མདོ་སྨད་ཀན་ལྷོ་བསང་ཆུ་རྫོང་འབོ་ར་ཨ་མཆོག་ཞང་གི་ཨ་མཆོག་ལུང་ནག་སྡེ་བ་དང་འབོ་ར་འཚོ་བའི་ཨ་ལི་ནང་སྡེ་བ་གཉིས་ཀྱི་བར། ལོ་མང་རིང་ནས་བཟུང་ས་རྩོད་ཀྱི་དཀའ་རྙོག་རིམ་པ་བྱུང་སྟེ་མི་ཤི་རྟ་འགྱེད་ཀྱི་དོན་རྐྱེན་བྱུང་ཡོད་པ་དང་། དཀའ་ངལ་དེ་སེལ་ཆེད་ས་གནས་བོད་མི་ཚོས། ༡༩༨༠ ལོ་ནས་བཟུང་བསང་ཆུ་རྫོང་སྲིད་གཞུང་ལ་སྡེ་བ་གཉིས་ཀྱི་ས་རྩོད་ཀྱི་དཀའ་རྙོག་འདུམ་འགྲིག་རོགས་རམ་གནང་རྒྱུའི་རེ་སྐུལ་ཞུས་ཡོད་ཀྱང་། རྫོང་སྲིད་གཞུང་གིས་ད་ལྟའི་བར་ཡ་ལན་མ་བྱས་པར་ལྷག་སྟབས། ཟླ་འདིའི་ཚེས་མགོར་འབོ་ར་ཨ་ལི་ནང་སྡེ་བའི་མི་གྲངས་ ༣༠ ལྷག་བསང་ཆུ་རྫོང་མི་དམངས་སྲིད་གཞུང་གི་སྒོ་འགྲམ་དུ་སོང་སྟེ། སྲིད་གཞུང་གིས་མི་མང་གི་བདེ་སྡུག་ལ་གཟིགས་སྐྱོང་ཡང་དག་གནང་རོགས་ཞེས་འཕྲེད་དར་འཕྱར་བ་དང་། ཉིན་གཉིས་རིང་སྲིད་གཞུང་གི་སྒོ་འགྲམ་དུ་བསྡད་དེ་རེ་སྐུལ་ཞུས་ཡོད་འདུག་མོད། ཕྱི་ཚེས་ ༥ ཉིན་རྫོང་སྲིད་གཞུང་གིས་བོད་མི་ཚོ་ཕྱིར་རང་ཁྱིམ་དུ་ལོག་དགོས་པའི་བཙན་བཀའ་བཏང་ཡོད་པ་མ་ཟད། ཐེངས་འདིའི་ལས་འགུལ་གྱི་སྣེ་འཁྲིད་པ་ཡིན་པའི་དོགས་གཞིའི་འོག འབོ་རའི་གཡང་སྐྱབས་རྡོ་རྗེ་དང་རུ་དཔོན་བན་ཏེ་མཁར། དཀོན་མཆོག་སྐྱབས། སྐལ་བཟང་རྡོ་རྗེ་བཅས་མི་བཞི་རྫོང་སྲིད་གཞུང་གི་མདུན་དུ་འཛིན་བཟུང་བྱས་ཡོད་པ་དང་། ཕྱི་ཚེ་ ༦ ཉིན་བོད་མི་གཞན་རྣམས་ཀྱང་བཙན་གྱིས་རང་ཁྱིམ་དུ་ལོག་བཅུག་ཡོད་འདུག
ད་ལྟའི་ཆར་འཛིན་བཟུང་བྱས་པའི་བོད་མི་ཚོ་གསང་བའི་བཀག་ཉར་བྱས་ཏེ། ཐུག་འཕྲད་དང་ཟས་གོས་སྤྲོད་པའི་ཐད་ལ་བཀག་སྡོམ་བྱེད་ཀྱི་ཡོད་འདུག
གསར་འགོད་པ། དོན་གོ
