བོད་ནང་གི་གནས་སྟངས་ལ་གཞུང་མང་གཉིས་ཀྱིས་ཅི་ཞིག་གནང་དགོས།

ཕྱི་ཚེས་ ༢༥ ནས་ ༢༧ ཉིན་བར་ངྷ་རམ་ས་ལར་བོད་ནང་གི་ཛ་དྲག་གི་གནས་སྟངས་ཐོག་བོད་གཞུང་དམངས་གཉིས་ཀྱིས་གདོང་ལེན་གནང་ཕྱོགས་ཐོག་དམིགས་བསལ་ཚོགས་ཆེན་ཐེངས་གཉིས་པ་འཚོགས་འཆར་ལ། གྲོས་གཞིའི་ནང་དོན་དང་འབྲེལ་གནད་བའི་ཐོག་ཆོལ་ཁ་གསུམ་གྱི་སྐུ་ཚབ་སྤྱི་འཐུས་རེ་ལ་བཅར་འདྲི་ཞུས་ཡོད།

དབུས་གཙང་སྤྱི་འཐུས་ཀརྨ་ཡེ་ཤེས་ལགས།

དྲི་བ། བོད་ནང་གི་ཛ་དྲག་གནས་སྟངས་ཐད་བོད་གཞུང་མང་གཉིས་ཀྱིས་གདོང་ལེན་ཇི་ལྟར་བྱེད་དགོས།

ལན། བོད་མིའི་སྒྲིག་འཛུགས་དང་མི་མང་གཉིས་ནས་བོད་ནང་གི་བོད་མིའི་སྐུ་ཚབ་མཚོན་པའི་ཐོག་ནས་བོད་ནང་གི་གནས་སྟངས་སྤྱི་དང་། ལྷག་པར་ང་ཚོས་ཤེས་རྟོགས་ཡོད་པ་ཁོ་ནར་ཕྱི་ལོ་ ༢༠༠༩ ཟླ་ ༢ ཚེས་ ༢༧ ནས་ད་བར་རྒྱལ་གཅེས་དཔའ་བོ་དཔའ་མོ་ ༥༡ ནས་རང་ལུས་མཆོད་མེར་ཕུལ་ཏེ། བོད་བསྟན་སྲིད་མི་རིགས་ཆེད་རང་གི་གཅེས་སྲོག་ཚུན་བློས་གཏོང་གནང་བའི་མཛད་རྗེས་དང་། ཁོང་རྣམས་ཀྱི་ཞལ་ཆེམས་དང་དགོས་འདུན་ཁག་རྒྱལ་སྤྱིའི་སྡིངས་ཆར་དྲིལ་བསྒྲགས་གང་ཐུབ་བྱ་དགོས་པ་མ་ཟད། བོད་དོན་བདེན་མཐའ་གསལ་ཐབས་སུ་ལས་འགུལ་སྔར་ལས་ཤུགས་ཆེ་ཙམ་སྤེལ་དགོས་པ་དང་། མཉམ་འབྲེལ་རྒྱལ་ཚོགས་ཀྱིས་མཚོན་འཛམ་གླིང་རྒྱལ་ཁབ་ཁག་དང་དབུ་ཁྲིད་རྣམ་པར་དུས་ནས་དུས་བོད་དོན་ཞུ་སྐུལ་གནང་བ་བརྒྱུད་རྒྱ་ནག་ལ་གནོན་ཤུགས་སྤྲོད་རྒྱུ་གལ་ཆེན་རེད། བོད་མིའི་སྒྲིག་འཛུགས་ངོས་ནས་ལྷོ་ཨ་མི་རི་ཁ་དང་། ཨ་ཧྥི་རི་ཀ ཨེ་ཤ་ཡ་གླིང་ཕྲན་སོ་སོའི་ནང་བོད་དོན་དྲིལ་བསྒྲགས་ཤུགས་ཆེན་བྱ་དགོས། ལྷག་པར་བཙན་བྱོལ་བོད་མི་ཚོས་རྡོག་རྩ་ཆིག་སྒྲིལ་ངང་རང་དོན་སྤངས་ཏེ་སྤྱི་དོན་ཐོག་ཤུགས་གནོན་རྒྱག་དགོས་པའི་ཁར་རང་གི་སྐད་ཡིག་རིག་གཞུང་མི་ཉམས་གོང་འཕེལ་ཐོག་འབད་རྒྱུ་གལ་ཆེན་རེད།

དྲི་བ། དེ་སྔའི་རྒྱལ་ཡོངས་ཚོགས་ཆེན་དང་དམིགས་བསལ་ཚོགས་ཆེན་རིམ་པའི་གྲོས་ཆོད་ཁག་ལ་གྲུབ་འབྲས་ཐོན་ཡོད་མེད་དང་། ཐེངས་འདིའི་གྲོས་ཆོད་ཁག་ལག་བསྟར་བྱེད་ཕྱོགས་ཐད་དགོངས་ཚུལ་ག་རེ་ཡོད།

ལན། བོད་གཞུང་མང་རྒྱལ་ཡོངས་ཚོགས་ཆེན་ནི་བོད་ཀྱི་ཆབ་སྲིད་གཙོ་བོར་གྱུར་བའི་བཙན་བྱོལ་བོད་མིའི་བདེ་དོན་བཀའ་བསྡུར་གནང་སའི་སྡིངས་ཆ་ཞིག་ཡིན་ལ། གཞི་རིམ་མི་མང་གི་དཀའ་ངལ་དང་དགོངས་ཚུལ་བསྡུ་རུབ་ཀྱི་ཐབས་ལམ་ཞིག་ཀྱང་ཆགས་ཡོད། ད་བར་ཚོགས་པའི་དམིགས་བསལ་ཚོགས་ཆེན་དང་བོད་གཞུང་མང་རྒྱལ་ཡོངས་ཚོགས་ཆེན་སོ་སོའི་རྒྱབ་གཉེར་སྙན་ཐོ་ཁག་ཆ་ཚང་ལག་བསྟར་བྱེད་ཐུབ་མེད་རུང་། རྒྱབ་གཉེར་སྙན་ཐོའི་ནང་དོན་མང་པོ་འཛིན་སྐྱོང་དང་ཁྲིམས་བཟོ་ལྷན་ཚོགས་སོ་སོས་ལག་བསྟར་བྱས་དང་བྱེད་བཞིན་པ་རེད། སྤྱིར་ཚོགས་ཆེན་སྐོང་ཚོགས་བྱས་པ་བརྒྱུད་རྒྱལ་སྤྱི་དང་རྒྱ་ནག་ལ་བོད་མིའི་འཐབ་རྩོད་གསོན་པོར་གནས་ཡོད་པའི་བརྡ་ལན་གསལ་པོ་སྤྲོད་ཐུབ་པ་བྱུང་ཡོད། མི་འགྱངས་པར་འཚོགས་རྒྱུའི་དམིགས་བསལ་ཚོགས་ཆེན་ཐེངས་གཉིས་པ་དེ་ནི་བོད་ནང་གི་ད་ལྟའི་ཛ་དྲག་གནས་སྟངས་ལ་གདོང་ལེན་བྱེད་ཕྱོགས་སྐོར་རེད། ཚོགས་ཆེན་ནང་བཀའ་བསྡུར་ཐག་གཅོད་བྱུང་བའི་རྒྱབ་གཉེར་སྙན་ཐོ་ཁག་ལ་བོད་མིའི་སྒྲིག་འཛུགས་དང་མང་ཚོགས་གཉིས་ནས་དུས་ནས་དུས་སུ་ལག་བསྟར་ཞུ་རྒྱུའི་གདེང་སྤོབས་དང་ཡིད་ཆེས་ཡོད་ཞུ་རྒྱུ་ཡིན།

དྲི་བ། བཙན་བྱོལ་བོད་གཞུང་གི་མཚན་བྱང་བཅོས་བསྒྱུར་བྱས་པའི་ཐོག་སྤྱི་ཚོགས་ནང་ལྟ་སྟངས་གཉིས་ཡོང་གི་ཡོད་པའི་ཐོག་དགོངས་ཆུལ་ག་རེ་ཡོད།

ལན། བཙན་བྱོལ་བོད་གཞུང་གི་མཚན་བྱང་ལ་འགྱུར་བ་ཕྱིན་པའི་གནས་ཚུལ་དེ་ནི་སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་འཕར་མའི་ཐོག་གཏན་འབེབས་བྱུང་བ་ཞིག་ཆགས་ཡོད། བཙན་བྱོལ་བོད་མིའི་དམངས་གཙོའི་འཕེལ་རིམ་ཡོངས་སུ་རྫོགས་པའི་ཆེད་དང༌བོད་མི་རྣམས་གང་ཟག་གཅིག་ལ་བརྟེན་མི་དགོས་པར་འཕྲལ་ཕུགས་ཀྱི་རྒྱུ་མཚན་དུ་མར་དགོངས་ཏེ། ཕྱི་ལོ་ ༢༠༡༡ ཟླ་ ༣ ཚེས་ ༡༤ ཉིན་ྋགོང་ས་མཆོག་གིས་ཆབ་སྲིད་དང་འཛིན་སྐྱོང་གི་འགན་དབང་བཞེས་རྒྱུ་མིན་པ་དང༌། འབྱུང་འགྱུར་ཆབ་སྲིད་དང་འཛིན་སྐྱོང་གཉིས་ཀའི་མགོ་ཁྲིད་མང་ཚོགས་ཀྱིས་འོས་འདེམས་བྱས་པའི་ལས་ཀྱི་སྣེ་མོ་བ་རྣམས་ཀྱིས་བྱེད་དགོས་པ་དང༌། དེའི་ཆེད་བཅའ་ཁྲིམས་ཀྱི་སྒྲོམ་གཞི་བསྐྱར་བཅོས་དགོས་པའི་བཀའ་སློབ་གསུང་འཕྲིན་གྲོས་ཚོགས་སུ་ཕེབས་པ་ལྟར། སྤྱི་ལྷན་སྐབས་བཅུ་བཞི་པའི་གྲོས་ཚོགས་འཕར་མའི་ཐོག་ཁྲིམས་བཟོ་ལྷན་ཚོགས་ནས་བཙན་བྱོལ་བོད་མིའི་བཅའ་ཁྲིམས་ཁྲིམས་མཐུན་བསྐྱར་བཅོས་བྱས་པ་དང་ཆབས་ཅིག “བོད་མིའི་སྒྲིག་འཛུགས་”འདི་ཉིད་ཕྱི་ལོ་ ༡༦༤༢ ལོར་དབུ་བརྙེས་པའི་བོད་གཞུང་དགའ་ལྡན་ཕོ་བྲང་གི་རྒྱུན་བོད་མིའི་ཁྲིམས་མཐུན་གྱི་དབང་ལྡན་སྒྲིག་འཛུགས་གཅིག་ཉིད་ཆགས་ཡོད། ད་ལྟའི་ཆར་”བོད་གཞུང་དགའ་ལྡན་ཕོ་བྲང་” ནས་ “བོད་མིའི་སྒྲིག་འཛུགས་” ཞེས་ཐ་སྙད་ཙམ་འགྱུར་བ་ཕྱིན་པ་མ་གཏོགས། བོད་ཕྱི་ནང་གཉིས་ཀྱི་ཁྲིམས་མཐུན་ངོ་བོ་མཚོན་ཐུབ་པའི་ནུས་པར་ཉམས་ཆག་རྩ་བ་ཉིད་ནས་ཕྱིན་མེད་པ་གསལ་པོ་ཡིན། མདོར་བསྡུས་ན་བཅའ་ཁྲིམས་ལ་བསྐྱར་བཅོས་ཀྱི་ལས་རིམ་རྣམས་དམངས་གཙོའི་ལམ་ལུགས་ཚད་ལྡན་འོག་གྲོས་ཚོགས་ནས་ཁྲིམས་མཐུན་ངང་ཁྲིམས་སུ་བཅོས་པ་ཞིག་ཆགས་ཡོད་པ་ཚང་མས་དགོངས་པར་འཇགས་དགོས། ལྷག་པར་དུ་༧གོང་ས་མཆོག་གིས་འཕྲལ་ཕུགས་རྒྱང་གསུམ་ལ་གཟིགས་ཏེ་བོད་མིའི་དམངས་གཙོའི་འཕེལ་རིམ་ཡོངས་སུ་རྫོགས་པར་མཛད་ཡོད་པ་ལྟར། ང་ཚོ་ལས་ཀྱི་སྣེ་མོར་གཏོགས་པ་གཙོས་བཙན་བྱོལ་བོད་མི་ཚོས་༸གོང་ས་མཆོག་གི་དགོངས་གཞི་རྣམས་འགྲུབ་རྒྱུའི་ཆེད་འབད་བརྩོན་ལྷོད་མེད་ཞུ་རྒྱུ་ནི་བཀའ་དྲིན་རྗེས་དྲན་གྱི་མཆོད་པ་རླབས་ཆེན་ཞིག་ཆགས་ཡོད། ཚང་མས་བོད་མིའི་འཐབ་རྩོད་སྤྱི་དང་དམངས་གཙོའི་གོམ་སྟབས་ཐད་སྔར་བས་འབད་བརྩོན་ཆེར་སྐྱེད་གནང་དགོས་པ་ཤིན་ཏུ་གལ་འགངས་ཆེ།

མདོ་སྟོད་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས།

ལན། བོད་ནང་གི་བོད་མི་ཚོའི་འབོད་སྒྲ་དང་མངོན་འདོད་ཇི་བཞིན་རྒྱལ་སྤྱིའི་སྡིངས་ཆ་ཆེ་འབྲིང་ཆུང་གསུམ་ལ་མཐིལ་ཕྱིན་ཞུས་ཏེ་བདེན་རྒྱབ་དཔུང་རོགས་ཡོང་ཐབས་སུ་གཞུང་འབྲེལ་དང་གཞུང་འབྲེལ་མིན་པ། སྒེར་པ་སུ་རུང་ནས་སྔར་ལྷག་འབད་འབུང་གནང་དགོས་པ་དང་། ང་ཚོ་བཙན་བྱོལ་བོད་མིའི་སྤྱི་ཚོགས་འདིར་བོད་ནང་གི་བོད་མི་ཚོའི་རེ་བ་བརྒྱབ་ཡོད་པ་ལྟར། རྒྱ་དམར་གཙོས་ཕྱི་དགྲ་སུ་ཞིག་གིས་ཀྱང་ནང་དུ་སིམ་འཛུལ་དཀྲུགས་ཤིང་ཡོང་མི་ཐུབ་པར་ཇི་སྲིད་བོད་དོན་བདེན་མཐའ་མ་གསལ་བར། དེ་སྲིད་དུ་བོད་མིའི་སྒྲིག་འཛུགས་འདི་སྲ་བརྟན་གནས་ཐུབ་པ་བཟོ་རྒྱུ་བོད་པ་མི་རེ་ངོ་རེའི་འོས་འགན་ཆགས་བསྡད་ཡོད།

དྲི་བ། དེ་སྔའི་རྒྱལ་ཡོངས་ཚོགས་ཆེན་དང་དམིགས་བསལ་ཚོགས་ཆེན་རིམ་པའི་སྐབས་ཀྱི་གྲོས་ཆོད་ཁག་ལ་གྲུབ་འབྲས་ཐོན་ཡོད་མེད་ཐོག་གཟིགས་ཚུལ་གང་ཡོད་པ་དང་། ཐེངས་འདིའི་ཚོགས་ཆེན་སྟེང་དུའང་གྲོས་ཆོད་མང་པོ་ཞིག་ཡོང་གི་རེད། དེ་དག་ལག་བསྟར་བྱེད་ཕྱོགས་ཐད་དགོངས་ཚུལ་ག་རེ་ཡོད།

ལན། དམིགས་བསལ་ཚོགས་ཆེན་ཐེངས་དང་པོ་དང་། རྒྱལ་ཡོངས་ཚོགས་ཆེན་ཐེངས་གཉིས་བཅས་ཀྱི་ཐོག་བཞག་པའི་གྲོས་ཆོད་ཁག་ལ་གྲུབ་འབྲས་ཐོབ་མེད་པའམ་ལག་བསྟར་བྱས་མེད་པར་ངོས་འཛིན་ཞུ་ཡི་མེད། དམིགས་བསལ་ཚོགས་ཆེན་ཐེངས་དང་པོའི་ཐོག་༸གོང་ས་མཆོག་གིས་ཡེ་ཤེས་དབྱིངས་དཔྱད་ཀྱིས་ཐག་གཅོད་གང་གནང་བ་དེར་ཤར་སྐྱོད་བྱ་རྒྱུ་ཡིན་ཞེས་བཀོད་པ་གཞིར་བཟུང་། ད་ལྟ་༸གོང་ས་མཆོག་གི་ཐག་གཅོད་གཞིར་བཟུང་བཙན་བྱོལ་བོད་མིའི་བཅའ་ཁྲིམས་ལ་བསྐྱར་བཅོས་ཐེངས་ཉེར་ལྔ་པ་གནང་སྟེ་འགྱུར་བ་ཆེན་པོ་ཐེབས་པ་རེད།

དྲི་བ། ༸གོང་ས་མཆོག་དང་བཙན་བྱོལ་བོད་གཞུང་གི་ངོས་ནས་འདུས་པའི་ལོ་ཤས་རིང་རྒྱ་རིགས་ཤེས་ཡོན་པ་དང་མི་མང་ཚོར་འབྲེལ་ལམ་འཛུགས་རྒྱུ་གལ་ཆེན་དུ་རྩིས་ཡོད། སྲིད་བྱུས་དེའི་གྲུབ་འབྲས་དང་ལེགས་ཉེས་ཐད་དགོངས་ཚུལ་ག་རེ་ཡོད།

ལན། བོད་ཀྱི་བདེན་མཐའ་གསལ་ཐབས་ཀྱི་མཐར་ཐུག་གི་བརྒྱུད་ལམ་དེ་ནི། རྒྱ་ནག་གཞུང་དང་མི་མང་ལ་གདོང་དང་གདོང་གཏུགས་ཏེ་འབྲེལ་མོལ་གྱི་ལམ་ནས་ཐག་གཅོད་དགོས་པ་དེ་ཧ་ཅང་གསལ་བོ་རེད། ད་ལྟའི་ཆར་རྒྱ་གཞུང་གི་མཁྲེགས་འཛིན་སྲིད་བྱུས་ཤིག་བཟུང་སྟེ་བོད་ཀྱི་གནད་དོན་སེལ་བར་བློ་སྟོབས་ཀྱིས་མ་འདང་བ་དང་། རྒྱ་མི་རིགས་ལ་དེ་དོན་འཁྱོག་བཤད་ཀྱི་དྲིལ་བསྒྲགས་ཤུགས་ཆེན་སྤེལ་བཞིན་པར་བརྟེན། རྒྱ་མི་མང་པོ་ཞིག་མགོ་རྨོངས་སུ་གྱུར་ཏེ་༸གོང་ས་མཆོག་གི་དགོངས་གཞི་དང་། བོད་མིའི་སྒྲིག་འཛུགས་ཀྱི་སྲིད་བྱུས་ཇི་བཞིན་མ་རྟོགས་པར། རང་རེའི་དབུ་ཁྲིད་དང་སྒྲིག་འཛུགས་ལ་འཁོན་སེམས་སློང་དང་། བོད་རྒྱ་མི་རིགས་གཉིས་བར་འགལ་ཟླ་ཇེ་ཆེ་རུ་འགྲོ་བའི་ཉེན་ཁ་འཕྲད་བཞིན་ཡོད་སྟབས། རྒྱ་མི་རིགས་ཀྱི་དོགས་པ་སེལ་ཐབས་གནང་རྒྱུ་དང་། དེར་བརྟེན་ནས་རྒྱ་གཞུང་གི་འཁྱོག་བཤད་ཀྱི་རྫུན་རྐུབ་བརྟོལ་ཐབས། ང་ཚོར་བདེན་རྒྱབ་ཡོང་བ་བཅས་ཀྱི་ཆེད་དུ་སྲིད་བྱུས་འདི་འཛིན་གྱིན་ཡོད་པ་རེད། ད་ལྟ་སྲིད་བྱུས་དེའི་གྲུབ་འབྲས་སུ་ཕྱིའི་རྒྱལ་ཁབ་ཁག་ཕུད། རྒྱ་ནག་ནང་ཁུལ་དུའང་ཤེས་ཡོན་པ་རྣམས་གཙོས་རྒྱ་མི་མང་པོ་ཞིག་གིས་དངོས་དོན་མཁྱེན་རྟོགས་བྱུང་སྟེ། བོད་དོན་བདེན་མཐའ་གསལ་རྒྱུར་ཕན་ནུས་ཀྱི་རྨང་གཞི་ལེགས་པོ་བཙུགས་ཐུབ་པ་བྱུང་ཡོད། ང་རང་ལ་མཚོན་ན་སྲིད་བྱུས་དེ་ཧ་ཅང་གལ་ཆེན་པོ་ཞིག་དང་། ཁ་ཡོད་ལག་ཡོད་ཀྱིས་བོད་རྒྱའི་གནད་དོན་སེལ་ཐབས་ཐོག་ཕན་འབྲས་ལྡན་པ་ཞིག་ལ་ངོས་འཛིན་བྱེད་བཞིན་ཡོད།

མདོ་སྨད་སྤྱི་འཐུས་རྒྱ་རིགས་ཐར།

ལན། མི་རིགས་ཤིག་དང་རྒྱལ་ཁབ་ཅིག་དུས་གཏན་དུ་འཆི་སྲིད་པའི་ཉེན་ཁ་ཆེན་པོ་ཞིག་དུས་ཀྱི་འགྱུར་འགྲོས་དང་བསྟུན་ནས་མགྱོགས་མྱུར་དུ་ཡོང་བཞིན་པ་དེར། བོད་མི་ཡོངས་ཀྱིས་རིགས་ཞེན་དང་ལ་རྒྱའི་ཀུན་སློང་རྣལ་མ་ཞིག་གིས་ཤ་ཁྲག་རུས་རྐང་ལ་འཐིམ་པའི་སྐད་ཡིག་རིག་གཞུང་དང་བཅས་པར་གཉའ་གནོན་དང་མནར་གཅོད་ཚད་མེད་གཏོང་བཞིན་པ་མ་བཟོད་པ་དང་། ཚེ་སྲོག་གི་སྐྱ་ཡ་ལྟ་བུའི་མི་རིགས་ཀྱི་ངོ་བོ་སྲུང་སྐྱོབ་རྒྱུན་འཛིན་བྱ་ཆེད་སོ་སོའི་ལུས་སྲོག་ལོངས་སྤྱོད་དང་བཅས་པ་ཕངས་མེད་བློས་བཏང་བྱས་དང་བྱེད་ཀྱི་ཡོད། ང་ཚོས་རྒྱལ་གཅེས་དཔའ་བོ་དཔའ་མོ་དག་གི་ཞུམ་པ་མེད་པའི་རྟུལ་ཕོད་དེ་བོད་གཞིས་བྱེས་གཉིས་དང་ཆོལ་གསུམ་བོད་མི་སྤྱི་བོ་གནམ་བསྟན་ཡོངས་ཀྱི་རྒྱལ་ཁ་ཅིག་ལ་ངོས་འཛིན་གྱིས་ཚོགས་པ་སྒྲིག་འཛུགས་དང་། ཡང་ན་མི་སྒེར་སུ་འདྲ་ཞིག་ཡིན་ཡང་བསམ་འདུན་གཅིག་གྱུར་དང་ལྡོག་རྩ་ཆིག་སྒྲིལ་གྱིས་གོང་བུའི་ནུས་པ་འདོན་རྒྱུ་དེ་དོན་གྱི་གནད་རེད། དེ་མ་ཡིན་པར་གཡག་ཞར་བའི་རྩྭ་ཟ་བ་བཞིན་ཕྱོགས་གཅིག་ཁོ་ནར་སྐོར་བ་འཁོར་ནས་སྡོད་པ་དང་། ར་བྲག་འདོད་པའི་བྲག་དང་ལུག་སྤང་འདོད་པའི་སྤང་བྱས་ན། མེད་པ་ཡོད་པར་སེམས་ན་ཡོད་པ་སྟོང་ཟེར་བའི་དཔེ་ལྟར་རྐང་རྗེས་ལག་གསུབ་ཏུ་གྱུར་ཏེ་དོན་གྱི་འབྲས་བུ་འབྱུང་ཐབས་ཡོད་པ་མ་རེད། ༧གོང་ས་དོན་གྱི་བདག་པོས་སྐུ་ཚེགས་དང་རྔུལ་ཁྲག་གིས་བཞེངས་བསྐྲུན་གནང་བའི་གཞིས་བྱེས་ཆོལ་གསུམ་ཆོས་བརྒྱུད་དང་བཅས་པའི་སྐུ་མཁར་སྨུག་པོ་འདིའང་ཁ་ཆག་སྣ་རལ་དུ་གཏོང་བའི་ངན་གྲོགས་སུ་མི་འགྲོ་བའི་ངེས་པ་མེད། མཐུན་ལམ་གཅིག་གྱུར་གྱིས་འགྱུར་ལྡོག་མེད་པའི་དམ་ཚིག་བརྟན་པོ་ཞིག་འཛུགས་རྒྱུ་ནི་ད་ལྟའི་ཛ་དྲག་གི་གནས་སྟངས་ལ་གཞིགས་པའི་བོད་གཞུང་མང་གཉིས་ཀྱི་ལྡོག་ཏུ་མེད་པའི་འགན་འཁྲི་ཉག་གཅིག་རེད་འདོད།

དྲི་བ། དེ་སྔའི་རྒྱལ་ཡོངས་ཚོགས་ཆེན་དང་དམིགས་བསལ་ཚོགས་ཆེན་རིམ་པའི་སྐབས་ཀྱི་གྲོས་ཆོད་ཁག་ལ་གྲུབ་འབྲས་ཐོན་ཡོད་མེད་ཐོག་གཟིགས་ཚུལ་གང་ཡོད་དང་། ཐེངས་འདིའི་ཚོགས་ཆེན་སྒང་གྲོས་ཆོད་མང་པོ་ཞིག་ཡོང་གི་རེད། དེ་དག་ལག་བསྟར་བྱེད་ཕྱོགས་ཐད་དགོངས་ཚུལ་ག་རེ་ཡོད།

ལན། ཁྲིམས་དང་སྒྲིག་བཞི་ཡང་ན་ལངས་ཕྱོགས་དང་ལམ་ལུགས་སོགས་ལ་འགྱུར་བ་གཏོང་ངེས་ཅན་གྱི་དམིགས་བསལ་ཁྲིམས་ནུས་དང་འགན་དབང་ཅན་གྱི་ཚོགས་འདུ་བྱེ་བྲག་པ་དེ་འདྲ་མིན་ན། ཚོགས་ཆེན་ཞིག་འཚོགས་པ་ཙམ་གྱིས་གནམ་ས་བླ་འོག་བརྗེས་པ་ལྟ་བུའི་འགྱུར་བ་ཆེན་པོ་ཐེབས་ཐུབ་ཀྱི་མ་རེད་བསམ་གྱི་ཡོད། འོན་ཀྱང་དམངས་གཙོ་དང་རང་དབང་གིས་གྲུབ་པའི་སྤྱི་ཚོགས་ཤིག་ཡིན་ན་ཁྲིམས་སྒྲིག་མཐའ་དག་མི་མང་གི་མངོན་འདོད་ཁོ་ནས་བཞེངས་བ་ཞིག་ཡིན་དགོས་སྟབས། དེ་སྔའི་ཚོགས་ཆེན་གཉིས་ཀྱང་སུ་ཞིག་གིས་སྒེར་གཅོད་དང་ཚད་བཀག་གིས་ནུས་མེད་དུ་སྒྱུར་ཐབས་མེད། དེ་ལས་ལྡོག་སྟེ་མ་འོངས་ལས་འཆར་དང་། ལངས་ཕྱོགས་ལམ་ལུགས་སོགས་ལ་ཁ་ཕྱོགས་ངེས་ཅན་ཞིག་བསྟན་ཡོད་པ་མ་ཟད། བོད་མི་རིགས་ཀྱི་མངོན་འདོད་རྩོད་སའི་དོ་ཟླ་ལའང་བརྡ་ལན་གསལ་བོ་ཞིག་སྤྲད་ཐུབ་ཡོད་ངེས་རེད་ལ། དེ་བཞིན་དུ་དོགས་སློང་དང་ཐེ་ཚོམ་གྱི་དྲི་རྟགས་ཁ་ཤས་ཀྱང་ཡོང་སྲིད་པ་ཞིག་རེད། ལས་དོན་གང་འདྲ་ཞིག་ཡིན་ཡང་དེ་ལ་བརྒྱུད་རིམ་སྣ་ཚོགས་ཤིག་དང་དུས་ཚོད་ངེས་ཅན་ཞིག་ཅིས་ཀྱང་དགོས་པས། ཐེངས་འདིའི་ཚོགས་ཆེན་འདི་ཡང་མ་འོངས་པའི་དགོས་དམིགས་ཤིག་ལ་ཕན་ངེས་ཅན་ཡིན་པ་ལས་ནུས་པ་མེད་པ་དང་། གྲོས་ཆོད་སྣ་གཅིག་ཀྱང་ལག་བསྟར་མི་ཡོང་བ་དེ་འདྲ་གཏན་ནས་མི་སྲིད་པ་ཞིག་རེད། ཡིན་ཡང་བརྒྱ་ཆ་བརྒྱ་ཚང་མ་ལག་བསྟར་བྱས་ཆོག་ཆོག་དེ་འདྲ་ཞིག་མིན་པས་གཙོ་ཕལ་དང་། ལེགས་ཉེས་ཀྱི་དབྱེ་བ་བཀར་ནས་ཕྱག་ལས་གནང་ན་ད་གཟོད་ལས་དོན་ཆེ་ཕྲ་གང་འདྲ་ཞིག་ཡིན་ཡང་གོ་འཛོལ་མེད་པའི་གྲུབ་དོན་ཞིག་འབྱུང་གི་རེད་དྲན་ཡོད།

དྲི་བ། བཀའ་ཤག་སྐབས་བཅུ་བཞི་པས་བོད་ནང་གི་ཛ་དྲག་གནས་བབས་ཐད། རྒྱལ་སྤྱིའི་ཐོག་འབྲེལ་ལམ་གནང་སྟངས་ཐོག་གཟིགས་ཚུལ་གང་འདྲ་ཡོད་དམ།

ལན། ང་ཚོར་མེད་པ་ནི་དམག་དཔུང་དང་དྲག་ཆས་ཡིན་ལ། ཡོད་པ་ནི་གནས་ལུགས་དང་བདེན་པ་རེད། འཚེ་བ་མེད་པ་དང་ཞི་བདེ་ཡི་རྒྱབ་དཔུང་ཞིག་ལ་གཞི་བཅོལ་ཏེ། མནར་གཅོད་དང་འཇིགས་སྣང་ལས་རྣམ་པར་རྒྱལ་དགོས་ན། དྲང་བདེན་དང་ལྷག་བསམ་འཚོལ་དགོས་ཀྱི་ཡོད། དེ་བས་རྒྱལ་ཁབ་དང་། ཚོགས་སྡེ། མི་སྒེར་སུ་འདྲ་ཞིག་ཡིན་ཡང་ཁྱད་མེད་ཐོག་བོད་མི་རིགས་ཀྱི་དངོས་ཡོད་གནས་ཚུལ་ངོ་སྤྲོད་བྱས་ཏེ། བདེན་ཚིག་རི་མོ་ཇེ་གསལ་དུ་གཏོང་རྒྱུ་དེ་གཞིས་བྱེས་གཉིས་ཀྱི་རྒྱལ་ཁའི་བ་དན་ལྟ་བུ་ཡིན། དེར་བརྟེན། བཀའ་ཤག་སྐབས་བཅུ་གཞི་པས་འཛམ་གླིང་གི་ཡུལ་གྲུ་སོ་སོར་བ་དན་དེ་ག་ཚོད་ཀྱིས་མང་པོ་ཞིག་འཛུགས་ཐུབ་ན་དེ་ཚོད་ཀྱིས་ཕན་གྱི་རེད་བསམ་གྱི་ཡོད།