རྒྱ་རིགས་གསར་འགོད་པས་ངོ་རྒོལ།

གསར་འགོད་པ་ ༥༠ ལྷག་གིས་བསྒྲགས་གཏམ་སྤེལ་ཏེ། ཀུང་ཏུང་དྲིལ་བསྒྲགས་འགན་འཛིན་ཐའོ་ཀྲིན་ལས་གནས་ནས་ཕབ་དགོས་པའི་འབོད་སྐུལ་ཞུས་འདུག

ཟླ་འདིའི་ཕྱི་ཚེས་ ༤ ཉིན་ཏུང་ཀུང་༼ལྷོ་ཕྱོགས་གཟའ་མཇུག༽གསར་ཁང་གི་རྩོམ་སྒྲིག་པ་དང་གསར་འགོད་པ་ ༥༠  ལྷག་གིས་མཚན་རྟགས་བཀོད་དེ།  ཉེ་ཆར་ཀུང་ཏུང་དྲིལ་བསྒྲགས་སྡེ་ཁག་གི་འགན་འཛིན་ཐའོ་ཀྲིན་གྱིས་རང་འདོད་ལྟར།  ལྷོ་ཕྱོགས་གཟའ་མཇུག་གསར་ཁང་གི་ ༢༠༡༣ ལོ་གསར་ཤིས་ཚིག་བཅད་གཏུབ་སྒྱུར་བཅོས་བཏང་བའི་གནད་དོན་ཐད།  དགོས་འདུན་དོན་ཚན་གསུམ་ཅན་གྱི་ཡོངས་ཁྱབ་བསྒྲགས་གཏམ་ཞིག་སྤེལ་ཡོད་ལ།  དེ་ནི་འདས་པའི་ལོ་ ༣༠ ཙམ་གྱི་རིང་གསར་འགོད་སྡེ་ཁག་གི་མི་སྣས་མཉམ་འབྲེལ་ཐོག་ངོ་རྒོལ་གནང་བ་ཐོག་མ་དེ་ཆགས་ཡོད། 

ཡོངས་ཁྱབ་བསྒྲགས་གཏམ་ནང་བཀོད་པའི་དགོས་འདུན་ཁག་གསུམ་ནི།  གཅིག  ཏང་སྲིད་ལས་བྱེད་སྐབས་འཕྲལ་གནས་དབྱུང་སྲོལ་ཡིག་གི་དོན་ཚན་ ༡༤ བའི་གཏན་འབེབས་ལྟར། ཐའོ་ཀྲིན་ལ་མུ་མཐུད་ལས་གནས་དེའི་འགན་འཁྱེར་མི་འཇུག་པར།  ལས་གནས་བརྗེ་སྤོར་བྱས་ཐོག་ཡོངས་ཁྱབ་དགོངས་སེལ་ཞུ་དགོས།  གཉིས། ལྷོ་ཕྱོགས་གཟའ་འཇུག་གསར་ཁང་གི་རྩོམ་སྒྲིག་པ་དང་གསར་འགོད་པ་རྣམས་ཀྱིས་གནད་དོན་དེའི་ཐད་ངོ་རྒོལ་གནང་བ་དེ་ནི།  གཟི་བརྗིད་ལྡན་པ་དང་འགན་ལེན་གྱི་འདུ་ཤེས་ལྡན་པ་ཞིག་ལ་ངོས་འཛིན་གྱིས་ཆད་གཅོད་གང་ཡང་མེད་པའི་ཐོག  འཕྲལ་དུ་ཁོང་ཚོ་མི་སྒེར་གྱི་ཝེ་པའོ་ཟིན་བྲིས་བསྐྱར་དུ་སྒོ་འབྱེད་བྱ་དགོས། གསུམ། ལྷོ་ཕྱོགས་གཟའ་འཇུག་གི་རྩོམ་སྒྲིག་ཚོགས་ཆུང་ཀྱི་བྱ་བ་མུ་མཐུད་རྒྱུན་ལྡན་བསྐྱར་གསོ་དགོས་པ་བཅས་ཡིན་འདུག  

ངོ་རྒོལ་དོན་རྐྱེན་དེའི་འབྱུང་རྐྱེན་གཙོ་བོ་ནི། ལྷོ་ཕྱོགས་གཟའ་མཇུག་གསར་ཁང་གིས།   ༢༠༡༣ ལོ་གསར་ཤེས་ཚིག་དེ་ཕྱི་ཚེས་ ༢ ཉིན་གཏན་འབེབས་དག་སྒྲིག་བྱས་རྗེས། རྩོམ་སྒྲིག་པ་དང་གསར་འགོད་པ་རྣམས་གུང་གསེང་དུ་ཕྱིན་པའི་སྐབས་དང་བསྟུན་ནས། ཀུང་ཏུང་ཞིང་ཆེན་གྱི་དྲིལ་བསྒྲགས་སྡེ་ཁག་གི་འགན་འཛིན་ཐའོ་ཀྲིན་གྱིས་རང་འདོད་ལྟར་ནང་དོན་གཅོད་གཏུབ་བསྐྱར་བཅོས་བྱས་པ་མ་ཟད། དོན་ནོར་དང་ཡིག་ནོར་སོགས་མང་པོ་བྱུང་བཅུག་པར་བརྟེན། རྩོམ་སྒྲིག་པ་དང་གསར་འགོད་པ་རྣམས་ཀྱིས་མཉམ་འབྲེལ་ཐོག་ལས་མཚམས་བཞག་སྟེ་ངོ་རྒོལ་དང་། ཝེ་པའོ་གནས་འཕྲིན་དྲ་བ་བརྒྱུད་ཐེར་འདོན་བསྒྲགས་གཏམ་སོགས་སྤེལ་བར་བརྟེན་ནས།  རྒྱ་ནག་སྤྱི་ཚོགས་ནང་དོ་སྣང་དང་གླེང་སློང་ཤུགས་ཆེན་པོ་འབྱུང་བཞིན་པ་མ་ཟད།  ད་ལྟའི་ཆར་གསར་ཁང་གི་ལས་དོན་རྣམས་རྒྱུན་ལྡན་ལྟར་འགྲོ་ཐུབ་ཀྱི་མེད་པའི་གནས་སྟངས་ཆགས་ཡོད་པ་རེད།   

ལྷོ་ཕྱོགས་གཟའ་མཇུག་གསར་ཁང་གི་རྩོམ་སྒྲིག་པ་དང་གསར་འགོད་པ་དག་གི་ངོ་རྒོལ་ལས་འགུལ་དེའི་ཐད། ཀྲུང་ཧྲན་སློབ་ཆེན་གྱི་སློབ་ཕྲུག་རྣམས་ཀྱིས་༼དེ་རིང་། ང་ཚོར་གདམ་ག་ཅི་ཡང་ལྷག་མི་འདུག ༽ཅེས་པའི་བསྒྲགས་གཏམ་དང་། མི་དམངས་སློབ་ཆེན་ཆབ་སྲིད་སྡེ་ཁག་གི་དགེ་རྒན་ཆེན་མོ་ཀྲང་ཝུ་གཙོས་པའི་རྒྱ་རིགས་ཤེས་ལྡན་པ་བཅུ་གྲངས་ཤིག་གིས་ལྷོ་ཕྱོགས་གཟའ་མཇུག་གི་རྩོམ་སྒྲིག་པ་དང་གསར་འགོད་པ་རྣམས་ལ་རྒྱབ་སྐྱོར་གྱི་ཡི་གེ་སྤེལ་ཡོད། གཞན་ཡང་། ཞིན་ལཱིང་ཝེ་པའོ་དྲ་བའི་ཐོག་མི་  ༤༠༠ ལྷག་གི་མིང་རྟགས་བཀོད་པའི་ ༼ལྷོ་ཕྱོགས་གཟའ་མཇུག་གྱི་ཤིས་ཚིག་དོན་རྐྱེན་གནམ་འོག་ལ་སྤྱི་བསྒྲགས་བྱེད།༽ཅེས་པའི་བསྒྲགས་གཏམ་ཤིག་ཀྱང་སྤེལ་ཡོད་འདུག 

གསར་འགོད་པ། ཚེ་རིང་རྒྱལ།