ཁ་སང་ཕྱི་དྲོར་ངྷ་ས་ཉིན་སློབ་ཚོགས་ཁང་དུ་བོད་ཀྱི་མི་རབས་གསར་བའི་མཐུན་ཚོགས་ཀྱི་གོ་སྒྲིག་འོག བོད་ཀྱི་ཛ་དྲག་གི་གནས་བབས་དང་མ་འོངས་པའི་ཁ་ཕྱོགས་ཞེས་པའི་བརྗོད་གཞིའི་ཐོག་ཆོལ་ཁ་གསུམ་གྱི་སྐུ་ཚབ་སྤྱི་འཐུས་རེ་ཡིས་བགྲོ་གླེང་གཏམ་བཤད་གནང་སོང་།
ཁ་སང་ཕྱི་དྲོའི་ཆུ་ཚོད་ ༥ དང་ཕྱེད་ཀའི་སྟེང་ངྷ་ས་ཉིན་སློབ་ཚོགས་ཁང་དུ་སུད་སིར་རྟེན་གཞི་བྱེད་པའི་བོད་ཀྱི་མི་རབས་གསར་པའི་མཐུན་ཚོགས་ཀྱི་གོ་སྒྲིག་འོག བོད་པའི་ཛ་དྲག་གི་གནས་བབས་དང་མ་འོངས་པའི་ཁ་ཕྱོགས་ཞེས་པའི་བརྗོད་གཞིའི་ཐོག མདོ་སྨད་སྤྱི་འཐུས་ཐུབ་བསྟན་ལུང་རིག་ལགས་དང་། མདོ་སྟོད་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས། དབུས་གཙང་སྤྱི་འཐུས་པདྨ་འབྱུང་གནས་ལགས། དབུ་མའི་ལམ་ལས་འགུལ་ཁང་གི་རིག་གཞུང་འགན་འཛིན་བློ་བཟང་ཆོས་འབྱོར་བཅས་ཀྱིས་གཏམ་བཤད་བགྲོ་གླེང་དང་། མང་ཚོགས་ཀྱི་དྲི་བར་ལན་འདེབས་བཅས་གནང་སོང་།
བགྲོ་གླེང་དབུ་འཛུགས་ཐོག་དམིགས་བསལ་ཚོགས་ཆེན་ལ་བཅར་བའི་བོད་ཀྱི་མི་རབས་གསར་པའི་མཐུན་ཚོགས་ཀྱི་ཚོགས་གཙོ་ཐུབ་བསྟན་དཔའ་བོ་ལགས་ཀྱིས་ཚོགས་པའི་བྱུང་རིམ་ངོ་སྤྲོད་དང་འབྲེལ། ཐེངས་འདིར་ངྷ་སར་བགྲོ་གླེང་གོ་སྒྲིག་ཞུ་དགོས་པའི་དམིགས་ཡུལ་སྐོར་གསལ་བཤད་གནང་པ་ལྟར་ན། ཚོགས་པ་དེ་ནི་འདས་པའི་ལོ་གཅིག་ཙམ་གྱི་གོང་དུ་སུད་སིར་གནས་བཞུགས་བོད་རིགས་གཞོན་སྐྱེས་སྐོར་ཞིག་གི་སྣེ་འཁྲིད་འོག ༧གོང་ས་མཆོག་གི་ཐུགས་དགོངས་དང་དབུས་བོད་མིའི་སྒྲིག་འཛུགས་ཀྱི་སྲིད་བྱུས་གང་ཡིན་པར་རྒྱབ་སྐྱོར་གནང་ཆེད་དང་། གཞུང་དམངས་གཉིས་ཀྱི་འབྲེལ་ལམ་ཟབ་ཏུ་གཏོང་ཐབས་དང་བོད་མིའི་ཆིག་སྒྲིལ་དང་འཐབ་རྩོད་ཀྱི་ནུས་པ་མཐོར་འདེགས་གཏོང་རྒྱུ། སྤྱི་ཚོགས་ནང་གི་ཤེས་ཡོན་ཅན་དང་མི་སྣ་འཇོན་ཐང་ཅན་སྐྱེད་སྲིང་བཅས་ཀྱི་ཆེད་དུ་གསར་འཛུགས་བྱས་པའི་ལས་འགུལ་ཚོགས་པ་ཞིག་ཡིན་པ་དང་། ཐེངས་འདིར་ངྷ་རམ་ས་ལར་ལས་འགུལ་སྤེལ་བ་ཐོག་མ་དེ་ཆགས་ཡོད་འདུག ཐེངས་འདིའི་བགྲོ་གླེང་དེ་ནི། ལོ་སྔ་ཕྱིར་བོད་ནང་གི་གནས་སྟངས་ཧ་ཅང་ཛ་དྲག་ཆགས་ཡོད་པ་དང་། བོད་ཕྱི་ལོགས་སུའང་ཆབ་སྲིད་ཀྱི་འཕོ་འགྱུར་དང་སྤྱི་ཚོགས་ནང་གནས་ཚུལ་འདྲ་མིན་ཞིག་འཐོན་བཞིན་པར་ཆེད་དུ་དམིགས་ཏེ། དབུ་མ་དང་རང་བཙན་གྱི་ལྟ་གྲུབ་འཛིན་མཁན་གཉིས་ཀ་སྡིངས་ཆ་གཅིག་གི་ཐོག་གདན་འདྲེན་གྱིས་ད་ལྟའི་བོད་ཀྱི་ཛ་དྲག་གནས་བབས་དང་མ་འོངས་པའི་ཁ་ཕྱོགས་ཐད་དགོངས་འཆར་དང་ནུས་པ་གཅིག་ཏུ་སྤུངས་ཆེད་ཡིན་སྐོར་སོགས་བརྗོད་བྱུང་།
བགྲོ་གླེང་དངོས་གཞིའི་ཐོག་བཀའ་ཟུར་མདོ་སྨད་སྤྱི་འཐུས་ཐུབ་བསྟན་ལུང་རིག་ལགས་ཀྱིས། ད་སྔ་བོད་མི་ ༥༡ གིས་བོད་རྒྱལ་ཁབ་དང་མི་རིགས་ཆེད་རང་སྲོག་བློས་གཏོང་གིས་རྒྱ་གཞུང་ལ་ངོ་རྒོལ་བྱས་ཡོད་ཀྱང་། མེར་བསྲེགས་གཏོང་མཁན་ཚོའི་རེ་བ་ནང་བཞིན་རྒྱལ་སྤྱིའི་སྟེང་གྲུབ་འབྲེས་ཐོན་མེད་པ་དང་། ཁོང་ཚོའི་མེར་བསྲེགས་ལས་འགུལ་ལ་གྲུབ་འབྲེས་ཡོད་མེད་ལས་འཚེ་བ་ཡིན་མིན་གྱི་སྐད་ཆ་ཡོང་གི་ཡོད་སྟབས། བོད་མི་ཚོས་རྒྱ་ནག་གི་ཁྲིམས་དང་མཐུན་པའི་ཐོག་ནས་རང་དབང་འཐབ་རྩོད་བྱས་དེ་བསྙོན་འཛུགས་ལ་ལག་པ་འཆིང་ས་མེད་པ་ཞིག་ཡོང་ཐབས། ཕྱི་ཕྱོགས་ནས་ཀྱང་ད་སྔ་རྒྱལ་སྤྱིའི་སྟེང་བོད་པར་རྒྱབ་སྐྱོར་ཡོད་ཀྱང་། ཕྱིན་ཆད་སྲིད་ཇུས་རང་བཞིན་གྱི་རྒྱབ་སྐྱོར་འཚོལ་རྒྱུར་འབད་བརྩོན་བྱ་དགོས་སྐོར་བརྗོད་སོང་།
སྤྱི་འཐུས་ཚོགས་གཙོ་ཟུར་པ་དང་དབུས་གཙང་སྤྱི་འཐུས་པདྨ་འབྱུང་གནས་ལགས་ཀྱིས་ད་ལྟའི་བོད་ཀྱི་ཛ་དྲག་དེ་སྣོད་བཅུད་གཉིས་ཐོག་འཕྲད་བཞིན་པའི་ཧ་ཅང་གི་ཛ་དྲག་གནས་བབས་ཤིག་ཏུ་གྱུར་ཡོད་པ། ཛ་དྲག་གནས་བབས་དེར་བོད་གཞིས་བྱིས་གཉིས་ཀར་འགན་ཡོད་ཅིང་། བོད་ནང་གི་བོད་མི་ཚོས་ཛ་དྲག་གི་དུས་སྐབས་དེའི་འོག་བོད་ཀྱི་རྩ་དོན་ཆེད་ལས་འགུལ་གང་སྤེལ་པ་དག བཙན་བྱོལ་གཞུང་དམངས་སྤྱི་སྒེར་ཚང་མས་རྒྱལ་སྤྱིའི་སྟེང་ཁྱབ་བསྒྲགས་དང་ཁ་གསལ་བཟོ་རྒྱུ་གལ་ཆེན་པོ་ཡིན་པ། རྒྱ་གཞུང་གིས་སྲིད་ཇུས་བང་བསྒྲིགས་ཏེ་བོད་ཀྱི་སྣོད་བཅུད་གཉིས་རྩ་མེད་བཟོ་རྒྱུ་དེ་ཡིན་སྟབས། གཞིས་བྱིས་བོད་མི་ཚང་མས་རྒྱ་གཞུང་གི་སྲིད་ཇུས་དེར་ཁ་གཏད་གཅོད་དགོས་སྐོར་བརྗོད་སོང་།
བགྲོ་གླེང་པ་མདོ་སྟོད་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་ཀྱིས་བོད་ཀྱི་གནད་དོན་དེ་རྒྱལ་སྤྱིའི་སྟེང་འབུར་དུ་ཐོན་པ་ཞིག་དང་། རྒྱ་གཞུང་གི་ངོས་ནས་བོད་ཀྱི་གནད་དོན་ནི་དངོས་ཡོད་ཀྱི་གནད་དོན་ཆེན་པོ་ཞིག་ཏུ་མི་བརྩི་ཐབས་མེད་ཅིག་ཏུ་འགྱུར་འཇུག་རྒྱུ་དེ་གལ་ཆེ་ཤོས་དང་། བོད་ཀྱི་འཐབ་རྩོད་གསོན་གནས་དང་ནུས་པ་རྒྱ་སྐྱེད་ཡོང་རྒྱུར། གཞིས་བྱིས་བོད་རིགས་ཀུན་གྱིས་བཀུར་ཡུལ་༧གོང་ས་མཆོག་བཞུགས་ཡོད་པ་དེ་བོད་ཀྱི་གནད་དོན་གསོན་གནས་ཀྱི་སྟོབས་ཤུགས་ཡིན་པ། བཙན་བྱོལ་བོད་གཞུང་མུ་མཐུད་གནས་དགོས་པ། གཞིས་བཞུགས་བོད་མིའི་སྟོབས་ཤུགས་ལ་བདག་པོ་རྒྱག་རྒྱུ་དང་རྒྱལ་སྤྱིའི་སྟེང་ཁྱབ་སྤེལ་གཏོང་རྒྱུ། གཞིས་བྱིས་གཉིས་ཀྱི་འབྲེལ་བ་ཡག་པོར་གནས་ཐུབ་རྒྱུར་མུ་མཐུད་འབད་བརྩོན་བྱ་དགོས་པ། བོད་ཀྱི་གནད་དོན་དེ་རྒྱལ་སྤྱི་རང་བཞིན་གྱི་གནད་དོན་ཞིག་ཏུ་འགྱུར་འཇུག་བཅས་ཡིན་པར་བརྗོད་སོང་།
མཐར་དབུ་མའི་ལམ་མི་མང་ལས་འགུལ་ཁང་གི་རིག་གཞུང་འགན་འཛིན་བློ་བཟང་ཆོས་འབྱོར་ལགས་ཀྱིས་༧གོང་ས་མཆོག་ནི་བླ་སྤྲུལ་ཞིག་ཡིན་པ་ཙམ་གྱིས་དད་གུས་བྱ་དགོས་པར་བརྗོད་ཀྱི་མེད་པར། ཁོང་གི་སྐུ་ཕྲེང་རིམ་བྱོན་དང་ལྷག་པར་དུ་༧གོང་ས་ ༡༤ མཆོག་གི་ཆོས་ལུགས་དང་ཆབ་སྲིད། སྤྱི་ཚོགས། མཐའ་ན་བུད་མེད་ཀྱི་ཐོབ་ཐང་ཡན་ནས་དགོངས་བཞེད་རླབས་ཆེན་ཡོད་པ་བོད་མི་ཀུན་གྱིས་ངོས་ཟིན་པའི་ཐོག་ནས་དད་མོས་ལག་བསྟར་བྱ་རྒྱུ་གལ་ཆེན་པོ་ཡིན་པ། བཀའ་ཤག་གིས་རྒྱ་རིགས་འབྲེལ་མཐུད་ལྷན་ཁང་ཞིག་གསར་འཛུགས་ཐོག་བོད་རྒྱའི་འབྲེལ་ལམ་གོང་འཕེལ་གཏོང་རྒྱུ། སྤྱི་འཐུས་ལྷན་ཁང་གིས་ཛ་དྲག་ཚོགས་ཆུང་བསྐྱར་དུ་སྒོ་ཕྱེས་ཏེ། བོད་ནང་གི་ཛ་དྲག་གནས་སྟངས་ལ་ཞིབ་འཇུག་གིས་རྒྱལ་སྤྱིའི་སྟེང་དང་གསར་ལམ་ཁག བོད་པའི་གཞིས་ཆགས་ཁག་བཅས་ལ་བོད་ནང་གི་དངོས་ཡོད་གནས་ཚུལ་ཁྱབ་སྤེལ་གོ་རྟོགས་སྤེལ་རྒྱུ་གལ་ཆེན་པོ་ཡིན་སྐོར་སོགས་བརྗོད་ཡོད།
གོ་སྒྲིག་པས་ངོ་སྤྲོད་གནང་བ་ལྟར་ན། ཐོག་མ་ཐེངས་འདིའི་བགྲོ་གླེང་དེ་བོད་ནང་གི་ཛ་དྲག་གནས་སྟངས་ལ་བོད་གཞུང་དམངས་གཉིས་ཀྱིས་གདོང་ལེན་གནང་ཕྱོགས་ཐོག་དམིགས་བསལ་ཚོགས་ཆེན་འཚོགས་ལ་ཉེ་བའི་གོ་སྐབས་དང་བསྟུན་ཏེ། བཞུགས་སྒར་ཁུལ་གྱི་གཞུང་འབྲེལ་མ་ཡིན་པའི་ཆབ་སྲིད་ལས་འགུལ་ཚོགས་པ་ཁག་དང་ཆོལ་ཁ་གསུམ་གྱི་སྐུ་ཚབ་སྤྱི་འཐུས་རེ་བཅས་ཀྱིས་བགྲོ་གླེང་གཏམ་བཤད་གནང་རྒྱུར་གྲ་སྒྲིག་ཞུས་ཡོད་ཀྱང་གཞུང་འབྲེལ་མིན་པའི་ཚོགས་པ་འགར་གོ་བརྡ་གསལ་བོ་སྤྲོད་མ་ཐུབ་པ་དང་། ཚོགས་པ་སོ་སོར་ཡང་གྲ་སྒྲིག་མེད་པའི་དབང་གིས་ཐེངས་འདིར་མཉམ་ཞུགས་ཐུབ་མེད་པར། ཕྱོགས་གཅིག་ནས་དགོངས་སེལ་ཞུ་དགོས་པ་ཞིག་དང་ཕྱོགས་གཞན་ཞིག་ནས་བློ་ཕམ་འབྱུང་གཞི་ཞིག་ཆགས་ཡོད་ཚུལ་ངོ་སྤྲོད་གནང་སོང་།
གསར་འགོད་པ། བནྡེ་སྐྱབས།
ཨོ་ལགས་སོ། བོད་ཀྱི་མི་རབས་གསར་བའི་མཐུན་ཚོགས་ཀྱི་ལས་དོན་བྱེད་ཕྱོག་ས་ལ་རྗེས་སུ་ཡིད་རིང་བྱེད་རྒྱུ་ལས་བསམ་འཆར་གང་ཡང་མི་འདུག བོད་ཆོལ་གསུམ་གཅིག་ཏུ་སྒྲིལ་རྒྱུ་ལས་གཞན་ང་ཚོའི་སྤྱི་ཚོགས་ལ་གནོད་པའི་ལས་འགུལ་ཞིག་མིན་པ་ང་ཚོས་ཤེས་རྟོགས་ཐུབ་སོང་། ད་དུང་༸གོང་ས་མཆོག་གི་བཀའ་དགོངས་དང་མཐུན་པ་མ་ཟད་བཙན་བྱོལ་བོད་མིའི་ལང་ཕྱོགས་དང་གཅིག་མཚངས་ཡིན་པས་ང་ཚོས་རྒྱབ་སྐྱོབ་དང་བསྔགས་བརྗོད་བྱེད་ན་མ་འགྲིག་པ་གང་ན་ཡོད།
དྲ་གྲོགས་ཚང་མས་རྒྱབ་སྐྱོར་ལ་སྙིང་ནས་བཀའ་དྲིན་ཆེ་ཞུ་རྒྱུ་དང་། བོད་ཆོལ་གསུམ་གཞུང་མང་མཐུན་སྒྲིལ་རྡོག་རྩ་གཅིག་སྒྲིལ་དང་། བོད་དོན་འཐབ་རྩོད་ཀྱི་སྟོབས་ཤུགས་གཅིག་ཏུ་སྤུང་བར་མི་ངོ་རེ་ནས་འབད་བརྩོན་རྒྱུན་མཐུད་གནང་བའི་འབོད་སྐུལ་ཀྱང་ཞུ་རྒྱུ་ཡིན།
གཞུང་འབྲེལ་མིན་པའི་ཚོགས་པ་ཁག་བགྲོ་གླེང་ལ་ཕེབས་མེད་པ་ནི། དགུ་བཅུ་གསུམ་གྱི་ཚོགས་གཙོ་གླུ་གར་བྱམས་དང་བུད་མེད་ཚོགས་པའི་ཉམས་ཞིབ་པ་པདྨ་ཆོས་སྒྲོན་གཉིས་ཀྱིས་ཚོགས་པ་གཞན་ལ་བརྡ་ལན་བསྐྱལ་ཏེ་བགྲོ་གླེང་དེར་ཚོགས་པ་ཁག་གི་གཏམ་བཤད་པ་མི་ཞུགས་རྒྱུ་ཐག་གཅོད་བྱས་པ་རེད་ཟེར། ངོ་མ་ཐབས་སྐྱོ་བོ་ཞེ་དྲག་རེད།
བོད་ཀྱི་མི་རབས་གསར་པའི་མཐུན་ཚོགས་འདི་ཐབ་ཆུང་ལ་མེ་ཚ་བོ་གཏོང་མཁན་ཞིག་ཡིན་པ་ང་ལའང་ཆ་རྒྱུས་གསལ་པོ་ཡོད། འོན་ཀྱང་ད་ལེན་ཚོགས་སྐྱིད་༡༡་གི་འཇིགས་སྐུལ་བའི་སྒྲག་གཏམ་གྱི་བྱེད་པོ་བློ་བཟང་ཆོས་འབྱོར་སྐད་གཏོང་བ་འདི་མོས་འཐུན་མེད། རྒྱུ་མཚན་ནི་ང་ཚོའི་བསྒྲུབ་བྱ་དེ་བོད་ཀྱི་བདེན་དོན་ཡིན་ལ་བློ་ཆོས་ཀྱི་བསྒྲུབ་བྱ་ནི་ཏང་གི་ཁེ་ཕན་ཡིན། དེ་ལས་གཞན་པའི་སྐུ་མགྲོན་མི་སྣ་རྣམ་པར་བསམ་ཚུལ་གང་ཡང་མེད།
མི་རབས་གསར་པའི་མཐུན་ཚོགས་ཀྱིས་ལས་འགུལ་རབ་དང་རིམ་པར་རྗེས་སུ་ཡིད་རངས་དང་རྒྱབ་བསྐྱོར་ཡོད།
མ་ཟད་ད་རེས་ཀྱི་གོ་སྒྲིག་གྲོ་གླེང་འདིར་གཞུང་འབྲེལ་མ་ཡིན་པའི་ཆབ་སྲིད་ལས་འགུལ་ཚོགས་པ་བཅས་པ་གྲོ་གླེང་གཏམ་བཤད་ལ་གདན་འབོད་ཞུས་པ་བཟང་མོད་ཀྱང་། ཚོགས་སྐྱིད་༡༡ གི་འཇིགས་བསྐུལ་བསྒྲགས་གཏམ་འོག་གཞོན་ནུ་ཚོགས་པ་ལྟ་བུ་གྲོ་གླེང་གི་གཏམ་བཤད་གནང་རྒྱུར་ཁག་པོ་བྱས་པ་ཡོད། མ་ཟད་བུད་མེད་ཚོགས་པ་ཚོ་ནི་མང་ཆེ་བ་ཨ་མ་ལས་བསྒྲུབ་པའི་ཚོགས་པ་ཞིག་ཡིན་ཙང་བྱིས་པ་གཉོར་སྐྱོང་འོག་དུས་ཁོམས་བྱུང་ཚོད་མེད། འོན་ཀྱང་འུར་སྒྲས་ཁེངས་པའི་ཚོགས་སྐྱིད་༡༡ དེ་ཚོ་ག་པར་ཕྱིན་པ་ཡིན་ན། འོ་རེད་དེའི་ནང་གི་ཚོགས་པ་གཟི་རྔམས་ཆེ་ཤོས་དེ་སླེབས་འདུག་ག།
ཁ་ཚ་དགོས་གཏུགས་ཀྱི་བགྲོ་གླེང་ཞིག་རེད། ཡིན་ནའང་གཞུང་འབྲེལ་མིན་པའི་ཚོགས་པ་ཁག་གི་གཏམ་བཤད་པ་མི་ཕེབས་དོན་ག་རེ་རེད། ཁོང་ཚོ་ལས་ལྷག་པའི་ཚོགས་པ་ཞིག་ཡོང་མི་ཆོག་ཟེར་བ་ཡིན་རྒྱུ་རེད།
བོད་ཀྱི་མི་རབས་གསར་པའི་མཐུན་ཚོགས་ཀྱི་ལས་དོན་ལ་རྒྱབ་སྐྱོར་དང་བསྔགས་བརྗོད་ཡོད། ན་ནིང་སུད་ཝེ་སིའི་བོད་རིགས་ཚོགས་པ་འཐོར་ཞིག་ཏུ་འགྲོ་ལ་ཉེ་སྐབས། མི་རབས་གསར་པའི་མཐུན་ཚོགས་ཀྱིས་ལས་འགུལ་རབས་དང་རིམ་པ་སྤེལ་ཏེ་བོད་པའི་རྩ་དོན་ཐོག་ནུས་ཤུགས་བཏོན་ཡོད་པ་མ་ཟད། སུད་ཝེ་སི་མི་མང་གི་ལ་རྒྱ་སྤོབས་པ་མཐོ་རུ་བཏེགས་ཡོད།
ཚོགས་པ་འདིས་ཕྱག་ལས་ག་རེ་གནང་ཡོད་མེད་དང་ཚོགས་པའི་ངོ་སྤྲོད་སོགས་དྲ་གནས་འདི་ལ་གཟིགས་དང་ཞིབ་ཏུ་བཀོད་འདུག http://www.aotng.blogspot.in/
བོད་ཀྱི་མི་རབས་གསར་པའི་མཐུན་ཚོགས་ཞུ་བ་འདི་ཐབ་ཆུང་ཆུང་ནང་མེ་ཚ་བོ་གཏོང་མཁན་གྱི་ཚོགས་པ་ཞིག་ཡིན། བཀྲ་ཤིས་བདེ་ལེགས་ཞུ་བཞིན་ཡོད།