གཟའ་མིག་དམར་ཉིན། ཌེ་བེ་ཌི་ཡིས་ཝུན་ཚང་གི་གནས་ཚུལ་དེ་ནི་རང་ཉིད་ཀྱིས་འཚོལ་བཤེར་བྱས་པ་བསྒྲགས་ཡོད་པ་དང་། ཝུན་གྱིས་ཁོའི་ནང་མིར་ཡོངས་བསྒྲགས་ཞིབ་བཤེར་བྱེད་ཆོག་སྐོར་བརྗོད་འདུག
ཁ་སང་ཕྱི་ཚེས་ ༣༠ ཉིན། རྒྱ་ནག་ཧྲང་ཧེ་རུ་ཡོད་པའི་ནེའུ་ཡོག་དུས་བབ་ཡན་ལག་གསར་ཁང་གི་མགོ་གཙོ་ཌེ་བེ་ཌི་(David Barboza) ཡིས། ཉེ་སྔོན་ནེའུ་ཡོག་དུས་བབ་སྟེང་བཏོན་པའི་ཝུན་ཚང་གི་དཔལ་འབྱོར་སྐོར་གྱི་གནས་ཚུལ་དེ་ནི། ཁོ་རང་གིས་འདས་པའི་ལོ་གཅིག་རིང་ཞིབ་བཤེར་འཚོལ་བསྡུ་བྱས་པ་ཞིག་ཡིན་པ་ལས། ལྐོག་ནས་གཞན་པས་མཁོ་སྤྲོད་བྱས་པའི་གནས་ཚུལ་ཞིག་མིན་སྐོར་གསལ་བཤད་བྱས་འདུག
ཝུན་ཇ་པའོ་ནང་མིའི་དཔལ་འབྱོར་བདག་ཉེར་སྐོར་གྱི་གནས་ཚུལ་དེ་ནི། ཌེ་བེ་ཌི་ཡིས་ཞིབ་བཤེར་བྱེད་མགོ་བརྩམས་ཏེ་ད་ལྟའི་བར་ཧ་ལམ་ལོ་གཅིག་འགོར་ཡོད་པ་དང་། དང་ཐོག་ཁོས་རྒྱ་གཞུང་གི་རྒྱལ་གཉེར་དཔལ་འབྱོར་རྣམ་གྲངས་སྐོར་གྱི་གནས་ཚུལ་སྤེལ་རྒྱུའི་འཆར་གཞི་ལྟར། རྒྱ་གཞུང་གི་མཐོ་རིམ་དཔོན་རིགས་ཁག་ཅིག་དང་བཟོ་ཚོང་ཁེ་ལས་བར་གྱི་འབྲེལ་བར་ཞིབ་བཤེར་བྱས་མཐར། སྤྱི་ཚོགས་ཁྲོད་སྔོན་ནས་ཝུན་ཇ་པའོ་ཡི་ནང་མིའི་སྐོར་ནས་ལབ་གླེང་ཞིག་ཁྱབ་ཡོད་སྟབས། ཁོས་དེ་སྔའི་གནས་ཚུལ་འཚོལ་བསྡུའི་དམིགས་ཡུལ་གྱི་ཁྱབ་ཁོངས་རྒྱ་ཆུང་དུ་བཏང་སྟེ། ཝུན་ཇ་པའོ་ཡི་ནང་མིའི་བདག་ཉར་དཔལ་འབྱོར་མ་དངུལ་གྱི་ཕྱོགས་ལ་སྐོར་བ་ཞིག་ཡིན་འདུག
ཌེ་བེ་ཌི་ཡིས་གསལ་བཤད་སྐབས། ཁོ་རང་གི་ཞིབ་བཤེར་དཔྱད་གཞིའི་རྒྱུ་ཆ་དག་ནི་ཡོངས་ཁྱབ་ཀྱི་ཡིག་ཆ་ཁག་ཡིན་པ་དང་། ཞིབ་བཤེར་ཁྲོད་ཁྲིམས་འགལ་དང་རུལ་སུངས་ཀྱི་གནད་དོན་རིགས་གང་ཡང་རྙེད་སོན་བྱུང་མེད་ཀྱང་། མ་དངུལ་གཏོང་འཇོག་བྱ་ཡུལ་ཁག་བཅུ་གྲངས་ལྷག་གི་རྒྱབ་ལྗོངས་སུ་ཝུན་ཇ་པའོ་ནང་མིའི་མིང་བཀོད་འདུག་པ་མ་ཟད། འདས་པའི་ལོ་ ༡༠ ནང་རྒྱ་གཞུང་གི་སྲིད་བློན་ཝུན་ཇ་པའོ་ཡི་ནང་མི་ཉེ་འབྲེལ་དག་གིས་ཉུང་མཐའ་ཡང་། ཨ་སྒོར་དུང་ཕྱུར་ ༢༧ གྱི་དཔལ་འབྱོར་མ་རྩ་སྟངས་འཛིན་བྱས་ཡོད་པ་བརྗོད་འདུག
ཌེ་བེ་ཌི་ཡིས་གསལ་བརྗོད་བྱས་པ་ལྟར་ན། ཐེངས་མང་པོར་སྲིད་བློན་ཝུན་ཇ་པའོ་དང་ཁོའི་ནང་མི་ཉེ་འབྲེལ་ཚོར་འབྲེལ་བ་གནང་ཐབས་བྱས་ཏེ། ཁོ་ཚོའི་ངོས་ནས་གནས་ཚུལ་དེ་དག་གི་ཐད་དཔྱད་སྡུར་དང་གསལ་བཤད་ཡོང་རྒྱུའི་རེ་བ་བཏོན་ཡང་། ཝུན་གྱི་ནང་མིའི་ངོས་ནས་གནས་ཚུལ་དེའི་ཐད་ལན་འདེབས་མི་བྱེད་པ་དང་། ཡང་ན། གནས་ཚུལ་དེ་གླེང་སློང་བྱ་རྒྱུ་ངོས་ལེན་བྱས་མེད་པ་རེད།
ཕྱི་ཚེས་ ༣༠ ཉིན་རྒྱ་གཞུང་མཐོ་རིམ་དཔོན་རིགས་ནང་ཁུལ་ལ་འབྲེལ་བ་དམ་པོ་ཡོད་མཁན་ཞིག་གིས་ཧོང་ཀོང་མཱེན་པའོ་གསར་ཁང་ལ་བརྗོད་པ་ལྟར། ཉེ་ཆར་ཝུན་ཇ་པའོ་ཡིས་རྒྱ་གཞུང་མཐོ་རིམ་དཔོན་རིགས་ལ་སྙན་ཞུ་ཡི་གེ་ཞིག་བཏང་སྟེ། ཁོ་དང་ཁོའི་ནང་མིས་ཆ་རྐྱེན་གང་ཡང་མེད་པའི་ཐོག་ནས་ཡོངས་བསྒྲགས་ཐོག་ཞིབ་བཤེར་བྱ་རྒྱུར་རམ་འདེགས་བྱ་རྒྱུ་ཡིན་པ་དང་། གང་མྱུར་ཚོགས་ཆུང་ཆེད་འཛུགས་ཀྱིས་ཕྱོགས་ཡོངས་ནས་ཞིབ་བཤེར་བྱས་ཏེ། ཡོངས་བསྒྲགས་ཐོག་མི་དམངས་ལ་རྩིས་སྤྲོད་བྱེད་དགོས་ཚུལ་དང་། ཞིབ་བཤེར་སྐབས་ཕྱི་རྒྱལ་གྱི་གསར་ལམ་ཁག་གི་འཐུས་ཚབ་ཀྱང་མཉམ་ཞུགས་བྱེད་འཇུག་དགོས་སྐོར་བརྗོད་ཡོད་འདུག
ད་དུང་ཝུན་གྱི་ཡི་གེའི་ནང་། གལ་སྲིད་ཡོངས་བསྒྲགས་ཀྱིས་ཞིབ་བཤེར་བྱེད་ཐབས་མེད་ཚེ། ཆེད་དུ་ཚོགས་ཆུང་བཙུགས་ཏེ་རང་དབང་ཐོག་ཞིབ་བཤེར་བྱེད་དགོས་ལ། དེ་མིན་ན། ཁོ་རང་ངོས་ནས་སོ་སོའི་ཁྱིམ་ཚང་གི་དཔལ་འབྱོར་མ་རྩ་ཡོངས་བསྒྲགས་བྱེད་ཆོག་པར་རྒྱ་གཞུང་མཐོ་རིམ་དཔོན་རིགས་ནས་མོས་མཐུན་ཡོང་བའི་འབོད་སྐུལ་དང་། གལ་སྲིད། ཞིབ་བཤེར་བརྒྱུད་ཁོ་དང་ཁོའི་ནང་མིའི་ཕྱོགས་ནས་མ་དངུལ་རུལ་སུངས་ཀྱི་གནད་དོན་གང་རུང་ཞིག་ཕྱིར་ཐོན་ཚེ། ཡོངས་བསྒྲགས་ཀྱི་ཐོག་ནས་ཁྲིམས་བཞེར་དང་། དམར་ཤོག་པའི་སྒྲིག་ཁྲིམས་དང་རྒྱལ་ཁབ་ཀྱི་བཅའ་ཁྲིམས་གཞིར་བཟུང་ཉེས་ཆད་གཅོད་རྒྱུ་ནང་ལེན་བྱ་རྒྱུ་ཡིན་སྐོར་བཀོད་ཡོད་པར་བརྗོད།
རྒྱ་ནག་ཉམས་ཞིབ་པ་དག་གིས། ཝུན་ཇ་པའོ་ཡིས་ཐེངས་འདིར་ཡོངས་བསྒྲགས་ཞིབ་བཤེར་བྱ་དགོས་པའི་རེ་བ་བཏོན་པ་དེས། ཁོ་རང་ཉིད་ལ་གསང་དགོས་པའི་ནག་ཉེས་གང་ཡང་མེད་པའི་རྣམ་འགྱུར་བསྟན་ཡོད་པ་མ་ཟད། ཅཱང་དང་ཀྲིག་གཙོས་ཁོ་རང་ལ་ཁ་གཏད་གཅོག་མཁན་གྱི་དཔོན་རིགས་ཚོར། བསམ་བཞིན་དུ་གནོན་ཤུགས་འཕར་མ་ཞིག་སྤྲད་ཡོད་པར་བརྗོད་ཡོད།
གསར་འགོད་པ། ཚེ་རིང་རྒྱལ།
![Wang made a research tour in Tibet from July 19 to 22. [Xinhua/Liu Bin]](https://tibettimes.net/wp-content/uploads/2026/07/1784796471071092378-360x180.jpg)
ཙུང་ལུའི་བློ་ཁོག་ཆེ་གི བྱེད་སྟངས་འདི་ནི་མྱིའི་བྱེད་སྟངས་ཤིག་རེད། ཧྲ་གི
ད་ཡིན་ན་འཁྲུགས་ཆ་དོད་པོ་ཞིག་ཡོང་ངེས་རེད་ཤག་་་་་་ཧ་ཧ་ཧ་ཧ་ཧ་ཧ་་་ལྟད་མོ་ཡོད་རེད་གྲོགས་པོ་ཚོ་གཟིགས་དང་།