ཉེ་ཆར་རྒྱ་ནང་གནས་སྡོད་ཕྱི་རྒྱལ་གསར་འགོད་མཐུན་ཚོགས་ཀྱིས། རྒྱ་གཞུང་གིས་ཕྱི་རྒྱལ་གསར་འགོད་པར་གཅར་རྡུང་བཀག་ཉར་བྱེད་བཞིན་པ་བསྒྲགས་འདུག
ཉེ་ཆར་རྒྱ་ནག་ནང་གནས་སྡོད་ཕྱི་རྒྱལ་གྱི་གསར་འགོད་པའི་མཐུན་ཚོགས་ཀྱིས་བསྒྲགས་གཏམ་ཞིག་སྤེལ་ཏེ། འདི་ལོའི་ཕྱི་ཟླ་ ༧ ཟླ་མཇུག་ཙམ་ནས་ཕྱི་ཟླ་ ༨ ཟླ་དཀྱིལ་བར། རྒྱ་ནག་གི་ས་ཁུལ་ཁག་འགའ་ཤས་ནང་ཕྱི་རྒྱལ་གསར་འགོད་པར་གཅར་རྡུང་གཏོར་རྒོལ་དང་། གསར་འགོད་པའི་ཡོ་བྱད་བཙན་འཕྲོག གསར་འགོད་པ་རྣམས་བཀག་ཉར་གྱི་གནས་ཚུལ་རིམ་པར་བྱུང་ཡོད་པ་མ་ཟད། དོན་རྐྱེན་དེ་དག་ཁྲོད་རྒྱ་ནག་རྒྱལ་སྲུང་སྡེ་ཁག་གི་དམག་མི་ཡང་མཉམ་ཞུགས་བྱས་ཡོད་པ་བརྗོད་འདུག
དེ་བཞིན། རྒྱ་ནག་ནང་ཁུལ་གྱི་གསར་ཁང་ཁག་ལའང་སྔར་ལྷག་བཀག་སྡོམ་བྱེད་མགོ་བརྩམས་ཏེ། ཕྱི་ཟླ་ ༧ ཚེས་ ༡༦ ཉིན་ས་གནས་རྒྱ་གཞུང་གི་བཀའ་མངགས་ལྟར། རྒྱ་ནག་ཀུང་ཀྲིག་མྱུར་འཕྲིན་གསར་ཤོག་གི་སྤྱི་ཁྱབ་རྩོམ་སྒྲིག་པ་ལུའུ་ཧྥུ་མེན་ལས་གནས་ནས་ཕུད་པ་དང་། ཚེས་ ༡༧ ཉིན་ཧྲང་ཧེ་གྲོང་ཁྱེར་དམར་ཤོག་དྲུང་ཆེ་ཡུས་ཀྲིན་ཧྲིན་གྱིས་བཀའ་རྒྱ་བཏང་སྟེ། ཤར་ཕྱོགས་ཞོགས་རེའི་གསར་ཤོག་གི་འགན་འཛིན་ལུའུ་ཡཱན་ལས་གནས་ནས་ཕྱིར་ཕུད་དང་། སྤྱི་ཁྱབ་རྩོམ་སྒྲིག་པ་གཞོན་པ་སུང་ཅན་ལས་མཚམས་འཇོག་བཅུག་ཡོད་འདུག
རྒྱ་ནག་པེ་ཅིན་དང་ཧྲང་ཧེ། ཧོང་ཀོང་བཅས་སུ་གནས་སྡོད་ཕྱི་རྒྱལ་གསར་འགོད་པའི་མཐུན་ཚོགས་ཁག་གིས་ཀྱང་། ཉེ་ཆར་རྒྱ་ནག་ནང་བྱུང་བའི་གནས་ཚུལ་དེ་དག་གི་སྟེང་ནས། རྒྱ་ནག་ནང་གསར་འགོད་ལས་རིགས་གཉེར་མཁན་དག་གི་ཚེ་སྲོག་ལ་ཉེན་ཁ་འཕྲད་ཀྱིན་པ་མངོན་ཡོད་པ་མ་ཟད། འདས་པའི་དུས་ཡུན་རིང་པོའི་ནང་ཕྱི་རྒྱལ་གསར་འགོད་པ་དག་གིས་རྒྱ་ནག་ནང་གནས་ཚུལ་བསྡུ་ལེན་སྐབས། རྒྱ་གཞུང་དཔོན་རིགས་ཚོས་ཐེ་ཇུས་སྟངས་འཛིན་བྱས་ཏེ། གནས་ཚུལ་མཁོ་སྤྲོད་ཐད་དམ་དྲག་བཀག་སྡོམ་ཤུགས་ཆེན་བྱས་ཡོད་པ་བསྒྲགས་འདུག
