ང་ཚོས་འདི་ལྟར་ལྟད་མོར་བལྟས་བསྡད་ན་སེམས་ཀྱིས་བཟོད་ཐབས་མི་འདུག

དམིགས་བསལ་ཚོགས་ཆེན་ཐེངས་གཉིས་པའི་གྲོས་གཞི་དང་འབྲེལ་བའི་གནད་དོན་ཁག་ཅིག་གི་ཐོག མཱ་སུ་རི་གཏན་སློབ་ཀྱི་བོད་དགེ་བུད་མེད་རྩོམ་པ་པོ་བསམ་གླིང་ཚེ་རིང་ལྷ་མོ་ལགས་སུ་ཡིག་ཐོག་གི་དྲི་བ་ཕུལ་བར་ལན་འདེབས་གནང་།  

དྲི་བ། བོད་ནང་གི་ཛ་དྲག་གནས་སྟངས་ཐད་བོད་གཞུང་མང་གཉིས་ཀྱིས་གདོང་ལེན་ཇི་ལྟར་བྱ་དགོས།

ལན། གཙོ་ཆེ་ཤོས་བོད་ནང་གི་བོད་མི་ཚོས་བཙན་བྱོལ་བོད་གཞུང་ངམ་ཡང་ན་བཙན་བྱོལ་སྤྱི་ཚོགས་ལ་རྒྱབ་རྟེན་དང་ཡིད་ཆེས། རེ་བ་ཆེན་པོ་ཞིག་བཅོལ་ཡོད་པ་བཤད་མ་དགོས་པ་རེད།  འོན་ཀྱང་དེ་༧ནོར་གོང་ས་མཆོག་དང་བོད་གཞུང་གིས་ཁོང་ཚོར་སྐུལ་སློང་བྱས་པ་ཞིག་རྩ་ནས་མ་རེད། ཁོང་རྣམས་པའི་བློས་གཏོང་གི་ཚད་གཞི་དེ་ཧ་ཅང་གི་མཐོན་པོ་རེད་ལ།  འཚེ་བ་མེད་པའི་ལས་འགུལ་དང་རང་ཉིད་བློས་གཏོང་ཆེན་པོ་དེ་འདྲ་ད་བར་འཛམ་གླིང་གི་ཡུལ་གྲུ་གཞན་གང་དུའང་བྱུང་མེད། བོད་མིའི་རང་ལུས་མེར་བསྲེགས་ལས་འགུལ་དེ་འཛམ་གླིང་ཐོག་གི་མེར་བསྲེགས་ངོ་རྒོལ་དག་ལས་གྲངས་འབོར་མང་ཤོས་དེ་ཆགས་ཡོད། གནས་ཚུལ་དེའི་ཐོག་འཛམ་གླིང་གང་སར་ཡོད་པའི་བཙན་བྱོལ་བོད་མི་ཡོད་དོ་ཅོག་གིས་རང་གི་ཁེ་ཕན་བློས་གཏོང་གིས་ལས་འགུལ་གནད་དུ་སྨིན་པ་མུ་ནས་མུ་མཐུད་དེ་སྤེལ་དགོས་པ་རེད་སྙམ།

བཙན་བྱོལ་རང་དབང་ལུང་པར་སྡོད་མཁན་ཚོས་ལས་འགུལ་སྤེལ་བར་དོན་སྙིང་མཐོང་གི་མེད་པ་དང་། གཞན་གྱིས་ལས་འགུལ་སྤེལ་བར་རྒྱབ་སྐྱོར་ཡང་མི་བྱེད་པར། འབྱུང་འགྱུར་རྒྱ་ནག་གི་འགྱུར་ལྡོག་ཅིག་ལ་སྒུག་བསྡད་རྒྱུ་ཡིན་ན། བོད་ནང་གི་རླབས་ཆེན་གྱི་བྱ་འགུལ་དེ་མཚམས་འཇོགས་རོགས་ཞེས་ཞུ་བ་འཐེན་དགོས་པ་རེད། ད་དུང་རང་མི་རིགས་ཀྱི་ངོ་བོ་མ་བརླགས་པའི་ཐོག་ནས་འབྱུང་འགྱུར་གོ་སྐབས་བཟང་པོ་ཞིག་མ་ཤར་བར་ངང་སྒུག་དགོས་པའི་ཞུ་བ་འཐེན་དགོས་པ་རེད། གཞུང་དང་གནད་ཡོད་མི་སྣ་ཚོས་ཞལ་གསལ་བོས་ཐོག་ནས་འབོད་སྐུལ་ནན་གྱིས་ཞུ་དགོས་པ་རེད། ང་ཚོས་འདི་ལྟར་ལྟད་མོར་བལྟས་བསྡད་ན་སེམས་ཀྱིས་བཟོད་ཐབས་མི་འདུག

དྲི་བ། བོད་ནང་གི་ཛ་དྲག་གི་གནས་སྟངས་དང་རྒྱ་ནག་གི་རྣམ་འགྱུར་བཅས་ལ་ཞུགས་ཏེ་བོད་མི་ཚོས་སྲིད་བྱུས་འཛིན་ཕྱོགས་དང་ལས་འགུལ་སྤེལ་ཕྱོགས་ལ་བསྐྱར་ཞིབ་གང་འདྲ་གནང་དགོས་པར་མཐོང་ཡོད་དམ།

ལན། བསྐྱར་ཞིབ་དང་ཞིབ་འཇུག་ཅེས་པ་དེ་ཧ་ཅང་གི་གལ་ཆེན་པོ་རེད།  དུས་ནས་དུས་སུ་བསྐྱར་ཞིབ་དང་ཞིབ་འཇུག་བྱ་དགོས་པ་རེད། ཡིན་ནའང་གཞུང་གི་སྲིད་བྱུས་ལངས་ཕྱོགས་ཤིག་ལ་ཤིག་ལ་འགྱུར་ལྡོག་གཏོང་དགོས་དང་མི་དགོས་དེ་ལས་སླ་པོ་ཞིག་མ་རེད། ལས་དོན་བྱེད་ཕྱོགས་དང་ལས་འགུལ་སྤེལ་སྟངས། དེ་བཞིན་འབྲེལ་ལམ་འཛུགས་ཕྱོགས་སོགས་བྱེ་བྲག་པའི་ཐོག་འགྱུར་བ་གཏོང་དགོས་སར་གཏོང་དགོས་པ་རེད་ལ། གཏོང་མི་དགོས་སར་ངེས་པར་གཏོང་དགོས་དོན་ཡང་ཡོད་པ་མ་རེད། ཡང་རྩ་བའི་སྒྲོམ་གཞིའི་ཐོག་ལ་འགྱུར་ལྡོག་གཏོང་མི་དགོས་ཀྱང་། ཡན་ལག་གི་གནས་ཚུལ་འགའ་རེ་ཐོག་འགྱུར་ལྡོག་གཏོང་དགོས་པ་དང་ཚོན་རྩི་མི་འདྲ་བ་བྱུགས་དགོས་པ་དེ་འདྲ་ཡང་ཡོང་སྲིད་པ་རེད།

དྲི་བ། བོད་ནང་དུ་རང་ལུས་མེར་བསྲེགས་གཏོང་མཁན་ཕལ་ཆེ་བས་༧གོང་ས་མཆོག་བོད་དུ་ཕེབས་དགོས་པ་དང་བོད་ལ་རང་དབང་དགོས་པའི་འབོད་སྒྲ་བསྒྲགས་ཡོད་པའི་ཐད་དགོངས་ཚུལ་གང་འདྲ་ཡོད།

ལན།  བོད་ནང་གི་བོད་མི་ཚོས་རང་གི་རྩ་བའི་བླ་མ། འདི་ཕྱི་གཉིས་ཀྱི་སྐྱབས་གནས་༧གོང་ས་མཆོག་བོད་ལ་ཕེབས་རྒྱུར་ཉིན་སྒུག་མཚན་སྒུག་བྱས་ཡོད་པ་རེད་ལ། མགོན་པོ་གང་གི་ཐུགས་བཞེད་གང་ཡོད་དེ་འགྲུབ་ན་དེ་གས་བློ་ཡིད་ཚིམ་གྱི་ཡོད་པ་རེད། ང་ཚོ་བཙན་བྱོལ་བོད་གཞུང་གི་སྲིད་བྱུས་འཛིན་སྟངས་ཀྱང་དེ་ག་རང་རེད། དེ་ལས་ལྷག་ཅིག་ལ་བསམ་བློ་གཏོང་གི་ཡོད་པ་མ་རེད། འོན་ཀྱང་ཕར་ཕྱོགས་རྒྱ་དམར་གཞུང་ནས་ང་ཚོས་རང་བཙན་བློས་གཏོང་དང་བསྟུན་མཁས་ཅི་ཙམ་བྱས་ཀྱང་ཡ་ལན་སྤྲོད་ཀྱི་མེད་པ་མ་ཟད། ལོ་ནས་ལོ་བསྟུད་དེོ་ཁྱད་གསོད་བྱེད་ཀྱི་ཡོད། བོད་ཀྱི་གནད་དོན་སེལ་དགོས་པ་ཞིག་ལ་བསམ་བློ་འཁོར་གྱི་མེད་ལ། ཕྱོགས་གཞན་ནས་ཁོང་ཚོར་བོད་རྒྱའི་བཀའ་རྙོག་སེལ་བའི་སྤོབས་པ་དང་བློ་ཁོག་ཀྱང་འདང་གི་ཡོད་པ་མ་རེད།

དེར་བརྟེན། ཁོ་པ་ཚོས་ཉི་མ་གང་འཁྱོལ་བྱས་ཏེ་རང་ཉིད་ཀྱི་རྐུབ་སྟེགས་འཛིན་ཡུན་རིང་ཆབ་སྲིད་ལ་གཡོ་འཁྱོམ་ཆེན་པོ་གཏོང་འདོད་བྱེད་ཀྱི་ཡོད་པ་མ་རེད། དུས་རྒྱུན་དཔལ་འབྱོར་ལྷུག་གཏོང་ཟེར་བའི་སྲིད་ཇུས་དེ་གཅིག་པུ་ཁ་ལ་འཁྱེར་སྡོད་པ་ཙམ་ལས་གནད་དོན་གཞན་པའི་ཐོག་གོམ་པ་གཅིག་ཀྱང་སྤོ་ཕོད་ཀྱི་ཡོད་པ་མ་རེད། ཐེངས་འདིའི་ང་ཚོའི་དམིགས་བསལ་ཚོགས་ཆེན་སྟེང་རྒྱ་ནག་གཞུང་གི་རྣམ་འགྱུར་དང་། བོད་ལ་འཛིན་པའི་སྲིད་ཇུས་སོགས་ཀྱི་ཐོག་ངོས་འཛིན་མ་ནོར་བ་ཞིག་དང་། གནས་ཚུལ་འགའ་རེ་ཁ་གསལ་བོ་བཟོ་དགོས་ཀྱི་འདུག

ང་ཚོས་ལས་དོན་འདི་བྱས་ན་བོད་ལ་རང་དབང་ཡོད་པ་ཞིག་དང་།  ༸གོང་ས་མཆོག་བོད་དུ་གདན་འདྲེན་ཞུ་ཐུབ་ཀྱི་རེད་ཅེས་པའི་བྱ་བ་ཞིག་ང་ཚོ་ཁོ་ནས་བསྒྲུབ་ཐུབ་པ་ཞིག་མ་རེད། ལག་པ་ཡ་གཅིག་གིས་ཟློག་པ་མི་ཡོང་བའི་དཔེ་ལྟར་རེད། དེ་ཟུག་བཅག་གི་སྨན་ཟས་པ་ལྟ་བུའི་ལས་སླ་པོ་ཞིག་མ་རེད། ལངས་ཕྱོགས་ཐད་ནས་བཤད་ན་གཞུང་དམངས་གཉིས་ཐོག་ནས་ཐབས་ལམ་འདྲ་མིན་འཚོལ་དགོས་པ་རེད་སྙམ། བཀའ་ཁྲི་མཆོག་གིས་གསུངས་པ་ལྟར།  གཞུང་ཕྱོགས་ནས་བྱེད་མ་ཐུབ་པའི་ལས་འགུལ་མང་པོ་ཞིག་ཚོགས་པ་ཁག་ནས་སྤེལ་ཐུབ་ཀྱི་ཡོད་པ་རེད།  དེས་ན་ང་ཚོས་ཚོགས་པ་ཁག་གི་ལས་འགུལ་སྤེལ་བར་རྒྱབ་སྐྱོར་ངེས་པར་དུ་བྱ་དགོས་ཀྱི་འདུག ༸གོང་ས་མཆོག་ནས་མདང་སྐྱེས་ཀྱི་བྱིས་པ་ཡིན་ནའང་བོད་ཀྱི་རྩ་དོན་ལ་འགན་ཁྲི་ཡོད་གསུངས་པའི་དོན་དམ་གྱི་བཀའ་སློབ་དག་ཇི་མ་ཇི་བཞིན་སློབ་སྦྱོང་གནང་དགོས་པ་ལས་འུར་འདྲོག་གི་རྣམ་པའི་ཐོག་ནས་བོད་ཀྱི་རྩ་དོན་དང་འབྲེལ་མེད་དོན་གཞན་ཞིག་བཤད་བསྡད་ན་ནོར་འཁྲུལ་ཆེན་པོ་རེད། མདོར་ན། སྲོག་ལ་ཉེན་ཁ་ཕར་ཞོག ཐ་ན་ལྟོགས་སྐོམ་ཙམ་ཡང་མྱོང་མི་དགོས་པའི་རང་དབང་ལུང་པ་ནས་མིང་ཙམ་གྱི་ལས་འགུལ་རེ་སྤེལ་ཁུལ་བྱས་ན་བསྡད། ལས་འགུལ་གང་ཞིག་སྤེལ་ཡང་སྲོག་ལ་ཉེན་ཁ་རྐྱང་རྐྱང་ལས་མ་འདས་པའི་སྤུན་ཟླ་ཁག་གཅིག་གིས་དམར་པོའི་མེ་ཡི་ནང་དུ་གསོན་བསྲེགས་བྱེད་པ་དེ་སྟངས་སྙོམས་རྩ་བ་ནས་མ་རེད།

གསར་འགོད་པ། བནྟེ་སྐྱབས།

༼ བོད་ཀྱི་དུས་བབ་ཚགས་པར་ལས་འདིར་བཀོད། ༽