མིག་སྒྲིབ་རྒྱལ་དཀྲོགས་ལས་འགུལ་ས་གནས་ ༥༥ ནང་སྐྱོད་འདུག༼པར༽

ཤེས་རབ་ཚེ་རྡོར་ལགས་ཀྱིས་ཟླ་གཉིས་ལྷག་རིང་རྒྱ་གར་གྱི་ས་གནས་དང་གྲོང་ཁྱེར་ ༥༠ ཙམ་ནང་མིག་སྒྲིབ་རྒྱལ་དཀྲོག་གི་ལས་འགུལ་སྤེལ་ཏེ། ད་ཆར་མི་ཉིས་ཁྲི་ལྷག་གི་མཚན་རྟགས་བསྡུས་ཡོད་པ་མ་ཟད། ཉིན་འདི་གར་ཨོ་རེ་སཱ་བོད་མིའི་གཞས་ཆགས་ནང་མུ་མཐུད་ལས་འགུལ་སྤེལ་བཞིན་ཡོད་འདུག

འདི་ལོའི་གསུམ་བཅུའི་དུས་དྲན་ཉིན་ན་གཞོན་ཤེས་རབ་ཚེ་རྡོར་ལགས་ཀྱིས་ངྷ་ས་བཞུགས་སྒར་ནས་མགོ་བཙུགས་ཏེ། “གངས་ལྗོང་གི་ཕོ་ཉ་” ཞེས་པའི་མིང་ཐོག་ནས་རྒྱ་གར་རྒྱལ་ཡོངས་ནང་༼ མིག་སྒྲིབ་རྒྱལ་དཀྲོཊ ༽ཟེར་བའི་བོད་དོན་ཁྱབ་བསྒྲགས་དང་མཚན་རྟགས་བསྡུ་རིབ་ཀྱི་ལས་འགུལ་ཞིག་བརྩམས་ཡོད་ལ། འདས་པའི་ཟླ་ ༢ ལྷག་རིང་རྒྱ་གར་བྱང་ཤར་དང་། ལྷོ་ཕྱོགས་སོགས་མངའ་སྡེ་ ༨ ཙམ་གྱི་ས་གནས་དང་གྲོང་ཁྱེར་ ༥༥ ཙམ་ནང་སྐོར་སྐྱོད་ཀྱིས་བོད་དོན་ཁྱབ་བསྒྲགས་དང་། མཚན་རྟགས་ ༢༠༠༠༠ ཙམ་བསྡུ་རིབ་བྱས་ཏེ། ཉིན་འདི་འགར་ཨོ་རེ་སཱ་ (Orissa)བོད་མིའི་གཞིས་ཆགས་ནང་མུ་མཐུད་ལས་འགུལ་སྤེལ་གྱིན་ཡོད་འདུག

ལས་འགུལ་སྐབས་ཁོང་གི་མིག་གཉིས་རས་ནག་པོས་གཡོགས་ཏེ། ཉིན་ལྟར་ཞོགས་པ་ཆུ་ཚོད་ ༩ ནས་ཕྱི་དྲོ་ཆུ་ཚོད་ ༥ བར་ཁོང་གིས་རྒྱ་དམར་གཞུང་གིས་བོད་ས་བཙན་བཟུང་བྱས་པ་དང་ད་ལྟའི་བོད་ནང་གི་ཛ་དྲག་གནས་སྟངས། བོད་མིའི་རང་ལུས་མེར་བསྲེགས་ཀྱི་རྒྱུ་རྐྱེན་སྐོར་ངོ་སྤྲོད་དང་། རྒྱ་ནག་གིས་བོད་ཀྱི་ཁོར་ཡུག་གཏོར་བཅོམ་གཏོང་བཞིན་ཡོད་པ་དེས་བོད་ཙམ་མ་ཟད། རྒྱ་གར་གཙོས་པའི་ཨ་ཤ་ཡའི་རྒྱལ་ཁབ་མང་པོར་གནོད་འཚེ་ཕོག་གི་ཡོད་ཚུལ་སོགས་མང་ཚོགས་ལ་གོ་རྟོགས་སྤེལ་བཞིན་ཡོད་འདུག

ཤེས་རབ་ཚེ་རྡོར་ལགས་ཀྱིས་འདི་ག་གསར་ཁང་ལ་བརྗོད་པ་ལྟར་ན། ཁོང་གང་དུ་བསླེབས་ཀྱང་ས་གནས་རྒྱ་གར་ཡུལ་མི་ཚོས་བོད་ནང་གི་ཛ་དྲག་གནས་སྟངས་ལ་གདུང་སེམས་མཉམ་སྐྱེད་བྱེད་ཀྱི་ཡོད་པ་མ་ཟད། གསར་འགོད་ལྷན་ཚོགས་སོགས་གྲ་སྒྲིག་བྱ་རྒྱུར་རོགས་རིམ་གནང་ཡོད་པ་དང་། ལས་འགུལ་སྐབས་ཨ་རུ་ན་ཅལ་ཡུལ་སྐོར་སྤྲོ་འཆམ་བློན་ཆེན་པདྨ་མཁའ་འགྲོ་མཆོག་གཙོས་པའི་འབྲེལ་ཡོད་རྒྱ་གར་མགོ་ཁྲིད་ཁག་ཅིག་གིས་ལས་འགུལ་ལ་རྒྱབ་སྐྱོར་གྱི་རྣམ་པ་ཤུགས་ཆེན་བསྟན་ཡོད་འདུག

ཁོང་གིས་ “ཀཱོལ་ཀཱ་ཊའི་(Kolkata) ནང་དམིགས་བསལ་མ་འདྲ་བ་ཞིག་ཆགས་སོང་། ང་ཕྱི་ཟླ་ ༤ ཚེས་ ༢ ཉིན་གྲོང་ཁྱེར་དེར་འབྱོར་བ་དང་བསྟུན་ཏེ་རྒྱལ་གཅེས་དཔལ་བོ་དོན་འགྲུབ་ཕུན་ཚོགས་ལགས་བོད་རྩ་དོན་ཆེད་ཧོཝ་རཱ་(Howrah bridge) ཟམ་ཁ་ནས་གངྒ་ཆུ་བོའི་ནང་མཆོངས་ཏེ་ཞགས་ ༤༩ འཁོར་བར་འཁེལ་ཡོད་སྟབས། ཟམ་འོག་གྲུ་ཐོག་ནས་རྒྱ་གར་ཡུལ་མི་ཚོར་བོད་ཀྱི་ཛ་དྲག་གནས་བབ་དང་། དཔའ་བོ་ཁོང་གིས་རང་སྲོག་བློས་གཏོང་བྱས་པའི་རྒྱུ་མཚན། གངྒ་གཙོས་པའི་རྒྱ་གར་ནང་གི་ཆུ་ཆེན་མང་པོ་ཞིག་བོད་ནས་བཞུར་ཡོང་གི་ཡོད་སྟབས། རྒྱ་གཞུང་གིས་བོད་པའི་ཁོར་ཡུག་ལ་གཏོར་བཅོམ་བཏང་ན་རྒྱ་གར་ལ་ཤུགས་རྐྱེན་ཅི་འདྲ་ཐེབས་མིན་སྐོར་ལ་གཏམ་བཤད་བྱེད་ཐུབ་སོང་”ཟེར།

ཁོས་ཚོར་བ་ཆེན་པོས་བརྗོད་དོན“ བོད་ནང་གི་ཛ་དྲག་གནས་སྟངས་ཉིན་རེ་བཞིན་ཚབས་ཆེ་རུ་འགྲོ་བཞིན་ཡོད་པ་དང་། ལྷག་པར་དུ་ཚེས་ ༢༧ ཉིན་ལྷ་སར་བོད་མི་གཉིས་ཀྱིས་རང་ལུས་མེར་བསྲེགས་བཏང་ཡོད་པ་བཅས་ལ་བལྟས་ཡོང་ན། ད་ནི་ང་ཚོ་བཙན་བྱོལ་དུ་ཡོད་པ་ཚོ་སྒུག་སྡོད་པའི་དུས་ཚོད་མ་རེད། མི་རེ་ངོ་རེ་ནས་འགུལ་སྐྱོད་ཅིག་རྒྱག་དགོས་ཀྱི་འདུག”ཅེས་འབོད་སྐུལ་གནང་སོང་།

ཤེས་རབ་ཚེ་རྡོར་ལགས་ཀྱིས་སྔ་ལོ་ལྡི་ལི་རྒྱ་ནག་གཞུང་ཚབ་མདུན་ནས་རང་ལུས་མེར་བསྲེགས་བཏང་སྟབས། ད་ཆར་རྐང་པའི་རྨ་ཁ་གང་འཚམ་སོས་ཡོད་ཀྱང་དབྱུག་པར་བརྟེན་ཏེ་འགྲོ་དགོས་པ་ཆགས་ཡོད་ཅིང་། ཐེངས་འདིར་ལྡི་ལིར་གནས་བཞུགས་ཀརྨ་དོན་འགྲུབ་དང་ཀརྨ་རབ་བརྟན་གཉིས་ཀྱིས་རླངས་འཁོར་ཞིག་བསྐོར་ཏེ་ཁོང་ལ་རོགས་རམ་བྱེད་ཀྱི་ཡོད་འདུག

ཤེས་རབ་ཚེ་རྡོར་ལགས་ཀྱིས་མིག་གཉིས་རས་ནག་གིས་བཏུམ་དོན་ནི། འཛམ་གླིང་གི་དབུ་ཁྲིད་ཚོས་བོད་ནང་གི་ཛ་དྲག་གནས་སྟངས་ཐོག་མིག་ལྡན་ལོང་བའི་རྟུལ་ཞུགས་འཛིན་གྱི་ཡོད་པ་མཚོན་པར་བྱས་པ་ཞིག་ཡིན་འདུག་ལ། ལས་འགུལ་འདི་མཐའ་མ་ལྡི་ལི་ནས་མཇུག་བསྒྲིལ་ཏེ། ཁོང་གི་དགོས་འདུན་མང་ཚོགས་ཀྱི་མཚན་རྟགས་ལྡི་ལིའི་མཉམ་འབྲེལ་རྒྱལ་ཚོགས་ལས་ཁུངས་དང་གཞུང་ཚབ་ཁང་ཁག རྒྱ་གར་གཞུང་བཅས་ལ་ཕུལ་རྗེས། རྒྱལ་ཚོགས་དང་རྒྱལ་སྤྱིའི་སྲིད་གཞུང་ཁག་གི་དཔོན་རིགས་ཚོས་བོད་ཀྱི་གནད་དོན་ཐོག་དྲང་བདེན་ལ་རྒྱབ་སྐྱོར་གྱི་མིག་ཕྱེ་རྒྱུའི་རེ་སྐུལ་ཞུ་རྒྱུ་ཡིན་འདུག

གསར་འགོད་པ། བནྡེ་སྐྱབས།