ཉེ་ཆར་རྒྱ་ནག་ཁྲུང་ཆིན་གྲོང་ཁྱེར་ཁུལ་གྱི་ས་གནས་དཔོན་རིགས་ ༡༠ ལས་གནས་ནས་ཕྱིར་ཕུད་འདུག
ཁ་སང་ཕྱི་ཚེས་ ༢༤ ཉིན་རྒྱ་ནག་ཁྲུང་ཆིན་གྲོང་ཁྱེར་དམར་ཤོག་རྒྱུན་ལྷན་གྱིས་ས་གནས་དམར་ཤོག་དཔོན་རིགས་དང་རྒྱལ་གཉེར་ཁེ་ལས་མགོ་བ་སོགས་མི་ ༡༠ ལས་གནས་ནས་ཕུད་ཡོད་པ་ཕྱིར་བསྒྲགས་བྱས་ཡོད་ལ། དེ་བཞིན། དཔོན་རིགས་ཚོའི་ཚུལ་མིན་འཁྲིག་སྤྱོད་བརྙན་རིས་དང་འབྲེལ་ཡོད་ཀྱི་དཔོན་རིགས་ ༡༡ ལ་ཉེས་ཆད་བཅད་ཡོད་འདུག
འཁྲིག་སྤྱོད་བརྙན་རིས་དེ་དག་ལོ་སྔོན་མའི་ཕྱི་ཟླ་ ༡༡ མཇུག་ཙམ་ལ། རྒྱ་རིགས་ཉམས་ཞིབ་གསར་འགོད་པ་ཀྲུའུ་རུའུ་ཧྥུན་གྱིས་ཐོག་མར་ཕྱིར་བསྒྲགས་བྱས་པ་དང་། བདུན་ཕྲག་གཅིག་གི་རྗེས་སུ་འཁྲིག་སྤྱོད་བརྙན་རིས་ནང་གི་མི་སྣ་གཙོ་བོ་རྒྱ་གཞུང་ཁྲུང་ཆིན་གྲོང་ཁྱེར་ནུབ་པའེ་ཁུལ་གྱི་དམར་ཤོག་དྲུང་ཆེ་ལིས་ཀྲིན་ཧྲུའུ་ལས་གནས་ནས་མར་ཕབ་ཡོད་འདུག གསར་འགོད་པ་ཀྲུའུ་རུའུ་ཧྥུན་གྱིས་བྷི་བྷི་སི་གསར་ཁང་གིས་བཅར་འདྲིའི་སྐབས། ཁོའི་ལག་ཏུ་ད་དུང་དམར་ཤོག་དཔོན་རིགས་གཞན་པའི་ཚུལ་མིན་གྱི་བརྙན་རིས་ཡོད་པ་མ་ཟད། མུ་མཐུད་ནས་ཕྱིར་བསྒྲགས་བྱ་འཆར་ཡོད་ལུགས་བརྗོད་འདུག
མཐོ་རིམ་དཔོན་རིགས་ཀྱི་ཚུལ་མིན་འཁྲིག་སྤྱོད་བརྙན་རིས་དེ་དག་ནི། ཁྲུང་ཆིན་གྲོང་ཁྱེར་ཡཱུང་ཧུང་ཚོགས་ཁག་གསར་འཛུགས་མཁན་ཞཱོ་ཧྭ་སོགས་ཀྱིས་ ༢༠༠༨ ལོར་པར་ལེན་བྱས་པ་དང་། ཁོ་ཚོས་ཁྲུང་ཆིན་གྲོང་ཁྱེར་ཁུལ་གྱི་དཔོན་རིགས་ཚོའི་ཚུལ་མིན་འཁྲིག་སྤྱོད་བརྙན་ལེན་བྱས་ཏེ། དཔོན་རིགས་ཚོ་དང་ལྐོག་འབྲེལ་གྱིས་བཟོ་ལས་ཁེ་ཕན་གཉེར་ཐབས་ཀྱི་ལག་ཆར་བེད་སྤྱོད་བྱས་ཡོད་འདུག ཡིན་ནའང་། སྐབས་དེར་ཁྲུང་ཆིན་གྲོང་ཁྱེར་ཉེན་རྟོག་མགོ་བ་ཝང་ལིས་ཅོན་གྱིས་བརྙན་རིས་དེ་དག་སྤྱི་ཚོགས་ཁྲོད་ཁྱབ་མ་བཅུག་པར་བསྔོག་བཤེར་བཀག་སྡོམ་བྱས་ཡོད་ཀྱང་། ཝང་ལིས་ཅོན་ཨ་རིའི་གཞུང་ཚབ་ཁང་དུ་བྲོས་བྱོལ་དང་། ཀུའུ་ཁའེ་ལའེ་དང་པའོ་ཞིས་ལའེ་སོགས་ཀྱི་དོན་རྐྱེན་རིམ་པར་བྱུང་རྗེས། དཔོན་རིགས་ཚོའི་ཚུལ་མིན་འཁྲིག་སྤྱོད་བརྙན་རིས་དེ་དག་ཁྲུང་ཆིན་ཉེན་རྟོག་པ་ནང་ཁུལ་དུ་བརྒྱུད་སྤྲོད་ཀྱིས་མཐར་གསར་འགོད་པ་ཀྲུའུ་རུའུ་ཧྥུན་གྱི་ལག་ཏུ་འབྱོར་ཡོད་འདུག
གསར་འགོད་པ། ཚེ་རིང་རྒྱལ།
་་་་་ ཁོ་ཚོས་ཁྲུང་ཆིན་གྲོང་ཁྱེར་ཁུལ་གྱི་དཔོན་རིགས་ཚོའི་ཚུལ་མིན་འཁྲིག་སྤྱོད་བརྙན་ལེན་བྱས་ཏེ། དཔོན་རིགས་ཚོ་དང་ལྐོག་འབྲེལ་གྱིས་བཟོ་ལས་ཁེ་ཕན་གཉེར་ཐབས་ཀྱི་ལག་ཆར་བེད་སྤྱོད་བྱས་ཡོད་འདུག ཡིན་ནའང་། ་་་་ཟེར།