ལྷ་བཟང་ཚེ་རིང་གི་སྙན་ངག་དེབ་ ༣ དབུ་འབྱེད།

གཟའ་ཉི་མའི་ཉིན་བོད་རང་བཙན་འཐབ་རྩོད་པ་ལྷ་བཟང་ཚེ་རིང་ལགས་ཀྱིས་གསར་དུ་བྲིས་པའི་སྙན་ངག་གི་དེབ་ ༣ པར་སྐྲུན་དབུ་འབྱེད་གནང་སོང་།

ཁ་སང་ཕྱི་ཚེས་ ༡༦ ཉིན་གྱི་ཕྱི་དྲོ་བོད་སྨྱུག་དཔེ་སྐྲུན་ཁང་གིས་དཔེ་བསྐྲུན་དང་གོ་སྒྲིག་འོག ངྷ་ས་མེག་གྷན་འཇིགས་མེད་ཨེ་ཊ་ལེ་ཟ་ཁང་དུ་རང་བཙན་འཐབ་རྩོད་པ་ལྷ་བཟང་ཚེ་རིང་ལགས་ཀྱི་གསར་དུ་བྲིས་པའི་སྙན་ངག་དེབ་ ༣ དབུ་འབྱེད་གནང་ཡོད་ཅིང་། དབུ་འབྱེད་མཛད་སྒོའི་ཐོག་རང་བཙན་འཐབ་རྩོད་པ་ལྷ་བཟང་ཚེ་རིང་ལགས་ཀྱིས་ཁོང་གི་སྙན་ངག་ཁག་ཅིག་གྱེར་འདོད་དང་། སྙན་ངག་སྐོར་ནས་མང་ཚོགས་ཀྱི་དྲི་བར་ལན་འདེབས་བཅས་གནང་ཡོད།

གསར་དུ་པར་སྐྲུན་དབྱེད་བྱས་པའི་སྙན་ངག་དེབ་ ༣ ནི་སེམས་འགྱུ་(wondering) དང་མི་བྱ་བ་གསུམ་(Three nevers)། མ་གློད་(Hold on) བཅས་ཡིན་ཞིང་། དེབ་གསུམ་པོ་སྙན་ངག་ ༤༦ ལས་གྲུབ་ཡོད་པ་དང་། ཐེངས་འདིར་གསར་དུ་པར་སྐྲུན་བྱས་པའི་དེབ་ ༣ ནང་གི་སྙན་ངག་རྣམས་བཀོད་སྤེལ་བྱས་མེད་པའི་སྙན་ངག་གསར་པ་རྐྱང་ཡིན་འདུག

དབུ་འབྱེད་མཛད་སྒོའི་སྟེང་། རང་བཙན་འཐབ་རྩོད་པ་ལྷ་བཟང་ཚེ་རིང་ལགས་ཀྱིས་སོ་སོའི་མི་ཚེ་ཕལ་ཆེ་བ་གཞུང་ཞབས་དང་བོད་དོན་འཐབ་རྩོད་སོགས་ཀྱི་ཐད་བཏང་ཡོད་ཀྱང་། ད་ཆར་བཙན་བྱོལ་སྤྱིའི་སྤྱི་ཚོགས་ཀྱི་བོད་དོན་འཐབ་རྩོད་ལ་ཁ་ཕྱོགས་ངེས་གཏན་དང་ཁ་གསལ་མེད་སྟབས། རང་ཉིད་གཞུང་དང་ཚོགས་པ་སྒྲིག་འཛུགས་ཁག་ལས་ཐོན་ཏེ། སོ་སོའི་སེམས་ཚོར་སྨྱུ་གུའི་རྩེ་རུ་འདྲེན་ཐབས་བྱེད་བཞིན་ཡོད་པར་བརྗོད་བྱུང་།

ཡང་ཁོང་གིས་རང་ཉིད་ཀྱི་སྙན་ངག་གི་སྐོར་ནས། ཁོས་ནམ་རང་ཉིད་ཀྱིས་གང་བྲིས་པ་རྣམས་སྙན་ངག་(poem) དང་སྙན་ངག་གི་རྩོམ་རིག་(poetry) ཅིག་ཡིན་པར་བརྗོད་ཀྱི་མེད་ཀྱང་། སོ་སོའི་མི་ཚེ་གང་བོར་རང་ཉིད་ཨང་གཉིས་པ་དང་བོད་དེ་ཨང་དང་པོ་འཛིན་གྱི་ཡོད་པས། རང་གི་ཕ་ཡུལ་ལ་བཟུང་པའི་བརྩེ་དུང་དང་བཙན་བྱོལ་བ་ཞིག་གི་སེམས་ཁོང་ན་ཡོད་པའི་ན་ཟུག་དག་སྨྱུག་ཁ་ནས་ཕྱི་རུ་མངོན་ཐབས་བྱེད་ཀྱི་ཡོད་པར་བརྗོད་བྱུང་།

ཁོང་གི་སྙན་ངག་གི་བརྗོད་བྱ་ཕལ་ཆེ་བས་རང་དབང་འཐབ་རྩོད་ཀྱི་ལྟ་གྲུབ་དང་སེམས་ཁམས། དབུ་མའི་ལམ་ཀྱི་སྲིད་བྱུས་འོག་ཁོང་ཁེར་ཡན་དུ་ཕྱིན་པའི་སྔ་རྗེས། ངྷ་སའི་རི་གྲོང་དང་། ལྷག་པར་དུ་ངྷ་སའི་རི་ངོགས་དང་ནགས་གསེང་མཐོ་ས་ནས་རྒྱང་རིང་གི་ཕ་ཡུལ་ལ་ཉིན་ལྟར་རེ་ལྟོས་བྱེད་བཞིན་པའི་སེམས་འགྱུ། སོ་སོའི་མི་ཚེའི་ལྟ་གྲུབ་ལས་ནམ་ཡང་མི་བྱ་བའི་དམ་བཅའ་སོགས་མཚོན་ཡོད་འདུག

ཁོང་གི་སྙན་ངག་དེབ་༼སེམས་འགྱུ༽ཡི་སྔོན་གླེང་ནང་། ཁོའི་ཚེ་སྟོད་ཕལ་ཆེ་བ་བོད་མི་མང་གི་ལས་དོན་ཐད་བཏང་ཡོད་ཅིང་། མི་ཚེའི་མཐའ་མ་དེ་བཙན་བྱོལ་གཞུང་མང་གི་ཆབ་སྲིད་ཀྱི་འགོག་རྐྱེན་ལྟ་བུ་ཞིག་ཏུ་འགྱུར་འཇུག་འདོད་མེད་པས། བོད་གཞུང་གི་ལངས་ཕྱོགས་དང་ཆབ་སྲིད་ཀྱི་གནས་བབ་ཐད་བཅར་འདྲི་དང་སྐད་ཆ་བཤད་མཚམས་བཞག་སྟེ། བཙན་བྱོལ་བོད་གཞུང་ལ་དབུ་མའི་ལམ་གྱི་དམིགས་ཡུལ་འགྲུབ་པར་བྱས་ནས་ཁོང་གི་ལངས་ཕྱོགས་ནོར་ཡོད་པ་ར་འཕྲོད་པར་གནང་རྒྱུའི་རེ་བ་བྱས་ཡོད་ཀྱང་། ༢༠༠༨ ལོའི་བོད་ནང་གི་ཞི་རྒོལ་ཆེན་མོ་བྱུང་རྗེས། ཁོང་ཚོས་བོད་མིའི་རང་དབང་ཆེད་སྡུག་སྦྱོང་དང་ཚེ་སྲོག་བློ་གཏོང་གིས་འཐབ་རྩོད་བྱེད་ཀྱི་ཡོད་པའི་གནས་བབ་འོག རང་ཉིད་ཁུ་སིམ་སིམ་སྡོད་ཐབས་བྲལ་ཡོད་སྐོར་གསལ་འདུག་ལ། ཁོང་གིས་ད་ཆར་བོད་ནང་གི་བོད་མི་ཚོས་སོ་སོའི་ཚེ་སྲོག་ལས་བོད་རྒྱལ་ཁབ་དང་མི་རིགས་གཅེས་པར་བཟུང་སྟེ་རང་ལུས་མེ་རུ་སྒྲོན་བཞིན་པར། རང་དབང་ལུང་པར་ཡོད་པའི་བཙན་བྱོལ་བོད་མི་ཚོས་ཁོང་ཚོའི་མངོན་འདོད་ལ་བདག་པོ་རྒྱག་རྒྱུ་དེ་གང་ལས་གལ་ཆེ་བར་བརྗོད་བྱུང་།

བོད་རང་བཙན་འཐབ་རྩོད་པ་ལྷ་བཟང་ཚེ་རིང་ལགས་ཀྱིས་པར་སྐྲུན་བྱས་པའི་དེ་སྔའི་དེབ་ནི། སང་ཉིན་དང་སྙན་ངག་གཞན་(Tomorrow and other poems) ཞེས་པ་དང་དབྱིན་སྒྱུར་བྱས་པའི་ཚང་དབྱངས་རྒྱ་མཚོའི་མགུར་གླུ་(Ocean of Melody)། ཐེངས་འདིར་གོང་གསལ་དེབ་ ༣ བཅས་ད་སྔ་དེབ་ལྔ་དཔེ་སྐྲུན་བྱས་ཡོད་འདུག

གསར་འགོད་པ། བནྡེ་སྐྱབས།