གློག་ཀླད་བཞག་སྟེ་རྒྱ་ནག་ནང་འཛུལ་འདུག

དེ་རིང་ཨོ་སི་ཊོ་ལི་ཡའི་རྒྱལ་སྲུང་བློན་ཆེན་རྒྱ་ནག་ཏུ་བསྐྱོད་ཡོད་ཀྱང་། ཁོང་གིས་གློག་ཀླད་དང་ལག་ཁྱེར་ཁ་པར་ཧོང་ཀོང་དུ་བཞག་ཡོད་འདུག

དེ་རིང་ཕྱི་ཚེས་ ༦ ཉིན་ཨོ་སི་ཊོ་ལི་ཡའི་རྒྱལ་སྲུང་བློན་ཆེན་སཱི་མེ་ཐཱི་ (Smith) དང་རྒྱ་ནག་གི་རྒྱལ་སྲུང་བློན་ཆེན་ལཱིང་ཀུང་ལིས་གཉིས་པེ་ཅིན་དུ་ཐུག་འཕྲད་གྲོས་མོལ་བྱས་ཡོད་པ་དང་། དེ་ནི་རྒྱལ་ཁབ་གཉིས་བར་རྒྱལ་སྲུང་བློན་ཆེན་རིམ་པའི་འབྲེལ་མོལ་ཐོག་མ་ཆགས་ཡོད་འདུག ཐེངས་འདིའི་འབྲེལ་མོལ་སྐབས་རྒྱ་གཞུང་ཕྱོགས་ནས་དོ་སྣང་ཤུགས་ཆེན་བྱེད་བཞིན་པའི་ཨོ་སི་ཊོ་ལི་ཡའི་བྱང་ཁུལ་དུ་ཨ་རིའི་མཚོ་དམག་རྟེན་གཞི་བཙུགས་པའི་སྐོར་གླེང་སློང་གྲོས་བསྡུར་བྱ་འཆར་ཡོད་འདུག

དེ་སྔོན་ཨོ་སི་ཊོ་ལི་ཡའི་རྒྱལ་སྲུང་བློན་ཆེན་ཕྱི་བསྐྱོད་སྐབས། ཁོང་གི་ལག་ཁྱེར་ཁ་པར་དང་གློག་ཀླད་ནང་དྲ་འབུ་སིམ་འཛུལ་གྱིས་གཏོར་སྐྱོན་ཐེབས་ཡོད་པར་བརྟེན། ཐེངས་འདིར་རྒྱ་ནག་ནང་ཕྱོགས་བསྐྱོད་སྐབས། རྒྱལ་སྲུང་བློན་ཆེན་སཱི་མེ་ཐཱི་གཙོས་གྲོས་མོལ་རུ་ཁག་གི་དཔོན་རིགས་ཚང་མས་གསང་བ་ཕྱི་གྱར་གྱི་ཉེན་སྲུང་ཆེད། སོ་སོའི་གློག་ཀླད་དང་ལག་ཁྱེར་ཁ་པར་ཡོངས་རྫོགས་ཧོང་ཀོང་ནང་བཞག་རྗེས། ད་གཟོད་རྒྱ་ནག་ནང་འབྲེལ་མོལ་དུ་བསྐྱོད་ཡོད་འདུག 

ཨོ་སི་ཊོ་ལི་ཡའི་འབྲེལ་ཡོད་དཔོན་རིགས་ཤིག་གིས་གསར་ལམ་ཁག་ཏུ།  “རྒྱ་གཞུང་གིས་དམིགས་འཛུགས་བྱ་ཡུལ་གཙོ་བོ་རྒྱལ་སྲུང་བློན་ཆེན་ཆགས་ཡོད་ལ།  ཁོ་ཚོར་དེ་ལྟའི་སིམ་འཛུལ་གནོད་སྐྱོན་བཟོ་བའི་ནུས་པ་དང་འཆར་གཞི་ཡོད་པ་ང་ཚོས་ཤེས་ཀྱི་ཡོད།” ཅེས་བརྗོད་ཡོད་འདུག

ལོ་སྔོན་མའི་ཕྱི་ཟླ་ ༣ པའི་ནང་ཨི་སི་ཌོ་ལི་ཡའི་སྲིད་བློན་དང་རྒྱལ་སྲུང་བློན་ཆེན། ཕྱི་འབྲེལ་དྲུང་ཆེ་བཅས་ཀྱི་གློག་ཀླད་ནང་དྲ་འབུའི་སིམ་འཛུལ་གཏོར་རྒོལ་ཐེབས་མྱོང་ཡོད་པ་མ་ཟད། དྲ་འབུའི་ཡོང་ཁུངས་རྒྱ་ནག་ཡིན་པའི་ངོས་འཛིན་བྱས་ཡོད་པ་རེད། ཡིན་ནའང་། སྐབས་དེར་རྒྱ་གཞུང་གིས་དེ་ནི་ཁུངས་སྐྱེལ་མེད་པའི་བཤད་ཡམས་ཤིག་ཡིན་སྐོར་བརྗོད་དེ་ངོས་ལེན་བྱས་མེད་པ་རེད།