དོན་ཚན་རེ་རེ་བཞིན་གལ་ཆེ་ཆུང་གཅིག་མཚུངས་སུ་བཞག་ན་བཟང་།

དེ་རིང་བཞུགས་སྒར་ངྷ་རམ་ས་ལར་༸རྒྱལ་དབང་སྐུ་ཕྲེང་བཅུ་གསུམ་པ་ཆེན་པོ་མཆོག་གི་རང་བཙན་ཁྱབ་བསྒྲགས་ཀྱི་ཉིན་མོ་སྲུང་གཙི་གནང་ཡོད་པ་དང་། དེ་མིན་འཛམ་གླིང་རྒྱལ་ཁབ་ ༣༠ ཙམ་གྱི་ནང་དུས་དྲན་སྲུང་གཙི་གནང་གི་ཡོད་འདུག

དེ་རིང་ཕྱི་ཚེས་ ༡༣ ཉིན་བོད་རང་བཙན་སློབ་ཕྲུག་ཚོགས་པའི་གོ་སྒྲིག་འོག  བཞུགས་སྒར་ངྷ་སའི་ཉིན་མོ་སློབ་གྲྭའི་ཚོགས་ཁང་ནང་། ༸གོང་ས་སྐུ་ཕྲེང་བཅུ་གསུམ་པ་མཆོག་གིས་བོད་རང་བཙན་བསྐྱར་ནན་གསལ་བསྒྲགས་སྤེལ་ཏེ་ལོ་ ༡༠༠  འཁོར་བའི་དུས་དྲན་དང་འབྲེལ་བགྲོ་གླེང་ཞིག་ཚོགས་སོང་། དེར་བོད་མི་མང་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་དང་དང་། བོད་ཀྱི་དཔེ་མཛོད་ཁང་གི་ཤེས་ཡོན་དཔར་སྐྲུན་འགན་འཛིན་ན་ག་སངས་རྒྱས་བསྟན་དར་ལགས། བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཞོན་ཀླུ་མཁར་བྱམས་ལགས་བཅས་ཀྱིས་གཏམ་བཤད་གནང་སོང་།

མཛད་སྒོ་དེར་བཞུགས་སྒར་ཁུལ་གྱི་སེར་སྐྱ་མི་མང་ ༡༠༠ ལྷག་འདུ་འཛོམ་གྱིས་བོད་རང་བཙན་སློབ་ཕྲུག་ཚོགས་པས་བོད་ཆོལ་ཁ་གསུམ་གྱི་སྐུ་ཚབ་མཚོན་པའི་བོད་མི་གསུམ་རྟར་གཞོན་བཅུག་སྟེ། བཞུགས་སྒར་ཁྲོམ་གཞུང་དུ་༸གོང་ས་སྐུ་ཕྲེང་བཅུ་གསུམ་པ་ཆེན་པོ་མཆོག་གི་ཆུ་གླང་ལོའི་རང་བཙན་བསྒྲགས་གཏམ་ཁྱབ་བསྒྲགས་ཁྲོམ་སྐོར་གནང་རྗེས། སློབ་ཕྲུག་ཚོགས་པའི་རྒྱ་གར་ས་གནས་ཚོགས་གཙོ་རྡོ་རྗེ་ཆེ་བརྟན་ལགས་ཀྱིས། ༡༩༡༣ ལོར་༸གོང་ས་སྐུ་ཕྲེང་བཅུ་གསུམ་པ་ཆེན་མོ་མཆོག་གིས་བོད་རང་བཙན་བསྐྱར་ནན་གནང་སྟེ་མི་ལོ་ ༡༠༠ འཁོར་བའི་ཉིན་མོ་འདིར། བོད་རང་བཙན་སློབ་ཕྲུག་ཚོགས་པས་བཞུགས་སྒར་ཙམ་མ་ཡིན་པར། བོད་དོན་རྒྱབ་སྐྱོར་ཚོགས་པ་དང་མཉམ་འབྲེལ་ཐོག་འཛམ་གླིང་རྒྱབ་ཁབ་ ༣༠ ལྷག་གི་ནང་གཞུང་ཚབ་ཁག་ལ་ཞུ་གཏུག་དང་། སྐད་ཡིག་འདྲ་མིན་ཐོག་རང་བཙན་བསྒྲགས་གཏམ་དེ་རྒྱལ་ཁབ་ཁག་གི་དཔོན་རིགས་དང་མི་མང་ལ་འགྲེམས་སྤེལ། པར་དང་བོད་རང་བཙན་ཡིན་པའི་ལོ་རྒྱུས་ཀྱི་དཔང་རྟགས་འགྲེམས་སྟོན་གནང་བཞིན་པའི་སྐོར་ངོ་སྤྲོད་གནང་སོང་།

དེའི་རྗེས་༸གོང་ས་སྐུ་ཕྲེང་བཅུ་གསུམ་པ་དང་བོད་རང་བཙན་གྱི་གཏམ་གླེང་ཞེས་པའི་གཏམ་བཤད་མགོ་འཛུགས་གནང་སོང་སྟེ། བོད་མི་མང་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་ཀྱིས། ༡༨༩༥ ལོར་༸རྒྱལ་དབང་སྐུ་ཕྲེང་བཅུ་གསུམ་པ་ཆེན་མོས་བོད་རྒྱལ་ཁབ་ཀྱི་ཆོས་སྲིད་གཉིས་ཀྱི་མཛད་འགན་བཞེས་པའི་སྐབས་ནི། དབྱིན་ཇི་དང་རཱ་ཤི་ཡ། མན་ཇུ་གསུམ་གྱིས་བོད་ཀྱི་ས་ཁུལ་ལ་དམིགས་བསལ་འཐབ་རྩོད་དང་དབང་ཆ་འཐབ་རྩོད་ཀྱི་དུས་སྐབས་ཤིག་ཏུ་ཁེལ་ཏེ། དེང་དུས་ཀྱི་ལོ་རྒྱུས་དང་མཐུན་པའི་ཆིངས་ཡིག་མང་པོ་ཞིག་བཞག་པ་དང་། ༡༩༠༤ ལོར་དབྱིན་ཇིས་བོད་ལ་བཙན་འཛུལ་བྱས་རྗེས། རཱ་ཤི་ཡའི་རྒྱལ་ཁབ་དང་འབྲེལ་བ་ཡོད་སྟབས། རྒྱལ་དབང་སྐུ་ཕྲེང་བཅུ་གསུམ་པ་ཆེན་པོ་སོག་པོ་བརྒྱུད་བཙན་བྱོལ་དུ་ཕེབས་དགོས་བྱུང་བ་དང་། ༡༩༠༥ ལོ་དང་ ༡༩༠༦ ལོར་མན་ཇུའི་རྒྱལ་ཁབ་ཀྱི་དམག་མང་པོ་བོད་ཀྱི་ཁམས་དང་ཨ་མདོའི་ཕྱོགས་སུ་བཙན་འཛུལ་བྱས་ཏེ། མི་མང་ལ་བརྡབ་གསིག་མང་པོ་བཏང་སྟབས། རཱ་ཤི་ཡཱ་ནས་ཕེབས་མ་ཐུབ་པར་པེ་ཅིན་དུ་ཕེབས་ཏེ་རྒྱ་ནག་གོང་དམག་ཚོར་ཁམས་དང་ཨ་མདོ་ཕྱོགས་ཀྱི་མན་ཇུའི་དམག་མི་ཕྱིར་འཐེན་ཡོང་ཐབས་ཞུ་སྐུལ་ཞ་དགོས་ཐུག་ཡོད་ཚུལ།  ༡༩༠༩ དང་ ༡༩༡༠ ལོར་བོད་ནང་ཕེབས་རྗེས་སྐབས་དེའི་མན་ཇུའི་གོང་མ་དང་མཆོད་ཡོན་གྱི་འབྲེལ་བ་མེད་སྟབས། མན་ཇུའི་དམག་ཡོངས་རྫོགས་ལྷ་སར་བཙན་འཛུལ་བྱས་མཐར་རྒྱ་གར་ནང་ཚུར་བཙན་བྱོལ་དུ་ཕེབས་དགོས་བྱུང་ཡོད་ཀྱང་། རྒྱ་གར་ནང་བཙན་བྱོལ་དུ་བསླེབས་རྗེས་བོད་ནང་མན་ཇུའི་དམག་མཐར་སྐྲོད་གཏོང་རྒྱུའི་ཐབས་ཤེས་མང་པོ་བྱས་ཡོད་པ་མ་ཟད། ༡༩༡༡ ལོར་ལྷ་ས་གཙོས་བའི་བོད་མི་ཡོངས་རྫོགས་ཡར་ལངས་ཏེ་ལོ་གཅིག་རང་དམག་འཁྲུག་བརྒྱབ་རྗེས་མན་ཇུའི་དམག་ཕམ་པར་བརྒྱབ་སྟེ་རྒྱལ་དབང་མཆོག་ཕྱིར་བོད་ལ་གདན་འདྲེན་ཞུས་ཡོད་ཚུལ་སོགས་རང་བཙན་བསྐྱར་ནན་གྱི་གསལ་བསྒྲགས་མ་གནང་གོང་གི་བོད་དང་མན་ཇུའི་སྐབས་ཀྱི་གནས་སྟངས་ངོ་སྤྲོད་གནང་སོང་།   

ཐེངས་འདིའི་དུས་དྲན་སྲུང་གཙིའི་ཐད་ཁོང་གིས། “ དེ་རིང་ང་ཚོས་དུས་ཆེན་གལ་ཆེན་པོ་ཞིག་སྲུང་གཙི་བྱེད་ཀྱིན་པ་རེད། ལོ་རྒྱུས་ལ་ཕྱིར་མིག་བལྟས་པ་ཡིན་ན། ང་ཚོའི་མེས་པོ་ཚོའི་སྐབས་སུ་དེང་དུས་དང་གཅིག་པ་རེད། ༸གོང་ས་སྐུ་ཕྲེང་བཅུ་བཞི་བ་ཆེན་མོ་མཆོག་ཀྱང་བཙན་བྱོལ་དུ་ཕེབས་དགོས་བྱུང་བ་རེད། དེ་ཡང་རྒྱ་ནག་དམར་པོ་ང་ཚོ་བོད་ལ་དམག་ཡོང་བ་གཅིག་པ་རེད། དེའི་སྐབས་སུ་ང་ཚོའི་མེས་པོ་ཚོས་རྒྱ་ནག་གི་འོག་ནས་༸གོང་ས་མཆོག་གདན་འདྲེན་དང་གསེར་ཁྲིར་མངའ་གསོལ་སོགས་དཀའ་ལས་གང་འདྲ་བརྒྱབ་ཡོད་མེད་བལྟས་ཏེ། དེང་སང་ང་ཚོའི་སྐབས་སུ་ག་རེ་བྱ་ཐུབ་མིན་ལ་བསམ་བློ་གཏོང་རྒྱུ་གལ་ཆེན་པོ་རེད། ལོ་རྒྱུས་ཐོག་རང་བཙན་ཡིན་པའི་ཁུངས་སྐྱེལ་བཞག་ཡོད་པ་རེད། ཡིན་ནའང་། ༸གོང་ས་སྐུ་ཕྲེང་བཅུ་བཞི་བ་ཆེན་མོའི་སྐབས་སུ་སྔར་དང་མ་འདྲ་ཞིག་ཆགས་ཡོད་པ་རེད། ༸གོང་ས་སྐུ་ཕྲེང་བཅུ་བཞི་པ་ཆེན་མོས་སྤྱི་ཡོངས་ཀྱི་འཛམ་གླིང་གི་གནས་སྟངས་དང་། བོད་དང་རྒྱ་ནག་གི་གནས་སྟངས་བཅས་ཕྱོགས་མང་པོར་དགོངས་པ་བཞེས་ཏེ། བདེ་སྐྱིད་ཡོང་བ་ཡིན་ན་རྒྱ་མི་དང་མཉམ་དུ་འདུག་རྒྱུའི་དབུ་མའི་ལམ་གྱི་ཐོག་ནས་འགྲོ་བཞིན་པ་རེད། དེ་ཡང་༸གོང་ས་མཆོག་གིས་མཛད་པའི་རླབས་ཆེན་གྱི་མཛད་འཕྲིན་གཅིག་རེད་བསམ་གྱི་ཡོད། དེང་སང་སྤྱི་ཚོགས་ནང་༸གོང་ས་སྐུ་ཕྲེང་བཅུ་གསུམ་པ་ཆེན་པོས་བོད་རང་བཙན་བསྐྱར་ནན་གསལ་བསྒྲགས་ཀྱི་ལས་འགུལ་སྤེལ་སྐབས། ཁག་ཅིག་གིས་༸གོང་ས་བཅུ་བཞི་བ་ཆེན་པོར་ཁ་གཏད་དང་ཁ་རྡུང་བཏང་བར་ངོས་འཛིན་བྱེད་ཀྱི་ཡོད་ས་རེད། ལོ་ ༦༠ ལྷག་གི་རྒྱ་ནག་གི་བཙན་བཟུང་བྱས་ཡོད་སྟབས། མ་འོངས་པའི་བོད་ཀྱི་དཀའ་ངལ་སེལ་བའི་ཐབས་ལ་དབུ་མའི་ལམ་གྱི་སྲིད་ཇུས་བཏོན་པ་དེ། འདས་པའི་བོད་རང་བཙན་གཞིར་བཞག་དངོས་ཡོད་གནས་སྟངས་ལ་དཔག་པའི་མཛད་འཕྲིན་ཞིག་ཡིན་སྟབས། ང་རང་གི་ངོས་ནས་འགལ་ཟླ་རྩ་བ་ཉིད་ནས་མཐོང་གི་མེད། མ་འོངས་པར་དེ་འཛམ་གླིང་ནང་ཁྱབ་བསྒྲགས་བྱ་རྒྱུ་དང་ལས་འགུལ་སྤེལ་རྒྱུ་གལ་ཆེན་པོ་རེད། ” ཅེས་བརྗོད་བྱུང་།

རྒན་ན་ག་སངས་རྒྱས་བསྟན་དར་ལགས་ཀྱིས། སྤྱིར་བཏང་འཛམ་གླིང་གི་ཆབ་སྲིད་ཀྱི་ལོ་རྒྱུས་ནང་རང་བཙན་ངོས་འཛིན་བྱེད་སྟངས་ཆ་རྐྱེན་བགྲང་སྐབས། ཆ་རྐྱེན་འདྲ་མིན་མང་པོ་ཡོད་ཀྱང་། དུས་ཀྱི་འཕེལ་རིམ་དབང་གིས་སྐབས་འགར་བདེན་དཔང་ཁག་ཅིག་དུས་ཚོད་རྗེས་མར་གལ་ཆེན་མིན་པར་ཆགས་ཀྱི་ཡོད་པ་དང་། འདས་པའི་ལོ་རྒྱུས་ནང་རྒྱལ་ཁབ་རང་བཙན་ཡིན་མིན་དངུལ་བཟོ་བ་དང་ཐོབ་ཐང་ཡོད་མེད་སོགས་ལ་ལྟ་རྒྱུ་ཡོད་ཀྱང་། དེང་སང་རྒྱལ་ཁབ་གཉིས་དང་གསུམ་གྱི་དངུལ་ལོ་གཅིག་བེད་སྤྱོད་གཏོང་མཁན་ཡང་ཡོད་སྟབས། རིགས་ཁག་ཅིག་དུས་ཚོད་གཅིག་གི་རང་བཙན་ཡིན་མིན་གྱི་ནང་ཁུངས་སྐྱེལ་ལ་འགྲོ་བཞིན་ཡོད་ཀྱང་། དུས་ཚོད་ཅིག་གི་ནང་དེ་ཙམ་གལ་ཆེན་མིན་པའི་གནས་ཚུལ་ཆགས་ཏེ་དུས་ཚོད་གསར་བའི་ནང་ངོས་ལེན་བྱེད་པར་བསམ་བློ་གསར་བ་གཏོང་དགོས་ཆགས་ཀྱི་ཡོད་ཚུལ། དེ་བཞིན་ཁོང་གིས་དུས་རབས་ ༡༩ དང་ ༢༠། ༢༡  ནང་ཁྲིམས་ཐོག་གི་ཡིག་ཆ་གལ་ཆེན་ཆགས་ཀྱི་ཡོད་པའི་སྐོར་སོགས་གསུངས་ཏེ། མ་འོང་པར་ལོ་རྒྱུས་ཡིག་ཆར་སློབ་སྦྱོང་བྱ་དགོས་པ་གལ་ཆེན་ཡིན་པའི་ཐད་ཁོང་གིས།   “ ༸གོང་ས་སྐུ་ཕྲེང་བཅུ་གསུམ་པ་ཆེན་པོའི་ཆུ་གླང་རྩ་ཚིག་གི་སྔོན་གླེང་དང་ནང་དོན་ཁག་ལ་སློབ་སྦྱོང་བྱ་རྒྱུ་ཧ་ཅང་གལ་ཆེན་པོ་རེད། སྔོན་གླེང་ནང་བོད་ཀྱི་གནའ་རབས་ཀྱི་ལོ་རྒྱུས་མདོར་བསྡུས་བཀོད་ཡོད་པ་མ་ཟད། ལྷག་པར་དུ་བོད་དེ་མིང་ཙམ་གྱི་རྒྱ་ནག་གི་དབང་འོག་ཡིན་ཟེར་བའི་སྐད་ཆ་སའུ་ཙི་ལེན་ཌི་ཟེར་བ་དེར་མེད་པར་ཆགས་པ་དང་སྐུ་ཕྲེང་ལྔ་བ་ནས་མཆོད་ཡོན་གྱི་འབྲེལ་བ་མཚམས་ཆད་པ་བཅས་གསལ་བོ་ཆགས་ཡོད་བཀོད་ཡོད་སྟབས། སྔོན་གླེང་ཧ་ཅང་གལ་ཆེན་པོ་རེད། དོན་ཚན་དང་པོ་དང་གཉིས་པའི་ནང་གཙོ་བོ། སངས་རྒྱས་ཀྱི་བསྟན་པ་དང་ཆོས་དང་རིག་གཞུང་སྲུང་སྐྱོབ་ཀྱི་སྐོར་རེད། དོན་ཚན་གསུམ་པ་གཙོ་བོ་བོད་མི་མང་གི་བདེ་སྡུག་ཐད་འཛིན་སྐྱོང་གི་ངོས་ནས་བསམ་བློ་གཏོང་སྟངས་དང་འཛིན་སྐྱོང་གནང་ཕྱོགས་རེད། སྤྱིར་བཏང་ཆུ་གླང་རྩ་ཚིག་གི་དོན་ཚན་ཚང་མ་གལ་ཆེན་པོ་ཡིན་ཡང་། ཆབ་སྲིད་དང་འབྲེལ་བ་ཡོད་པ་དེ་དོན་ཚན་བཞི་བ་དང་ལྔ་པ་གཉིས་ཆགས་འདུག ཆུ་གླང་རྩ་ཚིག་མགོ་ནས་མཇུག་བར་རང་བཙན་ཟེར་བའི་ཚིག་རྩ་བ་ཉིད་ནས་ཡོད་པ་མ་རེད།  ཡིན་ནའང་། ནང་དོན་དེ་བོད་རང་བཙན་ཡིན་པའི་གནད་འགག་ཆགས་ཡོད་སྟབས། སྐུ་ངོ་ཞྭ་སྒབ་པས་འགྲེལ་བརྗོད་བྱེད་པའི་སྐབས་སུ་རང་བཙན་གསལ་བསྒྲགས་རེད་ཅེས་སྐད་ཆ་དེ་འདྲ་ཆགས་པ་རེད། དེ་ཆགས་པ་ནས་བཟུང་བོད་པ་ཙམ་མ་ཟད། ལོ་རྒྱུས་སྨྲ་བ་གཞན་པ་ཚོས་ཀྱང་མ་རེད་ཟེར་མཁན་མེད་པའི་གནས་སྟངས་ཆགས་ཏེ། ཆབ་སྲིད་ཀྱི་ཕྱོགས་ནས་གནད་འགག་ཆགས་ཡོད་པ་རེད།  འབྲས་བུ་གང་འདྲ་ཞིག་ལ་འབད་བརྩོན་བྱེད་ཀྱང་དེའི་རྒྱུ་ལ་འབད་བརྩོན་བྱེད་རྒྱུ་གལ་ཆེན་ཡིན་སྟབས། དུས་དྲན་སྲུང་གཙིའི་སྐབས་དོན་ཚན་རེ་རེ་བཞིན་གལ་ཆེ་ཆུང་གཅིག་མཚུངས་ཀྱིས་སྲུང་གཙི་བྱས་པ་ཡིན་ན་ཡག་པོ་ཡོང་གི་རེད། ལྷག་པར་དུ་ད་ལྟའི་ཆར་ཁྲིམས་ཐོག་གི་གནས་ཚུལ་ཧ་ཅང་གལ་ཆེན་ཡིན་སྟབས། བོད་རྒྱལ་ཁབ་དང་ཁྱིམ་མཚེས་རྒྱལ་ཁབ་བར་སྔ་ཕྱི་ཆིངས་ཡིག་མང་པོ་བཞག་ཡོད་སྟབས།  སྐུ་ཕྲེང་བཅུ་བཞི་བའི་སྐབས་ཀྱི་དོན་ཚན་བཅུ་བདུན་དང་གཡུ་རྒྱལ་ལྷུན་རྩེ་རྫོང་དུ་ཕེབས་སྐབས་ཀྱི་གསལ་བསྒྲགས། ཆིངས་ཡིག་དོན་ཚན་བཅུ་བདུན་རྩིས་མེད་སྐོར་གྱི་གསལ་བསྒྲགས་བཅས་ལོ་རྒྱུས་ཀྱི་དཔང་བོ་ཆགས་ཡོད་སྟབས། ལོ་རྒྱུས་ཀྱི་གནས་ཚུལ་ཁྲོད་ཡག་སྡུག་མང་པོ་ཡོད་ཀྱང་། འདས་པའི་ལོ་རྒྱུས་དེ་ལོ་རྒྱུས་རང་ལ་ངོས་འཛིན་གྱིས་སློབ་སྦྱོང་བྱ་དགོས་པ་རེད། ” ཅེས་གསུངས་བྱུང་།

མཇུག་ཏུ་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཞོན་ཀླུ་མཁར་བྱམས་ལགས་ཀྱིས། སྤྱིར་རང་བཙན་བསྒྲགས་གཏམ་དགོས་པ་དེ་ནུབ་ཕྱོགས་ཀྱི་ཚད་གཞི་ཞིག་ཡིན་པ་དང་། བོད་རང་བཙན་གྱི་རྒྱལ་ཁབ་ཡིན་པའི་ངོས་འཛིན་དེ་ཡང་ཐོག་མར་བོད་པས་བྱས་པ་མིན་པར་བོད་ཀྱི་གནས་བབ་དང་། ༡༩༥༠ ལོར་སིར་ཆིང་སི་བྷེལ་ལགས་ཀྱིས་བརྩམས་པའི་དེབ།  ༡༩༥༢ ལོར་རྒྱ་མིའི་རྩོམ་པ་པོ་ཧྲིན་ཙོན་མེན་གྱི་བརྩམས་པའི་དེབ་བཅས་བོད་མིའི་རང་བཙན་ཡིན་པའི་བསྒྲགས་གཏམ་མ་སྤེལ་ཡར་སྔོན་དུ་ཕྱི་རྒྱལ་གྱི་ཆབ་སྲིད་པ་དང་རྩོམ་པ་པོ་སོགས་ཀྱིས་ངོས་འཛིན་བྱས་ཡོད་པ་དང་།  རྒྱལ་དབང་སྐུ་ཕྲེང་བཅུ་གསུམ་པ་མཆོག་གིས་རང་བཙན་གསལ་བསྒྲགས་དེ་ ༡༧༧༦ ལོའི་ཨ་རིའི་རང་བཙན་བསྒྲགས་གཏམ་དང་། ༡༧༨༩ ལོའི་ཧྥ་རན་སིའི་མི་སེར་ཐོབ་ཐང་བསྒྲགས་གཏམ་བཅས་དང་བསྡུར་སྐབས། ང་ཚོའི་བསྒྲགས་གཏམ་དེའི་ནང་བུད་མེད་དང་རིགས་རྒྱུད་ལ་མཐོང་ཆུང་སོགས་ཀྱི་ཚིག་མེད་པ་མ་ཟད། རྒྱ་ནག་ལའང་དམིགས་བསལ་ཚིག་སྡུག་པོ་དེ་འདྲ་མེད་པ་སོགས་ཆབ་སྲིད་དང་ཤེས་རིག་ཕྱོགས་གང་གི་ཐད་ནས་ཀྱང་འཛམ་གླིང་གི་རང་བཙན་བསྒྲགས་གཏམ་གཞན་ལྟར་ཚད་མཐོན་པོར་ཡོད་སྟབས། རྒྱ་ནག་གཞུང་གིས་ཆབ་སྲིད་གཅིག་པུ་མིན་པར། དཔལ་ཡོན་གྱི་ཕྱོགས་ནས་ཚད་མཐོན་པོར་བསླེབས་ཡོད་པའི་རང་བཙན་བསྒྲགས་གཏམ་དེ་བཀག་འགོག་བྱས་ཡོད་སྐོར་སོགས་བརྗོད་དེ། རྒྱ་ནག་གིས་བོད་རང་བཙན་གྱི་བསྒྲགས་གཏམ་ཐད་ལ་འཁྱོག་བཤད་དང་དམིགས་ཡུལ་འདྲ་མིན་བཟུང་ཡོད་པའི་ཐད་ཁོང་གིས།  “ རྒྱ་ནག་གིས་རང་བཙན་བསྒྲགས་གཏམ་ཐད་སིམ་ལའི་ཆིངས་ཡིག་འཇོག་དགོས་པའི་རྒྱུ་མཚན་གཙོ་བོ། སའུ་ཙི་ལན་ཌི་དང་ཕྱི་བོད་དང་ནང་བོད་ཀྱི་སྐད་ཆ་ཡོད་པ་རེད། རྒྱ་ནག་གིས་ཆིངས་ཡིག་དེ་གླེང་ཡོང་སྐབས་དང་པོ་རྒྱ་ནག་གིས་མཚན་རྟགས་བརྒྱབ་མེད་པའི་དབང་གིས་ཁྲིམས་འགལ་དང་། དཀྲོགས་གཏམ་བཟོ་བྱེད་ཡིན་ཚུལ་སོགས་བཤད་ཀྱི་ཡོད་པ་རེད་ལ། དེ་དང་མཉམ་དུ་བོད་རང་བཙན་བཤད་སར་སིམ་ལའི་ཆིངས་ཡིག་འཁྱེར་ཡོང་གི་འདུག ང་རང་གི་ངོས་ནས་རྒྱུ་མཚན་གཙོ་བོ་བོད་ཕྱི་ནང་གི་སྐད་ཆ་ཡོད་སྟབས། གལ་སྲིད། མ་འོངས་པར་བོད་ཆ་ཚང་བཟུང་མ་ཐུབ་པར་ཤོར་བ་ཡིན་ན། ཕྱི་སོག་དང་ནང་སོག་ལྟར་ཁམས་ཨ་མདོའི་ས་ཆ་ཁ་ཤས་བཟུང་སྟེ། གཞན་རྣམས་ཤོར་བའི་ཐབས་ཤེས་རེད་བསམ་གྱི་འདུག དེ་རིང་ང་ཚོས་རང་བཙན་བསྒྲགས་གཏམ་ཉིན་མོ་སྲུང་གཙི་བྱེད་ཀྱི་ཡོད་པ་རེད། ང་ཚོར་བོད་རང་བཙན་ཡིན་པའི་ཁུངས་སྐྱེལ་འདི་གཅིག་པུ་མ་རེད། ཡིན་ནའང་། ང་ཚོས་བོད་ཀྱི་ལོ་རྒྱུས་ཡིག་ཆ་ཚད་ལྡན་སྲོང་བཙན་སྒམ་པོའི་སྐབས་ཀྱི་ལྷ་ཆོས་དགེ་བ་བཅུ་དང་མི་ཆོས་གཙང་མ་བཅུ་དྲུག ཁྲིམས་ལུགས་ཞལ་ལྕེ་བཅུ་དྲུག ས་སྐྱ་དང་ཕག་གྲུ་སྐབས་ཀྱི་ཡིག་ཆ་ཁག་ལས་ཧང་སངས་བ་མིན་ཡང་། ད་ལྟའི་འཛམ་གླིང་གི་ཡིག་ཆ་ཁག་དང་མཉམ་དུ་འགྲོ་ཐུབ་པའི་ནུས་པ་ཡོད་པ་དང་། ༡༩༡༣ ལོ་ནས་ ༡༩༥༡ གྲོས་མཐུན་དོན་ཚན་བཅུ་བདུན་བར་བོད་ཀྱི་གནས་སྟངས་ལ་འགྱུར་བ་ཕྱིན་ཏེ་མི་ལོ་ ༤༠ ཕྱིན་ཡོད་སྟབས་སྲུང་གཙི་བྱེད་དགོས་པའི་རྒྱུ་མཚན་རེད་ལ། དེ་དང་མཉམ་དུ་རང་བཙན་བསྒྲགས་གཏམ་གཅིག་པུ་མིན་པར་སྐབས་དེའི་སྣེ་ཁྲིད་པ་དག་གི་སྣེ་འཁྲིད་ཀྱི་ནུས་པ་བཅས་རིན་ཐང་ཆེན་པོ་རེད། ” བརྗོད་བྱུང་།

དེ་རིང་དགོང་དྲོའི་ཆུ་ཚོད་ ༦།༣༠ ཐོག་བོད་རང་བཙན་སློབ་ཕྲུག་ཚོགས་པས་སུད་སི་དང་རྒྱ་གར་བཅས་སུ་ཡོད་པའི་བོད་རིགས་གཞས་པ་ཁག་ཅིག་གདན་ཞུའི་ཐོག  ངྷ་ས་བོད་ཀྱི་ཟློས་གར་ཚོགས་ཁང་དུ་བོད་རང་བཙན་ཉིན་མོར་ཕྱིར་དྲན་གྱི་རོལ་དབྱངས་འདུ་འཛོམས་ཞེས་པ་གོ་སྒྲིག་གནང་ཡོད། 

གསར་འགོད་པ། དོན་གོ