བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་གནས་ཚུལ་བཏང་འབྱོར་ལྟར་ན། ཕྱི་ཟླ་ ༡༡ པའི་ཚེས་ ༣༠ ཉིན་བོད་མདོ་སྨད་རྔ་པ་ཁུལ་མཛོད་དགེ་རྫོང་ཨ་སྐྱིད་ཞང་གཟའ་རུ་སྟོད་མའི་རུ་སར་ཁ་བའི་ཕུན་ཚོཊ་ཚང་གི་རང་ལོ་ ༢༩ ཡིན་པའི་བུ་དཀོན་མཆོག་སྐྱབས་ལཊ་ཀྱིས། བཞག་ལྡོམ་ཞང་ནས་སྤྱི་ལེ་བཅུ་ལྷག་གི་སར་ཡོད་པའི་སྣུམ་ལྡུག་སའི་སྒོ་འགྲམ་དུ་རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་གནང་རྗེས། རྒྱ་གཞུང་ཉེན་རྟོག་པས་དེ་མ་ཐག་འབར་ཁམས་སུ་ཁྱེར་ཏེ་ཞིབ་ཕྲའི་གནས་ཚུལ་ཤེས་མེད་ཀྱང་། ཟླ་འདིའི་ཕྱི་ཚེས་ ༡ ཉིན་གྱི་དགོང་མོ་རྒྱལ་གཅེས་པ་ཁོང་རྔ་པ་རང་སྐྱོང་ཁུལ་གྱི་ལྟེ་གནས་འབར་ཁམས་སུ་འདས་གྲོངས་སུ་གྱུར་ཡོད་པ་མ་ཟད། རྒྱ་གཞུང་གིས་ཁོང་གི་རུས་ཐལ་ཞིག་ནང་མིར་སྤྲད་ཡོད་པའི་གནས་ཚུལ་ཐོན་འདུག
རྒྱལ་གཅེས་དཔའ་བོད་དཀོན་མཆོག་སྐྱབས་ལགས།
རྒྱལ་གཅེས་དཔའ་བོ་དཀོན་མཆོག་སྐྱབས་ལགས་ཀྱི་བྱིས་པ་གཉིས།
ས་གནས་དགེ་འདུན་པ་ཚོས་བསྔོ་སྨོན་གནང་བཞིན་པ།
གསར་འགོད་པ། དོན་གོ
མྱེ་ཞགས་ཤིག རི་རྩེ་ནས་མཚོ་གཞུང་བར་དུ་མཆེད་དེ། རི་ཆུ་ཚ་རླབས་ཀྱིས་བསྐྱོམས་ཤིང་བསྲོས་པ། སྐལ་བ་འཇིག་ཁའི་མེ་དེ་མིན་ཡང་། གཅིག་རྗེས་གཉིས་མཐུད་ཀྱིས་བསྲེགས་ཏེ། བདག་དབང་གི་བོད་སའི་གྲུ་ཟུར་རེ་རེ་སྐོར་ནས། མིའི་སེམས་སུ་དམར་ལམ་ལམ་གྱི་སྲོག་དབུགས་ཀྱིས་བདེན་པ་བརྡར་གྱིན་ཡོད།
རང་བཙན་གྱི་ངར་སྐད་སྒྲོག་གིན། ཞི་བདེ་ཡི་ཁ་གཡང་འབོད་ཀྱིན། མེ་ལུམས་ཀྱི་འགད་སྒྲ་གཅིག་གིས་གློ་སྙིང་བྲང་གསུམ་ཚལ་བར་གཏོར་ཏེ། ཕ་ས་དམར་པོ་དེར་ཚེ་མཐའི་ཤི་སྔས་བཞག
སྦྱིན་བསྲེག་ལ་ཕུལ་བའི་མི་ལུས་རིན་པོ་ཆེ་ཆུ་ཤུར་ཐར་རེ་ངའི་སྔས་འགྲམ་དང་མིག་སྔུན་ལ་ལྷུང་། དེའི་ཚེ་དམར་དམག་གི་མེ་མདའི་སྐག་སྒྲ་དང་། ཡུལ་མི་ཚོའི་ངུ་ འབོད་ཀྱི་འཁུན་སྒྲ། འུར་འུར་ཆེམ་ཆེམ་གྱིས་འཁྲིགས་པའི་ཚིག་དྲི་དེས་ ཤ་འཁོན་ཁྲི་ཕྲག་གི་ཚ་གཟེར་ཁྱེར་ནས་ཆས་བྱུང་།
གཡུལ་འགྱེད་ཀྱི་བློ་སྒོ་ཕྱེས་ཏེ། དཔའ་རྟགས་ཀྱིས་གཤེགས་ལམ་རེ་ན། སྒང་བ་བོད་པའི་བླ་སྲོག་དང་ལོ་རྒྱུས་ཡོད། བཟོད་བསྲན་གྱི་སྤྱན་ཟུང་ཟུམ་སྟེ། མཆོད་སྦྱིན་གྱིས་བློས་བཏང་རེ་ན། ཆོས་ལྡན་ཞིང་གི་རེ་སྨོན་དང་ཐུགས་སྐྱེད་ཡོད།
རང་དབང་གི་འཚོ་གཞིས་བསྐྲུན་ཕྱིར། དཀའ་སྡུག་གི་དོང་ལ་ལྕེབས་སོང་། རྒྱལ་ཁབ་ཀྱི་དར་ཆ་ཕྱར་ཕྱིར། གཅེས་སྲོག་དེ་མེ་ལ་སྦར་སོང་། མེ་འབར་གྱི་ངར་ཁ་བཙན་པའི་ལོ་སར་ཞིག་ཚེས་སོང་། ངའི་ལུས་སེམས་ཐལ་བར་བསྲེགས་སོང་།
(ངས་སྔོན་མར་དྲ་ཐོག་ཏུ་བཞག་ཚར་བ་ཡིན་ཀྱང་ད་རེས་ཡང་འདིར་ཕུལ་བ་ཡིན)
ཟུངས་ཁྲག་གིས་སྨྱོས་པའི་མེ་ལྕེ།
བསྐལ་པ་སྟོང་གི་མུན་པའི་མངལ་སྦུབས་ན་སྦྲུམ་པའི
གོད་ཆག་དང་འཇིགས་ཉེན་གྱིས་ཟོས་པའི་པོ་ཏ་ལ
ཟུངས་ཁྲག་གིས་སྨྱོས་པའི་མེ་ལྕེའི་འོད་ངོགས་ནས་མངོན་བྱུང
རྡོ་སྣུམ་དང་ཟུངས་ཁྲག་གི་རྦ་རླབས་འཁྱིལ་བའི་ཁུགས་སོ་ན
འོད་དུ་བཞེངས་བའི་བཙན་པོའི་སྙིང་སྟོབས་མེ་ལྕེའི་ཟོལ་གྱིས་མཆེད་པས
ལོ་རྒྱུས་ཀྱི་གས་སྲུབ་ཏུ་ལྷུང་བའི་པོ་ཏ་ལ
འཛམ་གླིང་གི་མཐོ་ས་ནས་མངོན་བྱུང
མངོན་སྟངས་དེ སྙིང་གས་གཞི་དང་སྙིང་སྟོབས་སྐྱེ་གཞི་རུ་གྱུར་པའི
ཟུངས་ཁྲག་གིས་སྨྱོས་པའི་མེ་ལྕེ་དེའི་སྟོབས་ཤུགས་དང་འཕྲིན་ལས་ལགས་ཏེ
མེ་ལྕེ་དེ་ནི དཔའ་བོ་ཚོའི་ཟུངས་ཁྲག་རྡོ་སྣུམ་དང་འདྲེས་ཏེ་འཁུལ་སྟངས་ཞིག་དང
དཔའ་མོ་ཚོའི་གསོན་སྙིང་དྲོན་མོ་མེ་ཀློང་ན་ལྡིང་བའི་སྟངས་སྟབས་ཡིན་པས་སོ
ད་དུང་མེ་ལྕེ་དེ་ནི འཚོ་གནས་དང་དབང་གི་ཆེད་དུ
ཆེས་ཐོག་མར་མཐོ་སྒང་ནས་འཛམ་གླིང་ལ་ཆད་ཅིང་ཐོར་བའི་ཟི་ར་དམར་པོ་ཞིག
ཟུངས་ཁྲག་གིས་སྨྱོས་པའི་མེ་ལྕེ་དེ
བདག་གི་ཕུ་ནུ་མིང་སྲིང་ཚོའི་ཤ་རྗེན་ཐོག་ཏུ་དམར་འུ་རུ་རུ་འབར་དུས
དགྲ་ཚོགས་ཀྱི་སྙིང་ལ་འོད་ཀྱི་དུག་མདའ་ཟུག་ཅིང
གངས་ཅན་པའི་ལོ་རྒྱུས་དེབ་ཐེར་གྱི་སུལ་ན་གསེར་ཡིག་ཐོར་བ་བདེན་ངེས་ཀྱང
བོད་མི་རྣལ་མ་རེ་རེའི་སྙིང་གི་ཕྱེད་ཀ་བསྲེགས་སོང་བའང་བདེན་པ་ཡིན་ངེས
མེ་ཡི་གཤོག་ཟུང་བརྐྱངས་ཏེ་རང་དབང་གི་དག་ཞིང་བསྙེགས་པའི་ཕུ་ནུ་མིང་སྲིང་ཚོ
ཁྱེད་ཚོས་མེ་ལྕེ་ཡི་རྣོ་དབལ་བཟོད་ནུས་ཀྱང
ང་ཚོའི་སྙིང་ཁོང་གི་ན་ཟུགས་བསྲན་ཐབས་བྲལ་སོང
༢༠༡༢་༡༡་༡༠་།།
བློ་སྟོབས་ལ་རྗེས་སུ་ཡི་རང་དང༌། བསམ་དོན་མྱུར་དུ་འགྲུབ་པའི་སྨོན་འདུན་ཞུའོ། །