གློག་བརྙན་སོགས་རིག་གསར་ལ་རྒྱབ་སྐྱོར་མེད་པ་དེ་ནི་ཕངས་པོ་རེད།

ཟླ་འདིའི་ཕྱི་ཚེས་ ༢༧ ནས་ཉིན་གཉིས་རིང་བོད་ཀྱི་ཟློས་གར་ཚོགས་ཁང་དུ། བོད་ཀྱི་གློག་བརྙན་བཟོ་སྐྲུན་ཁང་དང་བོད་རང་བཙན་སློབ་ཕྲུག་ཚོགས་པ་གཉིས་ཀྱི་གོ་སྒྲིག་འོག བོད་ཀྱི་གློག་བརྙན་དུས་སྟོན་ཚོགས་ཡོད་པ་ལྟར། གློག་བརྙན་དུས་སྟོན་གོ་སྒྲིག་པ་ཉི་མ་དོན་གྲུབ་ལགས་སུ་བཅར་འདྲི་ཞུས་ཡོད།

        དྲི་བ། ཐོག་མར་ཁྱེད་རང་ཉིད་ཀྱི་མི་ཚེ་ལོ་རྒྱུས་རཊ་བསྡུས་ཤིག་ངོ་སྤྲོད་གནང་རོགས་ཞུ།

        ལན། ངའི་མིང་ལ་ཉི་མ་དོན་གྲུབ་ཟེར། ད་ལྟ་ལོ་ ༦༠ བསླེབས་ཡོད། ང་རང་ཕྱི་ལོ་ ༡༩༥༣ ལོར་བོད་ནང་དུ་སྐྱེས་པ་ཡིན་ལ། བོད་ལ་རང་བཙན་ཡོད་པའི་འོག་ནས་ལོ་ ༥ ནས་ ༦ ཙམ་གྱི་རིང་སྐྱིད་པོ་སྡོད་རྒྱུ་བྱུང་ཡོད་པ་རེད། དེ་ནས་སྐྱབས་བཅོལ་ལ་བསླེབས་པའི་རྗེས་སུ། ང་རང་དྷ་རམ་ས་ལར་བོད་ཁྱིམ་སློབ་གྲྭའི་བུ་ཕྲུག་དང་པོའི་གྲས་ཆགས་ཡོད་པ་རེད། སྐབས་དེར་བོད་ཁྱིམ་སློབ་གྲྭའི་བུ་ཕྲུག་མང་པོ་ཞིག་ཕྱི་རྒྱལ་ཁག་ཏུ་བཏང་བའི་གྲས་སུ། ང་རང་ཡང་ཕྱི་ལོ་ ༡༩༦༢ ལ་ཧྥ་རན་སིར་བཏང་སོང་། དེ་ནས་ད་ལྟའི་བར་ངའི་མི་ཚེ་ཆ་ཚང་ཕྱི་རྒྱལ་ལུང་པའི་ནང་བསྐྱལ་པ་རེད།

        དྲི་བ། ཁྱེད་ལ་བོད་ཀྱི་གློག་བརྙན་དུས་སྟོན་འདི་གསར་འཛུགས་གནང་རྒྱུའི་ཐོག་མའི་བསམ་བློ་ཅི་ལྟར་འཁོར་སོང་།

        ལན། མ་གཞི་ང་རང་གློག་བརྙན་བཟོ་བར་ཉམས་མྱོང་དང་གོ་རྟོགས་ཆེན་པོ་གང་ཡང་མེད། ཡིན་ནའང་། བོད་ཀྱི་གློག་བརྙན་དུས་སྟོན་གསར་འཛུགས་བྱ་དགོས་དོན་གཙོ་བོ་ནི། ང་རང་སྤྱིར་བཏང་བོད་དོན་ཐོག་ལས་ཀ་བྱེད་མཁན་ཞིག་ཡིན། དེ་སྔོན་དོན་གྲུབ་དབང་ཆེན་ལགས་ཀྱིས་བརྙན་པར་མང་པོ་ཞིག་བརྒྱབ་ནས་སུད་སི་ལ་གསང་བའི་ཐོག་ནས་བཏང་ཐུབ་པ་བྱུང་བ་རེད།  སྐབས་དེར་དོན་གྲུབ་དབང་ཆེན་གྱི་སྤུན་མཆེད་ཀྱིས་བརྙན་པར་མང་པོ་ཞིག་ང་ཚོར་བསྟན་ཏེ།  དེ་དག་ག་རེ་བྱེད་དགོས་མིན་དང་ཁོ་རང་གིས་གློག་བརྙན་གང་ཡང་བཟོ་ཤེས་ཀྱི་མེད་སྐོར་བརྗོད་བྱུང་། དེར་བརྟེན་ང་ཚོ་བོད་དོན་ཐོག་ལས་ཀ་བྱེད་མཁན་གྲོགས་པོ་ཁ་ཤས་འཛོམས་ཏེ།  བརྙན་པར་ཡོད་ན་ང་ཚོས་གློག་བརྙན་ཞིག་བཟོ་འཇོག་ཞུས་པ་ཡིན། དེ་དུས་ང་ཚོར་གློག་བརྙན་བཟོ་བའི་མ་དངུལ་དང་ཉམས་མྱོང་གང་ཡང་ཡོད་པ་མ་རེད། ཡིན་ནའང་། ང་ཚོས་ཚོགས་པ་ཞིག་བཟོས་ཏེ་སེམས་ཤུགས་སྐྱེད་པའི་ཐོག་ནས། གྲོགས་པོ་ངོ་ཤེས་ཏོག་ཙམ་གློག་བརྙན་བཟོ་བར་ཉམས་མྱོང་ཡོད་མཁན་ཚོར་སྐད་ཆ་དྲིས་ཞོར་གློག་བརྙན་བཟོ་རྒྱུ་མགོ་བཙུགས་པ་ཡིན། སྟབས་ལེགས་པ་ཞིག་ལ་ཕྱི་རྒྱལ་གྱི་གློག་བརྙན་བཟོ་མཁན་ཨ་ཅག་ཅིག་གིས་ང་ཚོར་སློབ་སྟོན་གནང་སོང་།  དེ་ལྟར་དོན་གྲུབ་དབང་ཆེན་གྱིས་ཆུ་ཚོད་ ༤༠ རིང་བརྒྱབ་པའི་བརྙན་པར་དེ།  ང་ཚོས་གང་མགྱོགས་མགྱོགས་ཀྱི་སྒོ་ནས་༼འཇིགས་བྲལ༽ཞེས་པའི་གློག་བརྙན་དེ་བཟོ་ཐུབ་པ་བྱུང་བ་རེད།  གློག་བརྙན་དེ་ང་ཚོ་བོད་པ་ཚང་མའི་ཚབ་ལ་སྦེལ་ཇམ་ནས་སྟོན་ཐུབ་པ་བྱུང་བ་མ་ཟད། གློག་བརྙན་དེ་སྐད་གྲགས་ཆེན་པོ་བྱུང་སྟེ་འཛམ་བུ་གླིང་གི་ལུང་པ་གང་སར་སྟོན་ཐུབ་པ་བྱུང་བ་རེད། ང་ཚོས་དམིགས་ཡུལ་ནི་དོན་གྲུབ་དབང་ཆེན་ལགས་ཀྱི་ཆེད་དུ་ལས་འགུལ་སྤེལ་རྒྱུ་དེ་རེད། རྒྱུ་མཚན་དོན་གྲུབ་དབང་ཆེན་ལགས་བཙོན་ཁང་ནང་ཡོད་པ་རེད། ད་ལྟ་དོན་གྲུབ་དབང་ཆེན་ཁོང་རྒྱལ་སྤྱིའི་སྒང་སྐད་གྲཊ་ཆེན་པོ་བྱུང་བ་རེད། ཡིན་ནའང་། ཡུ་རོབ་དང་རྒྱ་གར་ལུང་པ་སོཊ་གང་ཡིན་ཡང་། མི་ཞིག་གློ་བུར་སྐད་གྲགས་བྱུང་བའི་རྗེས་ག་ལེར་མིང་དེ་བརླག་འགྲོ་རྒྱུའི་ཉེན་ཁ་ཡོད་པ་རེད།  བོད་ནང་བཙོན་པ་ཧ་ཅང་མང་པོ་ཡོད་ཀྱང་དེ་དག་གི་མིང་དང་ཁོང་ཚོ་གང་དུ་ཡོད་མེད་འཛམ་གླིང་གིས་ཤེས་ཐུབ་ཀྱིན་ཡོད་པ་མ་རེད།  གནས་སྟངས་དེ་ལྟ་བུ་ཆགས་པ་ཡིན་ན་ཧ་ཅང་སེམས་པ་སྐྱོ་དགོས་པ་རང་རེད། དོན་གྲུབ་དབང་ཆེན་ལགས་ཀྱིས་པར་བརྒྱབ་པ་རྣམས་གློག་བརྙན་དུ་བཟོས་ནས་སྟོན་མཁན་ང་ཚོ་ཆགས་ཡོད་སྟབས། ཁོང་གི་མིང་མ་བརླག་པ་ཞིག་བྱ་རྒྱུར་ང་ཚོར་འགན་ཡོད་པ་རེད། དེར་བརྟེན། དོན་གྲུབ་དབང་ཆེན་དྲན་གསོའི་ཆེད་དུ་བོད་ཀྱི་གློག་བརྙན་དུས་ཆེན་འདི་གསར་འཛུགས་བྱས་པ་ཡིན། ༢༠༠༨ ལོར་དོན་གྲུབ་དབང་ཆེན་ཁོང་རྒྱ་ནག་གི་བཙོན་ལ་བཅུག་པ་རེད། ༢༠༠༩ ལོར་ང་ཚོས་ཁོང་ལ་དྲན་གསོའི་ཆེད་བོད་ཀྱི་གློག་བརྙན་དུས་སྟོན་དང་པོ་དེ་མགོ་བཙུགས་པ་ཡིན། 

        དྲི་བ། ཁྱེད་ཚོའི་ཚོགས་པར་ཚོགས་མི་ག་ཚོད་ཡོད། ད་ལྟའི་བར་གློག་བརྙན་དང་འབྲེལ་བའི་ལས་ཀའི་བརྒྱུད་རིམ་ཁྲོད་དཀའ་ངལ་ཆེ་ཤོས་ག་རེ་འཕྲད་ཀྱི་འདུག  

        ལན། ང་རང་སུད་སི་ནས་དྷ་རམ་ས་ལར་བསླེབས་ཏེ་ལོ་གཉིས་ལྷག་ཕྱིན་སོང་། ད་ལྟའི་ཆར་ང་ཚོ་བོད་ཀྱི་གློག་བརྙན་བཟོ་སྐྲུན་ཁང་ལ་ཚོགས་མི་ག་ཚོད་ཡོད་མེད་ངས་ཞེ་དྲག་ལབ་ཐུབ་ཀྱི་མི་འདུག དང་པོ་མགོ་བཙུགས་དུས་སྒང་ལ་སུད་སིར་ང་ཚོར་ཚོགས་མི་དྲུག་ཡོད། རྗེས་ཕྱོགས་ག་ལེར་ཚོགས་མི་གཞོན་པ་དེ་འདྲ་བསླེབ་ཡོང་གི་རེད། ང་ཚོ་རྒན་པ་ཚོ་རིམ་པས་ཕྱིར་ཐོན་པ་དང་གཞོན་པ་ཚོས་འགན་ལེན་ཡོང་གི་རེད་བསམ་གྱི་འདུག དཀའ་ངལ་གྱི་ཐད་ནས། སུད་སི་དང་དྷ་རམ་ས་ལའི་བོད་ཀྱི་གློག་བརྙན་དུས་ཆེན་གཉིས་ཀྱི་དཀའ་ངལ་ཁ་ཁ་རེད། སུད་སི་ནང་ང་ཚོ་བོད་པའི་ལས་ཀ་བྱེད་མཁན་ཚོས་སེམས་ཤུགས་སྐྱེད་དེ། ནམ་རྒྱུན་སོ་སོའི་ལས་ཀའི་ཞོར་ནས་གནང་གི་ཡོད་པ་རེད། དེར་དཀའ་ངལ་གཙོ་བོ་དུས་ཚོད་མང་པོ་མེད་སྟབས། ལས་ཀ་དེ་ག་ཚོད་ཀྱིས་སྤུས་དག་པོ་བྱས་པ་ཡིན་ནའང་། སོ་སོའི་འདོད་པ་ནང་བཞིན་བྱེད་མ་ཐུབ་པའི་དཀའ་ངལ་འདུག དྷ་རམ་ས་ལར་མཚོན་ན་བོད་པ་མང་པོ་ཡོད་པ་རེད།  དངོས་གནས་བྱས་ན་ཡག་པོ་ཞིག་ཡོང་རྒྱུར་རེ་བ་འདུག ཡིན་ནའང་། དྷ་རམ་ས་ལར་ཚོཊ་པ་མང་པོ་དང་སྒྲིག་གཞི་མང་པོ་ཡོད་པ་དང་། གཅིག་ནས་རྒྱ་གར་གྱི་འགྲོ་སྟངས་དེ་ངས་མགོ་ཚོས་ཀྱི་མི་འདུག ཚང་མ་ག་ལེ་བྱས་ཏེ་སྐད་ཆ་མང་པོ་བཤད་དགོས་པ་དེ་དཀའ་ལས་ཞེ་དྲག་ཁག་པོ་འདུག  དེ་བཞིན། མི་མང་ལ་གློག་བརྙན་གལ་ཆེན་པོ་ཡིན་པའི་གོ་རྟོགས་སྤེལ་རྒྱུའི་ཐད་ནས་ཀྱང་དཀའ་ཁག་འདུག 

        དྲི་བ། བོད་ཀྱི་གློག་བརྙན་དུས་སྟོན་བརྒྱུད་ནས་སྐར་མ་ ༥ ཅན་གྱི་གློག་བརྙན་ཐུང་གྲས་ཀྱི་འགྲན་སྡུར་ཞིག་གོ་སྒྲིག་གནང་བཞིན་པ་ལྟར།   གློག་བརྙན་ཐུང་གྲས་འགྲན་བསྡུར་དེ་གཙོ་གང་ལ་དམིགས་པ་ཞིག་ཡིན་ནམ།    

        ལན། དེང་སྐབས་འཛམ་གླིང་སྒང་གློག་བརྙན་དང་དྲ་རྒྱ་ནི་ཧ་ཅང་གལ་ཆེན་པོ་ཆགས་ཀྱིན་ཡོད་པ་རེད། ཡིན་ནའང་། ང་ཚོ་བོད་པའི་སྤྱི་ཚོགས་ནང་གློག་བརྙན་སྒྱུ་རྩལ་ལ་མཐོང་ཞེ་དྲག་གནང་གི་མི་འདུག དེར་བརྟེན། བོད་པའི་གཞོན་སྐྱེས་ཚོར་གློག་བརྙན་བཟོ་རྒྱུར་སེམས་ཤུགས་སྐྱེད་ཐབས་དང་། ད་ལྟའི་ཆར་བོད་པའི་ནང་གློག་བརྙན་བཟོ་མཁན་ཉམས་མྱོང་ཅན་ཁ་ཤས་ཡོད་སྟབས། གློག་བརྙན་དུས་སྟོན་འདི་བརྒྱུད་ནས་ཁོང་ཚོ་དང་གཞོན་སྐྱེས་ཚོ་མཉམ་དུ་ཐུག་འཕྲད་ཀྱིས་ཕན་ཚུན་ཉམས་མྱོང་གོ་སྡུར་ཡོང་ཐབས། བོད་པའི་གློག་བརྙན་བཟོ་མཁན་ཚོའི་གློག་བརྙན་རྣམས་སྤྱི་ཚོཊ་ཁྲོད་ཁྱབ་བསྒྲཊ་དང་གཟིཊ་འབུལ་གྱི་གོ་སྐབས་བསྐྲུན་ཐབས་བཅས་ལ་དམིགས་ཏེ། ང་ཚོས་སྐར་མ་ ༥ ཅན་གྱི་གློག་བརྙན་ཐུང་ཐུང་ཞིག་བཟོ་བཅུག་གི་ཡོད། མི་མང་པོ་ཞིག་གིས་སྐར་མ་ ༥ རིང་གི་གློག་བརྙན་ཐུང་ཐུང་ཟེར་དུས་མཐོང་ཆུང་བྱེད་ཀྱི་ཡོད་པ་རེད། ཡིན་ནའང་། སྒྲུང་གཅིག་སྐར་མ་ ༥ ནང་ལ་བཤད་ཐུབ་རྒྱུ་དེ་ཧ་ཅང་ཁག་པོ་ཡོད།  མི་ཞིག་གིས་སྒྲུང་ཞིག་སྐར་མ་ ༥ ནང་བཤད་ཐུབ་པ་ཡིན་ན། གློག་བརྙན་ཆེན་པོ་བཟོ་རྒྱུ་ཏོག་ཙམ་ལས་སླ་བོ་ཡོད་པ་རེད།

        དྲི་བ།  སྐར་མ་ ༥ ཅན་གྱི་གློག་བརྙན་ཐུང་གྲས་འགྲན་བསྡུར་ནང་ཞུགས་རྒྱུར་ཆ་རྐྱེན་གང་དག་ཚང་དགོས་པ་རེད།  འགྲན་བསྡུར་ཁྲོད་བྱ་དགའ་ཐོབ་མཁན་དག་ལ་གཟེངས་རྟགས་ག་རེ་སྤྲོད་ཀྱི་ཡོད་དམ། 

        ལན། གློག་བརྙན་ཐུང་གྲས་འགྲན་བསྡུར་ནང་ཞུགས་པ་ལ་ང་ཚོར་གཏན་འབེབས་ཀྱི་ཁྲིམས་སྒྲིག་ཞིག་ཡོད། གཅིག གློག་བརྙན་འགྲན་ནང་ཞུགས་མཁན་ནི་བོད་པ་ཞིག་ཡིན་དགོས་པ།  ཡང་ན། ཨ་ཁུ་དང་ཨ་ནེ་གང་རུང་བོད་པ་ཡིན་མཁན་ཞིག་དགོས་ཀྱི་ཡོད་པ་རེད། གཉིས། གློག་བརྙན་འགྲན་བསྡུར་ནང་ཞུགས་མཁན་གྱི་མིའི་ལོ་ཚད་ནི་ལོ་ ༡༠ ནས་ ༡༠༠ བར་ཡིན་དགོས། གསུམ་པ། མི་མང་པོ་མཉམ་རུབ་ཀྱིས་ལས་ཀ་བྱེད་པ་དང་། ཡང་ན། ཕྱི་རྒྱལ་དང་གྲོགས་པོ་གཞན་མཉམ་དུ་ལས་ཀ་བྱས་ན་འགྲིག་མོད། འཁྲབ་ཁྲིད་པ་དང་བརྙན་ལེན་པ་སོགས་ལས་ཀ་གཙོ་བོ་བྱེད་མཁན་དེ་བོད་པ་ཞིག་ཡིན་དགོས།  བཞི། མི་གཞན་གྱིས་བརྒྱབ་པའི་བརྙན་པར་དང་། མི་གཞན་གྱིས་བཟོས་པའི་གློག་བརྙན་བརྐུ་བཤུ་བྱེད་མི་ཆོག་པ།  ལྔ་པ། ལོ་རེའི་འགྲན་བསྡུར་གློག་བརྙན་གྱི་བརྗོད་གཞི་དང་མ་འགལ་བ།  དྲུག  ལོ་རེའི་འགྲན་ཞུགས་གློག་བརྙན་བསྡུ་བའི་དུས་བཅད་ནང་ཚུད་གློག་བརྙན་འབྱོར་ཐུབ་པ་བྱེད་དགོས་པ་བཅས་རེད།  འགྲན་ཞུགས་གློག་བརྙན་ཁྲོད་ཨང་དང་པོ་ཐོབ་མཁན་ལ་ཨ་སྒོར་ ༥༠༠ དང་། ཨང་གཉིས་པ་ཐོབ་མཁན་ལ་ཨ་སྒོར་ ༣༠༠ ། ཨང་གསུམ་པ་ཐོབ་མཁན་ལ་ཨ་སྒོར་ ༢༥༠ ། མི་མང་གི་དགའ་མོས་ཐོབ་མཁན་གློག་བརྙན་ལ་ཨ་སྒོར་ ༢༠༠ བཅས་ཀྱི་བྱ་དགའ་སྤྲོད་ཀྱི་ཡོད།

        དྲི་བ། ད་ལོ་སྐར་མ་ ༥ ཅན་གྱི་གློག་བརྙན་ཐུང་གྲས་འགྲན་བསྡུར་ཁྲོད་ཞུཊ་མཁན་མི་ག་ཚོད་འདུག བྱ་དགའ་མི་གང་དག་ལ་ཐོབ་སོང་ངམ། 

        ལན། ད་ལོ་ཨང་དང་པོ་ཝེ་ཐི་ནམ་ནས་ཡིན་པའི་ཚེ་རིང་བཀྲ་ཤིས་རྒྱལ་ཐང་ལགས་ལ་ཐོབ་འདུག ཁོང་ང་ཚོའི་གློག་བརྙན་འགྲན་བསྡུར་ནང་ཞུགས་པར་ཧ་ཅང་དགའ་བོ་བྱུང་། བོད་པའི་གཞོན་སྐྱེས་ཚོར་གློག་བརྙན་མཁས་པ་དཔེ་ལྟ་ས་ཞིག་དགོས་ཀྱི་ཡོད་པ་རེད། ང་ཚོས་ཐེངས་འདིར་གཟིགས་འབུལ་ཞུས་པའི་ཚེ་རིང་བཀྲ་ཤིས་རྒྱལ་ཐང་ལགས་ཀྱི་གློག་བརྙན་དེ་ནི། ཧྥ་རན་སིར་ལོ་ལྟར་འཛམ་གླིང་ནང་གློག་བརྙན་ཡག་ཤོས་༡༠ བདམས་ཏེ་སྟོན་གྱི་ཡོད་པ་ལྟར། ད་ལོར་བདམས་པའི་གྲས་སུ་ཁོང་གི་གློག་བརྙན་དེ་ཚུད་ཡོད་པ་རེད། བོད་པ་ཞིག་གི་གློག་བརྙན་ཚུད་ཐུབ་པ་དེ་ནི་ང་ཚོའི་སྤོབས་པ་རེད། དེ་བཞིན། ང་ཚོའི་སྐར་མ་ ༥ ཅན་གྱི་གློག་བརྙན་འགྲན་བསྡུར་ཁྲོད་དུའང་ཁོང་ལ་བྱ་དགའ་ཨང་དང་པོ་ཐོབ་པ་རེད།  ཁོང་གི་གློག་བརྙན་དེ་དག་གིས་ཐེངས་འདིར་གློག་བརྙན་བཟོ་མཁན་གཞོན་སྐྱེས་ཚོར་སློབ་སྦྱོང་ཡག་པོ་ཞིག་རག་སོང་བསམ་གྱི་འདུག  ད་ལོ་ཨང་གཉིས་པ་གཉིས་འདུག གཅིག་དྷ་ས་མེག་གྷན་ནས་ཡིན་པའི་བསྟན་འཛིན་བུ་ཆུང་ལགས་རེད། གཅིག་ལ་དྭགས་ནས་ཡིན་པའི་དགེ་ལེཊ་པ་སངས་ལཊ་རེད། མི་མང་གི་དགའ་མོས་ཐོབ་མཁན་གྱི་གློག་བརྙན་དེ་བསྟན་འཛིན་བུ་ཆུང་ལཊ་ལ་ཐོབ་སོང་། 

        དྲི་བ། བོད་ཀྱི་གློག་བརྙན་དུས་སྟོན་ཐོག་ཆེད་དུ་གཟིགས་འབུལ་ཞུ་བཞིན་པའི་འགྲན་ཞུགས་མ་ཡིན་པའི་གློག་བརྙན་གཞན་པ་རྣམས་ཅི་ལྟར་འདེམས་སྒྲིག་བྱེད་ཀྱིན་ཡོད་དམ། 

        ལན། ང་རང་ཚོ་བོད་ཀྱི་གློག་བརྙན་བཟོ་སྐྲུན་ཁང་གི་ངོས་ནས། ཐོག་མར་ཚོཊ་མི་སོ་སོས་བསམ་འཆར་ཞུས་ཏེ། གློག་བརྙན་གང་བསྟན་ན་ཡག་མིན་ཕན་ཚུན་ལ་གྲོས་སྡུར་གནང་ཐོག་དེའི་ཐད་ཚོཊ་འདུ་ཚོཊ་ཀྱི་ཡོད། ཡིན་ནའང་། ང་ཚོ་ཚོཊ་པའི་ནང་ལ་གློག་བརྙན་བཟོ་མཁན་ཆེད་མཁས་པ་བློ་བཟང་ལགས་ཡོད། ཁོང་གིས་སྒྱུ་རྩལ་ལམ་སྟོན་པའི་འགན་འཁུར་གྱིན་ཡོད་པ་རེད། དེར་བརྟེན། གློག་བརྙན་གང་ཡག་པོ་ཡོད་མེད་ཐད་ནས་མང་ཆེ་བ་ཞིག་ཁོང་གིས་ཐག་གཅོད་གནང་གི་ཡོད། 

        དྲི་བ།  ཁྱེད་ཚོས་ངོས་ནས་འགྲན་ཞུགས་གློག་བརྙན་གྱི་བརྗོད་གཞི་ཅི་ལྟར་འཚོལ་གྱིན་ཡོད།  ལོ་སྔ་ཕྱི་གཉིས་བསྡུར་ན་འགྲན་ཞུགས་པ་དག་གི་བར་ཁྱད་པར་ག་རེ་མཐོང་གི་འདུག་གམ།   

        ལན། ང་ཚོའི་འགྲན་བསྡུར་གློག་བརྙན་གྱི་བརྗོད་གཞིའི་ཐད་ནས། ང་ཚོའི་ངོས་ནས་གཅིག་མིན་གཅིག་བོད་པ་ཁོ་ནའི་སྐོར་ལ་བཟོ་དགོས་ཟེར་གྱི་ཡོད་པ་མ་རེད། དེར་བརྟེན། གློག་བརྙན་གྱི་བརྗོད་གཞི་འཛམ་གླིང་སྤྱི་ཡོངས་ལ་ཁྱབ་པ་ཞིག་བདམས་ཀྱིན་ཡོད། ལོ་སྔོན་མའི་བརྗོད་གཞི་ནི་ཨ་མ་དང་། ད་ལོའི་བརྗོད་གཞི་ནི་སེམས་ཤུགས་ཡིན། ལོ་རྗེས་མའི་བརྗོད་གཞི་ནི་ཞལ་ཟས་ཡིན།  གློག་བརྙན་བཟོ་མཁན་སྒྱུ་རྩལ་བ་སོ་སོའི་ངོས་ནས་ཞལ་ཟས་ཀྱི་སྐོར་ལ་རྣམ་པ་མི་འདྲ་བའི་གློག་བརྙན་སྣ་ཚོགས་ཤིག་བཟོ་ཐུབ་པའི་རེ་བ་ཡོད། ད་ལོ་འགྲན་ཞུགས་ཁྲོད་བོད་ཁྱིམ་སློབ་གྲྭའི་སློབ་ཕྲུག་གཉིས་འདུག མ་འོངས་གཞོན་སྐྱེས་དེ་ལས་མང་པོ་འཐོན་ཐུབ་པ་དང་།  ལོ་རེ་བཞིན་བོད་པའི་གློག་བརྙན་གྱི་གནས་ཚད་མཐོ་རུ་འགྲོ་ཐུབ་རྒྱུའི་རེ་བྱེད་བཞིན་ཡོད། ལོ་སྔ་ཕྱིའི་འགྲན་ཞུགས་པའི་ཁྱད་པར་གཙོ་བོ་ནི། ལོ་སྔོན་མར་མཚོན་ན་ཨ་རི་དང་ཡུ་རོབ། རྒྱ་གར་སོགས་ལུང་པ་མང་པོ་ཞིག་ནས་འགྲན་ཞུགས་པ་བསླེབས་འདུག ད་ལོར་མཚོན་ན་རྒྱ་གར་ནང་དུ་འགྲན་ཞུགས་པ་ ༥ བསླེབས་འདུག  ལོ་སྔོན་ལས་མང་དུ་ཕྱིན་ཡོད་པ་རེད། ནོར་ཝེ་ནས་ ༡ དང་ལ་དྭགས་ནས་ ༡ འདུག ཨ་རི་དང་ཨོ་སི་ཊོ་ལི་ཡ་སོགས་ནས་ད་ལོ་གཅིག་ཀྱང་བསླེབས་མི་འདུག དྷ་རམ་ས་ལར་གཞོན་སྐྱེས་མང་པོར་གློག་བརྙན་བཟོ་འདོད་འདུག ཡིན་ནའང་། ཁོང་ཚོར་ལག་ཆ་དང་དཔལ་འབྱོར་གྱི་དཀའ་ངལ་ཏོག་ཙམ་འཕྲད་བཞིན་ཡོད་འདུག

        དྲི་བ། བོད་ཀྱི་གློག་བརྙན་དུས་སྟོན་འདི་མགོ་འཛུགས་ནས་ལོ་ ༣ ཕྱིན་པའི་བརྒྱུད་རིམ་ལས། བཙན་བྱོལ་བོད་མིའི་སྤྱི་ཚོགས་ཁྲོད་གློག་བརྙན་ལས་རིགས་སྐོར་ལ་བརྩི་མཐོང་དང་ལྟ་སྟངས་ག་འདྲ་ཞིག་བསླེབས་ཡོང་གི་འདུག་གམ། 

        ལན། ངས་བསམ་ན་དེ་ལ་རིགས་གཉིས་སུ་བགར་དགོས་ཀྱི་འདུག བཙན་བྱོལ་བོད་མིའི་སྤྱི་ཚོགས་ཁྲོད་མི་མང་པོ་ཞིག་གིས་གློག་བརྙན་ལ་མཐོང་ཆུང་གནང་གི་འདུག གློག་བརྙན་ནི་སྣང་བ་སྐྱིད་པོ་གཏོང་བའི་ལས་ཀ་ཙམ་ཞིག་ལས་ཡོན་ཏན་གྱི་ཁོངས་སུ་བརྩི་ཡི་མི་འདུག ཡང་གཞོན་སྐྱེས་ཚོའི་ངོས་ནས་གློག་བརྙན་ལ་དགའ་བོ་གནང་གི་འདུག ཁོང་ཚོས་གློག་བརྙན་གྱི་སྐོར་ལ་བགྲོ་གླེང་དང་དོ་སྣང་ཞེ་དྲཊ་གནང་བཞིན་པ་མ་ཟད། ཁོང་ཚོ་གློག་བརྙན་ལས་རིཊ་ལ་ཡིད་ཆེས་བརྟན་པོ་འདུག 

        དྲི་བ། ད་ལྟའི་བོད་པའི་སྤྱི་ཚོགས་ཀྱི་གནས་བབ་འདིའི་ངོས་ཐད་ནས་བལྟས་ན། གློག་བརྙན་སྒྱུ་རྩལ་ལས་རིགས་འདི་ཁྱེད་ཀྱིས་གལ་ཆེ་ཆུང་ག་འདྲ་ཞིག་མཐོང་གི་འདུག་གམ།  

        ལན། ང་རང་ངོས་ནས་གློག་བརྙན་ནི་ཧ་ཅང་གལ་ཆེན་པོ་ཞིག་ལ་མཐོང་གི་ཡོད། གློག་བརྙན་བརྒྱུད་ནས་སྒྲུང་བཤད་དུས་མིའི་སེམས་ཀྱི་གཏིང་ལ་ཚོར་ཤུགས་སློང་ཐུབ་ཀྱི་ཡོད་པ་རེད། དེར་བརྟེན། བོད་མིའི་ཆབ་སྲིད་དང་རིག་གཞུང་གི་དཀའ་ངལ་གང་ཡིན་ཡང་། གློག་བརྙན་གྱི་ལམ་ནས་སྟོན་ཐུབ་པ་ཡིན་ན་འཛམ་གླིང་མི་མང་ཚང་མས་ཤེས་རྟོགས་སླ་བ་དང་། མི་ཚང་མའི་སེམས་ཀྱི་གཏིང་ལ་ཚོར་བ་སྤྲོད་ཐུབ་རྒྱུར་ཕན་ཐོགས་ཆེན་པོ་ཡོད་པ་རེད་བསམ་གྱི་འདུག

        དྲི་བ། མ་འོངས་པར་གློག་བརྙན་དུས་སྟོན་འདི་བོད་པའི་སྤྱི་ཚོགས་ནང་ཡར་རྒྱས་ཚཊ་ཚུད་ཡོང་རྒྱུའི་ཐད། གཙོ་བོ་ཕྱོགས་གང་དག་ནས་དམ་འཛིན་དང་ཤུཊ་སྣོན་རྒྱག་དགོས་ཀྱི་འདུག་གམ། 

        ལན། ངའི་བསམ་ན་མི་སྒེར་གྱི་ངོས་ནས་ཡིན་ན་རེད། གཞུང་གི་ཐོག་ནས་ཡིན་ན་རེད། བོད་པའི་གློག་བརྙན་གྱི་ཐོག་ལ་རྒྱབ་སྐྱོར་བྱ་རྒྱུ་དེ་ཧ་ཅང་གལ་ཆེན་པོ་མཐོང་གི་འདུག བོད་པའི་གཞོན་སྐྱེས་ཚོར་བལྟས་ཡོང་དུས་ཡོན་ཏན་གང་འཚམ་ཡོད་པའི་བཟོ་འདུག ཡིན་ནའང་། ཁོང་ཚོར་ཡོན་ཏན་འདོན་སའི་སྡིངས་ཆ་དེ་མི་འདུག ཁོང་ཚོར་ཡོད་པའི་ཡོན་ཏན་དེ་དག་སྤྱི་ཚོགས་ནང་འདོན་ཐུབ་པ་བྱ་དགོས་པ་རེད། ང་ཚོ་བོད་པའི་ལྟ་བ་དང་འདུ་ཤེས་འཛིན་སྟངས་ཤིག་ལ་བོད་རང་གི་ཤེས་རིག་རྙིང་པ་རྣམས་མ་བརླག་པར་ཉར་ཐུབ་ཐད་ཤུགས་རྒྱག་རྒྱུ་ཁོ་ན་མ་གཏོགས། རིག་གནས་གསར་བའི་ཐད་དོ་སྣང་ཤུགས་ཆེན་པོ་གནང་གི་མི་འདུག འཛམ་གླིང་འདི་སྐོར་བ་བརྒྱབ་ནས་འགྱུར་ལྡོག་འགྲོ་བཞིན་ཡོད་སྟབས། ང་ཚོའང་འཛམ་གླིང་འདི་དང་མཉམ་དུ་བསྐྱོད་དགོས་པ་རེད།  གློག་བརྙན་གྱིས་མཚོན་པའི་རིག་གནས་གསར་པའི་སྐོར་ལ་རྒྱབ་སྐྱོར་ཤུགས་ཆེན་པོ་མི་གནང་བ་དེ་ནི་ཕངས་པོ་རེད། མ་འོངས་པར་དེ་དག་གི་ཐད་རྒྱབ་སྐྱོར་གནང་ན་ཡག་པོ་ཡོང་ས་རེད་བསམ་གྱི་འདུག 

        དྲི་བ།  སྤྱིར་བཏང་བོད་པའི་སྤྱི་ཚོགས་ཁྲོད་གློག་བརྙན་ལས་རིགས་རྐང་ཚུགས་ཐུབ་རྒྱུར།  འཁྲབ་གཞུང་རྩོམ་པ་པོ་དང་། འཁྲབ་ཁྲིད་པ།  འཁྲབ་སྟོན་པ། སྒྲིག་བཟོ་བ་སོགས་ཆེད་ལས་མི་སྣ་མང་པོ་ཞིག་འཛོམས་དགོས་ཀྱི་ཡོད་རེད།  དེ་དག་ཐད་ཁྱེད་ཚོ་ཚོགས་པའི་ངོས་ནས་དམིགས་བསལ་འཆར་སྣང་ག་རེ་ཡོད་དམ།

        ལན། དེ་འདྲ་ཞིག་འབྱུང་ཐུབ་རྒྱུར་རེ་བ་ཆེན་པོ་ཡོད་དེ། ང་ཚོའི་ངོས་ནས་འཆར་གཞི་དམིགས་བསལ་གང་ཡང་མེད། རྒྱུ་མཚན་ང་ཚོ་ཚོགས་པ་ཧ་ཅང་ཆུང་དྲགས་པ་རེད། དཔལ་འབྱོར་ཞེ་དྲག་ཡོད་པ་མ་རེད། ལས་ཀ་ཆེན་པོ་དེ་འདྲ་བྱེད་འདོད་ཡོད་ནའང་བྱེད་ཐུབ་ཀྱི་མི་འདུག དཔེར་མཚོན་ཙམ་ཞུས་ན། ང་ཚོས་གློག་བརྙན་དང་པོ་འཇིགས་བྲལ་བཟོས་ཏེ་བསྟན་པ་རེད། དེ་འཛམ་གླིང་སྒང་ཡག་པོ་བྱུང་ཡོད། གློག་བརྙན་གཉིས་པ་ཞིག་བཟོ་རྒྱུ་མགོ་བཙུགས་ཏེ་ལོ་གཉིས་ཕྱིན་སོང་། མ་དངུལ་མེད་སྟབས་ད་དུང་བཟོས་ཚར་མ་སོང་། ཡིན་ནའང་། ང་ཚོའི་ངོས་ནས་གཞུང་དང་ཚོགས་པ་ཁག་ལ་བསམ་འཆར་ཕུལ་ཏེ། གློག་བརྙན་ལས་རིགས་ཐོག་ལ་རྒྱབ་སྐྱོར་ཡོང་རྒྱུའི་འབོད་སྐུལ་ཞུ་བཞིན་ཡོད། ང་ཚོས་ལས་ཀ་ཤུགས་ཆེ་བ་དོན་གྲུབ་དབང་ཆེན་གྱི་ཆེད་དུ་ལས་འགུལ་སྤེལ་རྒྱུ་དེ་ཆགས་ཡོད། ལས་ཀ་དེ་མཇུག་སྐྱེལ་ཐུབ་པ་བྱ་རྒྱུ་དང་། ད་ལྟའི་ཆར་བོད་ཀྱི་གློག་བརྙན་བཟོ་སྐྲུན་ཁང་གིས་བོད་ཀྱི་གློག་བརྙན་དུས་སྟོན་གོ་སྒྲིག་བྱེད་བཞིན་ཡོད་སྟབས། དེའང་མཇུག་སྐྱོང་ཐུབ་པ་བྱ་དགོས་པ་རེད། ད་ལྟ་ང་ཚོ་ཚོགས་པ་ཆུང་ཆུང་ཞིག་ལ་ལས་ཀ་ཆེན་པོ་གཉིས་ཆགས་ཚར་པ་རེད། ད་ལོ་མགོ་ལོག་འཇིགས་མེད་ལགས་ཀྱང་རྒྱ་གཞུང་གི་འཇུ་བཟུང་འོག་གར་སོང་ཆ་མེད་དུ་གྱུར་འདུག  ཁོང་རང་ཡང་ང་ཚོས་འཚོལ་དགོས་ཀྱི་འདུག ཁྱེད་རང་གིས་གསུངས་པ་དེ་དག་ཚོགས་པ་གཞན་གྱིས་བསྒྲུབ་ཐུབ་པ་ཡིན་ན། ང་ཚོའི་ངོས་ནས་དགའ་སྤོབས་ཡོང་ས་རེད།

གསར་འགོད་པ། ཚེ་རིང་རྒྱལ།

༼བོད་ཀྱི་དུས་བབ་སྤྱིའི་འདོན་ཐེངས་ ༥༧༡ ལས་བདམས་བཀོད་བྱས།༽