པུས་བཙུཊ་ཞུ་འབོད་ལ་རྒྱལ་ཚོཊ་ཀྱིས་གསན་བཞེས།

རྒྱལ་ཚོགས་མདུན་པུས་བཙུགས་ལས་འགུལ་སྤེལ་མཁན་བོད་མི་བཞིའི་ཞུ་འབོད་ལ། ཁ་སང་རྒྱལ་ཚོགས་འགྲོ་བ་མིའི་ཐོབ་ཐང་ལས་ཁུངས་ཀྱི་འབྲེལ་ཡོད་དཔོན་རིགས་ནས་གསན་བཞེས་གནང་ཡོད་འདུག

ཟླ་འདིའི་ཕྱི་ཚེས་ ༡༤ མགོ་བཙུགས་ཏེ་ཉིན་ ༣ རིང་སུད་སི་ཇི་ནི་ཝའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལས་ཁུངས་ཀྱི་སྒོ་འགྲམ་དུ་བོད་མི་བཞིས་པུས་བཙུགས་ཀྱི་ཞུ་འབོད་ལས་འགུལ་ཞིག་སྤེལ་བཞིན་པ་ལྟར།  ཁ་སང་ཕྱི་ཚེས་ ༡༦ ཉིན་རྒྱལ་ཚོགས་འགྲོ་བ་མིའི་ཐོབ་ཐང་ལས་ཁུངས་ཀྱི་འགན་འཛིན་ནེ་ཝི་པེ་ལི་མཆོག་ལས་ཁུངས་སུ་ཕེབས་བཞིན་པ་དང་གདོང་ཐུག་བྱུང་ཡོད་པ་དང་། སྐབས་དེར་བོད་མི་ལས་འགུལ་བ་བཞིས་པུས་མོ་ས་བཙུགས་ཏེ་ངུ་འབོད་ཀྱི་ལམ་ནས་བོད་ནང་གི་བོད་མི་ཚོར་རྒྱབ་སྐྱོར་ཡོང་བའི་ཞུ་འབོད་དང་། དགོས་འདུན་དོན་ཚན་ ༤ ཅན་གྱི་སྙན་ཞུ་ཡི་གེ་དེ་དངོས་སུ་ཁོང་གི་ཕྱག་ལ་ཕུལ་ཡོད་འདུག 

དེ་བཞིན། རྒྱལ་ཚོགས་འགྲོ་བ་མིའི་ཐོབ་ཐང་འགན་འཛིན་ནེ་ཝི་པེ་ལི་མཆོག་གིས་ཀྱང་། ཁོང་གིས་ལས་བྱེད་བཏང་སྟེ་བོད་མི་ལས་འགུལ་བ་ཚོའི་བདེ་སྡུག་སྙན་ཞུར་ཉན་རྒྱུའི་ཞལ་བཞེས་གནང་བ་ལྟར།  བོད་མི་ལས་འགུལ་ཚོ་རྒྱལ་ཚོགས་ལས་ཁུངས་ནང་མི་མང་སྤྱི་ཚོགས་ཀྱི་འགྲོ་བ་མིའི་ཐོབ་ཐང་ (Chief Civil Society of the High commissioner for Human Rights) གི་དབུ་འཛིན་ཇོན་རཱའེ་ (June RAY) མཆོག་དང་དངོས་སུ་ཐུག་འཕྲད་ཀྱིས།  བོད་མི་ལས་འགུལ་བ་བཞིས་ཕུལ་བའི་སྙན་ཞུ་ལ་གསན་བཞེས་གནང་ཡོད་པ་མ་ཟད།  དབུ་འཛིན་མཆོག་ནས་བཀའ་ལན་གནང་གི་ཡིན་པའི་ཞལ་བཞེས་ཀྱང་གནང་ཡོད་འདུག

རྒྱལ་ཚོགས་མདུན་པུས་བཙུགས་ཞུ་འབོད་ཀྱི་ལས་འགུལ་སྤེལ་མཁན་བོད་མི་བཞི་ནི། མཁར་ནང་འཕགས་པ་དང་། ཐར་ཤུལ་བསོད་གྲགས། སེར་ཤུལ་ཨུ་རྒྱན་ཚེ་རིང་། འཇིགས་བྲལ་བསྟན་འཛིན་བཞི་ཡིན་པ་རེད།