མིག་སྒྲིབ་ལས་འགུལ་མཇུག་བསྒྲིལ།

བོད་རིགས་ན་གཞོན་ཤེས་རབ་ཚེ་རྡོར་ལགས་ཀྱིས་ད་ལོའི་གསུམ་ཅུའི་དུས་དྲན་ཉིན་བཞུགས་སྒར་ནས་མགོ་འཛུགས་ཀྱིས་༼གངས་ལྗོངས་ཀྱི་ཕོ་ཉ༽ཞེས་པའི་མིང་ཐོག་ནས་མཉམ་འབྲེལ་རྒྱལ་ཚོགས་གཙོས་པའི་འཛམ་གླིང་གི་སྲིད་གཞུང་ཁག་ལ་བོད་ནང་གི་ཛ་དྲག་གནས་སྟངས་ཐོག་རྒྱབ་སྐྱོར་ཡོང་ཆེད། རྒྱ་གར་རྒྱལ་ཡོངས་ནང་མིག་སྒྲིབ་རྒྱལ་དཀྲོགས་ཟེར་པའི་བོད་དོན་ངོ་སྤྲོད་དང་མཚན་རྟགས་བསྡུ་རུབ་ཀྱི་ལས་འགུལ་ཞིག་སྤེལ་ཡོད་པ་དེ་ཕྱི་ཚེས་ ༦ ཉིན་ལྡི་ལིར་མཇུག་བསྒྲིལ་ཏེ། ཉིན་འདི་འགར་ལྡི་ལིར་ཡོད་པའི་རྒྱལ་ཚོགས་ཡན་ལག་ལས་ཁུངས་དང་རྒྱལ་ཁབ་ཁག་གི་གཞུང་ཚབ་ཁང་ལ་མཚན་རྟགས་འབུལ་བཞིན་ཡོད་འདུག

ཁོང་གིས་འདས་པའི་ཟླ་ ༦ དང་ཕྱེད་ཀའི་རིང་རྒྱ་གར་གྱི་མངའ་སྡེ་ཡོངས་སུ་ས་གནས་ཁག་ ༡༠༨ ནང་སྐོར་སྐྱོད་ཀྱིས། ཞོགས་པ་ཆུ་ཚོད་ ༩ ནས་ཕྱི་དྲོ་ཆུ་ཚོད་ ༥ བར་ཁོང་གིས་མིག་གཉིས་རས་ནག་གིས་གཡོགས་ཏེ། རྒྱ་དམར་གཞུང་གིས་བོད་ས་བཙན་བཟུང་བྱས་པ་དང་། ད་ལྟའི་བོད་ནང་གི་ཛ་དྲག་གནས་སྟངས། བོད་མིའི་རང་ལུས་མེར་བསྲེགས་ཀྱི་རྒྱུ་རྐྱེན་སྐོར་ངོ་སྤྲོད། རྒྱ་ནག་གིས་བོད་ཀྱི་ཁོར་ཡུག་གཏོར་བཅོམ་གཏོང་བཞིན་ཡོད་པ་དེས་བོད་ཙམ་མ་ཟད། རྒྱ་གར་གཙོས་པའི་ཨེ་ཤ་ཡའི་རྒྱལ་ཁབ་མང་པོར་གནོད་འཚེ་ཕོག་གི་ཡོད་ཚུལ་སོགས་མང་ཚོགས་ལ་གོ་རྟོགས་སྤེལ་ཏེ། ད་ཆར་མཚན་རྟགས་ལྔ་ཁྲི་སུམ་བརྒྱ་གསུམ་ཅུ་སོ་དྲུག་ ༥༠༣༣༦ བསྡུ་རུབ་གནང་ཡོད་འདུག

གསར་འགོད་པས་ཁ་པར་བརྒྱུད་ལས་འགུལ་དེ་ཐོག་མ་ཟླ་ ༣ གྱི་འཆར་གཞི་ཡིན་ཡང་ད་ཆར་ཟླ་དྲུག་ལྷག་ཕྱིན་པའི་རྒྱུ་མཚན་དྲིས་སྐབས། གཅིག་ནས་ས་གནས་ཁག་ཏུ་སྐོར་སྐྱོད་སྐབས་ས་གནས་བདེ་སྲུང་བའི་ཆོག་མཆན་རག་མིན་གྱིས་ཅུང་འགོར་འགྱངས་བྱས་པ་དང་། གཉིས་ནས་ལས་འགུལ་དངོས་གཞིའི་སྐབས་ཐོག་མའི་འཆར་གཞི་ལས་ས་གནས་ཀྱི་ཁྱབ་ཁོངས་ཆེ་རུ་ཕྱིན་ཏེ། ཐོག་མའི་ཟླ་གསུམ་གྱི་འཆར་གཞིའི་ནང་ས་གནས་ཁག་ ༦༠ ཙམ་ལ་སྐོར་སྐྱོད་བྱ་འཆར་དེ་རྗེས་སུ་ས་གནས་ཁག་ ༡༠༨ ཙམ་ལ་སྐོར་སྐྱོད་བྱ་དགོས་ཆགས་ཏེ་ཟླ་དྲུག་ལྷག་ཕྱིན་སྐོར་བརྗོད་བྱུང་།

ཁོང་གིས་ “མཚན་རྟགས་བསྡུ་རུབ་ནི་བོད་པ་དང་རྒྱ་གར་ཡུལ་མི་གཉིས་ཀའི་ཁྲོད་བྱས་ཡོད། ཐེངས་འདིའི་མཚན་རྟགས་ནང་ཨ་རུ་ཎ་ཅལ་མངའ་སྡེའི་ཡུལ་སྐོར་སྤྲོ་འཆམ་བློན་ཆེན་པདྨ་མཁའ་འགྲོ་མཆོག་གཙོས་མངའ་སྡེ་གཞུང་གི་གནད་ཡོད་དཔོན་རིགས་ཁག་ཅིག་གིས་བོད་དོན་རྒྱབ་སྐྱོར་གྱི་མཚན་རྟགས་བཀོད་ཡོད་པ་ལས། ས་གནས་གཞན་ཕལ་ཆེ་བེར་མང་ཚོགས་ཁྲོད་མཚན་རྟགས་བསྡུས་ཡོད་”ཟེར།

ལས་འགུལ་འདིའི་ཟླ་དྲུག་ལྷག་རིང་གི་འགྲོ་སོང་སྐོར་ལ། ཐོག་མའི་ཆར་ཧིན་སྒོར་འབུམ་གཅིག་བུ་ལོན་བླངས་ཏེ་ལས་འགུལ་མགོ་འཛུགས་གནང་ཡོད་པ་དང་། བོད་པ་འདུས་སྡོད་ཁུལ་ཏུ་སྐོར་སྐྱོད་སྐབས་བོད་མི་ཚོས་སྡོད་གནས་དང་ཞལ་ལག་གྲ་སྒྲིག་གནང་ཡོད་པ་མ་ཟད་ཞལ་འདེབས་ཀྱང་གང་འཚམ་རེ་གནང་ཡོད་འདུག ཁོང་གིས་བརྗོད་དོན། “ལས་འགུལ་སྐབས་གྲོགས་པོ་ཀརྨ་དོན་འགྲུབ་དང་ཀརྨ་རབ་བརྟན་གཉིས་དང་བླངས་ཐོག་མཉམ་ཞུགས་གནང་ཡོད་སྟབས། འགྲོ་གྲོན་ཆེན་པོ་དེ་འདྲ་ཕྱིན་མེད་ཀྱང་ཟླ་དྲུག་རིང་རླངས་འཁོར་ཞིག་གླས་པར་ཧིན་སྒོར་འབུམ་གསུམ་ཙམ་ཕྱིན་སོང་། དེ་ལ་གཞི་ནས་ཐབས་ཤེས་བྱ་དགོས་པ་རེད” ཅེས་བརྗོད་བྱུང་།

ཁོང་ལ་ལས་འགུལ་དེར་འདོད་བློ་ཁེངས་པ་ཞིག་བྱུང་ཡོད་མེད་དྲིས་པར། “ཐེངས་འདིའི་ལས་འགུལ་མཇུག་བསྡོམས་བརྒྱབ་ཡོད་ཀྱང་ལས་ཀ་ད་དུང་ཚར་མེད་པ་དང་། ལྷག་པར་དུ་བོད་ནང་རང་དབང་དང་འགྲོ་བ་མིའི་ཐོབ་ཐང་གི་དཀའ་ངལ་མ་སེལ་པར་དུ་ལས་འགུལ་གང་སྤེལ་ཡང་དེར་འདོད་བློ་ཁེངས་འགྲོ་བ་ཞིག་ཡོང་གི་མ་རེད། ངའི་ལས་འགུལ་མཇུག་སྒྲིལ་བའི་ཕྱི་ཉིན་བོད་ནང་བསྐྱར་དུ་རང་ལུས་མེར་བསྲེགས་གནང་པ་དེས། ང་ཚོས་ལས་འགུལ་གཅིག་གཉིས་རེ་སྤེལ་པ་ཙམ་གྱི་འགྲིག་གི་མེད་པ་གསལ་བོར་བསྟན་ཡོད” ཟེར།

རྒྱ་གར་མི་མང་གིས་རྒྱབ་སྐྱོར་གང་འདྲ་ཡོད་མེད་དྲིས་པར། “ སྔོན་ཆད་ལས་འགུལ་མང་པོ་སྤེལ་པའི་ཉམས་མྱོང་ལ་བལྟས་ན། དེ་རེབ་རྒྱ་གར་མང་ཚོགས་ཁྲོད་བོད་དོན་ལ་དོ་སྣང་དང་རྒྱབ་སྐྱོར་ཆེ་བ་འདུག དེ་ནི་གཙོ་བོ་བོད་ནང་གི་རང་ལུས་མེར་བསྲེགས་ཀྱི་ཛ་དྲག་གནས་སྟངས་ལ་བརྟེན་ནས་བྱུང་པ་ཞིག་རེད་དྲན་གྱི་ཡོད” ཅེས་བརྗོད་བྱུང་།

ལས་འགུལ་སྐབས་ཁོང་གི་མིག་གཉིས་ལ་རས་ནག་གིས་གཡོགས་དོན་ནི། མཉམ་འབྲེལ་རྒྱལ་ཚོགས་དང་འཛམ་གླིང་གི་དབུ་ཁྲིད་ཚོས་བོད་ནང་གི་ཛ་དྲག་གནས་སྟངས་ཤེས་བཞིན་དུ་མཐོང་ན་མ་མཐོང་ཁུལ་གྱིས་མིག་ལྡན་ལོང་བའི་རྟུལ་ཞུགས་འཛིན་གྱི་ཡོད་པ་མཚོན་པར་བྱས་པ་ཞིག་ཡིན་འདུག་ལ། ཕྱི་ཚེས་ ༨ ཉིན་རྒྱབ་ཁོང་དངོས་སུ་ལྡི་ལིར་ཡོད་པའི་རྒྱལ་ཚོགས་ཡན་ལག་ལས་ཁུངས་ལ་ཕྱིན་ཏེ། མཚན་རྟགས་ལྔ་ཁྲི་ལྷག་བཀོད་པའི་ཞུ་འབོད་ཡིག་ཆ་འབུལ་སྐབས་མིག་རས་ནག་པོ་དེ་ཁོ་ཚོར་ལེན་དུ་འཇུག་རྒྱུ་ཡིན་པ་དང་། དེ་ནི་རྒྱལ་ཚོགས་དང་རྒྱལ་སྤྱིའི་སྲིད་གཞུང་ཁག་གི་དཔོན་རིགས་ཚོས་བོད་ཀྱི་གནད་དོན་ཐོག་དྲང་བདེན་ལ་རྒྱབ་སྐྱོར་གྱི་མིག་ཕྱེ་རྒྱུའི་རེ་སྐུལ་ཞིག་ཡིན་ཡིན་པར་བརྗོད་བྱུང་། 

གསར་འགོད་པ། བནྡེ་སྐྱབས།