བཛྲ་རཏྣ།
བོད་ནང་རང་སྲེག་གི་དོན་རྐྱེན་རེ་རེའི་སྐབས་གནས་ཚུལ་བྱུང་ཡུལ་ས་གནས་ས་ཐོག་གི་དྲ་ཚིགས་དང་། ཁ་པར་གྱི་བརྒྱུད་ལམ་ཡོད་ཚད་བཀག་འགོག་གིས་ཕྱི་མི་ནང་ལ་མི་ཚུད་ཅིང་ནང་མི་ཕྱི་ལ་མི་ཐར་བའི་བཀག་རྒྱ་དམ་པོ་བྱས་ཏེ། འཛམ་གླིང་མི་དམངས་ལ་བོད་ཀྱི་དོན་དངོས་ཤེས་སུ་འཇུག་མི་འདོད་པའི་སྲིད་བྱུས་དེ་པེ་ཅིང་སྲིད་གཞུང་སྔར་ལྟར་ཡིན་ནའང་། བར་སྐབས་ཤིག་ནས་བོད་མིའི་རང་སྲེག་གི་རྒྱུ་རྐྱེན་ཁག་ཅིག་བཟའ་ཚང་བར་གྱི་འགལ་ཟླར་བརྟེན་ནས་བྱུང་ཚུལ་དང་། ཡང་ཁག་ཅིག་རྒྱན་ཤོར་གྱིས་རང་སྡུག་མ་ཐེག་པའི་ཡིན་པར་ངོས་ལེན་ཡོང་ཐབས་དང་། དེ་བཞིན་བོད་ཤར་ཕྱོགས་མདོ་སྨད་རེབ་གོང་ཁུལ་གྱི་སྐྱ་སེར་ཚོས་རང་སྲེག་མི་བྱེད་རྒྱུར་ཁག་ཐེག་མཛུབ་ཐེལ་རྒྱག་པ་བཅས་ཀྱི་ཐད་ཞི་དྲག་གིས་བྱེད་ཐབས་ཅི་རིགས་སྤྱོད་བཞིན་པ་ནི། བོད་མིའི་རང་སྲེག་གི་དམིགས་འདུན་དེ་ཚད་མཐོ་བར་བསླེབས་པའི་མངོན་རྟགས་ཤིག་ཏུ་མ་ཟད། པེ་ཅིང་སྲིད་གཞུང་ཡང་གནད་དོན་དེར་གཡོལ་ཅི་ཐུབ་ཀྱི་ཚད་དུ་ལྷུང་བའི་རྟགས་མཚན་ཞིག་ཀྱང་རེད།
བོད་མིས་འཚེ་མེད་ཞི་བའི་ལྟ་གྲུབ་རྨང་གཞིར་བཞག་སྟེ་རང་གི་མངོན་འདོད་རྩོད་ལེན་བྱ་རྒྱུ་རྒྱུན་འཁྱོངས་དང་། བློ་བརྟན་འགྱུར་མེད། ཆོད་སེམས་ཅི་བས་ཆེ་ན། པེ་ཅིང་སྲིད་གཞུང་གིས་དེ་ལ་བཟོད་སྒོམ་མི་ཐུབ་པ་ནི། ང་ཚོས་འདས་པའི་ཉམས་མྱོང་རིམ་པ་ནས་ཚོད་བགམ་ཐུབ་ཅིང་། ཉེ་བའི་ཐད་ནས་ཀྱང་ཕྱི་ཚེས་ ༡༣ ཉིན་རྒྱ་ནག་ཕྱི་སྲིད་མགྲིན་ཚབ་པ་ཧོང་ལིས་ ‘‘ཏཱ་ལའི་བླ་མས་རང་སྲོག་བློས་གཏོང་བྱེད་མཁན་ཚོར་སྐྱོན་བརྗོད་གཏིང་ཟབ་བྱ་རྒྱུའི་ཚབ་ཏུ། བོད་རང་བཙན་གྱི་དམིགས་ཡུལ་འགྲུབ་སླད་གཞན་གྱི་ལུས་སྲོག་བློས་གཏོང་དགོས་རྒྱུར་སྐུལ་མ་བྱེད་བཞིན་ཡོད་པ་རེད་’’ཅེས་དང་། ‘‘ཏཱ་ལའི་བླ་མས་བོད་རང་བཙན་གྱི་དམིགས་ཡུལ་འགྲུབ་ཐབས་སུ་ཉི་ཧོང་ནང་གཏམ་བཤད་སྤེལ་བ་བརྒྱུད་རྒྱ་ནག་ལ་མི་དགའ་མཁན་ཉི་ཧོང་གཡས་ཐལ་སྡེ་ཁག་དང་མཉམ་འབྲེལ་ཐབས་ཤེས་བྱེད་བཞིན་ཡོད་པ་རེད་’’ཅེས་དངོས་ཡོད་གནས་ཚུལ་ལ་བསྙོན་འཛུགས་དང་། རྫུན་གཏམ་ཆེན་པོ་བཤད་དེ་རྒྱ་རིགས་ཀྱིས་མཚོན་འཛམ་གླིང་མི་དམངས་ལ་མངོན་སུམ་འཛེམ་མེད་ཀྱིས་དབུ་སྐོར་འདི་ལྟར་གཏོང་ཕོད་པ་ནི། པེ་ཅིང་སྲིད་གཞུང་གིས་བོད་མིའི་རང་སྲེག་གི་དོན་དངོས་ལ་གཏན་ནས་བཟོད་སྒོམ་ཐུབ་ཀྱི་མེད་པའི་རང་མཚང་ཕྱིར་མངོན་ཡོད།
གཉིས། བཟོད་སྒོམ་མི་ཐུབ་པའི་རྒྱུ་མཚན་བཙལ་བ།
པེ་ཅིང་གིས་ད་རབས་དམིགས་བསལ་བཟོད་སྒོམ་ཐུབ་ཀྱི་མེད་པའི་རྒྱུ་མཚན་གཙོ་བོ་དེ། ད་བར་ཁོང་ཚོས་སྤྱི་ཚོགས་རིང་ལུགས་ཀྱི་བདེ་སྐྱིད་ལྡན་པའི་བོད་ཡུལ་གསར་བ་ཞེས་པའི་དར་ཆ་མཐོན་པོར་སྒྲེང་བའི་ནང་སྙིང་། དུམ་བུར་བགོས་པའི་སི་ཁྲོན་ཁོངས་ཀྱི་བོད་ཁུལ་དང་། ཀན་སུའུ། མཚོ་སྔོན། བོད་རང་སྐྱོང་ལྗོངས་བཅས་བོད་ཆོལ་ཁ་གསུམ་གྱི་ས་ཁྱོན་ཡོངས་ནས་གཅིག་གྱུར་གྱི་འབོད་ཚིག་འོག་བོད་མི་སྐྱ་སེར་ཕོ་མོ་རྒན་གཞོན་དོན་དྲུག་གིས་རང་ལུས་གསོན་པོ་མེ་རུ་བསྲེགས་ནས་རང་གི་མངོན་འདོད་རྩོད་ལེན་བྱས་པ་དེས་རྫུན་ཁུང་ཡོངས་སུ་བརྡོལ་བ་དང་དུས་མཚུངས། གནད་དོན་དེས་འཛམ་གླིང་མི་དམངས་ཧང་སང་དུ་བཅུག་པ་མ་ཟད། མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་དང་། ཨ་རིའི་གཞུང་ཚབ་དང་། འཇར་མན་གཞུང་། ཡོ་རོབ་གྲོས་ཚོགས། ཧྥ་རན་སིའི་གྲོས་ཚོགས། ཌན་མག་གྲོས་ཚོགས། ཉི་ཧོང་གྲོས་ཚོགས་རྣམས་ཀྱིས་རྒྱ་ནག་ལ་སྐྱོན་བརྗོད་དང། དེ་བཞིན་རང་དབང་ལྡན་པའི་རྒྱལ་ཁབ་ཁེ་ན་ཌ་དང་། ཨོ་སི་ཊོ་ལི་ཡའི་གྲོས་ཚོགས་འཐུས་མི་ཁག་ཅིག་གིས་སྔ་རྗེས་སུ་བོད་མིའི་རང་སྲེག་གི་གནད་དོན་གླེང་སློང་བྱས་པས་མཚོན། བོད་མིས་ཆེས་ཚད་མཐོའི་འཚེ་མེད་ཞི་བའི་རང་སྲེག་གིས་མངོན་འདོད་རྩོད་ལེན་བྱེད་ཤུགས་ཆེ་ཆེར་འགྲོ་བཞིན་ཡོད་པས་རེད།
གསུམ། ང་ཚོའི་རྒྱལ་ཁ་ངོ་མ་ནི་ཕྱིར་འཁོན་མི་སློང་བ་དེ་ཡིན།
སྐབས་འདིར་ང་ཚོས་གཟབ་ནན་དགོས་པ་ཞིག་ནི། པེ་ཅིང་སྲིད་གཞུང་གི་མུན་སྒམ་སྦུབས་ཀྱི་དམག་ཇུས་དེ་བོད་མིས་འཚེ་མེད་ཞི་བའི་ངང་རང་སྲེག་གིས་མངོན་འདོད་རྩོད་ལེན་ཀྱི་རྣམ་པ་ཡོད་ཚད་ཁ་ཕྱོགས་གཞན་ལ་བསྒྱུར་ཏེ། མདའ་གཅིག་གིས་གླ་བ་གཉིས་གསོད་པའི་བྱེད་ཐབས་སྤྱོད་ཉེན་ཡོད་པ་དེ་རེད། དེའི་ཐད་ཀྱི་ཉེ་བའི་དཔེ་མཚོན་ཞིག་ནི། ཕྱི་ཟླ་ ༡༠ ཚེས་ ༢༤ ནས་བཟུང་རྒྱ་གཞུང་གིས་མགོ་ལོག་ཁུལ་རྨ་ཆེན་རྫོང་གི་ཞང་སོ་སོའི་ནང་དྲག་རྡུང་ལས་འགུལ་སྤེལ་མགོ་བརྩམས་ཤིང་། དེའི་ཁྲོད་བོད་མི་ལོ་ ༡༥ ཡན་ནས་ ༦༥ མན་གྱི་སྐྱེས་པ་ཡོངས་རྫོགས་ཞུགས་པར་བཙན་བཀའ་བཏང་བའི་དྲག་རྡུང་ལས་འགུལ་དེ་ནང་བོད་མི་ཁག་ཅིག་ལ་རྨས་སྐྱོན་ཆེན་པོ་བཟོས་ཚུལ་གསར་ལམ་ཁག་ཏུ་ཐོན་ཡོད་པ་རེད།
བོད་མིའི་ཁ་དཔེར། ཁྱི་ཁུག་ལ་བཀར་དྲགས་ན། མཆེ་བ་མི་འདོན་ཀ་མེད། ཅེས་པའི་དཔེ་ལྟར། རྒྱུ་རྐྱེན་འདི་ཡིན་ཟེར་རྒྱུ་མེད་པར་རང་དགར་གཅར་རྡུང་དེ་ལྟར་བྱས་ན་བོད་མི་འུ་ཐུག་ནས་དྲག་སྤྱོད་སྤེལ་སྲིད་པ་དང་། གལ་སྲིད་བོད་མིས་དྲག་སྤྱོད་སྤེལ་བ་ཡིན་ན། གཅིག་ནས་བོད་མིའི་རང་སྲེག་ལས་འགུལ་འདིའི་སྣེ་མོ་དྲག་སྤྱོད་པར་བསྒྱུར་བ་དང་། དེ་ལ་བརྟེན་ནས་བོད་མིར་དྲག་གནོན་ཡ་ང་བ་ཞིག་བྱས་ཏེ། རྒྱལ་སྤྱིའི་ཐོག་ལའང་འགྲེལ་བཤད་སྟབས་བདེ་ཞིག་བརྒྱག་ཉེན་ཡོད་པ་རེད། ཕྱོགས་གཅིག་ནས་གནད་དོན་དེས་རྒྱ་རིགས་མི་དམངས་ཁོང་ཁྲོ་ལངས་གཞི་དང་མི་རིགས་རིང་ལུགས་ཀྱི་ལྟ་བ་ཤུགས་སྣོན་བྱེད་པའི་ལག་ཆ་ཞིག་ལའང་བསྒྱུར་སྲིད་སྟབས། སྐབས་འདི་ནས་བོད་མི་ཚོས་ཅིས་ཀྱང་རྣམ་རིག་གྲུང་བོའི་ངང་མེ་མདས་དྲག་ཆར་ཕབ་ཀྱང་འཚེ་མེད་ཞི་བའི་ལྟ་གྲུབ་རྒྱུན་འཁྱོངས་དགོས་པ་ལས། ཕ་རོལ་གྱི་གཡོ་འོག་ཏུ་ཚུད་དེ་དྲག་སྤྱོད་མངོན་དུ་གྱུར་པ་ཡིན་ན། ཕ་རོལ་ལ་དགོས་རྒྱུ་དེ་བསྒྲུབས་པ་རེད་ལ། གཞིས་ལུས་བོད་མི་དོན་དྲུག་གིས་འཚེ་མེད་ཞི་བའི་ངང་རང་སྲེག་གིས་མངོན་འདོད་རྩོད་ལེན་བྱས་པ་རྣམས་ཀྱང་ཆུད་ཟོས་སུ་བཏང་བ་རེད།
བཞི། རྒྱབ་ཕྱོགས་ལ་ཉན་འཇོག་དགོས།
གནད་དོན་གང་ཞིག་ཡིན་ཡང་བཟང་ཕྱོགས་ཀྱི་ཆ་དང་ལྡོག་ཕྱོགས་ཀྱི་ཆ་གཉིས་ཡོད་པ་ལྟར། ང་ཚོས་ངེས་པར་རང་སྲེག་གི་རྒྱབ་གཟུགས་ལ་ལྡོག་ཕྱོགས་ཀྱི་ཆ་ནས་ཉན་འཇོག་དགོས། དེ་ཐད་འཐུས་ཤོར་གྱི་དཔེ་མཚོན་ཞིག་ལོ་རབས་བརྒྱད་ཅུའི་མཇུག་ཏུ་བོད་ཀྱི་རྒྱལ་ས་ལྷ་སའི་ནང་དངོས་སུ་བྱུང་ཡོད། དེ་ཡང་ཕྱི་ལོ་ ༡༩༨༩ ཟླ་ ༣ ཚེས་ ༢ ནས་ལྷ་སར་བསྐྱར་དུ་བོད་མིས་གཞི་རྒྱ་ཆེ་བའི་ངོ་རྒོལ་གྱེན་ལངས་སྐབས། ས་གནས་དཔོན་རིགས་གཙོ་གྲས་ཁག་ཅིག་གིས་ཀྱང་ཤེས་ཚོར་གཏན་ནས་མེད་པར། ཕྱི་ཟླ་ ༣ ཚེས་ ༥ ཉིན་བོད་སྡོད་ཉེན་རྟོག་དྲག་ཆས་དམག་དཔུང་ལ་པེ་ཅིང་དབུས་གཞུང་ཉེན་རྟོག་བཀའ་བཀོད་ཁང་གིས་དམག་རྒྱག་སྐུལ་སློང་གི་བཀའ་བརྒྱ་འབྱོར་རྗེས། འཕྲལ་དུ་དམག་རྒྱག་འཆར་བཀོད་སྒྲིག་པའི་གོ་རིམ་ཡོད་ཚད་ཆེས་འཇིགས་སྣང་ཡོང་གཞི་ཤ་སྟག་ཡིན་ཞིང་། དེའི་དོན་ཚན་བཞི་བར་ནང་གསེས་དོན་ཚན་བདུན་ཅན་གྱི་གསང་ཇུས་ཡོད་པའི་ཆ་ཤས་ཤིག ‘‘ གསང་ཉུལ་ཡན་ལག་རུ་ཁག་ནས་མི་སུམ་བརྒྱ་སྐོར་ཞིག་མི་མང་དང་། གྲྭ་བའི་ནང་འཛུལ་ནས་ཚེས་ལྔ་ཉིན་གྱི་ཞོགས་པ་བར་སྐོར་ནང་དང་། ལྷ་སའི་ཟིང་ཆ་ཡོད་སའི་ས་གནས་ཁག་ལ་བསྐྱོད་དེ་སྤྱི་བདེ་ཐིང་དང་གྲོང་ཁྱེར་སྤྱི་བདེ་ཅུས་ཀྱི་དཀྱུས་ཆས་སྤྲོས་པའི་ཉེན་རྟོག་པར་རམ་འདེགས་བྱས་ནས་ཆེད་མངགས་རྣམ་པ་ཟང་ཟིང་བཟོ་རྒྱུའི་ལས་འགན་སྒྲུབ་དགོས། གཙུག་ལག་ཁང་གི་བྱང་ཤར་ཕྱོགས་སུ་ཡོད་པའི་དགའ་ལྡན་དར་སྨྱོན་དང་། ཤར་སྐྱ་རེངས་དར་ཆེན་མེར་སྲེག་གཏོང་རྒྱུ། ལྷ་སའི་གྲོང་ཁྱེར་ཁྲེང་ཀོན་ཆུས་ཀྱི་འབྲུ་རིགས་ཚོང་ཁང་གཏོར་བཅོམ་བྱས་ནས་གྲོང་མི་ཚོ་མཉམ་དུ་འབྲུ་རིགས་བརྐུ་རྒྱག་བྱེད་འཇུག་རྒྱུ་དང་ཆབས་ཅིག་བོད་དང་ཀན་སུ་ཟུང་སྦྲེལ་གྱིས་གཉེར་བའི་ཚོང་ཁང་ཆེན་མོར་དཀྲོག་རྐྱེན་གཏོར་བཅོམ་བྱས་ཏེ་གྲོང་ཁྱེར་མི་ཚོར་ཚོང་ཟོག་བརྐུ་རྒྱག་བྱེད་རྒྱུའི་ངན་སྐུལ་བྱེད་རྒྱུ། ’’ཞེས་སོགས་ཞིབ་ཚགས་པའི་གསང་ཇུས་བཀོད་སྒྲིག་འདི་ལྟར་བྱས་ཡོད་ལ། གསང་ཇུས་འདི་བཞིན་པེ་ཅིང་དབུས་གཞུང་དང་ཐད་ཀར་འབྲེལ་བ་ཡོད་པ་རེད། དེ་བཞིན་ཕྱི་ལོ་ ༢༠༠༨ ས་བྱི་ཞི་རྒོལ་ཆེན་མོའི་སྐབས་ཀྱང་རྒྱལ་ས་ལྷ་སར་རྒྱ་མིས་བོད་ཆས་གྱོན་ཏེ་གྲི་ནམ་མཁར་འཕྱར་བའི་གནས་ཚུལ་དངོས་སུ་བྱུང་ཡོད་པ་མིན་ནམ།
མཇུག་གི་རེ་སྐུལ།
སྔོན་ཆད་རྒྱ་གར་དུ་ནང་བའི་བསྟན་པར་མཐའ་དམག་གིས་འཇིགས་པ་ཇི་སྙེད་བྱུང་དུས་རྣམས་སུ། སྐབས་དེའི་བསྟན་འཛིན་གྱི་སྐྱེས་མཆོག་གང་མང་ཞིག་གིས་བཟོད་པ་སྒོམ་ནས་རྒྱལ་ཁ་བླངས་པའི་ལོ་རྒྱུས་ཡོད་པ་དང་། བོད་མིའི་ཁ་དཔེ་ལ་ཡང་། འཇམ་པོས་དྲག་པོ་འཇོམས་ཞེས་པ་འདི་བོད་མི་ཀུན་གྱི་སེམས་ལ་ཉར་བའི་སྨོན་འདུན་དྲག་ཏུ་ཞུ་བ་དང་ཆབས་ཅིག དེ་རིང་བོད་དོན་རྒྱབ་སྐྱོར་དམིགས་བསལ་ཚོགས་ཆེན་ཐོག་ཏུའང་བོད་མིའི་སྐྱབས་མགོན་༸གོང་ས་མཆོག་གིས་ ‘‘བོད་པའི་འཐབ་རྩོད་ནི་མཐའ་གཅིག་ཏུ་འཚེ་བ་མེད་པའི་འཐབ་རྩོད་ཅིག་དང་། འཚེ་མེད་ཞི་བ་ནི་ནང་སེམས་ཀྱི་སྟོབས་ཤུགས་ཀྱི་མཚོན་རྟགས་ཤིག་ཡིན་ལ། དྲག་སྤྱོད་ཀྱི་རིགས་ནི་ཁོང་ཁྲོ་དང་རང་ཉིད་ལ་གདེང་ཚོད་མེད་པའི་དབང་གིས་མཚོན་ཆ་བེད་སྤྱོད་བྱེད་པ་སོགས་འབྱུང་གི་ཡོད་’’ཅེས་པའི་ལམ་སྟོན་འདི་བོད་མི་ཀུན་གྱི་སེམས་ཀྱི་གཏིང་རིམ་ལ་ཉར་དགོས།
མཐའ་དོན་ནན་གྱིས་བརྗོད་འདོད་པ་ཞིག་ལ། མཁས་པ་ཤེས་རབ་ཀྱིས་སྲུང་ན། ། དགྲ་བོ་མང་ཡང་ག་ལ་ཚུགས།། ཞེས་པ་ལྟར། བོད་ནང་ཤིན་ཏུ་ཛ་དྲག་ཏུ་གྱུར་པའི་སྐབས་འདིར། མཁྱེན་དཔྱོད་ཡངས་པའི་བོད་མི་ཤེས་ལྡན་པ་ཚོ་ཅི་ཡང་མི་སྨྲ་བའི་རྟུལ་ཞུགས་མི་འཛིན་པར་རང་རང་གི་རྣམ་དཔྱོད་སྤྱད་ནས་བླང་དོར་ལེགས་ཉེས་སྟོན་པའི་བྱ་བར་ཅིས་ཀྱང་འཇུག་དགོས། འདིའི་ཐད་དེ་རིང་ན་གཞོན་ཤེས་ཡོན་པའི་ཚོགས་ཆེན་ཐོག་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག་གིས་ཀྱང་‘‘ བོད་དང་བོད་མིའི་གལ་ཆེའི་གནད་དོན་ཡོངས་རྫོགས་ཀྱི་ཐོག ན་གཞོན་ཤེས་ཡོན་ཅན་རྣམས་ཀྱིས་དཔེ་སྟོན་དང་མདུན་བསྐྱོད་གནང་བའི་རེ་འདུན་ཞུ་བ་ཡིན། ’’ཞེས་གསུངས་ཡོད་པ་མིན་ནམ། །
གཤམ་གྱི་མཆན་འདེབས་པ་མཁྱམ་པོའི་ཚིག་འདི་གོ་དུས་སྔོན་གྱི་འདས་དོན་འདི་འདྲ་ཞིག་ཡིད་དྲན་ཡོང་། བླ་མ་ཞིག་གིས་ཚོགས་པར་ཆོས་གསུང་སྐབས་སེམས་ཅད་ཐམས་ཅད་འཚང་རྒྱ་རུང་ཡིན་སྐོར་བཤད། ཆོས་ཞུའི་ཁྲོད་ཀྱི་མི་ཞིག་གིས་བླ་མར་དྲི་བ་འདི་ལྟར་ཕུལ། རིན་པོ་ཆེ་ལགས། སེམས་ཅན་ཐམས་ཅད་སངས་རྒྱས་སོང་ན། སངས་རྒྱས་བསྟན་སུ་སྐྱོང་དགོས་པ་རེད་ཅེས་འཁང་རའི་ཚུལ་གྱིས་དྲི་བས་ཚོགས་པ་ཚང་བཞད་གད་ཐག་གེར་སོང་བ་དང་འདྲ་སེ་མི་འདུག་གམ། ཧ་ཧ་་་་་་་་་་་་་་་་་་་་
དེ་རིང་ཡང་བསྐྱར་རྩོམ་ཡིག་འདིའི་གནད་ཚིག་དག་ལ་གུས་པ་མཇལ་དུ་ཡོང་ཡོད། ཡིན་ནའང་རྩོམ་ཡིག་འདི་ཡང་བསྐྱར་འགོ་ནས་མཇུག་བར་དུ་བསྐྱར་ཀློག་ཐང་གཅིག་བྱས་ནས་གཤམ་གྱི་མཆན་བུ་ཁག་གཅིག་ལ་ལྟ་ཙམ་བྱས་པ་ཡིན། མ་གཞི་རྩོམ་ཡིག་འདིས་གཉེན་ཁའི་གནས་ཚུལ་ཁག་གཅིག་ལ་ཕྱི་ལྟས་དང་། བསམ་གཞིག དོགས་སློང་སོགས་བྱས་ནས་ལམ་ལ་ཆས་དགོས་པའི་སྐུལ་མ་ང་ཚོར་གནང་འདུག་པ་མ་ཟད། དུས་ཀུན་ང་ཚོས་བསམ་ཤེས་དགོས་པ་ནི། ལས་འགུལ་འདིའི་ཁ་ཕྱོགས་གཞན་ཞིག་ཏུ་འཁྲིད་འདོད་ཀྱི་གཡོ་ཇུས་ཤིག ཐབས་ཤེས་སྣ་ཚོགས་ཤིག་འོག་ནས་ཡོང་བཞིན་ཡོད་པ་མཁྱེན་གཟིགས་ཡོད་དགོས་པའི་གནད་ཚིག་དང་། དེ་མིན་དུས་ནམ་ཞིག་གི་ཚེ་ཁོ་བ་ཚང་གིས་བྱ་བ་གང་ཞིག་རྩོམ་ན། ང་ཚོས་འཚེ་མེད་ཞི་བའི་རྒྱ་ལས་མ་བརྒལ་བའི་བརྩོན་པ་གནང་དགོས་པའི་སྐད་ཆ་ཞིག་བཤད་འདུག དེ་བས་ན་མཆན་བུ་འདེབས་མཁན་ཚོས་རྩོམ་ཡིག་འདིའི་རིགས་ལམ་ཁ་གཞན་ཞིག་ཏུ་མ་ཁྲིད་རོགས་ཞུ།
རྩ་བའི་རྩོམ་དེའི་ནང་། འུ་ཚོའི་མེ་རྒོལ་ལ་འོང་ངེས་ཀྱི་ཉེན་ཁ་ངོས་འཛིན་གནང་སྟངས་དང་། མེ་རྒོལ་འདིས་གཞི་རིམ་གྱི་ནུས་པ་ཐོན་ཚུལ་གཉིས་གནད་ཁེལ་དང་ཁྱད་འཕགས་བཤད་འདུག རྩོམ་པ་པོ་ངོ་མ་བཀའ་དྲིན་ཆེ། དེ་མིན་མཆན་འདེབས་མཁན་ཚོས་ཀྱང་རང་གི་འཁྲི་ཆ་བདག་བཞེས་གནང་འདུག་སྙམ་བྱུང་། རྩོམ་གྱི་མཇུག་གི་རེ་བསྐུལ་ལྟར་སང་ཉིན་བསམ་ཚུལ་ཐུང་ཐུང་ཞིག་བྲི་ངེས་ཡིན།
ལེགས་ཆ་གང་ཡང་མ་མཐོང་། མདོ་ཧྲིལ་གྱི་སྒྲིལ་ན་ད་དུང་མེར་སྲིག་བཏོང་དགོས་ཞེས་པ་ཞིག་ཤུག་ལ་གོ་གི་འདུག་པའི་དམངས་ཐམས་ཅད་མེ་ལ་སྲིག་རྗེས་སུ་ཞིག་བདེ་བར་གནས་སམ། མི་རིགས་དང་རིགས་གཞུང་ཞེས་པ་དེ་མི་གསོན་ནི་སྲུང་སྐྱོབས་བྱེད་དགོས་པ་ལས་འཆི་ནི་སྲུང་རྒྱུ་ཤིན་དུ་དཀའ།
བཛྲ་རཏྣ་ལགས། ངོ་མ་ཡག་པོ་ཞིག་བྲིས་འདུག་་་་་་ཆ་ཚང་བཀླགས་ནས་ཕྱིར་བུད་ཡོད།
་་་་་ དེ་བཞིན་ཕྱི་ལོ་ ༢༠༠༨ ས་བྱི་ཞི་རྒོལ་ཆེན་མོའི་སྐབས་ཀྱང་རྒྱལ་ས་ལྷ་སར་རྒྱ་མིས་བོད་ཆས་གྱོན་ཏེ་གྲི་ནམ་མཁར་འཕྱར་བའི་གནས་ཚུལ་དངོས་སུ་བྱུང་ཡོད་པ་མིན་ནམ ་་་་
འགན་ཁུར་ཡོད་པའི་རྩོམ་ཡིག་ཅིག་རེད་འདུག་སྙམ། དྲང་མོར་བཤད་ན་རྩོམ་ཡིག་འབྲི་མཁན་ཡིན་ཟེར་བ་ཚོས་འདི་འདྲ་བ་རེ་བྲིས་ན་མི་རིགས་ལ་འགན་འཁྱེར་སྟངས་ཞིག་རེད།
ཧཧཧཧ་་་་་་ ཐོག་མར་བཀྲ་ཤིས་བདེ་ལེགས་ཡོད།
རྩོམ་ཡིག་འདི་མཐོང་ནས་ང་ལ་ཆེས་ཐོག་མར་དགའ་སྣང་ཞིག་སྤྲད་པ་ནི་”བོད་མིས་འཚེ་མེད་ཞི་བའི་ལྟ་གྲུབ་རྨང་གཞིར་བཞག་སྟེ”ཞེས་པའི་ཚིག་འདི་རང་ཡིན།
ཕྲན་དགའ་སྤྲོ་སྐྱེས་དགོས་པའི་རྒྱུ་མཚན་ནི། ང་ཚོའི་ཉེ་ལམ་གྱི་སྲིད་ཇུས་ཅི་རེད་ཟེར་ན། འཚེ་བ་མེད་པ་དང་། ཞི་རྒོལ་ཆེན་པོའི་ལས་འགུལ་རེད། དེ་ལྟར་གོང་གི་རྩོམ་ཡིག་སྤེལ་མཁན་འདིས་དགོངས་པ་དང་ལངས་ཕྱོགས་ང་ཚོའི་ཡོངས་ཁྱབ་རང་བཞིན་གྱི་སྲིད་ཇུས་དང་མཐུན་པས་ཡིན། འདི་ལྟར་རེ་རེ་བཞིན་བགྲངས་ན་གླེང་མི་ཚར་བས། ད་ནི་སྐབས་བསྟུན་མདོར་བསྡུས་ངང་རྩོམ་ཡིག་འདིར་རོལ་མྱོངས་ཐེངས་ཤིག་བྱས་པའི་སྐད་ཆ་མཇུག་བསྡུ་བར་བྱེད། མཐར་དོན། བློ་རིག་གསལ་བའི་མི་ཚང་མས་དམིགས་ཡུལ་གཅིག་ལ་འབད་འབུངས་བྱེད་པ་
དང་། རླབས་ཆེན་གྱི་བསམ་པ་ཐམས་ཅད་ཀྱིས་རྩ་དོན་གཅིག་ལ་བརྩི་བཀུར་ཞུ་བ་སྟེ། དེ་བཞིན་རང་རེའི་སྙིང་ཉེ་བའི་རྩོམ་མིང་འཛིན་པ་རྣམས་ཀྱིས་ཀྱང་རྩོམ་ཡིག་ཅེས་པ་རང་ཉིད་ཀྱི་བསམ་ཚུལ་ཙམ་མ་ཡིན་པར་གནས་ལུགས་ཀྱི་གདོང་གཏད་དེ་སྐད་ཆ་བཤད་ཐུབ་པ་ནི་ཧ་ཅང་གལ་ཆེན་ཡིན། དེ་ཡང་གསོང་བོར་བརྗོད་ན། ང་ཚོས་ཡང་དག་པའི་དེང་གི་ལོ་རྒྱུས་ཀྱི་དགོངས་པ་རྟོགས་དགོས། སྤྱིར་དུས་ཚོད་ཐུང་ཐུང་ཞིག་གི་ནང་སྐད་ཆ་ཡོད་ཚད་བཤད་མི་ཚར་བས། ད་འདི་ནས་མཚམས་འཇོག་གི་ཡིན། ཉིད་ཀྱི་ཕྱག་རྩོམ་འདི་ལྟར་དགའ་བཞིན་སྤྲོ་བཞིན་བཀླགས་ཏེ་བུད་སོང་། ལས་ཀྱི་སྐལ་བ་ཡོད་ན་སླད་མར་མཇལ་ཡོངས། ཧཧཧཧཧ་་་་་་་་་ ཡིན་ནའི་ཉིད་དགོངས་པ་ཁྱོན་ནས་མ་ཚོམས། རྒྱུ་མཚན། ཆེས་ཐོག་མའི་ཁྱེད་ཀྱི་རྩོམ་ཡིག་འདིའི་ཁ་བྱང་སྟེ། <<མེ་སྲེག་གི་རྒྱབ་གཟུགས་གླེང་བ>> ཞེས་པའི་ནང་ངས་ནི་འདི་འདྲིའི་སྐྱོན་ཞིག་མཐོང་སོང་། སྤྱིར་ངས་གནད་དོན་འདི་རིགས་མི་བཤད་མི་གླེང་བར་གྲ་སྒྲིག་བྱས་མོད། འོན་ཀྱང་ཉིད་ཀྱི་རྩོམ་ཡིག་འདིར་བལྟས་རྗེས་ང་ལ་གར་ཡོང་མི་ཤེས་བའི་ལྷག་བསམ་ཞིག་གིས་འདེབས་ཀྱིན་འདུག་པས་ད་ནི་འགྲིག་མིན་མི་ཤེས་ཀྱང་འདི་ལྟར་བགྱི་དགོས་པ་འདྲ་བྱུང་། བླུན་རྨོངས་བ་ངས་བལྟས་ན། མེ་སྲེག་ཅེས་པའི་གོང་གི་ཁ་བྱང་མདུན་གྱི་མེ་སྒྲ་དེ་རྗེས་སུ་ ལ་དོན་ཀྱི་ཕྲད་ར་ཞེས་པ་འདི་སྦྱར་ནས་ མེར་སྲེག་ཅེས་བཞག་ན་བྱ་བའི་དོན་སྟོན་པར་ནུས་པ་བླ་ལྷག་ཏུ་ཐོན་ཐུབ་པ་འདྲ་ཞིག་མཐོང་སོང་བས་ཉིད་ཀྱི་བསམ་བློའི་དགོངས་པ་ལ་བརྩི་བཀུར་བྱས་ཡོད་མིན་སོགས་ལའང་མ་བལྟས་པར་དེ་ལྟར་བྱས་པ་ཙམ་ཡིན། གལ་སྲིད་ནོར་འཛོལ་གྱི་ཆ་མཆིས་ན་ངས་ཁྱེད་ལ་འདི་ནས་དགོངས་པ་དྭངས་བར་གྱིས་ཞེས་ཞུའོ། བཀྲ་ཤིས་དང་བཅས་བདེ་བར་སྨོན།བ་རྨང་གཞིར་བཞག་
རྣག་ཐོག་ཁབ་གཙགས་དང་ཚིག་དོན་ཟབ་པའི་རྩོམ་ཡིག་ཅིག་རེད་འདུག འདི་བརྒྱུད་འགོད་བྱས་ན་འགྲིག་གམ།