ཉེ་ཆར་ནན་ཧྭ་གསར་ཤོག་གིས་མིང་འདོན་བྱས་པའི་སྐབས་རྗེས་མའི་རྒྱ་གཞུང་དཔོན་རིགས་གསར་བའི་ཁྲོད། པའོ་ཞིས་ལེ་ཡི་ཁ་གཏད་ལངས་མཁན་ཝང་ཡཱང་སླེབས་མི་འདུག
རྒྱ་གཞུང་གི་སྐབས་ ༡༨ པའི་ཚོགས་ཆེན་སླེབས་ལ་ཉེ་སྐབས། ཧོང་ཀོང་༼ནན་ཧྭ་ཞོགས་པའི་ཚགས་པར་༽གྱིས་ད་ལྟའི་རྒྱ་གཞུང་དབུས་ཆབ་སྲིད་ལྷན་ཁང་གི་རྒྱུན་ལས་མི་གྲངས་ ༩ དེ་ཐེངས་རྗེས་མར་ ༧ ལ་ཉུང་འཕྲི་བྱ་རྒྱུ་ཡིན་པ་དང་། མ་འོངས་པའི་རྒྱ་གཞུང་དཔོན་རིགས་གསར་བ་བདུན་ནི། ད་ལྟའི་ཆར་རྒྱ་གཞུང་དཔོན་རིགས་ནང་ཁུལ་ཡོང་ཁྱབ་གཏན་ཁེལ་ཟིན་པའི་ཞིས་ཅིན་ཕེན་དང་ལི་ཁི་ཆང་གཉིས་ལས་གཞན། ད་ལྟའི་ཧྲང་ཧེ་གྲོང་ཁྱེར་གྱི་དམར་ཤོག་དྲུང་ཆེ་ཡུས་ཀྲིན་ཧྲིན་དང་། ཁྲུང་ཆིན་གྲོང་ཁྱེར་དམར་ཤོག་དྲུང་ཆེ་ཁྲང་ཏིག་ཅང་། རྒྱ་གཞུང་རྒྱལ་སྲིད་སྤྱི་ཁྱབ་ཁང་གི་སྲིད་བློན་གཞོན་པ་ཝང་ཀྲི་ཧྲན། རྒྱ་གཞུང་དབུས་དམར་ཤོག་དྲུང་ཆེ་ལྷན་ཁང་གི་དྲུང་ཆེ་ལིས་ཡོན་ཁྲའོ། རྒྱ་གཞུང་དབུས་དྲིལ་བསྒྲགས་སྡེ་ཁག་གི་མགོ་གཙོ་ལིག་ཡོན་ཧྲན་བཅས་ཡིན་པར་ཚོད་བགམ་བྱས་འདུག
ཧོང་ཀོང་ནན་ཧྭ་ཞོགས་པའི་གསར་ཤོག་གིས་པེ་ཅིན་ནས་སྤེལ་བའི་གནས་ཚུལ་ནང་། འདི་ལོའི་ཕྱི་ཟླ་ ༥ པའི་ཟླ་དཀྱིལ་ཙམ་ལ་རྒྱ་གཞུང་དབུས་འཐུས་མིའི་ལྷན་ཚོགས་ཀྱིས། ཆབ་སྲིད་ལྷན་ཁང་གིི་འཐུས་མི་དང་རྗེས་སྣོན་འཐུས་མི་བཅས་མི་གྲངས་ ༣༧༠ བསྡུ་བསྐོང་བྱས་ཏེ། གསང་བའི་ཐོག་རྒྱ་གཞུང་ཆབ་སྲིད་ལྷན་ཁང་གི་འཐུས་མི་ནང་ཁུལ་འོས་བསྡུའི་ཚོགས་འདུ་ཞིག་ཚོགས་ཏེ། སྐབས་རྗེས་མའི་རྒྱ་གཞུང་དབུས་ཆབ་སྲིད་ལྷན་ཁང་གི་རྒྱུན་ལས་འོས་འདེམས་བྱས་ཡོད་སྐོར་བཀོད་འདུག
སྐབས་དོན་དབྱེ་ཞིབ་པ་དག་གིས། གནས་སྟངས་དེ་ནི་རྒྱ་གཞུང་གི་ཆབ་སྲིད་བཅོས་སྒྱུར་ཐད་གལ་གནད་ཅན་གྱི་གོམས་སྟབས་ཤིག་ཆགས་ཡོད་ལ། མ་འོངས་པར་སྒྲིག་སྲོལ་རང་བཞིན་ཅན་དུ་འགྱུར་སྲིད་པ་མ་ཟད། ཐེངས་འདིའི་ནང་ཁུལ་འོས་བསྡུ་དེ་ནི། ད་ལྟའི་རྒྱ་གཞུང་སྲིད་འཛིན་ཧུའུ་ཅིན་ཐའོ་ཡིས་བཏོན་པའི་ “དམར་ཤོག་ནང་ཁུལ་མང་གཙོ” ཞེས་པའི་ལངས་ཕྱོགས་ལ་རྒྱབ་སྐྱོར་མཉམ་འབྲེལ་གྱི་རྣམ་འགྱུར་ཞིག་ཡིན་པར་ངོས་འཛིན་བྱེད་ཀྱིན་ཡོད་འདུག
ནན་ཧྭ་ཞོགས་པའི་གསར་ཤོག་གིས་རྒྱ་གཞུང་དཔོན་རིགས་ནང་ཁུལ་གྱི་སྐད་ཆ་ལུང་འདྲེན་བྱས་པ་ལྟར་ན། གལ་སྲིད་ཐེངས་འདིའི་ཚོད་ལྟ་རང་བཞིན་ཅན་གྱི་འོས་བསྡུ་བརྒྱུད། དམར་ཤོག་ནང་ཁུལ་གཅིག་གྱུར་མོས་མཐུན་ཡོད་པའི་མགོ་ཁྲིད་དཔུང་ཁག་གསར་བ་ཞིག་བདམས་ཐོན་བྱུང་ཚེ། མ་འོངས་པར་རྒྱ་གཞུང་གི་དཔོན་རིགས་གསར་རྙིང་བརྗེ་སྤོར་གྱི་གོ་རིམ་ཐད་སྔར་མེད་ཀྱི་ཤུགས་རྐྱེན་ཆེན་པོ་ཞིག་ཐེབས་རྒྱུ་ཡིན་སྐོར་གླེང་ཡོད་འདུག
ཡིན་ནའང་། ཐེངས་འདིར་ནན་ཧྭ་ཞོགས་པའི་གསར་ཤོག་གིས་བཏོན་པའི་སྐབས་རྗེས་མའི་རྒྱ་གཞུང་གི་རྒྱུན་ལས་ ༧ གྱི་གྲས་སུ། ཧུའུ་ཝུན་གཉིས་ཀྱིས་མཐའ་གཅིག་ཏུ་རྒྱབ་སྐྱོར་དང་བཅོས་བསྒྱུར་ཤོག་ཁག་གི་ཚབ་མཚོན་འོས་མི་གཙོ་བོའི་གྲས་སུ་གླེང་སྟེ། དམར་ཤོག་མཁྲེགས་འཛིན་པ་པའོ་ཞིས་ལའེ་ཡི་ཁ་གཏད་ཆགས་ཡོད་པའི་ཀུང་ཏུང་ཞིང་ཆེན་གྱི་དམར་ཤོག་དྲུང་ཆེ་ཝང་ཡཱང་མིང་འདོན་བྱུང་པ་མེད་པ་དེ་ནི། རྒྱལ་སྤྱིའི་ཆབ་སྲིད་དབྱེ་ཞིབ་པ་དག་ལ་དོགས་གཞི་ཆེན་པོ་ཞིག་དང་གླེང་སློང་གསར་བ་ཞིག་ཆགས་ཡོད་འདུག
ཡང་་་སེང་གེ་བཀའ་ཤག་གིས་ཀྱང་རེ་བ་སྐམ་པོ་ཞིག་མུ་མཐུད་རྒྱག་ཚོད་རེད། བོད་ཕྱོགས་ནས་ད་བར་དུ་རེ་བ་སྐམ་པོའི་ཐོག་ལ་རེ་བ་སྐམ་པོ་བཞག་ཏེ་ནང་ཁུལ་མགོ་སྐོར་བཏང་ནས་མི་ལོ་ལྔ་བཅུ་ལྷག་འདས་པ་རེད། གྲགས་སྐམ་དཔོན་ངན་འདི་ཚོའི་རིགས་ཀྱིས་རང་གི་མིག་སྔར་གསལ་ལྷང་ངེར་ཡོད་པའི་༧གོང་ས་མཆོག་གི་སྐུའི་བགྲེས་ཉམས་ཀྱང་མཐོང་གི་མེད་ཚོད་རེད། དོན་དམ་གྱི་ལས་དོན་བསྒྲུབ་བསམ་ན་༧གོང་ས་མཆོག་ཁ་ལ་མ་འཁྱེར་རོགས།