ཉིན་བརྒྱ་དུས་གཅིག་ཏུ་མཆོད་འབུལ།

དེ་རིང་ཕྱི་ཚེས་ ༡༩ ཉིན་གྱི་ཞོགས་པའི་ཆུ་ཚོད་ ༡༠།༠༠ ཐོག་གངས་སྐྱིད་སྤྱི་ཐབ་ཡང་སྟེང་ཚོགས་ཁང་དུ། དབུས་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་དྲུང་ཆེ་ངག་དབང་ཆོས་གྲགས་ལགས་ཀྱིས་གསར་འགོད་གསལ་བསྒྲགས་ཤིག་བསྐྱངས་ཏེ། སང་ཉིན་ཕྱི་དྲོ་བོད་བསྟན་སྲིད་མི་རིགས་ཆེད་རང་སྲོག་བློས་གཏོང་གནང་བའི་རྒྱལ་གཅེས་དཔའ་བོ་དཔའ་མོ་རྣམས་ལ་གདུང་སེམས་མཉམ་སྐྱེད་མཚོན་ཆེད། བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་རྣམ་རྒྱལ་གྲྭ་ཚང་གི་མཁན་རིན་པོ་ཆེ་དབུ་བཞུགས་ཐོག བོད་གཞུང་མང་གཉིས་ཀྱིས་དུས་ཡུན་ཆུ་ཚོད་ ༣ རིང་མཆོད་འབུལ་སྨོན་ལམ་གནང་རྒྱུ་ཡིན་པར་མ་ཟད།  རྒྱ་བལ་འབྲུག་གསུམ་གཙོས་པའི་འཛམ་གླིང་ཡུལ་གང་སར་ཡོད་པའི་བཙན་བྱོལ་བོད་མི་ཚོས་ཉིན་བརྒྱ་དུས་གཅིག་ཏུ་མཆོད་འབུལ་གནང་རྒྱུ་དང་། མཆོད་འབུལ་ཐོག་བོད་མི་གང་མང་མཉམ་ཞུགས་གནང་དགོས་པའི་འབོད་སྐུལ་གནང་སོང་།

གསལ་འགོད་གསལ་བསྒྲགས་སྐབས་ཆོས་རིག་དྲུང་ཆེ་ལགས་ཀྱིས། རྒྱ་ནག་དམར་པོའི་གཞུང་གིས་བོད་བཙན་བཟུང་བྱས་པ་ནས་བོད་ཡུལ་རྒྱ་ཡུལ་དུ་བསྒྱུར་རྒྱུའི་ཕུགས་ངན་བསམ་བྱུས་དང་། བོད་མིའི་ངོ་བོ་དང་རིག་གཞུང་མི་རིགས་དང་བཅས་པ་རྩ་མེད་གཏོང་རྒྱུའི་སྲིད་བྱུས་མཁྲེགས་བཟུང་བྱས་པར། གཞིས་བཞུགས་རང་རིགས་རྣམས་ཀྱིས་དཔའ་མཛངས་ཆེན་པོས་འཚེ་མེད་ཞི་བའི་ལྟ་གྲུབ་ཀྱི་རྒྱ་ལས་མ་བརྒལ་བའི་ཐོག རྒྱ་གཞུང་གི་སྲིད་བྱུས་དང་དབང་འཛིན་ལ་མི་འདོད་པའི་རྣམ་འགྱུར་བསྟན་དང་སྟོན་བཞིན་པ་དང་། ལྷག་པར་དུ་ཕྱི་ལོ་ ༢༠༠༩ ཟླ་ ༢ ཚེས་ ༢༩ ཉིན་ཨ་མདོ་རྔ་པའི་རང་ལོ་ ༢༠ ཡིན་པའི་གྲྭ་བཀྲ་བྷེ་ལགས་ཀྱིས་རང་ལུས་མེར་བསྲེཊ་ཀྱིས་རྒྱ་ནག་གཞུང་ལ་ངོ་རྒོལ་གནང་བ་ནས། ཕྱི་ལོ་ ༢༠༡༣ ཟླ་ ༢ ཚེས་ ༡༧ བར་དུས་ཡུན་ལོ་ངོ་གསུམ་དང་ཟླ་བ་གཅིག ཉིན་གྲངས་བཅུ་བདུན་ནང་བོད་གངས་ཅན་ལྗོངས་སུ་རྒྱལ་གཅེས་དཔའ་བོ་དཔའ་མོ་ ༡༠༢ ནས་བོད་བསྟན་སྲིད་མི་རིགས་ཀྱི་དོན་དུ་རང་ཉིད་མེར་བསྲེཊ་བཏང་སྟེ། བོད་མི་  ༨༦ ཙམ་རྐྱེན་འདས་སུ་གྱུར་ཡོད་པ་དང་། བསྟན་སྲིད་མི་རིགས་ཆེད་དུ་རང་སྲོག་བློས་གཏོང་གནང་མཁན་རྣམས་ཀྱི་ཚེ་རབས་ཕྲེང་བར་བྱས་བསགས་སྡིག་ལྟུང་མ་ལུས་པ་བྱང་ཞིང་དག་ནས་རྣམ་མཁྱེན་རྒྱལ་བའི་གོ་འཕང་མྱུར་དུ་ཐོབ་པ་དང་། ཁོང་ཚོའི་རྗེས་བཞུགས་ནང་མི་སྤུན་ཉེ་དང་། ད་ལྟ་བཙོན་འཇུག་མནར་གཅོད་སོགས་དཀའ་སྡུག་མི་ཟད་པ་མྱངས་དང་མྱོང་བཞིན་པའི་རང་རིགས་ཚོ་ལ་གདུང་སེམས་མཉམ་སྐྱེད་དང་སྐྱིད་སྡུག་མཉམ་མྱོང་མཚོན་བྱེད་དུ་གོ་སྒྲིག་གནང་བཞིན་ཡོད་སྐོར་བརྗོད་བྱུང་།

གསར་འགོད་པ། དོན་གོ