བོད་ཀྱི་ནང་ཆོས་དེང་དུས་ཤེས་ཡོན་གྱི་བསླབ་གཞིར་འཇོག་དགོས།

དེ་རིང་གཟའ་པ་སངས་ཉིན་༸གོང་ས་མཆོག་གིས་ངྷ་སྟེང་བོད་ཁྱིམ་ཚོཊ་ཁང་དུ། འཛམ་གླིང་རྒྱལ་ཁབ་ཁག་ ༧ དང་མཐོ་སློབ་ ༨༢ ནས་བཅར་བའི་བོད་རིཊ་སློབ་མ་དང་། བོད་ཁྱིམ་སློབ་ཕྲུག་བཅས་ཁྱོན་མི་ ༣༠༠༠ བརྒལ་བར་ནང་ཆོས་ངོ་སྤྲོད་གནང་མགོ་བཙུགས་ཡོད།

ནང་ཆོས་གོ་སྒྲིག་ཚོགས་ཆུང་གི་གོ་སྒྲིག་འོག༸གོང་ས་མཆོག་གིས་ལོ་རེའི་ཕྱི་ཟླ་དྲུག་པའི་ནང་རྒྱ་གར་མཐོ་སློབ་ཁག་ཏུ་སྐྱོད་བཞིན་པའི་བོད་རིགས་སློབ་ཕྲུག་གཙོས། བོད་ཕྲུག་ན་གཞོན་ཚོར་ནང་ཆོས་ངོ་སྤྲོད་གནང་བཞིན་ཡོད་པ་ལྟར། ད་ལོའི་ནང་ཆོས་ངོ་སྤྲོད་དེ། དེ་རིང་ཕྱི་ཚེས་ ༡ ཉིན་ངྷ་སྟེང་བོད་ཁྱིམ་ཚོགས་ཁང་དུ་མགོ་འཛུཊ་གནང་ཡོད་ཅིང་། ཐེངས་འདིའི་ནང་ཆོས་ངོ་སྤྲོད་ཀྱི་མཛད་སྒོའི་སྟེང་༸གོང་ས་མཆོག་དབུ་བཞུགས་ཐོགབོད་མིའི་སྒྲིག་འཛུགས་ཀྱི་ཤེས་རིག་དྲུང་ཆེ་དངོས་གྲུབ་ཚེ་རིང་ལགས་དང་། བོད་མི་མང་སྤྱི་འཐུས་ཁག་ཅིག བོད་ཁྱིམ་སློབ་དགེ་གཙོས་འཛམ་གླིང་རྒྱལ་ཁབ་ཁག་ ༧དང་། རྒྱ་གར་མཐོ་སློབ་ ༨༢ ནས་བཅར་བའི་མཐོ་རིམ་སློབ་མ་ ༡༠༠༠ དང་། ཤེས་རབ་དགའ་ཚལ་སློབ་གླིང་། བོད་ཁྱིམ་འཛིན་རིམ་བཅུ་བ་ཡན་གྱི་སློབ་ཕྲུག་དང་། ཕྱི་རྒྱལ་བ་བཅས་ཁྱོན་མི་ ༣༠༠༠ ལྷག་འདུ་འཛོམས་བྱུང་ཡོད།

ཐེངས་འདིའི་གསུང་ཆོས་དེ་རིང་ཕྱི་ཚེས་ ༡ ནས་ ༣ ཉིན་བར་འཚོགས་རྒྱུ་ཡིན་པ་དང་། གསུང་ཆོས་སྐབས་༸གོང་ས་མཆོག་གིས་སློབ་ཕྲུག་ཚོར་རྗེ་ཙོང་ཁ་པ་ཆེན་པོས་མཛད་པའི་༼རྟེན་འབྲེལ་བསྟོད་པ་༽དང་། ༼སྐྱེ་བོ་གསོ་ཐིགས་༽གཉིས་འཆད་ཁྲིད་གནང་རྒྱུ།  ཕྱི་ཚེས་ ༣ ཉིན་འཇམ་དཔལ་དབྱངས་ཀྱིས་རྗེས་གནང་བཅས་བསྩལ་རྒྱུ། དེ་རིང་སྔ་དྲོའི་གསུང་ཆོས་འགྲུབ་རྗེས། སློབ་ཕྲུག་དང་མང་ཚོགས་ལ་བལ་ཡུལ་དང་ཏེ་ཛི་ནས་གདན་ཞུས་གནང་བའི་སྟོན་པའི་རིང་བསྲེལ་ལ་མཇལ་ཁ་གཏོང་རྒྱུ་དང་། ཕྱི་དྲོ་ནས་ཉིན་ལྟར་སྡེ་ཚན་ཁག་ ༤ ལ་དབྱེ་སྟེ། བོད་ཀྱི་མཁན་བླ་དགེ་བཤེས་ ༡༣ གྱིས་སློབ་ཕྲུག་ཚོར་ནང་ཆོས་ཐོག་དོགས་གཅོད་གནང་རྒྱུ་ཡིན་འདུག

གསུང་ཆོས་མགོ་འཛུགས་མ་གནང་གོང་།༸གོང་ས་མཆོག་གིས་སློབ་ཕྲུག་ཚོར་གདོད་མའི་ཆོས་ལུགས་ཀྱི་བྱུང་རིམ་དང་། རྒྱ་གར་ཆོས་ལུགས་ཁག་གི་འབྱུང་ཁུངས་དང་འཕེལ་རིམ།ལྟ་གྲུབ་རྣམ་བཞག་བཅས་སྐོར་ངོ་སྤྲོད་དང་། རྒྱ་གར་གྱི་ནང་ཆོས་བོད་ལ་དར་ཚུལ་དང་། རྒྱ་གཞུང་གིས་བོད་བཙན་བཟུང་བྱས་རྗེས་བོད་ཀྱི་ནང་ཆོས་དང་མི་རིགས་ལ་མཐོང་ཆུང་ཁྱད་གསོད་བྱས་པའི་གནས་སྟངས་ངོ་སྤྲོད་གནང་སྟེ། ཉེ་སྔོན་རྒྱ་མི་ཞིག་གིས་༸གོང་ས་མཆོག་གི་ངོ་ཤེས་བོད་པ་ཞིག་ལ། བོད་པ་ཚོ་ཆེས་རྗེས་ལུས་དང་ཧ་ཅང་ལྐུགས་པ་ཡིན་ཚུལ། བོད་པ་ཚོས་ཆོས་འདྲ་བྱས་ཏེ་སྡོད་རྒྱུ་ལས་གཞན་ཅི་ཡང་ཤེས་ཀྱི་མེད་སྐོར་བརྗོད་ཡོད་འདུག་ལ། ཕྱི་ལོ་ ༡༩༧༠ ནང་དུའང་རྒྱ་ནག་དཔོན་རིགས་ཚོས་བོད་ཀྱི་ཆོས་དེ་རྨོངས་དད་ཆོས་ལུགས་ཤིག་ཡིན་སྟབས། ཚན་རིག་ཤེས་ཚད་ཡར་རྒྱས་ཕྱིན་པ་དང་མཉམ་དུ་རང་བཞིན་གྱིས་ཡལ་འགྲོ་རྒྱུ་ཡིན་སྐོར་བརྗོད་ཡོད་ཀྱང་། དེང་སང་རྣམ་དཔྱོད་རྩེར་སོན་པའི་ཚན་རིག་པ་ཚོས་ཀྱང་།བོད་ཀྱི་ནང་ཆོས་ཀྱི་སེམས་ཀྱི་རྣམ་གཞག་ཐོག་དོ་སྣང་ཆེན་པོ་བྱེད་བཞིན་པ་མ་ཟད། རང་གི་ཕ་མེས་ཆོས་ལུགས་ཡི་ཤུ་ཡིན་པའི་ནུབ་ཕྱོགས་པ་ཚོས་ཀྱང་བོད་ཀྱི་ནང་ཆོས་ལ་མཐོང་དང་ཆ་འཇོག་ཆེན་པོ་བྱེད་ཀྱི་ཡོད་སྐོར་གསུངས་སོང་།

༸གོང་ས་མཆོག་གིས་མུ་མཐུད་དུ་མི་སྒེར་བ་ཞིག་ངོས་ནས་ཆོས་ལུཊ་གང་ལ་དད་མོས་བྱེད་མིན་སོ་སོའི་འདོད་པ་ཡིན་རུང་། ཁོང་རང་ཉིད་ལ་མཚོན་ན་ནང་པ་མིན་པའི་ལུང་པ་ཁག་ཏུ་ནང་པའི་ཆོས་ཆོས་ལུགས་དར་སྤེལ་གཏོང་འདོད་མེད་སྐོར་ནན་བརྗོད་དང་འབྲེལ། “ ལོ་ཤས་གོང་ངོས་ཀྱི་ངོ་ཤེས་འབྱོར་ལྡན་ཞིག་གིས་ཧྥ་རན་སིའི་ནང་པའི་ཆོས་ཚོགས་ཀྱི་མི་ཞིག་ངའི་སར་ཁྲིད་ཡོང་སྟེ། ཧྥ་རན་སིའི་ནང་ནང་པའི་དགོན་པ་ཆེན་པོ་ཞིག་རྒྱག་རྒྱུའི་ཐད་ང་ལ་སྐད་ཆ་དྲིས་སོང་། སྐབས་དེར་ངས་སོ་སོའི་ལུང་པའི་ནང་སོ་སོའི་ཕ་མེས་ཀྱི་ཆོས་དེ་བྱས་ན་ཡག་གི་རེད། ཆོས་ལུཊ་བསྒྱུར་ན་ཡག་པོ་ཡོད་མ་རེད། ཁྱེད་ལ་འགྲོ་སོང་གཏོང་རྒྱུ་ཡོད་ན་ནང་པའི་ལུང་པ་ཞིག་ལ་རྒྱག་ཐུབ་ན་ཡག་པོ་འདུག ཧྥ་རན་སི་ནང་པའི་ལུང་པ་མིན་སྟབས། ཡུལ་དེར་ནང་པའི་དགོན་པ་ཆེན་པོ་བརྒྱབ་ན་རན་པོ་མི་འདུག བོད་པའི་གཞིས་ཆགས་ཞིག་ཏུ་ཡི་ཤུའི་ལྷ་ཁང་ཆེན་པོ་ཞིག་བརྒྱབ་ན་བོད་པ་ཚོས་ག་རེ་དྲན་གྱི་རེད། དེ་ཡག་པོ་ཡོད་པ་མ་རེད་ལབ་པ་ཡིན། ཡིན་ནའང་། མི་སྒེར་བ་སོ་སོའི་ཆོས་ག་རེ་བྱེད་མིན་ལ་ཁྱད་པར་ཡོད་པ་མ་རེད་ཅེས་བཤད་པ་ཡིན། དེའི་རྗེས་དགོན་པ་དེ་ཐའེ་ལན་ཌིར་བཙུགས་ཡོད་ས་རེད་ ” ཅེས་གསུངས་བྱུང་།

༸གོང་ས་མཆོག་གིས་སེ་རི་ཡཱ་དང་འཛམ་གླིང་ནང་འབྱུང་བཞིན་པའི་དམར་གསོད་དོན་རྐྱེན་སྐོར་གྱི་གནས་སྟངས་དང་། དེང་དུས་ཤེས་ཡོན་ནང་བཟང་སྤྱོད་ཀྱི་བསླབ་གཞི་མེད་པའི་སྟབས་ཀྱིས་འགྲོ་བ་མིའི་རིགས་ལ་དཀའ་ངལ་ཆེན་པོ་འཕྲད་བཞིན་ཡོད་སྐོར་གསུངས་ཏེ། མིའི་སྲོག་ལ་རིན་ཐང་མེད་ན་མི་ལ་བརྩེ་བ་ཡོང་གི་མེད་པ་དང་། བརྩེ་བ་མེད་ན་སྲོག་ལ་རིན་ཐང་མི་མཐོང་བ་དང་། དེང་སྐབས་འཛམ་གླིང་འབྱོར་ལྡན་ཚོས་རང་གི་ཉམས་མྱོང་ཐོགསེམས་ཀྱི་ཞི་བདེ་དངོས་པོས་བསྒྲུབ་མི་ཐུབ་པ་དང་། སེམས་ཞི་བདེ་མེད་ན་བདེ་སྐྱིད་བསྐྲུན་ཐབས་མེད་པ་ར་འཕྲོད་ཡོད་ཚུལ་དང་། ལྷག་པར་དུ་ཀླད་ཁམས་ཚན་རིག་པ་ཚོས་མིའི་རྣམ་རྟོག་ལ་དོ་སྣང་གསར་པ་ཞིག་བསླེབས་ཏེ། བདེ་སྐྱིད་ངོ་མ་དེ་མིའི་བསམ་བློའི་སྟེང་བསྒྲུབ་དགོས་པ་ཞིག་ཡིན་པ་ངོས་འཛིན་བྱས་ཡོད་སྐོར་གསུངས་སོང་།

མཇུག་ཏུ་༸གོང་ས་མཆོག་གིས་ཚན་རིག་པ་དང་ཤེས་ཡོན་ཅན་ཚོས་འདས་པའི་མི་ལོ་༣༠༠རིང་ཕྱིའི་དངོས་པོ་ཁོ་ནར་དོ་སྣང་བྱས་ཡོད་ཀྱང་། ཉེ་བའི་ལོ་ཤས་རིང་ཨ་རི་དང་ཁེ་ཎ་ཌ།ཡུ་རོབ།ཨོ་སི་ཊི་ལི་ཡ།ཉི་ཧོང་།རྒྱ་གར་བཅས་ཀྱི་ནང་། དེང་དུས་ཤེས་ཡོན་ལམ་ལུགས་ནང་ཕྱིའི་དངོས་པོ་ཡར་རྒྱས་གཏོང་རྒྱུ་ཁོ་ན་མ་གཏོགས། ནང་བསམ་བློ་ཡར་རྒྱས་གཏོང་རྒྱུའི་བསླབ་གཞི་མེད་པར་ངོས་འཛིན་གནང་ཡོད་ཚུལ་གསུངས་ཡོད་པ་མ་ཟད།གནད་དོན་དེའི་ཐོག་ལོ་སྔོན་མར་རྒྱལ་ས་ལྡི་ལིར་༸གོང་ས་མཆོག་དང་ལྡི་ལིའི་མཐོ་སློབ་ཁག་གི་དགེ་རྒན་རྣམས་ལྷན་འཛོམས་གནང་སྐབས།རྒྱ་གར་གྱིས་ལོ་ངོ་སྟོང་ཕྲག་རིང་ཆོས་དང་མ་འདྲེས་པའི་ཀུན་སྤྱོད་ལག་ལེན་བསྟར་ཡོད་པའི་སྟབས་ཀྱིས། ཆོས་དང་མ་འདྲེས་པའི་ཀུན་སྤྱོད་ཡར་རྒྱས་གཏོིང་རྒྱུའི་ལས་གཞི་དེ་ཐོག་མར་རྒྱ་གར་ནས་མགོ་བཙུགས་ན་འོས་འཚམ་ཡིན་ཚུལ་དང་། ལས་གཞི་དེར་རྒྱ་གར་གྱིས་ཉམས་ཞིབ་བྱས་ཏེ་གཏན་འབེབས་གནང་དགོས་ཚུལ་བརྗོད་ཡོད་སྐོར་དང་། དེང་དུས་ཤེས་ཡོན་བསླབ་གཞིའི་ནང་ནང་སེམས་ཀྱི་བསླབ་གཞི་གསར་པ་ཞིག་གཏན་འབེབས་གནང་རྒྱུར། བོད་ཀྱི་ནང་ཆོས་ལས་གསུངས་པའི་སེམས་ཀྱི་རྣམ་གཞག་ལས་ལྷག་ཅིག་མཐོང་རྒྱུ་མེད་སྟབས།བོད་ཀྱི་ནང་ཆོས་དེ་འཛམ་གླིང་སྤྱི་ནོར་ལྟ་བུ་ཆགས་ཡོད་སྐོར་གསུངས་ཡོད།

མཐའ་མར།༸གོང་ས་མཆོག་གིས་བོད་མི་ས་ཡ་དྲུག་ཡོད་པའི་ནང་ནང་ཆོས་ངོ་མ་ཤེས་མཁན་ཆིག་འབུམ་ཙམ་ལས་མེད་སྟབས། བོད་རིགས་གཞོན་སྐྱེས་ཚོས་ནང་ཆོས་ལ་ཤེས་ནས་དད་པ་འཐོབ་ཐབས་གནང་རྒྱུ་དང་། ནང་ཆོས་ལ་དད་པ་ཙམ་མིན་པར་སློབ་ཚན་གྱི་འདུ་ཤེས་བཟུང་སྟེ་བརྟག་དཔྱད་གནང་དགོས་པའི་འབོད་སྐུལ་དང་། ནང་ཆོས་དང་བོན་ཆོས་གཉིས་ཀྱང་ད་ཆར་མིང་གི་འདོགས་ཚུལ་མི་འདྲ་བ་ཙམ་ལས་གཞི་ལམ་འབྲས་ཀྱི་རྣམ་གཞག་ལ་ཁྱད་པར་ཆེན་པོི་མེད་སྐོར་ནན་བརྗོད་གནང་སོང་།

གསར་འགོད་པས་སུ་ཇཱ་སློབ་གྲྭའི་འཛིན་རིམ་ ༡༠ པའི་སློབ་མ་བློ་བཟང་ཚུལ་ཁྲིམས་ལགས་སུ་གསུང་ཆོས་ཞུ་དོན་སྐོར་བཀའ་འདྲི་ཞུས་པར། ༸རྒྱལ་བ་རིན་པོ་ཆེའི་སྐུ་མདུན་ནས་གསུང་ཆོས་ཞུ་རྒྱུ་དེ་ཧ་ཅང་རྩ་ཆེན་པོ་ཞིག་ཡིན་རུང་། སུ་ཇཱ་སློབ་གྲྭའི་ནང་༸རྒྱལ་བ་རིན་པོ་ཆེའི་གསུང་ཆོས་ཞུ་རྒྱུའི་གོ་སྐབས་རག་གི་ཡོད་པ་མ་རེད། ཚེས་ ༣༡ ཉིན་སུ་ཇཱ་སློབ་གྲྭའི་བོད་མ་ ༡༦༠ ཙམ་གྱིས་ངྷ་སར་ཟས་བཅད་ངོ་རྒོལ་ལས་འགུལ་ཞིག་སྤེལ་ཡོད་སྟབས། གོ་སྐབས་དེ་དང་སྟབས་བསྟུན་དེ་ང་ཚོ་གསུང་ཆོས་ཞུ་རུ་ཡོང་བ་ཡིན་ཞེས་བརྗོད་བྱུང་།   

དེ་བཞིན་ལྡི་ལི་མཐོ་སློབ་སྐྱོད་དུ་བཞིན་པའི་བུ་མོ་ཚེ་རིང་ཆོས་འཛོམས་ལགས་སུ་བཅར་འདྲི་ཞུས་པར།ང་རང་ནང་ཆོས་ངོ་སྤྲོད་ཀྱི་ལས་འཆར་འདིའི་ཡོང་ཐེངས་༦པ་ཡིན།ང་རང་གིས་ལྡི་ལི་མཐོ་སློབ་ནང་ལོ་རྒྱུས་རིག་པའི་ཐོག་སློབ་སྦྱོང་བྱེད་ཀྱི་ཡོད་སྟབས།ནང་ཆོས་དེ་ང་རང་གི་སྦྱང་གཞི་དང་འབྲེལ་བ་ཆེན་པོ་འདུག་ལ།ཕྱོགས་གཞན་ཞིག་ནས་ང་རང་སྒེར་ངོས་ནས་ནང་ཆོས་སྐོར་ཤེས་འདོད་ཆེན་པོ་ཡོད་ཅེས་བརྗོད་སོང་།

འདི་ནི་༸གོང་ས་མཆོག་གིས་བཞུགས་སྒར་དུ་བོད་རིགས་མཐོ་རིམ་སློབ་མ་ཚོར་ནང་ཆོས་ངོ་སྤྲོད་གནང་ཐེངས་ ༦ པ་དེ་ཆགས་ཡོད།

གསར་འགོད་པ། དཔལ་ལྡན།