དོན་དངོས་ཀྱི་རྒྱ་ནག

ཁྲིམས་ལུགས་སློབ་མ། བློ་བཟང་གྲགས་པ།

མི་མང་པོ་ཞིག་གིས་རྒྱ་ནག་ནི་འཛམ་གླིང་འདིའི་སྒང་སྟོབས་ཤུགས་ཆེ་ཤོས་ཤིག་ཏུ་བརྩི་བཞིན་ཡོད་ལ། ཁོང་ཚོས་རྒྱ་ནག་གི་སྲིད་འབྱོར་རིག་གསུམ་ཡར་རྒྱས་གྱི་ཕྱི་ཚུལ་ཙམ་ལ་ཧང་སང་སྟེ། རྒྱ་ནག་ལ་ཕྲག་དོག་ཟ་བ་དང་འགྲན་རྩོད་བྱེད་པ། ད་དུང་རྒྱ་ནག་ལ་སྤྲེལ་ལད་འཁྲབ་སྟེ་ཁེ་བཟང་རག་ཐབས་བྱེད་པ་སོགས་ནི་དེང་གི་སྤྱི་ཚོགས་ཀྱི་ཁ་ཕྱོགས་ཤིག་ཏུ་གྱུར་ཡོད། འཛམ་གླིང་འདིའི་སྒང་ཆེ་མཐོང་ལྡན་པའི་དཔལ་འབྱོར་རིག་པ་བ་དང་། ཆབ་སྲིད་དང་དམག་དོན་ཆེད་མཁས་པ་མང་པོ་ཞིག་གིས་ཀྱང་། རྒྱ་ནག་ནི་དུས་རབས་ཉེར་གཅིག་ནང་གི་ཡར་རྒྱས་ཆེ་ཤོས་དང་། དེས་རྐྱེན་གྱིས་ཨ་རི་དང་ཡུ་རོབ་སོགས་ཀྱི་སྟོབས་ཆེན་རྒྱལ་ཁབ་ཁག་ལའང་འཇིགས་སྣང་ཆེན་པོ་འབྱུང་སྲིད་པར་ཡིད་ཆེས་བྱེད་ཀྱི་ཡོད། དེ་ནི་ཁོང་ཚོས་རྒྱ་ནག་གི་ཕྱི་ཚུལ་གྱི་ཡར་རྒྱས་ཙམ་ལ་བལྟས་ཏེ་བཤད་པ་ཁོ་ན་ཡིན།

རྒྱལ་ཁབ་ཅིག་ལ་རྒྱུན་སྲིང་ཐུབ་པའི་སྟོབས་འབྱོར་དང་དམངས་སེམས་འཕྲོག་པའི་མཉམ་མཐུན་དང་ཆིག་སྒྲིལ་ཡོང་བར། གཙོ་བོ་རྒྱལ་ཁབ་དེའི་མི་མང་གིས་རང་རྒྱལ་ལ་བཅངས་བའི་དྭངས་གཙང་གི་ཡིད་ཆེས་དང་། བློ་གཏད་བཅོལ་འོས་པའི་རྒྱལ་ཁབ་ཀྱི་དྲང་བདེན་ཆབ་སྲིད་དང་ཁྲིམས་ལུགས་དབང་འཛིན་དེ་ཡིན་པས། ངས་ཁོང་ཚོས་ཐུགས་ཐག་ཆོད་པོས་རྒྱ་ནག་ལ་འདི་ལྟར་གདེང་འཇོག་དང་རེ་བ་བཅངས་པར་དོན་དངོས་ཀྱི་རྒྱ་ནག་ཇི་ལྟར་ཡིན་མིན་གྱི་ཐད་བསམ་བློ་འདང་ངེས་ཤིག་བཏང་ཡོད་དམ་སྙམ།

རྒྱལ་ཁབ་སུ་ཡིན་རུང་རང་ཉིད་ཀྱིས་རང་ཉིད་འཛམ་གླིང་འདིའི་ཐོག་ཆེ་མཐོང་དང་གོ་གནས། རྒྱལ་ཁབ་གཞན་གྱིས་རང་ཉིད་ལ་གང་བྱུང་ཐུབ་ཚོད་གཏོང་མི་ཕོད་པ། རང་ཉིད་ཀྱིས་དོན་དངོས་རང་བཞིན་དེ་ཉིད་གང་ཐུབ་ཀྱིས་སྣང་མེད་དང་གཡོལ་གང་ཐུབ་བྱས་ཏེ། ཕྱི་ཚུལ་ནས་རང་ཉིད་ཀྱི་སྲིད་འབྱོར་རིག་གསུམ་གྱི་ཐད་ཡར་རྒྱས་ཀྱི་རྣམ་པ་ཞིག་སྟོན་ཅི་ཐུབ་བྱེད་པ་ནི་ཆབ་སྲིད་ཀྱི་དགོས་མཁོ་ཡིན་པ་ལས། རྒྱུ་མཚན་དེའི་རྐྱེན་པས་རྒྱལ་ཁབ་དེར་རྒྱུན་སྲིང་ཐུབ་པའི་སྟོབས་ཤུགས་ཤིག་དང་། ཟློག་ཐབས་མེད་པའི་ཆིག་སྒྲིལ་གྱི་ནུས་པ་ལྡན་པ། ནམ་ཡང་ཐོར་བཤིག་ཏུ་མི་འགྲོ་བའི་སྟོབས་ཆེན་རྒྱལ་ཁབ་ཅིག་ཡིན་པ་མཚོན་དཀའ།

འཛམ་གླིང་འདིའི་སྒང་རྒྱལ་ཁབ་མང་པོ་ཞིག་གིས་རང་ཉིད་ཀྱིས་སྲིད་འབྱོར་རིག་གསུམ་སྟོབས་ཆེན་ཡིན་པར་ངོམ་བྱེད་དུ། མི་མང་ཚོའི་བདེ་སྡུག་ལ་བསམ་བློ་དེ་ཙམ་མི་གཏོང་བར། མི་མང་ལ་ཁྲལ་དང་གཡོག་སྐུལ་གང་ཐུབ་བྱེད་པ་དང་། མཚམས་རེར་དགོས་མཁོ་དང་བསྟུན་ཏེ་ཀུན་སྤྱོད་དང་ཡོངས་སུ་འགལ་བའི་ཁྲིམས་ལུགས་འདྲ་མིན་གསར་བཟོ་བྱས་ཏེ། མི་མང་ལ་འཇིགས་སྐུལ་གཏོང་བའི་སྲོལ་ཡོད་ལ། རང་ཉིད་ཀྱི་སྐྱུག་བྲོ་བའི་ཕྱི་རྫིག་ནང་སྟོང་གི་ཆབ་སྲིད་སྲ་བརྟན་ཡོང་བར་སྨྱོས་ཆུ་བཏུང་བ་ལྟར་ལས་འགུལ་འདྲ་མིན་བརྩམས་དང་རྩོམ་བཞིན་ཡོད། རྒྱ་ནག་ནི་གོང་གསལ་རྒྱལ་ཁབ་དེ་དག་གི་ཆེས་འོས་འཚམ་ཀྱི་དཔེ་མཚོན་ཞིག་རེད་སྙམ། གང་ལགས་ཞེ་ན། རྒྱ་ནག་ལ་མཐོ་དམན་དང་དབུལ་ཕྱུག་འདྲ་མཉམ་གྱི་ལྟ་གྲུབ་ཞན་ཞིང་། ཁྲིམས་ལུགས་དབང་འཛིན་གྱི་ནུས་པ་ཇེ་ཞན་དུ་འགྲོ་བཞིན་པ་དེ་རེད། འདི་ནི་རྒྱལ་ཁབ་ཅིག་སྔ་ཕྱིའི་བར་འཐོར་བརླག་ཏུ་འགྲོ་ཉེན་ཆེ་བའི་རྐྱེན་རྩ་ཞིག་ཡིན་ལ། རྒྱལ་ཁབ་དེ་ཉིད་གཞན་གྱིས་ཚར་གཅོད་བྱེད་མི་དགོས་པར་རང་ཉིད་རང་ཤི་འགྲོ་བའི་རྒྱུ་རྐྱེན་གཙོ་བོ་ཞིག་ཀྱང་དེ་ཡིན།

རྒྱ་ནག་དང་རྒྱ་གར་གཉིས་ནི་འཛམ་གླིང་འདིའི་སྒང་མི་འབོར་མང་ཤོས་ཀྱི་རྒྱལ་ཁབ་གཉིས་ཡིན་པ་དང་། ཆབ་སྲིད་ལྟ་གྲུབ་ཐད་ནས་བཤད་ན། མི་འབོར་ནི་རྒྱལ་ཁབ་ཅིག་གི་མ་ལག་གཙོ་བོ་དེ་ཡིན་པ་དང་། གནའ་དུས་རྒྱ་ནག་གི་དམག་ཇུས་བསྟན་བཅོས་ནང་། “ མང་སེམས་འགུགས་པ་རྒྱལ་ཁའི་ལག་ཆ་གཙོ་བོ་དེ་ཡིན”ཞེས་བསྟན་ཡོད་པ་བཞིན་མི་མང་གི་སེམས་པ་རྒྱལ་ཁབ་དང་གཅིག་སྦྲེལ་གཅིག་ཏུ་གནས་པ་དང་། མི་མང་གི་རྒྱལ་ཁབ་ལ་ཡིད་སེམས་གཡོ་མེད་དང་ཆོད་སེམས་དམ་དུ་བཅངས་པས་ན། རྒྱལ་ཁབ་དེ་ཉིད་ཡར་རྒྱས་དང་སྟོབས་འབྱོར་འཕེལ་ངེས་པ་ནི་སྨྲོས་མེད་ཡིན། འོན་ཀྱང་དེ་ལས་ལྡོག་སྟེ། གལ་སྲིད་རྒྱལ་ཁབ་ཅིག་གི་མི་མང་ཚོས་རང་ཉིད་ཀྱི་རྒྱལ་ཁབ་ལ་ཡིད་ཆེས་བརླག་པ་དང་ཆོད་སེམས་བརྟན་པོ་མེད་པ་ཡིན་ན། དེ་ནི་རྒྱལ་ཁབ་དེའི་འཇིགས་སྣང་ཆེ་ཤོས་དང་ཉེན་ཁ་ཆེ་ཤོས་ཤིག་ཡིན།

རྒྱ་ནག་ནང་དེང་སང་དངོས་སུ་འབྱུང་བཞིན་པའི་གནད་དོན་ཞིག་ནི། མི་མང་གི་སེམས་ཁུངས་ལ་རྨ་ཁ་གཏོད་པའི་གནས་ཚུལ་དེ་དག་ཡིན། དེ་ཡང་རྒྱ་ནག་གིས་མི་གཞན་ལ་སྟོན་བྱེད་དུ་གྲོང་ཁྱེར་ཆེ་ཁག་དང་ས་ཁུལ་གནད་འགག་ཆེ་ས་དེ་ཚོར་ཡར་རྒྱས་གཏོང་བ་ལ་ས་ཁུལ་གཞན་མང་པོའི་མི་མང་གི་འཚོ་བརྟེན་འཕྲོག་པ་དང་མི་མང་དེ་ཚོའི་སྡོད་གནས་བཤིག་པ་སོགས་ཨོང་ཤ་བཀོག་ནས་གདོང་ལ་ལྷན་པ་རྒྱག་གི་ཡོད། གནད་དོན་དེའི་རྐྱེན་པས་རྒྱ་ནག་མི་མང་ས་ཡ་མང་པོའི་འཚོ་སྡོད་ལ་དཀའ་ངལ་འཕྲད་ཀྱི་ཡོད་ལ། མི་མང་ས་ཡ་མང་པོར་གནས་ཁྱིམ་མེད་མེད་བཟོས་ཡོད།

རྒྱ་ནག་གི་ཁྲིམས་ལུགས་དབང་འཛིན་གྱི་དོན་དངོས་རང་བཞིན་དེ་ཉིད་ཀྱང་ཆབ་སྲིད་ཀྱི་དགོས་མཁོའི་འོག་འགུལ་མེད་གཡོ་མེད་དུ་གྱུར་པ་རེད། སྤྱིར་ཁྲིམས་ལུགས་ནི་འདྲ་མཉམ་མིན་པའི་དོན་རྐྱེན་དེ་དག་འདྲ་མཉམ་དུ་འཁོད་པ་དང་། མི་མང་ལ་སྲུང་སྐྱོབ་བྱེད་པའི་ལག་ཆ་གཙོ་བོ་དེ་ཡིན་ནའང་། རྒྱ་ནག་ལ་མཚོན་ན། ཁྲིམས་ལུགས་ནི་འདྲ་མཉམ་མིན་པའི་དོན་རྐྱེན་དེ་དག་དེ་བས་འདྲ་མཉམ་མིན་པ་བཟོ་བྱེད་དང་། མགོན་མེད་སྐྱབས་མེད་ཀྱི་ཉམ་ཆུང་མི་དམངས་དེ་དག་ལ་ཞུ་གཏུགས་བྱེད་ས་མེད་པ། གལ་སྲིད་ཞུ་གཏུགས་བྱས་ན། ཀུན་སྤྱོད་ཀྱི་དྲི་མ་ཙམ་ཡང་མེད་པའི་དྲག་ཤུགས་ཀྱིས་ཁོང་ཚོའི་གནས་སྟངས་དེ་ལས་སྡུག་པ་ཞིག་ཏུ་ཏུ་རྫོང་གི་ཡོད།

དེས་ན་ཁོང་ཚོར་མཚོན་ན་ཁོག་པའི་ནང་མེ་འབར་ཡང་དུ་བ་འདོན་ས་མེད་པར་གྱུར་ཡོད་མོད། ཡིན་ནའང་། ཁོང་ཚོས་འདི་ལྟར་ཕ་རབས་བུ་རྒྱུད་ནས་སྡོད་འདོད་ཡོད་དམ། སྡོད་ཐུབ་ཀྱི་རེད་དམ། དེ་ནི་ང་ཚོས་སྔོན་དཔག་ཐུབ་པའི་གནད་དོན་ཞིག་རེད། སྤྱིར་མིའི་རིགས་ཀྱི་འཚོ་བརྟེན་ངོ་མ་ནི་རང་བྱུང་ཁམས་དེ་ཡིན་མོད། འོན་ཀྱང་ཚན་རིག་རིག་རྩལ་འཕེལ་རྒྱས་སོང་བ་དང་དུས་མཉམ། དཔལ་འབྱོར་མཁོ་སྒྲུབ་ནི་མི་ཚོའི་འཚོ་བརྟེན་གཙོ་བོ་ཞིག་ཏུ་འཁྲུལ་འཛིན་བྱེད་ཀྱི་ཡོད། རྒྱ་ནག་གི་འཚོ་བརྟེན་འཁྲུལ་འཛིན་འདིའི་ནང་མགོ་བོ་གཏིང་འཁོར་གྱིས། ཁྲོམ་རྭ་རྒྱ་སྐྱེད་དང་ཁྲོམ་ལམ་རྒྱས་སྤྲོས་བྱེད་པར་རང་བྱུང་ཁོར་ཡུག་ལ་བློ་ཡུལ་དུ་མི་ཤོངས་བའི་གཏོར་བཤིག་གཏོང་གི་ཡོད། རང་བྱུང་ཁོར་ཡུག་གི་རྒྱུན་ལྡན་འཕེལ་ཕྱོགས་དང་འགྲོ་སྐྱོད་ལ་གནོད་སྐྱོན་ཚབས་ཆེན་བཏང་སྟེ། རི་མེད་སར་རི་བཟོ་པ་དང་མཚོ་མེད་སར་མཚོ་སྐྲུན་པ་སོགས་བྱེད་རྒྱུ་མང་དྲགས་ཏེ། རྒྱ་ནག་ལ་ལོ་ལྟར་རང་བྱུང་གནོད་འཚེ་མང་པོ་ཡོང་གི་ཡོད་པ་དང་། གནོད་འཚེ་དེའི་རྐྱེན་པས་ཉམ་ཆུང་ཡུལ་མི་མང་པོ་དཀའ་སྡུག་ཉེན་ཁའི་གནས་སུ་སྐྱེལ་ཡོད།

དཔལ་འབྱོར་འཁྲུལ་འཛིན་གྱི་ལམ་ཕྱོགས་དེས་གནས་སྐབས་རིང་རྒྱ་ནག་གི་དཔལ་འབྱོར་ཁྲོམ་རྭ་དེ་ཉིད་རྒྱལ་སྤྱིའི་ཡང་རྩེར་སོན་ཡོད་པ་དང་། རྒྱ་ནག་གི་ཕྱུག་པོ་དང་དབང་ཡོད་མི་སྣ་ཁག་གཅིག་ལ་ཁེ་བོགས་མང་པོ་བྱུང་ཡོད་ནའང་། རྒྱ་ནག་གི་དབུལ་ཕྱུག་བར་གྱི་ཧེ་བག་དེ་ཉིད་ཇེ་ཆེ་ནས་ཇེ་ཆེ་འགྲོ་བ་ལས་ཇེ་ཆུང་ཕྲན་ཙམ་ཡང་འགྲོ་ཡི་མེད། ཕྱུག་པོ་ཚོ་ཇེ་ཕྱུག་དང་དབུལ་པོ་ཚོ་ཇེ་དབུལ་དུ་འགྲོ་བཞིན་ཡོད་པ་རྒྱ་ནག་མི་མང་གིས་ཚོར་བཞིན་ཡོད།  གནས་སྟངས་འདིའི་འོག་དབུལ་པོ་ཚོས་མུ་མཐུད་མི་རྒྱུ་གཉིས་ཐད་ནས་ཕྱུག་པོ་ཚོར་ཞབས་འདེགས་ཞུ་རྒྱུ་ཡིན་ནམ། ཞུ་ཐུབ་བམ། གནད་དོན་འདིའང་ང་ཚོས་སྔོན་དཔག་ཐུབ་པ་ཞིག་ལོས་ཡིན། རྒྱ་ནག་གི་བཤད་རྒྱུན་དུ་“གོང་ལ་སྡོད་མཁན་ཚོ་མ་དྲང་ན། འོག་ལ་སྡོད་མཁན་ཚོ་དྲང་སྲིད་དམ”ཟེར།

རྒྱ་ནག་གི་དབང་འཛིན་མི་སྣ་མང་པོས་རང་ཉིད་ཀྱི་དབང་ཤུགས་ལ་བརྟེན་ཏེ། སྤྱི་རྫས་སྒེར་བདག་བྱེད་པ་དང་དབང་ཆ་འཐབ་རྩོད་བྱེད་པ་སོགས་སྐྱུག་བྲོ་བའི་གནས་ཚུལ་མང་པོ་རྩོམ་བཞིན་ཡོད། ཉེ་ཆར་རྒྱ་ནག་ནང་བྱུང་བའི་པའོ་ཞི་ལེའི་གནད་དོན་ནི་དཔེ་མཚོན་ཙམ་ཡིན་པ་ལས། དེ་ལས་མང་པ་དང་དེ་ལས་རྫབ་ཆེ་བ་མང་པོ་བྱུང་དང་འབྱུང་བཞིན་ཡོད། རྒྱ་ནག་གི་མི་མང་པོ་ཞིག་གིས་རྒྱ་གར་ནང་གི་ལྐོག་ཟ་རུལ་སུངས་ཀྱི་གནས་ཚུལ་རེ་ཟུང་ཐོས་སྐབས་ཧང་སང་མདོག་བྱེད་ཀྱི་ཡོད། འོན་ཀྱང་དོན་དངོས་ཐོག་རྒྱ་ནག་ནང་འདི་ལས་ཚབས་ཆེ་བའི་ལྐོག་ཟ་རུལ་སུངས་ཀྱི་གནས་ཚུལ་ཧ་ཅང་མང་པོ་འབྱུང་བཞིན་ཡོད། འདི་ལྟ་བུའི་གོང་སྡོད་དཔོན་རིགས་ཚོའི་བྱེད་ཕྱོགས་དེ་དག འོག་གི་མི་མང་ཚོས་ག་ཚོད་བར་བཟོད་སྒོམ་བྱེད་སྲིད་དམ།

དེང་སྐབས་བོད་མི་མང་པོ་ཞིག་ཀྱང་རི་བོང་ཅལ་འདྲོག་བྱས་ཏེ། མི་རིགས་གཞན་པ་ཚོས་རྒྱ་ནག་ལ་གདེང་འཇོག་ཇི་ལྟར་བྱེད་པ་དེ་བཞིན་དུ་ཡིད་ཆེས་བྱས་ཏེ། རང་ཉིད་ཀྱི་ཁ་གཏད་དགྲ་བོ་ནི་བརྟན་ཞིང་གཡོ་བ་མེད་པའི་རྒྱལ་ཁབ་སྟོབས་ལྡན་ཞིག་ཏུ་མཐོང་སྟེ་སོ་སོ་སེམས་ཤུགས་ཆག་པ་དང་། སྤོབས་པ་ཞུམ་པ་སོགས་ཡོང་གི་ཡོད་པ་ནི། གཞན་གྱི་རྔམ་རྫིག་གིས་རང་ཉིད་ཀྱི་གཟི་འོད་བཀག་པ་དང་གཉིས་སུ་མེད་ན། དེ་ནི་ང་ཚོས་ནམ་ཡང་བྱེད་མི་འོས་པ་ཞིག་རེད། ང་ཚོས་ནམ་ཡང་༧གོང་ས་མཆོག་གི་ཡང་དག་པའི་ལམ་ཕྱོགས་སུ་ཤར་སྐྱོད་བྱེད་པ་དང་། ང་ཚོའི་བཀུར་འོས་བཀའ་བློན་ཁྲི་པ་བློ་བཟང་སེང་གེ་མཆོག་གི་དབུ་ཁྲིད་འོག་མདུན་སྐྱོད་བྱས་ན། ང་ཚོ་ལ་རྒྱལ་ཁ་ཞིག་ཏན་ཏན་འཐོབ་ངེས་རེད། གངས་ཡིན་ཞེ་ན། དོན་དངོས་ཀྱི་རྒྱ་ནག་ནི་ང་ཚོའི་ཕྱི་ཚུལ་ནས་མཐོང་བ་ལྟ་བུ་ཞིག་གཏན་ནས་མིན་ནོ།།