ཐེངས་དང་པོའི་རྩོམ་ཡིག་འགྲན་བསྡུར་དེ་ནི། ཕྱི་ལོ་ ༢༠༡༢ ལོའི་ཕྱི་ཟླ་ ༤ བའི་ཚེས་ ༡༥ ཉིན་མགོ་འཛུགས་ཀྱིས་ཕྱི་ཟླ་ ༥ བའི་ཚེས་ ༡༥ བར་སུ་ཇཱ་བོད་ཁྱིམ་དང་ས་རཱ་མཐོ་སློབ། ནོར་གླིང་མཐོ་སློབ། ཤེས་རབ་དགའ་ཚལ་སློབ་གླིང་། ངྷ་སྟེང་བོད་ཁྱིམ། ངྷ་ཤོད་བོད་ཁྱིམ། གྷོ་པ་པུར། ཅོང་ངྷི་ར་བོད་ཁྱིམ། བྷེལ་ཀོལ་བོད་ཁྱིམ། སེ་ལ་ཀོལ་བཅས་སློབ་གྲྭ་ ༡༠ ལྷག་གི་རྩོམ་ཡིག་ ༥༠ ཙམ་འབྱོར་ཡོད་འདུག
གསར་འགོད་པས་དགེ་འདུན་ཆོས་འཕེལ་བསམ་བློའི་དཔྱད་རྩོམ་འགྲན་བསྡུར་ཁྲོད་ཨང་དང་པོ་ཐོབ་མཁན་སློབ་མ་ཤ་བོ་མཆོད་རྟེན་ལགས་སུ་བཅར་འདྲི་ཞུས་པར “ ངས་ནམ་རྒྱུན་བོད་ཡིག་དང་དབྱིན་ཡིག་གི་དཔྱད་རྩོམ་དང་། བོད་ནང་གི་དཔེ་ཚོགས་ཁག་དང་དུས་དེབ་རིགས་མང་པོ་ཀློག་གི་ཡོད། སློབ་སྦྱོང་གི་ཞོར་དུ་སློབ་གྲྭའི་དུས་དེབ་ཀྱི་རྩོམ་སྒྲིག་པར་བསྡད་དེ་རྩོམ་ཡིག་མང་པོ་བྲིས་མྱོང་ཡོད་ལ་བྱ་དགའ་ཁ་ཤས་ཀྱང་ཐོབ་མྱོང་ཡོད། ད་ཐེངས་ཕྱི་ལོགས་ཀྱི་རྩོམ་ཡིག་འགྲན་བསྡུར་ནང་བྱ་དགའ་ཐོབ་པས་དགའ་བོ་བྱུང་སོང” ཞེས་བརྗོད་བྱུང་།
ཡང་དོན་འགྲུབ་རྒྱལ་གྱི་རང་མོས་སྙན་ངག་འགྲན་བསྡུར་ཁྲོད་ཨང་དང་པོ་ཐོབ་མཁན་སློབ་མ་སེང་གདོང་སྐྱབས་ལགས་སུ་བཅར་འདྲི་ཞུས་པར“ ང་རང་ལ་མཚོན་ན་དམིགས་བསལ་རྩོམ་ཡིག་གི་གོ་རྟོགས་ཡོད་མཁན་ཞིག་མིན་ཡང་། ནམ་རྒྱུན་སློབ་གསེང་གི་དུས་ཚོད་བེད་སྤྱད་དེ་རྩོམ་ཡིག་འབྲི་བཞིན་ཡོད་ལ་བྱ་དགའ་ཡང་རེ་ཟུང་ཐོབ་མྱོང་ཡོད། ༢༠༠༨ ལོ་ནས་བཟུང་ལོ་ལྟར་ཤེས་རིག་ལས་ཁུངས་ཀྱི་རྩོམ་ཡིག་འགྲན་བསྡུར་ཁྲོད་བྱ་དགའ་བླངས་མྱོང་ཡོད་། ང་རང་ཆུང་དུས་ངའི་ཕ་རྒན་གྱི་བོད་ནང་གི་༼སྦྲང་ཆར་༽ དུས་དེབ་དང་༼ གེ་སར་སྒྲུང་༽སོགས་ཉོས་ཏེ་ང་ལ་མཐུན་རྐྱེན་སྐྲུན་གྱི་ཡོད། བྱུང་ན་ང་རང་གིས་མ་འོངས་པར་དེ་སྔ་བྲིས་པའི་རྩོམ་ཡིག་ཁག་ཕྱོགས་བསྒྲིགས་བྱས་ཏེ་དེབ་ཆུང་ཞིག་འདོན་དགོས་བསམ་ཡོད” ཅེས་བརྗོད་བྱུང་།
གསར་འགོད་པ། དོན་གོ
