སྐུའི་གཅེན་པོ་ལྟག་མཚེར་རིན་པོ་ཆེའི་སྲས་འབྲིང་བ་ཀུན་དགའ་ནོར་བུ་དང་རྔ་པ་རབ་བརྟན་རྒྱ་མཚོ་གཉིས་ཀྱིས་ཨ་རིའི་རྒྱལ་ས་ཝ་ཤིང་ཊོན་ཌི་སི་ནས་ནེའུ་ཡོག་བར་དུ་ཉིན་བཅུའི་རིང་གི་བོད་རང་བཙན་གོམ་བགྲོད་ཅིག་ལོ་འདིའི་ཟླ་ ༣ ཚེས་ ༡༠ ཉིན་ཏེ་བོད་གྱེན་ལངས་ཀྱི་ཉིན་་མགོ་འཛུགས་བྱེད་རྒྱུ་ཡིན་འདུག
སྲས་ཀུན་དགའ་ནོར་བུ་ལགས་ཀྱིས་གོམ་བགྲོད་འདིའི་སྐོར་ལ་གསུངས་དོན། “ང་ཚོ་བོད་མི་རྣམས་ནི་རང་བཙན་ཤོར་ནས་ལོ་ ༥༠ ཕྱིན་ཡོད། ང་ཚོས་བོད་རང་བཙན་གྱི་སྐད་འབོད་བྱས་ཡོད། ཡིན་ན་ཡང་གྲུབ་འབྲས་ད་དུང་ཐོན་མེད། ངའི་པ་ལགས་ཀྱིས་རང་བཙན་གོམ་བགྲོད་ཐེངས་མང་པོ་གནང་བ་རེད། ངའི་སྤུན་ཆུང་དམ་པ་འཇིགས་མེད་ལགས་ཀྱིས་ཀྱང་རང་བཙན་གོམ་བགྲོད་མང་པོ་གནང་བ་རེད། དེའི་ལས་འགུལ་གྱི་མཇུག་སྐྱོང་རྒྱུ་ནི་ཧ་ཅང་གལ་ཆེན་པོ་རེད། ཡིན་ན་ཡང་། དེ་ལས་ཀྱང་གལ་ཆེ་ཤོས་དེ་ནི་རང་ལུས་མེར་སྲེག་ཐེངས་བརྒྱ་ལ་ཉེ་བའི་ད་ལྟའི་བོད་ནང་གི་སྡུག་བསྔལ་འདི་ཕྱི་ལོགས་ནས་སྒྲོག་རྒྱུ་དེ་རེད། ངའི་པཱ་ལགས་ཀྱིས་རྟག་པར་གསུངས་གི་ཡོད། བོད་འདི་བོད་མི་རྣམས་ལ་དབང་བ་རེད། ཅེས་གསུངས་གི་ཡོད། འདི་ནི་ངས་གང་ལ་ཡིད་ཆེས་བྱེད་པ་དེ་ཡིན།” ཞེས་འགྲེལ་བརྗོད་གནང་བྱུང་།
ཐེངས་འདིར་གོམ་བགྲོད་པ་ཁྱེད་གཉིས་ཀྱིས་ཨ་རིའི་རྒྱལ་ས་ཝ་ཤིན་ཊོན་ནས་ནིའུ་ཡོག་བར་དུ་གོམ་བགྲོད་བྱེད་དགོས་དོན་ཅི་ཡིན་ཞེས་དྲིས་སྐབས་ཁོང་གིས་གསུངས་དོན། “གཅིག་ནས་ཨ་རིའི་རྒྱལ་ས་ཝ་ཤིང་ཊོན་ནི་དམངས་གཙོའི་རྒྱལ་ཁབ་ཀྱི་རྒྱལ་ས་ཡིན་སྟབས་མཚོན་དོན་ཆེན་པོ་ཡོད་རེད། ནིའུ་ཡོག་ཀྱང་དེ་བཞིན་མཚོན་དོན་ཆེན་པོ་ཡོད་རེད། དེ་ནས་བོད་མི་མང་པོ་ནིའུ་ཡོག་དང་ཝ་ཤིང་ཊོན་ས་ཁུལ་དུ་སྡོད་ཀྱི་ཡོད། ང་ཚོས་བོད་མི་རྣམས་ལ་རེ་སྐུལ་ཞུས་ཏེ་གོམ་བགྲོད་ཆ་ཚང་ཞུགས་རོགས་ཞེས་ཞུ་གི་མེད། འོན་ཀྱང་ཉི་མ་གཅིག་གམ་ཡང་ན་ཆུ་ཚོད་འགའ་རེ་ལའང་མཉམ་ཞུགས་བྱས་ནས། བོད་ཀྱི་དཀའ་སྡུག་འདི་དག་འཛམ་གླིང་ལ་སྒྲོག་པར་ཕེབས་ཆེད་གོམ་བགྲོད་ལ་མཉམ་ཞུགས་བྱས་ན་ཧ་ཅང་ཡག་པོ་རེད། ང་ཚོ་བོད་མི་རྣམས་ནི་དཀའ་སྡུག་ཆེ་བའི་སྐབས་སུ་མཉམ་འབྲེལ་དང་རྡོག་རྩ་ཆིག་སྒྲིལ་བྱེད་རྒྱུ་འདི་གལ་ཆེན་པོ་རེད། ཅེས་གསུངས་བྱུང་།
བོད་རང་བཙན་གྱི་ལས་འགུལ་སྤེལ་རྒྱུ་ལ་རིགས་མང་པོ་ཡོད་པ་ལས་གོམ་བགྲོད་བྱེད་དགོས་པའི་རྒྱུ་མཚན་གང་ཡིན་ཞེས་དྲིས་སྐབས་ཁོང་གིས་གསུངས་དོན། “ངའི་པཱ་ལགས་ཀྱིས་ང་ལ་གསུངས་གི་ཡོད། ང་ཚོ་ཨ་རི་ལ་སྡོད་མཁན་བོད་མི་རྣམས་ནི་ཧ་ཅང་སྐྱིད་དྲགས་པ་རེད་གསུངས་གི་ཡོད། ང་ཚོས་ལས་ཀ་བྱས། དངུལ་བསགས། དེ་ནས་སྐྱིད་པོ་བྱས་ནས་སྡོད་ཀྱི་ཡོད། དེས་འགྲིག་གི་མི་འདུག ངས་གཞན་ཅིག་བྱེད་དགོས་པ་རེད། ངའི་པཱ་ལགས་ཀྱིས་ལས་འགུལ་འདི་ཧ་ཅང་ཡུན་རིང་པོར་བྱས་པ་རེད། ད་ངའི་མི་ཐོག་སྒང་ལ་བབས་པ་རེད། ད་ག་རེ་བྱས་ནས་གོམ་པ་བརྒྱབ་གི་ཡོད་ཅེ་ན། གོམ་པ་རྒྱག་རྒྱུ་འདི་དཀའ་ལས་ཁག་པོ་ཡོད་རེད། བྱས་ཙང་ང་གོམ་པ་རྒྱག་གི་ཡོད། ངས་རྐང་འཁོར་དང་སྦག་སྦག་བཏང་ནས་ཨ་རི་ལ་བསྐོར་བ་རྒྱག་ཐུབ་ཀྱི་རེད། དེ་ལས་སླ་བ་རེད། ང་ནི་ལས་སླ་བ་ཞིག་བྱེད་རྒྱུ་ལ་སྐྱེད་སྲིང་བྱས་ཡོད་མ་རེད། དཀའ་ལས་རྒྱག་ཐུབ་གི་ཡོད། ད་དུང་། ངའི་པཱ་ལགས་གོམ་པ་བརྒྱབ་གནང་བ་རེད། འཇིགས་མེད་གོམ་པ་བརྒྱབ་གནང་བ་རེད། ངས་ཁོང་ཚོ་གཉིས་ཀྱི་རྗེས་འབྲང་ནས་གོམ་པ་རྒྱག་གི་ཡོད།” ཅེས་གསུངས་སོང་།
ཀུན་དགའ་ནོར་བུ་ལགས་ཀྱི་སྤུན་ཆུང་བ་འཇིགས་མེད་ནོར་བུ་ལགས་ ༢༠༡༡ ལོའི་ཟླ་ ༢ ཚེས་ ༡༤ ཉིན་ ཧྥི་ལོ་ཪེ་ཌ་མངའ་སྡེའི་ནང་ རང་བཙན་གོམ་བགྲོད་སྐབས་ མོ་ཊ་བརྡབ་རྐྱེན་གྱིས་སྐུ་འདས་པ་དང་། སྐབས་དེའི་གོམ་བགྲོད་སྔོན་དེ་མ་ཐག་ལ་ཁོང་གིས་ཚིག་འདི་འདྲ་ཞིག་གསུངས་འདུག “ངའི་ལག་པ་དང་རྐང་པ་ནི་ངའི་ཕ་ཡི་ཆ་ཤས་ཤིག་རེད། ངའི་ཕ་ཡིས་གོམ་བགྲོད་འདི་འདྲ་ཟླ་རེ་རེའི་ནང་དུ་བྱུང་ན་བསམས་ཀྱི་ཡོད་པ་རེད། འདི་ཁོང་གི་ཐུགས་རེ་རེད། བྱས་ཙང་། ངས་དེ་སྒྲུབ་ཀྱི་ཡོད། བོད་མི་སུ་ཡིན་ང་དང་ལྷན་དུ་མཉམ་ཞུགས་བྱེད་རྒྱུར་དགའ་བསུ་ཡོད།”
ཐེངས་འདིའི་གོམ་བགྲོད་སྐོར་ལ་གནས་ཚུལ་ཞིབ་གསལ་མཁྱེན་འདོད་ཡོད་མཁན་ཚོས་ རང་བཙན་གོམ་བགྲོད་པ་རྔ་བ་རབ་བརྟན་རྒྱ་མཚོ་ལགས་སུ་འབྲེལ་བ་གནང་དགོས་པ་དང་། ཁོང་གི་ཁ་པར་ཨང་གྲངས་ནི་ (202) 412-4104 ཡིན་པ་རེད།
