བྷང་ལཱ་ཌེ་ཤི་ནང་གི་ཁ་ཆེ་བ་ཚོས་ནང་པའི་སྟེང་དྲག་རྒོལ་དང་། ནང་པའི་ལྷ་ཁང་དགོན་པ་སོགས་ལ་མེ་བརྒྱབ་ཡོད་པར། ད་ཆར་གཞུང་གིས་དྲག་རྒོལ་བ་ཚོར་ཞིབ་བཤེར་འཇུ་བཟུང་བྱེད་ཀྱི་ཡོད་འདུག
ཕྱི་ཚེས་ ༢ ཉིན་བྷང་ལཱ་ཌེ་ཤིའི་སྲིད་བློན་ཧཱ་སེ་ནཱ་(Sheikh Hasina) ཡིས། ཐེངས་འདིའི་དྲག་རྒོལ་ཁྲོད་མཉམ་ཞུགས་བྱེད་མཁན་དག་ནི་སྤྱི་ཚོགས་འཆམ་མཐུན་ལ་གཏོར་བརླགས་གཏོང་མཁན་ཡིན་པས། དྲག་རྒོལ་བ་ཚོར་ཞིབ་བཤེར་དང་ཐག་གཅོད་ནན་མོ་བྱ་དགོས་པའི་བཀའ་བཏང་ཡོད་པ་དང་། ད་ལྟའི་ཆར་དོན་རྐྱེན་དང་འབྲེལ་བའི་མི་སྣ་ ༣༠༠ ལྷག་འཇུ་བཟུང་བྱས་ཡོད་པ་མ་ཟད། དོན་རྐྱེན་དེའི་རྒྱབ་ལྗོངས་དང་དྲག་རྒོལ་ཁྲོད་མཉམ་ཞུགས་བྱེད་མཁན་དག་ལ་ཞིབ་བཤེར་དང་འཇུ་བཟུང་བྱེད་བཞིན་ཡོད་འདུག
ཕྱི་ཚེས་ ༣༠ ཉིན་གྱི་ཕྱི་དྲོ་བྷང་ལཱ་ཌེ་ཤིའི་(Bangladesh) ལྷོ་ཤར་ས་ཁུལ་རཱ་མཱུ་(Ramu) གྲོང་ཁྱེར་དང་ཉེ་འཁོར་ས་གནས་ཁག་གི་ཁ་ཆེ་བ་སྟོང་ཕྲག་མང་པོ་གཞུང་ལམ་སྟེང་ཐོན་ཏེ། ནང་པ་ཞིག་གིས་གདོང་དེབ་སྟེང་ཁ་ཆེ་བར་དམའ་འབེབ་ཀྱི་པར་རིས་ཤིག་བཀོད་ཡོད་ཚུལ་བརྗོད་བཞིན། ཐོག་མར་གྲོང་ཁྱེར་དང་ས་ཁུལ་དེ་དག་ནང་ཡོད་པའི་ནང་པའི་ལྷ་ཁང་དང་དགོན་པ་ཁག་ཅིག་ལ་གཏོར་རྒོལ་དང་མེ་བརྒྱབ་ཡོད་ཅིང་། རྗེས་སུ་ཉེ་འཁོར་དུ་ཡོད་པའི་ནང་པའི་གྲོང་གསེབ་ཁག་ཏུ་ཕྱིན་ཏེ་ཁྱིམ་ཚང་མང་པོ་ཞིག་ལ་དྲག་རྒོལ་དང་མེ་བརྒྱབ་ཡོད་འདུག ཕྱི་ཚེས་ ༡ ཉིན་བསྐྱར་དུ་ནང་པའི་སྟེང་དྲག་རྒོལ་བྱས་ཏེ། ཁྱོན་ནང་པའི་ལྷ་ཁང་དང་དགོན་པ་བཅུ་ཕྲག་ལྷག་དང་། གྲོང་གསེབ་ ༡༥ ཙམ་གྱི་ནང་གི་སྡོད་ཁང་ ༡༠༠ ལྷག་ལ་གཏོར་སྐྱོན་དང་མེ་བརྒྱབ་ཡོད་པའི་ཁྲོད་མི་ལོ་ ༣༠༠ ལྷག་ཕྱིན་པའི་དགོན་རྙིང་ཁག་ཅིག་ཀྱང་གཏོར་བརླགས་བཏང་ཡོད་འདུག
ས་གནས་ཉེན་རྟོག་དཔོན་ཞིག་གིས་གནས་ཚུལ་བརྗོད་པ་ལྟར་ན། དྲག་རྒོལ་དོན་རྐྱེན་དེའི་སྐབས་ཁ་ཆེ་བ་ ༢༥༠༠༠ ཙམ་ཡོད་ཚུལ་དང་། དྲག་རྒོལ་སྐབས་ནང་པའི་ལྷ་ཁང་དང་དགོན་པར་གཏོར་སྐྱོན་དང་མེ་བརྒྱབ་པ་ཙམ་མ་ཟད། ལྷ་ཁང་དང་དགོན་པའི་ནང་གི་རིན་པོ་ཆེ་དང་སྟོན་པའི་སྐུ་བརྙན་རྩ་ཆེ་རིགས་དང་། གཞན་ལྷ་ཁང་དང་དགོན་པ་ཁག་གི་ཉེ་འགྲམ་དུ་ཡོད་པའི་ཚོང་ཁང་སོགས་ཀྱི་ཅ་དངོས་རིགས་རྐུ་འཕྲོག་བྱས་ཡོད་འདུག
ས་གནས་རྫོང་གི་རྫོང་དཔོན་བྷ་རེ་(Joinul Bari) ཡིས་གསར་ལམ་ཁག་ཏུ་བརྗོད་པ་ལྟར་ན། དོན་རྐྱེན་བྱུང་འཕྲད་གཞུང་ལ་གནས་ཚུལ་ཡར་ཞུ་དང་བདེ་སྲུང་དམག་གཏོང་དགོས་པའི་འབོད་སྐུལ་ཞུས་རྗེས། གཞུང་གི་བདེ་སྲུང་དམག་དང་ཉེན་རྟོག་པ།ས་མཚམས་སྲུང་དམག་བཅས་ཆེད་གཏོང་གིས།ད་ཆར་ནང་པ་གྲངས་ཉུང་མི་རིགས་ཀྱི་ས་གནས་ཁག་ཏུ་སྟངས་འཛིན་ནན་མོ་དང་། ཡུལ་དེ་དག་ནང་མི་མང་མཉམ་འཛོམས་རིགས་ལ་བཀག་འགོད་བྱེད་བཞིན་ཡོད་འདུག
བྷང་ལཱ་ཌེ་ཤི་ནི་མི་འབོར་ས་ཡ་ ༡༥༣ ཡོད་པ་ལས་མང་ཤོས་ཁ་ཆེ་བ་ཆགས་ཡོད་ཅིང་། མི་འབོར་གྱི་སྤྱིའི་བརྒྱ་ཆ་ ༡ མ་ཟིན་ཙམ་ཞིག་ནང་པ་ཡིན་པ་དང་། ནང་པ་གྲངས་ཉུང་མི་རིགས་དེ་དག་ནི་བྷང་ལཱ་ཌེ་ཤི་ཡི་ལྷོ་ཤར་ཏེ། འབར་མ་དང་བྷང་ལཱ་ཌེ་ཤིའི་རྒྱལ་མཚམས་དང་ཉེ་བའི་ས་ཁུལ་ཁག་ཏུ་གནས་ཡོད་འདུག
འཛམ་གླིང་ས་ཕྱོགས་གང་སར་མི་གསོད་ཁྲག་སྦྱོར་གྱི་ལས་ལ་ཞུགས་མཁན་དག་ནི་ཁ་ཆེ་མི་རིགས་ཡིན་པ་མ་ཟད་ད་དུང་སོ་སོའི་ལུང་པའི་མི་སེར་དཀྱུས་མ་དག་གི་དཀའ་སྡུག་ལ་མ་བལྟོས་པར་འཛམ་གླིང་མི་མང་གི་ཞི་བདེ་ལ་གཏོར་ཤིག་གཏོང་མཁན་དེ་ཚོའི་རིགས་ལ་ཡང་སྐྱར་ཨ་རིའི་སྲིན་འཛིན་སུར་བ་བྷོ་ཞི་གདན་འདྲེན་ཞུ་དགོས་པ་མ་ཟད་ཁོང་ཚོར་སེམས་ཤེས་སུ་འཇུག་དགོས།
ལྟ་སྤྱོད་འཚེ་མེད་དང་རྟེན་འབྲེལ་སྨྲ་བ་དག་ཡང་སྐྱིད་དུ་བཅུག་མ་སོང་།
མཁྲེགས་འཛིན་པ་དེ་ཚོ་ངོ་མ་འཇམ་གླིང་དཀྲུག་པའི་སྐྲན་རེད།
ང་ཚོ་ཡིད་གཟབ་བྱོས་ཤིག