ཟླ་འདིའི་ཕྱི་ཚེས་ ༤ ཉིན་ཧོང་ཀོང་ཝེ་ཏོ་ལིས་སྤྱི་གླིང་དུ་མི་མང་ཁྲི་ ༡༨ ཙམ་འདུ་འཛོགས་ཐོག ཐེན་ཨན་མཱན་དྲུག་བཞིའི་དམར་གསོད་ཆེན་མོའི་དུས་དྲན་སྲུང་གཙི་བྱས་ཡོད་པ་རེད།
ཕྱི་ཟླ་༦ཚེས་༤ཉིན་གྱི་དགོང་མོའི་ཆུ་ཚོད་༨སྟེང་ཧོང་ཀོང་ཝེ་ཏོ་ལིས་ཡ་སྤྱི་གླིང་དུ་མི་མང་ཁྲི་༡༨ཙམ་འདུ་འཛོགས་ཐོག༼དྲུག་བཞི་ནམ་ཡང་བརྗེད་མི་སྲིད།དམངས་གཙོ་གཏན་དུ་རྒྱལ་ངེས་ཡིན།༽ཞེས་པའི་འཕྲེད་བྱང་འཕྱར་ཏེ། རྒྱ་ནག་མི་དམངས་བཅིངས་འགྲོལ་དམག་གིས་པེ་ཅིན་ཐེན་ཨན་མཱན་ཐང་ཆེན་དུ་ཞི་བའི་དམངས་གཙོའི་ལས་འགུལ་སྤེལ་མཁན་སློབ་ཕྲུག་སྟོང་ཕྲག་མང་པོ་སྡེབས་གསོད་བྱས་ཏེ། ལོ་༢༣འཁོར་བའི་དུས་དྲན་སྲུང་གཙིའི་མར་མེ་མཚན་ཚོགས་གཞི་རྒྱ་ཆེ་བ་ཞིག་སྤེལ་ཡོད་ལ། ཐེངས་འདིའི་ལས་འགུལ་ཁྲོད་རྒྱ་ནག་ནང་ལོགས་ཀྱི་སློབ་ཕྲུག་མང་པོ་མཉམ་ཞུགས་བྱས་ཡོད་པ་དང་། ཨོ་མན་དང་ཐེ་ཝན། ཨ་རི་བཅས་འཛམ་གླིང་རྒྱལ་ཁབ་ཁག་ནང་དུའང་དྲུག་བཞི་དུས་དྲན་སྲུང་གཙིའི་ལས་འགུལ་སྤེལ་ཏེ་མི་མང་འདུ་འཛོམས་བྱས་ཡོད་པ་མ་ཟད། དྷ་ས་ས་གནས་བོད་ཀྱི་གཞོན་ནུ་ལྷན་ཚོགས་དང་བོད་རང་བཙན་སློབ་ཕྲུག་ཚོགས་པ་གཉིས་ཀྱི་གོ་སྒྲིག བཞུགས་སྒར་དྷ་སའི་ཉིན་མོའི་སློབ་གྲྭ་ནང་དྲུག་བཞིའི་ལས་འགུལ་དང་འབྲེལ་བའི་བགྲོ་ཞིག་ཚོགས་ཏེ་དུས་དྲན་སྲུང་གཙི་བྱས་ཡོད་འདུག
གཞི་རྒྱ་ཆེ་བའི་མར་མེ་མཚན་ཚོགས་ཀྱི་ལས་འགུལ་གོ་སྒྲིག་གནང་མཁན་ཧོང་ཀོང་མཉམ་འབྲེལ་ཚོགས་པའི་ཚོགས་གཙོ་ལི་ཀྲོ་རཱིན་གྱིས་དུས་དྲན་སྲུང་གཙིའི་བསྒྲགས་གཏམ་སྒྲོགས་སྦྱང་སྐབས། “ཞི་ཅིན་ཕེན་དང་ལི་ཁི་ཆང་གཉིས་ཀྱིས་གཙོས་རྒྱ་གཞུང་གི་མ་འོངས་མགོ་ཁྲིད་གསར་བ་ཚོར་དེ་རིང་ང་ཚོས་གསལ་འདེབས་ཞུ་རྒྱུར། རྒྱ་གཞུང་ད་དུང་ལོ་རྒྱུས་འཕེལ་ཕྱོགས་ཀྱི་རྗེས་སུ་ལྷག་ཏེ། དམངས་གཙོའི་བཅོས་བསྒྱུར་ལག་བསྟར་མ་བྱས་ཚེ། མི་མང་གིས་ད་ལྟའི་རྒྱ་གཞུང་འདི་མཆིལ་ལུད་བཞིན་འདོར་ངེས་ཡིན་ལ། མི་མང་དམངས་གཙོའི་རླབས་རྒྱུན་ནི་ནམ་ཡང་འགོག་ཐབས་བྲལ་བར་མ་ཟད། དེ་ལ་ཁ་གཏད་ངོ་ལོག་བྱ་མཁན་སྲིད་གཞུང་དེ་ནམ་ཞིག་འཐོར་ངེས་ཡིན།” ཅེས་བརྗོད་ཡོད་ལ། སློབ་ཕྲུག་མནའ་མཐུན་ཚོགས་པའི་མགྲིན་ཚབ་པའི་སྣེ་ཁྲིད་འོག དམངས་གཙོ་དོན་གཉེར་བ་རྣམས་གློད་གྲོལ། ༨༩ དྲུག་བཞི་དམངས་གཙོའི་ལས་འགུལ་དཀར་འདོན། དམར་གསོད་ནག་ཉེས་ཐེར་འདོན་དང་དམར་ཤོག་གཅིག་སྡུད་སྒེར་གཅོད་སྲིད་དབང་མཇུག་སྒྲིལ། རང་དབང་དམངས་གཙོའི་རྒྱ་ནག་གསར་བ་འཛུགས་དགོས་པ་སོགས་ཀྱི་འབོད་ཚིག་བསྒྲགས་ཡོད་འདུག
དེ་བཞིན། ཕྱི་ཚེས་ ༣ ཉིན་ཨ་རིའི་རྒྱལ་དོན་མགྲིན་པ་ཌེ་ཁྲོ་ན་(Mark Daytona)ལགས་ཀྱིས་ཀྱང་། “ཕྱི་ལོ་ ༡༩༨༩ ལོར་རྒྱ་ནག་ཐེན་ཨན་མཱན་ཐང་ཆེན་དུ་ཞི་བའི་ལས་འགུལ་སྤེལ་མཁན་སློབ་ཕྲུག་རྣམས་དྲག་གནོན་དམར་གསོད་བྱས་ཏེ་ལོ་ ༢༣ འཁོར་བའི་དུས་དྲན་དང་སྟབས་བསྟུན། ཨ་རི་གཞུང་གིས་རྒྱལ་སྤྱིའི་སྤྱི་ཚོགས་དང་མཉམ་ཏུ་ཚེ་སྲོག་ཤོར་མཁན་སློབ་ཕྲུག་དག་ལ་མྱ་ངན་རྗེས་དྲན་ཞུ།” ཞེས་བརྗོད་དེ། ཨ་རིའི་གཞུང་གི་ངོས་ནས་རྒྱ་གཞུང་གིས་དྲུག་བཞིའི་ལས་འགུལ་དང་འབྲེལ་ཏེ། བཙོན་འཇུག་བཀག་སྡོམ་འོག་ཚུད་པའི་དམངས་གཙོ་དོན་གཉེར་བ་ཡོངས་རྫོགས་གློད་གྲོད་དང་། རྒྱ་གཞུང་གིས་གཅར་རྡུང་རྨས་སྐྱོན་དང་བཀག་སྡོམ་འོག་གར་སོང་ཆ་མེད་དུ་གྱུར་བ་རྣམས་ཡོངས་བསྒྲགས་གསལ་བཤད་གནང་དགོས་པ་མ་ཟད། ལས་འགུལ་ཁྲོད་ཞུགས་མཁན་དང་ཁོང་ཚོའི་ནང་མིར་ལྟ་རྟོག་བཀག་སྡོམ་བྱ་རྒྱུ་མཚམས་འཇོག་བྱས་ཏེ། སྤྱི་དམངས་ཡོངས་ཀྱི་འགྲོ་བ་མིའི་ཡོངས་ཁྱབ་ཐོབ་ཐང་གཙི་སྲུང་དགོས་པ་ནན་སྐུལ་གནང་ཡོད་པ་རེད།
ཕྱི་ཚེས་ ༥ ཉིན་གྱི་རྒྱ་གཞུང་ཕྱི་དྲིལ་སྡེ་ཁག་གི་གསར་འགོད་ལྷན་ཚོགས་ཐོག རྒྱ་གཞུང་མགྲིན་ཚབ་པ་ལིག་ཝེ་མཱེན་གྱིས་ཨ་རི་གཞུང་གིས་ལངས་ཕྱོགས་དེར་བསྐྱོན་བརྗོད་ཀྱི་རྣམ་འགྱུར་བསྟན་ཏེ། དེ་ནི་གནས་ལུགས་རྒྱུ་མཚན་མེད་པ་ཞིག་དང་། རྒྱ་ནག་གི་ནང་སྲིད་ལ་ཐེ་ཇུས་བྱས་པ་ཞིག་ཡིན་སྐོར་བརྗོད་འདུགཡིན་ནའང་། རྒྱ་གཞུང་གི་བཀག་སྡོམ་བཙོན་འཇུག་འོག་ལོ་མང་རིང་དཀའ་སྡུག་མཐར། ཉེ་སྔོན་ཨ་རིར་གསར་ཏུ་འབྱོར་བའི་རྒྱ་ནག་དམངས་ཁྲོད་ཁྲིམས་རྩོད་པ་ཁྲིན་ཀུང་ཁྲིན་གྱིས། “དམངས་གཙོའི་ལས་འགུལ་དེར་འཛམ་གླིང་སྤྱི་ཡོངས་ཀྱིས་ངོས་འཛིན་ཐོབ་དགོས་ངེས་ཤིག་ཆགས་ཡོད་སྟབས། དྲུག་བཞིའི་གནད་དོན་དེར་རྒྱ་གཞུང་གིས་ལྟ་སྟངས་དྲང་བདེན་ཞིག་འཛིན་དགོས། དེ་ནི་ང་ཚོས་འཁོན་སེམས་སློག་འདུན་པ་མ་ཡིན་པར་དོན་དངོས་གནས་ཚུལ་གསལ་འདོན་ཡོང་ཆེད་ཡིན། ང་ཚོའི་ངོས་ནས་ནོར་འཁྲུལ་ལ་གུ་ཡངས་བློ་སྐྱེད་ཀྱི་འདུན་པ་ཡོད་མོད། དོན་དངོས་ནག་བསུབ་གཏོང་འདོད་ཀྱི་བྱ་སྤྱོད་ལ་མཐའ་གཅིག་ཏུ་ངོ་རྒོལ་ཡོད། འདས་པའི་བྱུང་རབས་ཡིད་ལ་ཉར་མི་ཐུབ་པའི་མི་རིགས་ཤིག་ལ་དུས་ནམ་ཡང་རེ་བ་ཡོད་མི་སྲིད།” ཅེས་བརྗོད་ཡོད་པ་རེད།
ཐེན་ཨན་མཱན་དྲུག་བཞིའི་དམར་གསོད་དོན་རྐྱེན་ཁྲོད་མི་ག་ཚོད་ཅིག་འདས་གྲོངས་ཕྱིན་ཡོད་མེད་ད་དུང་གསལ་ཁ་བྱུང་མེད་མོད། རྒྱ་གཞུང་གི་བརྗོད་ཚུལ་ལྟར་ན་དོན་རྐྱེན་ཁྲོད་མི་ ༢༤༡ རྐྱེན་འདས་དང་མི་ ༧༠༠༠ ལྷག་ལ་རྨས་སྐྱོན་ཕོག་ཡོད་སྐོར་བརྗོད་ཡོད་ཀྱང་། འགྲོ་བ་མིའི་ཐོབ་ཐང་ཚོགས་སྡེ་ཁག་གིས་མི་གྲངས་སྟོང་ཕྲག་བརྒལ་བ་རྐྱེན་ལམ་དུ་ཕྱིན་ཡོད་པའི་ངོས་འཛིན་བྱེད་ཀྱི་ཡོད་པ་རེད།
གསར་འགོད་པ། ཚེ་རིང་རྒྱལ།
ད་འདི་ནི་དངོས་ནས་རྒྱ་ནག་མི་དམངས་ཚོ་ལ་རྒྱལ་ཁ་ཆེན་པོ་ཐོབ་པའི་རྟགས་ཤིག་རེད་་ཧོང་ཀོང་མི་དམངས་ཚོས་རང་གི་ཤ་ཁྲག་ཅིག་པའི་སྤུན་ཟླ་ཚོར་ད་རོག་པ་བྱ་བའི་དུས་ལ་བབ་པ་རེད་
དམངས་གཙོ་རྒྱལ་ལོ་
འདི་ནི་ང་ཚོར་ལམ་ཁ་གསར་པ་ཞིག་རེག་རྒྱུའི་སྔ་ལྟས་རེད་་་
གསར་འགྱུར་འདིར་གཟི་བརྗིད་འདུག མི་མང་ཁྲི་༡༨ཙམ་འདུ་འཛོགས་ཐོག (དྲུག་བཞི་ནམ་ཡང་བརྗེད་མི་སྲིད། དམངས་གཙོ་གཏན་དུ་རྒྱལ་ངེས་ཡིན།) ཞེས་པའི་འབོད་ཚིག་དང་འཕྲེད་བྱང་གཉིས་ནི། འདི་ལོའི་ཕྱི་ཟླ་༦ པའི་ཚེས་༤ ཉིན་འཛམ་གླིང་ནང་གི་རྒྱལ་མཆོང་རླབས་ཆེ་ཤོས་དེ་ཆགས་ཡོད་པ་རེད། ལྷག་པར་དུ་ལས་འགུལ་གོ་སྒྲིག་པའི་གཏམ་བཤད་ནས། “ཞི་ཅིན་ཕེན་དང་ལི་ཁི་ཆང་གཉིས་ཀྱིས་གཙོས་རྒྱ་གཞུང་གི་མ་འོངས་མགོ་ཁྲིད་གསར་བ་ཚོར་དེ་རིང་ང་ཚོས་གསལ་འདེབས་ཞུ་རྒྱུར། རྒྱ་གཞུང་ད་དུང་ལོ་རྒྱུས་འཕེལ་ཕྱོགས་ཀྱི་རྗེས་སུ་ལྷག་ཏེ། དམངས་གཙོའི་བཅོས་བསྒྱུར་ལག་བསྟར་མ་བྱས་ཚེ། མི་མང་གིས་ད་ལྟའི་རྒྱ་གཞུང་འདི་མཆིལ་ལུད་བཞིན་འདོར་ངེས་ཡིན་ལ། མི་མང་དམངས་གཙོའི་རླབས་རྒྱུན་ནི་ནམ་ཡང་འགོག་ཐབས་བྲལ་བར་མ་ཟད། དེ་ལ་ཁ་གཏད་ངོ་ལོག་བྱ་མཁན་སྲིད་གཞུང་དེ་ནམ་ཞིག་འཐོར་ངེས་ཡིན།” ཞེས་པའི་སྐད་གསང་མཐོ་པོ་དེ་གཉིད་མ་ཁུག་པའི་མི་ཚང་མའི་རྣ་བར་ཐོས་ཡོད་འདུག བོད་དང་སོག་པོ། ཡུ་གུར་སོགས་ག་པར་ཕྱིན་པ་ཡིན་ནམ་་་་་་་་་་་་་་