ཁ་སང་སུད་སིའི་ཨོ་ཙི་ཝེལ་དུ་སྐབས་དང་པོའི་བོད་རིགས་ན་ཆུང་བྱིས་པའི་ཕ་སྐད་གཙང་མའི་འགྲན་བསྡུར་ཞེས་པ་དེ་བསྡུས་སོང་།
ཁ་སང་སུད་སིའི་མངའ་སྡེ་སངྒ་ལེན་ས་གནས་ཚོགས་ཆུང་བོད་ཡིག་སློབ་གྲྭའི་གོ་སྒྲིག་འོག ཨོ་ཙི་ཝེལ་དུ་སུད་སིའི་བོད་ཡིག་སློབ་གྲྭ་ཁག་གི་བོད་རིགས་སློབ་ཕྲུག་ཚོར་༼ སུད་སི་རྒྱལ་ཡོངས་བོད་རིགས་ན་ཆུང་བྱིས་པའི་ཕ་སྐད་གཙང་མའི་འགྲན་བསྡུར་སྐབས་དང་པོ༽ཞེས་པ་ཞིག་ཚོགས་སོང་།
ཐེངས་འདིའི་ཕ་སྐད་གཙང་མའི་འགྲན་བསྡུར་མཛད་སྒོ་དེར་སུད་སི་རི་ཀོང་མཁན་རིན་པོ་ཆེ་མཆོག་དང་སུད་སི་སྐུ་ཚབ་དོན་གཅོད། སྤྱི་ཟུར། དེ་བཞིན་སུད་སི་དང་ལེཀ་ཏེན་སིཊཡན་བོད་མི་མང་གི་སློབ་གྲྭའི་སྤྱི་ཁྱབ་འགན་འཛིན་བཅས་ཀྱིས་གཙོས་པའི་མི་མང་བརྒྱ་ལྷག་འདུ་འཛོམས་བྱུང་སོང་།
ལས་འགུལ་འདིའི་དམིགས་ཡུལ་ནི། སུད་སི་གཙོས་པའི་ཡུ་རོབ་ཡུལ་གྲུ་ཁག་གི་བོད་རིགས་འདུས་སྡོད་ཁུལ་དུ་བོད་ཀྱི་སྐད་ཡིག་རིག་གཞུང་སྲུང་སྐྱོབ་དར་སྤེལ་དང་། ལྷག་པར་དུ་ཡུ་རོབ་ཁུལ་གྱི་བོད་པའི་ཕྲུ་གུ་ཚོར་མི་རིགས་རང་གི་སྐད་ཡིག་ལ་གོམས་བྱང་དང་། བོད་པའི་འདུ་ཤེས་གོང་མཐོར་གཏོང་ཆེད་ཡིན་འདུག
འགྲན་བསྡུར་འདིར་ཆེད་དུ་གཟུ་དཔང་བ་གསུམ་གདན་འདྲེན་གནང་ཡོད་པ་དག་ནི། སུད་སི་ནས་ཕེབས་པའི་ཡུ་རོབ་སྤྱི་ཟུར་གསང་གླིང་ཚེ་རིང་རྡོ་རྗེ་དང་། ཧྥ་རན་སི་ནས་ཕེབས་པ་མདོ་སྨད་སྤྱི་ཟུར་ཆབ་བྲག་ལྷ་མོ་སྐྱབས། སུད་སི་ནས་ཕེབས་པ་དགེན་དཀོན་མཆོག་ལགས་བཅས་ཡིན་འདུག
ལས་འགུལ་གོ་སྒྲིག་པ་དཀོན་མཆོག་བཀྲ་ཤིས་ལགས་ཀྱིས་ངོ་སྤྲོད་གནང་དོན། “ བོད་པའ་འཐབ་རྩོད་གནང་སྟངས་དེ་སྐད་འབོད་གཅིག་པུ་མིན་པར། མི་རིགས་ཀྱི་རྒྱུ་རྩལ་ཀྱི་ཕྱོགས་དང་། རྩོམ་འབྲི། རི་མོ། རོལ་མོ་སོགས་ཀྱི་ཐོག་ནས་འཐབ་རྩོད་བྱེད་སྟངས་ཡོད་པ་རེད། ལྷག་པར་དུ་བོད་པའི་འཐབ་རྩོད་ཀྱི་གཞི་བཅོལ་ས་གཙོ་བོ་ཞིག་བོད་པའི་སྐད་ཡིག་རིག་གཞུང་སྲུང་སྐྱོབ་དེ་ཆགས་ཡོད་དུས། ང་ཚོས་སྐད་ཡིག་སྲུང་སྐྱོབ་དར་སྤེལ་གྱི་ལས་འགུལ་ཐོག་ཤུགས་རྒྱག་རྒྱུ་གལ་ཆེན་པོ་རེད” ཅེས་བརྗོད་བྱུང་།
ཁོང་གིས་མུ་མཐུད་དོན། “ང་ཚོ་རང་དབང་ལུང་བར་སྡོད་པའི་བོད་པ་ཚོས་སོ་སོའི་ཕྲག་ཏུ་བབ་པའི་ལས་དོན་མང་པོ་ཞིག་ལ་དོ་སྣང་མི་སྤྲོད་པར། སྒྲུབ་མི་ཐུབ་པ་དང་མི་སྙོབས་ས་མང་པོ་ཞིག་ལ་ཨུ་ཚུགས་རྒྱག་གི་ཡོད་པ་དེ་ནོར་འཁྲུལ་ཆེན་པོ་རེད། ཕྱི་རྒྱལ་ལུང་པའི་བོད་པ་ཚོ་དཔལ་འབྱོར་གྱི་ཐད་ནས་ཕྱི་རྒྱལ་བ་ཚོའི་རྗེས་ཟིན་ཀྱི་ཡོད་པ་མ་རེད། ཁ་ཕྱིར་འཁོར་ནས་ང་ཚོའི་བོད་པའི་གྲས་སུ་ཡང་མི་ཚུད་པ་ཞིག་ཆགས་ཀྱི་ཡོད་པ་རེད། དེ་བས་ང་ཚོ་མི་སྒེར་སུས་ཀྱང་སྒྲུབ་ཐུབ་པ་དང་འཇོན་ཐུབ་པ། དཔེར་ན། སོ་སོའི་བྱིས་པ་ལ་བོད་སྐད་བཤད་པ་དང་། སོ་སོ་རང་ཉིད་ཀྱིས་དུས་རྒྱུན་བོད་དོན་ལ་དོ་སྣང་སྤྲོད་རྒྱུ་སོགས་ཕྲག་ཏུ་བབ་པའི་འགན་འཁྲི་ཞིག་ལ་ངོས་འཛིན་བྱེད་ཀྱི་ཡོད། མ་འོངས་པར་ཕ་སྐད་གཙང་མའི་འགྲན་བསྡུར་འདི་བཞིན་ཡུ་རོབ་སྤྱིའི་ནང་གི་བོད་རིགས་ན་ཆུང་བྱིས་པ་རྣམས་ཀྱི་ཕ་སྐད་གཙང་མའི་འགྲན་བསྡུར་ཞིག་གི་ངོ་བོར་འཕེལ་རྒྱས་སུ་འགྲོ་བའི་རེ་བ་ཡོད” ཅེས་སོགས་བརྗོད་བྱུང་།
ཕ་སྐད་གཙང་མ་འགྲན་བསྡུར་དེ་ཉིན་དེའི་ཉིན་རྒྱབ་ཆུ་ཚོད་ ༣།༣༠ ནས་དགོང་མོའི་ཆུ་ཚོད་ ༡༠ བར་གནང་ཡོད་ཅིང་། གཟུ་དཔང་བ་གསུམ་ཀྱིས་འགྲན་ཞུགས་པ་དག་གི་བོད་སྐད་སྐྱོན་སྟངས་དང་སྒྲ་གདངས། བརྗོད་གཞི་གསུམ་ལ་སྐར་གྲངས་སྤྲད་ཡོད་པ་རེད།
མཇུག་མཐར་སངྒ་ལེན་སློབ་གྲྭའི་སློབ་མ་བསྟན་འཛིན་བཟང་མོ་ལགས་སུ་ཨང་དང་པོ་ཐོབ་སྟེ་བྱ་དགའ་སུད་སྒོར་ ༥༠༠ དང་། ཨང་གཉིས་པ་ཧོར་གྷན་སློབ་གྲྭའི་སློབ་མ་བསྟན་འཛིན་འཆི་མེད་ལགས་སུ་ཐོབ་སྟེ་བྱ་དགའ་སུད་སྒོར་ ༣༠༠ ། ཨང་གསུམ་པ་སཱོ་ལོ་ཊོན་སློབ་གྲྭའི་སློབ་མ་ངག་དབང་ཆོས་སྐྱིད་ལགས་སུ་ཐོབ་སྟེ་བྱ་དགའ་སུད་སྒོར་ ༢༠༠ བཅས་གསོལ་རས་སུ་བསྩལ་སོང་།
གསར་འགྱུར་གཏོང་མཁན། ཕུན་ཚོགས།
ཕ་སྐད་གཙང་མའི་འགྲན་བསྡུར་གྱི་ལས་འགུལ་དེ་ནི་དུས་སྐབས་དང་མཚམས་པའི་ལས་འགུལ་ཞིག་ཡིན་པས་རྗེས་སུ་ཡིད་རང་ཡོད་པ་མ་ཟད་ལས་འགུལ་གོ་བསྒྲིགས་བ་རྣམས་ལ་ཐུགས་ཆེ་ན་ཞུ་བ་ཡིན།
ལས་འགུལ་གོ་སྒྲིག་གནང་མཁན་དག་ལ་སྙིང་ཐག་པ་ནས་བཀའ་དྲིན་ཞུ་སྐད་དང་ཡི་གེ་ནི་མི་རིགས་རང་གི་བླ་སྲོག་ལྟ་བུ་ཡིན་ཡག་པོ་འདུག
མ་གཞི་ནི་ལས་འགུལ་འདི་རིགས་ལ་དགའ་བསུ་ཞུ་མུས་ཡིན།འོན་ཀྱང་ད་ཆ་ནི་བོད་ནང་གི་འཐབ་རྩོད་གནང་སྟངས་ལ་ལྟས་ན་འདི་དག་ལ་ངོམ་དུ་རུང་བ་ཞིག་དང་འདོད་བློ་ཚུམ་པོ་ཞིག་གཏན་ནས་མ་རེད་ཅེས་ཁོ་བོའི་ངག་ལས་ཐལ།
གམིགས་བསལ་ཐུགས་ཁུལ་གནང་འཁན་དང་མཉམ་ཞུགས་སློབ་ཕྲུག་ཡོངས་ལ་གུས་པས་སྙིང་དབུས་ནས་དགའ་སུ་ཞུས་བཞིན་ཡོད།རང་མི་རིགས་ཀྱི་གནད་དོན་ཧ་ཅང་ཉེན་ཚབས་ཀྱི་ངོ་བོར་གྱུར་བཞིན་ཡོད་པའི་དུས་ཚོད་འདིར་མི་རིགས་ཀྱི་ངོ་བོར་མཚོན་པའི་སྐད་ཡིག་གོམས་གཤིས་ཉམས་པར་སླར་གསོ་དང་མ་ཉམས་གོང་འཕེལ་རྒྱུན་འཛི་བྱེད་དགོས་པ་ནི་རང་བྱིས་འཁོད་སྤུན་ཟླའི་འོས་འགན་ཉག་གཅིག་ཡིན་པར་ཚང་མས་མཁྱེན་གསལ་རེད། དེང་གི་འཆར་གཞིས་སྡོད་ཆོལ་གསུམ་སྤུན་ཟླས་རང་མི་རིགས་ཀྱི་བདེ་སྡུག་གི་ཆེད་དུ་བློས་བཏང་དེ་དག་ནམ་ཡང་བརྗེད་མི་རུང།
འདི་ནི་དངོས་གནས་དགའ་འོས་ཤིང་བསྔགས་བརྗོད་བྱེད་འོས་པའི་གནས་ཚུལ་བཟང་པོ་ཞིག་རེད། གོ་སྒྲིགས་ཞུ་མཁན་དཀོན་མཆོག་བཀྲ་ཤིས་གཙོས་གཟི་དཔང་རྣམ་པ་གསུམ་དང་དེ་བཞིན་འགྲན་ཞུགས་སློབ་ཕྲུག་རྣམས་སྙིང་པ་ནས་འཚམས་འདྲི་དང་ཐུགས་རྗེ་ཆེ་ཞེས་ཞུ་འདོད་བྱུང་།འདི་ནི་བོད་ཀྱི་སྐད་ཡིག་དང་རང་དབང་ཆེད་རང་སྲོག་བློས་གཏོང་མཁན་གྱི་དཔའ་བོ་དཔའ་མོ་རྣམས་ཀྱི་ཆེད་རྗེས་འཇུག་གི་ཆོས་རྣལ་མ་ཞིག་རེད་ཅེས་བརྗོད་ཀྱང་མི་ཆོག་པ་མེད་པར་སེམས། ཁོང་རྣམ་པས་བདེ་ལྡན་དག་པའི་ཞིང་ནས་ཁྱེད་ཅག་ལས་འགུལ་འདིར་རྒྱབ་སྐྱོར་དང་ཐུགས་རྗེ་ཆེ་ཞུ་ངེས་ཡིན། གོ་སྒྲིག་པ་དཀོན་མཆོག་བཀྲ་ཤིས་ཀྱིས་ “བོད་པ་ཚོས་སོ་སོའི་ཕྲག་ཏུ་བབ་པའི་ལས་དོན་མང་པོ་ཞིག་ལ་དོ་སྣང་མི་སྤྲོད་པར། སྒྲུབ་མི་ཐུབ་པ་དང་མི་སྙོབས་ས་མང་པོ་ཞིག་ལ་ཨུ་ཚུགས་རྒྱག་གི་ཡོད་པ་དེ་ནོར་འཁྲུལ་ཆེན་པོ་རེད།”ཅེས་བཤད་པ་དེར་རྒྱབ་སྐྱོར་ཡོད། གནས་ཚུལ་དེ་འདྲའི་འོག་ནས་ང་ཚོས་སྒྲུབ་དཀའ་ལས་དོན་རྣམས་ལྟ་ཅི་སྒྲུབ་ཐུབ་པའི་ལས་འགུལ་ཆུང་ཚགས་རྣམས་ཀྱང་འཐུས་ཤོར་སོང་ནས་ལྷག་བསྡད་པ་མང་པོ་ཡོད་པ་དངོས་ཡོད་གནས་ཚུལ་ཡིན།
སྩལ་བྱ། སྩོལ་བྱེད། སྩོལད་ཟིན། སྩལད་ཅིག དགོས་པ་ལྟར་ན། བསྩལ་སོང་ཟེར་བ་འདི། བསལ་སོང་བྲིས་པ་དང་ཁྱད་མེད་དུ་གྱུར་པ་ཡང་ཤེས་དགོས་གལ་ཆེའོ་སྙམ་ལགས། འདི་ཡང་ཉིན་ཅིག་ཕ་སྐད་གཙང་མའི་འགྲན་རྩོད་ཀྱི་བརྗོད་བྱའི་གྲལ་དུ་ཚུད་རེ་ཡོད་ལགས།
ལས་གཞི་འདི་འདྲ་དག་ལ་རྒྱབ་སྐྱོར་ཤུགས་ཆེན་བྱེད་ཀྱིན་ཡོད། གོ་བསྒྲིག་ཞུ་མཁན་ཡོངས་ལ་ཐུགས་རྗེ་བླ་མེད་ཆེ་ཞུ་རྒྱུ་དང་། སླད་མའི་ཆར་ཡང་འདི་དྲ་གང་མང་དང་། བོད་མི་ཡོད་པའི་ཡོ་རོབ་རྒྱལ་ཁབ་ཀུན་གྱི་ནང་དང་། དེ་བཞིན་ཨ་རི་ཕྱོགས་ཀྱི་ནང་དུའང་འདི་བཞིན་ཚོགས་ཐུབ་པའི་རེ་བ་དང་སྨོན་ལམ། ད་དུང་འབོད་སྐུལ་ཞུ་གིན་ཡོད།