ཉེ་ཆར་རྒྱ་དམར་དཔོན་རིགས་ནང་ཁུལ་གྱི་འཁྲུག་རྩོད་བསྐྱར་དུ་རྣོ་ངར་ཆེ་རུ་འགྱུར་མགོ་བརྩམས་ཡོད་ལ། འཁྲུག་རྩོད་ཀྱི་ཁ་གཏད་ས་དེའང་རྒྱལ་ཁབ་ཕྱི་ནང་ཚང་མས་མ་འོངས་པའི་རྒྱ་ནག་སྲིད་འཛིན་དུ་ངོས་འཛིན་བྱེད་བཞིན་པའི་ཞི་ཅིན་ཕེན་ཆགས་ཡོད་པ་རེད།
ཟླ་འདིའི་ཕྱི་ཚེས་ ༥ ཉིན་རྒྱ་གཞུང་དབུས་དམར་ཤོག་སློབ་གྲྭའི་སློབ་སྦྱོང་དུས་བབ་སྟེང་། ༼ སྤྱི་ཚོགས་དོ་དམ་སུས་འགན་ལེན་གནང་དགོས ༽ཞེས་པའི་གནས་ཚུལ་ཞིག་སྤེལ་ཏེ། སྤྱི་ཚོགས་དོ་དམ་ནི་སྒྲིག་འཛུགས་གཅིག་ཁོ་ནས་སྟངས་འཛིན་ཐུབ་པ་ཞིག་མ་ཡིན་པར། ངེས་པར་དུ་རྣམ་པ་འདྲ་མིན་གྱི་མཉམ་ལས་ཤིག་ཡིན་པ་སོགས་བརྗོད་དེ། ཀྲུག་ཡུང་ཁཱང་གི་དཔུང་ཤུགས་ཀྱི་གཞི་རྟེན་དུ་གྱུར་བའི་རྒྱ་གཞུང་ཁྲིམས་སྲིད་སྡེ་ཁག་གི་དབང་ཤུགས་སྲིད་གཞུང་ལ་སྤྲོད་དགོས་པའི་བསམ་ཚུལ་བཏོན་ཡོད་པ་རེད། རྒྱ་གཞུང་དམར་ཤོག་སློབ་གྲྭའི་སློབ་གཙོ་ནི་ད་ལྟའི་རྒྱ་ནག་གི་སྲིད་འཛིན་གཞོན་པ་ཞིས་ཅིན་ཕེན་ཡིན་སྟབས། དཔྱད་བརྗོད་པ་དག་གིས་དེ་ནི་ཉེ་སྔོན་གསར་ལམ་ཁག་ཏུ་རྒྱ་གཞུང་དབུས་ཆབ་སྲིད་ལྷན་ཁང་གི་རྒྱུན་ལས་མི་གྲངས་ ༩ དེ་ཐེངས་རྗེས་མར་མི་གྲངས་ ༧ ལ་ཉུང་འཕྲི་བྱ་རྒྱུ་ཡིན་པའི་གནས་ཚུལ་ཐོན་པ་ལྟར། ཀྲུག་ཡུང་ཁཱང་གི་དཔུང་ཤུགས་རྒྱ་གཞུང་ཁྲིམས་སྲིད་སྡེ་ཁག་ཏེ། སྐབས་བཅོ་བརྒྱད་པའི་ཚོགས་ཆེན་རྗེས་ཆེས་མཐོའི་ཆབ་སྲིད་ལྷན་ཁང་གི་རྒྱུན་ལས་རིམ་པའི་གོ་བབ་ནས་མར་དབྱུང་འཆར་ཡིན་པ་བརྗོད་ཡོད།
དེ་བཞིན། ཕྱི་ཟླ་ ༦ ཚེས་ ༢༩ ཉིན། ཨ་རིའི་བྷི་ལོམ་བྷིར་(Bloomberg)གསར་འཕྲིན་དྲ་བའི་སྟེང་། རྒྱ་གཞུང་གི་སྲིད་འཛིན་གཞོན་པ་ཞི་ཅིན་ཕེན་གྱི་ནང་མི་སྤུན་མཆེད་ཀྱི་དཔལ་འབྱོར་མ་དངུལ་ཨ་སྒོར་དུང་ཕྱིར་ ༣་༦༧ ལ་སླེབས་ཡོད་དང་། ཅང་ཞིས་རྫས་འགྱུར་ས་རྩི་བཟོ་གྲྭ་ཞིག་གི་མ་དངུལ་གྱི་བརྒྱ་ཆ་ ༡༨ དང་། ཧྲིན་ཀྲིན་རྐང་དངུལ་གཏོང་འཇོག་བཟོ་གྲྭ་ཞིག་ནང་མ་དངུལ་ཨ་སྒོར་དུང་ཕྱིར་ ༣ ། པེ་ཅིན་གྱི་ཚན་རྒྱལ་བཟོ་གྲྭ་ཞིག་ཏུ་ཨ་སྒོར་ཁྲི་ ༢༠༠༠ བཅས་ཡོད་པ་མ་ཟད། ཧོང་ཀོང་དུ་ས་ཁང་ ༧ ཡོད་པའི་མ་དངུལ་བསྡོམས་འབོར་ཨ་སྒོར་ཁྲི་ ༥༥༠༠ བརྒལ་ཡོད་པའི་གནས་ཚུལ་སྤེལ་ཡོད་པ་རེད། དེ་མ་ཐག་རྒྱ་ནག་ནང་བྷི་ལོམ་བྷིར་གསར་འཕྲིན་དྲ་རྒྱ་བཀག་ཡོད་པ་མ་ཟད། ཞིས་ཅིན་ཕེན་དང་ཐེ་ཙི་ཏང་སོགས་གནད་ཚིག་རྣམས་རྒྱ་ནག་གནས་འཕྲིན་དྲ་རྒྱ་ཁག་ཏུ་འཚོལ་བཤེར་མི་ཐུབ་པ་བཟོས་ཡོད་པ་རེད།
ཞིས་ཅིན་ཕེན་ནང་མི་སྤུན་མཆེད་གྱི་དཔལ་འབྱོར་གསང་བ་ཕྱིར་གྱར་བའི་གནས་ཚུལ་དེ་ནི། ཞིས་ཅིན་ཕེན་རང་ཉིད་དང་ཁོའི་ཆུང་མ་བུ་ཕྲུག་བཅས་ལ་ཐད་ཀར་འབྲེལ་བ་ཆགས་མེད་ཀྱང་། མ་དངུལ་གནས་ཡུལ་དང་དངུལ་འབོར་སོགས་ཧ་ཅང་ཞིབ་ཕྲ་ཡིན་པར་མ་ཟད། རྒྱ་གཞུང་གི་དཔོན་རིགས་གསར་རྙིང་བརྗེ་སྤོར་གྱི་སྐབས་བཅོ་བརྒྱད་པའི་ཚོགས་ཆེན་སླེབས་ལ་ཉེ་བའི་གནད་འགག་གི་དུས་ཚོད་ཅིག་ལ་གློ་བུར་དུ་བྱུང་བ་དང་། དེ་བཞིན། ཕྱི་ཟླ་ ༥ ཚེས་ ༡༡ ཉིན་རྒྱ་ནག་བདུན་རེ་གསར་དེབ་སྟེང་པའོ་ཞིས་ལེ་ཡི་ཆུང་མའི་སྤུན་མཆེད་ཀུའུ་ཞིས་ཅཱང་གིས་བཟོ་གྲྭ་ ༢༠ ལྷག་ལ་སྟངས་འཛིན་བྱས་ཡོད་པ་དང་། ཁོ་མོའི་མ་དངུལ་ཨ་སྒོར་དུང་ཕྱིར་ ༡་༢༦ ལ་སླེབས་ཡོད་སྐོར་གྱི་གནས་ཚུལ་ཕྱིར་གྱར་བ་དེ་དང་ཁ་གཏད་དུ་གྱུར་བའི་གནས་ཚུལ་ཞིག་ཆགས་ཡོད་སྟབས། གནས་ཚུལ་དེའི་རྒྱབ་ལྗོངས་སུ་རྒྱ་ནག་དཔོན་རིགས་ནང་ཁུལ་དབང་ཤུགས་འཐབ་རྩོད་ཀྱི་རྙིང་ཟིང་ཆེན་པོ་ཞིག་ཡོད་པའི་ཚོད་བགམ་བྱེད་བཞིན་ཡོད་པ་རེད།
གནས་ཚུལ་དེའི་ཐད་སྐབས་དོན་དཔྱད་བརྗོད་པ་ཁྲིན་པའོ་ཁུང་གིས། ཉེ་སྔོན་ཕྱི་ཟླ་ ༦ ཚེས་ ༢༦ ཉིན་ཀྲུག་ཡུང་ཁཱང་གིས་རྒྱ་ནག་ཏཱ་ལེན་དུ་ཚོགས་པའི་རྒྱལ་སྤྱིའི་རུལ་སུངས་བཀག་སྡོམ་མཉམ་འབྲེལ་ཚོགས་འདུ་ཐེངས་བཞི་བའི་སྟེང་། མ་དངུལ་ཕྱིར་གཏོང་རུལ་སུངས་ཀྱི་ནག་ཉེས་བཀག་སྡོམ་སྐོར་གྱི་གཏམ་བཤད་སྤེལ་ཏེ། ཉིན་གསུམ་གྱི་རྗེས་ཏག་ཏག་ལ་ཞིས་ཅིན་ཕེན་གྱི་ནང་མིའི་མ་དངུལ་གྱི་གསང་བ་ཕྱིར་གྱར་བ་དེ་ནི། རང་བཞིན་གྱིས་སྟབས་འཁེལ་བ་ཞིག་ཡིན་མི་སྲིད་ལ། ཀྲུག་ཡུང་ཁཱང་གིས་རྒྱ་གཞུང་ཁྲིམས་སྲིད་ལྷན་ཁང་དུ་ལོ་མང་རིང་ལས་ཀ་སྒྲུབ་པའི་རིང་། རྒྱ་གཞུང་མཐོ་རིམ་དཔོན་རིགས་ཀྱི་གསང་བ་མང་པོ་ཞིག་སྔོག་བཤེར་བྱས་ཡོད་པར་བརྟེན། དེ་ནི་ཅང་ཙེ་མཱེན་དང་ཀྲུག་ཡུང་ཁཱང་གིས་ཞིས་ཅིན་ཕེན་ལ་གནོན་ཤུགས་སྤྲོད་ཀྱིན་པའི་རྣམ་འགྱུར་ཡིན་ལ། དེ་ཡང་གཙོ་བོ་ཞིས་ཅིན་ཕེན་གྱི་ཕ་རྒན་ནི་བཅོས་བསྒྱུར་གྱི་ལམ་ཕྱོགས་འཛིན་མཁན་ཞིག་དང་། དྲུག་བཞི་སློབ་མའི་དྲག་གནོན་ཐད་ངོ་རྒོལ་གནང་མཁན་གྱི་གྲས་ཡིན་པར་མ་ཟད། ཞིས་ཅིན་ཕེན་གྱི་སྤུན་མཆེད་ནང་མི་ཚང་མ་ཕྱིའི་རྒྱལ་ཁབ་དག་ནང་གནས་སྡོད་བྱས་སྟབས། ཕ་རྒན་ཞིས་ཀྲུང་ཞོན་དང་ནང་མིའི་གནས་སྟངས་ཀྱི་ཤུགས་རྐྱེན་ལ་བརྟེན་ནས། ཞིས་ཅིན་ཕེན་གྱིས་སྲིད་བཟུང་རྗེས་རྒྱ་ནག་ནང་ཆབ་སྲིད་བསྒྱུར་བཅོས་ཡོང་རྒྱུར་རེ་བ་ཤུགས་ཆེན་པོ་གནང་གི་ཡོད་པར་བརྟེན། མང་ཚོགས་ཀྱི་མཐོང་སྣང་དེ་ནག་བསུབ་གཏོང་ཆེད་དང་ཞིས་ཅིན་ཕེན་ལའང་སྒེར་གྱི་རུལ་སུངས་ནག་ཉེས་ཕྱིར་འདོན་སྲིད་པའི་ཉེན་བརྡ་ཞིག་ཡིན་ཚུལ་བརྗོད་འདུག
ཞིས་ཅིན་ཕེན་གྱི་ཕ་རྒན་འདས་པོ་ཞིས་ཀྲུང་ཞོན་གྱིས་དེ་སྔོན་རྒྱ་གཞུང་གི་སྲིད་བློན་གཞོན་པ་དང་ཆབ་སྲིད་ལྷན་ཁང་གི་འཐུས་མི། མི་དམངས་འཐུས་མིའི་ཚོགས་ཆེན་གྱི་ཚོགས་གཙོ་གཞོན་པ་བཅས་ཀྱི་ལས་འགན་ཁུར་མྱོང་ཡོད་ལ། རིག་གསར་སྐབས་ཁོ་ལོ་ ༡༦ ནང་བཙོན་འོག་བསྡད་མྱོང་ཡོད་པ་རེད། ད་ལྟ་ཞིས་ཅིན་ཕེན་ལ་ཕ་གཅིག་མ་གཅིག་གི་མིང་སྲིང་བཞི་ཡོད་པའི་ནང་ནས། སྲིང་མོ་ཆིས་ཆོ་ཆོ་ནི་ཁ་ན་ཊའི་མི་སེར་ཡིན་པ་དང་། སྲིང་མོ་ཆིས་ཨན་ཨན་དང་ནུ་བོ་ཞིས་ཡོན་ཕེན་གཉིས་ནི་ཨོ་ཏ་ལི་ཡའི་རྒྱུན་སྡོད་ཡུལ་མི་ཡིན། ཞིས་ཅིན་ཕེན་གྱི་བུ་མོ་ཞིས་མཱེན་ཡིས་ད་ལྟ་ཨ་རིའི་ཧ་ཝར་ཌི་མཐོ་སློབ་ནང་སློབ་སྦྱོང་བྱེད་བཞིན་ཡོད་པ་རེད།
གསར་འགོད་པ། ཚེ་རིང་རྒྱལ།
བོད་པ་ཚོས་ཞིས་ཅིན་ཕེན་ལ་ཡང་རེ་ཆེན་པོ་ཞིག་བྱེད་གི་ཡོད་པ་འདྲ། ཀྲུག་རྩ་མེད་འགྲོ་ན་བསམ་གི་འདུག ཡང་བོད་རེ་བའི་ཕོང་གི་རེད། དེ་ལས་ཀྲུང་ཡུང་ཁང་རྩ་མེད་བཟོ་མི་ཉན། ཞིས་ཕྱོགས་ཁག་དང་ཀྲུག་ཕྱོགས་ཁག་གི་ཁྱོད་ཤི་ང་གསོན་གྱི་འཐབ་རྩོད་བྱས་ནས་རྒྱ་གཞུང་འཐོར་བཤིག་ལ་འགྲོ་དགོས། ད་དུང་མུ་འཐུད་ནས་སྐུ་ཞབས་ཀྲུག་ལགས་ཀྱིས་རང་གི་དབང་ཆ་བརྟན་གནས་ཆེད་དགྲ་བོའི་རུལ་སུང་གི་ཚང་རློག་གི་རེད། གཅིག་བྱས་ན་ཧོ་ཅིན་ཐོས་བོད་ཀྱི་པཎ་ཆེན་བླ་མ་དུག་བྱིན་ནས་ལྐོག་དཀྲོངས་བྱས་པ་བཤད་སྲིད་གི་རེད།