བོད་དོན་ཞི་བའི་འཐབ་རྩོད་པ་གླིང་ཚ་ཚེ་བརྟན་རྡོ་རྗེ་ལགས་སུ། ལོ་སྔོན་མའི་ཞི་བའི་འཐབ་རྩོད་བརྒྱུད་རིམ་ཁྲོད་ཀྱི་གླེང་སློང་སྣ་ཚོགས་དང་། མ་འོངས་པའི་ཞི་བའི་གོམ་བགྲོད་ཐེངས་གཉིས་པ་གནང་ཕྱོགས་ཐད་ནས་བཅར་འདྲི་ཞུས་ཡོད།
དྲི་བ། ཐོག་མར་ཁྱེད་རང་གི་འཚར་ལོངས་བརྒྱུད་རིམ་རོབ་ཙམ་ངོ་སྤྲོད་གནང་རོགས།
ལན། སྤྱིར་ང་རང་ངོ་ཤེས་རྒྱུ་དེ་གལ་ཆེན་པོ་མ་རེད། ཡིན་ནའང་། ངའི་ལས་ཀ་འདི་བོད་མི་རིགས་ཀྱི་བདེན་དོན་དང་འབྲེལ་བའི་ལས་ཀ་ཞིག་ཡིན་སྟབས། ལས་མཁན་དེ་ངོ་ཤེས་ན་ལས་ཀའི་ཐད་ཕན་ཐོགས་ཡོད་སྲིད་སྟབས། རང་ཉིད་ངོ་སྤྲོད་རགས་ཙམ་ཞུས་ཆོག ང་རང་ཕྱི་ལོ་ ༡༩༧༧ ལོར་མདོ་སྨད་བླ་བྲང་བསང་ཁོག་ཏུ་སྐྱེས་ཤིང་། ཆུང་དུས་རྫོང་སློབ་ཆུང་དུ་ལོ་ ༤ རིང་ཕྱིན་རྗེས་བླ་བྲང་དགོན་པའི་གྲྭ་བ་བྱས་ཏེ་ལོ་འགར་བསྡད་པ་ཡིན། ཕྱི་ལོ་ ༡༩༩༥ ལོར་རྒྱ་གར་ཏུ་འབྱོར་བ་རེད། དེ་ནས་ཕྱི་ལོ་ ༢༠༠༨ བར་གཞན་གྱི་ལག་འོག་ཏུ་མ་བྱན་དང་ནང་གཙང་མ་བཟོ་མཁན་སོགས་གཡོག་ལས་རྐྱང་བྱས་བསྡད་པ་ཡིན། རྗེས་སུ་ཨེ་སི་རལ་གྱི་བུ་མོ་ཞིག་དང་མཉམ་དུ་དགའ་བོ་ཆགས་ཏེ། ཕར་ཕྱིན་ནས་ལོ་ ༣ ལྷག་རིང་བྱིས་པ་གཉིས་ཀྱི་ཨ་ཕ་ཆགས་སོང་། ད་སྐབས་བྱིས་པ་གཉིས་ལས་བུ་མོ་ལོ་གསུམ་དང་བུ་ལོ་གཉིས་རེད། ངའི་ལོ་རྒྱུས་མདོར་བསྡུས་དེ་འདྲ་ཞིག་རེད།
དྲི་བ། ཞི་བའི་ལས་འགུལ་འདི་སྤེལ་རྒྱུའི་ཐོག་མིའི་བསམ་འདུན་ཇི་ལྟར་འཁོར་བ་ཡིན།
ལན། སྤྱིར་མི་དེས་ལས་ཀ་ཅི་ཞིག་བྱེད་ཀྱི་ཡོད་མེད་དེ་མི་མང་གིས་ཤེས་རྒྱུ་གལ་ཆེན་པོ་རེད། ཉེ་སྔོན་ང་རང་བཙོན་ཁང་ནང་ཡོད་དུས། སོ་སོའི་ལོ་ངོ་ཉི་ཤུའི་བསམ་བློའི་བརྒྱུད་རིམ་དང་འབྲེལ་བའི་རྩོམ་ཡིག་ཅིག་བྲིས་ཡོད། ག་ལེར་དྲ་ཐོག་ཏུ་འདོན་དགོས་དྲན་ཡོད། སོ་སོ་མི་རིགས་ཀྱི་འཐབ་རྩོད་ནང་ཞུགས་རྒྱུ་དེ་གློ་བུར་དུ་དྲན་པ་ཞིག་མ་རེད། ཕྱི་ལོ་ ༡༩༩༣ ནས་བཟུང་བྱུང་བ་ཞིག་ཡིན། དེ་དུས་ང་རང་གྲྭ་བ་རེད། ༡༩༨༩ ལོར་ལྷ་སའི་གཙུག་ལག་ཁང་དུ་རྒྱ་དམག་གིས་བཙན་གནོན་བྱེད་ཀྱིན་པའི་གློག་བརྙན་ཞིག་ལ་ལྟ་རྒྱུ་བྱུང་། སྐབས་དེ་ནས་བཟུང་མ་འོངས་པར་ངས་འདི་བྱེད་དགོས་ཀྱི་འདུག་སྙམ་པའི་དམ་བཅའ་ཞིག་རང་བཞིན་གྱིས་སེམས་ལ་འཁོར་སོང་། དེར་བརྟེན། འདས་པའི་ལོ་ངོ་ཉི་ཤུའི་བརྒྱུད་རིམ་ནང་ཚོར་བ་དང་ཉམས་མྱོང་བསགས་མཐར་ཐག་གཅོད་འདི་བྱས་པ་ཡིན།
དྲི་བ། ལོ་སྔོན་མར་ཞི་བའི་གོམ་བགྲོད་ཀྱི་བརྒྱུད་རིམ་ཁྲོད། ཁྱེད་རང་ལ་དམིཊ་བསལ་གྱི་དཀའ་ངལ་དང་སེམས་ཚོར་ག་རེ་བྱུང་སོང་།
ལན། མི་ཞིག་ཡིན་པའི་ཆ་ནས་དགའ་སྐྱོའི་ཚོར་བ་ཏན་ཏན་ཡོད་པ་རེད། ཡིན་ནའང་། ད་ལྟའི་ཆར་སོ་སོར་དཀའ་ངལ་ཞིག་འཕྲད་སོང་སྙམ་པའི་བསམ་བློ་མི་འདུག ངས་གཞི་ནས་ཞི་བའི་འཐབ་རྩོད་ཀྱི་མགོ་བཙུགས་པ་ཙམ་རེད། བྱིས་པ་ཞིག་ལ་དཔེ་བཞག་ན། ཟླ་དགུ་དང་ཞག་བཅུར་ཁོག་ལ་འཁུར་རྗེས་བཙས་པ་རེད། གཞི་ནས་འཚར་ལོངས་འབྱུང་རྒྱུ་བསྡད་ཡོད། དེ་འདྲ་ཞིག་ལ་སྐྱེས་པའི་སྡུག་བསྔལ་ཅི་འདྲ་ཡིན་མིན་དྲིས་ཚེ། བྱིས་པ་དེས་ཁོ་རང་གི་སྐྱེས་པའི་སྡུག་བསྔལ་བཤད་ཤེས་ཀྱི་མ་རེད། སྤྱིར་བཏང་ང་རང་ལ་སྡུག་བསྔལ་ཡོད་པའི་དབང་དུ་བཏང་ཡང་། སྡུག་བསྔལ་དེ་འདི་འདྲ་ཞིག་རེད་ཅེས་སྤྱི་ཚོགས་སྒང་འགྲེལ་བཤད་རྒྱག་འདོད་མི་འདུག རྒྱུ་མཚན། སོ་སོ་རང་ངོས་ནས་སེམས་ཐག་གཙང་བཅད་བྱས་ཡོད་སྟབས། བྱ་བ་ཅི་ཞིག་མགོ་ཐོག་ཏུ་བབས་ཀྱང་འགན་རང་འཁུར་བྱ་རྒྱུའི་དམ་བཅའ་ཡོད། ཆོད་སེམས་དང་སྤོབས་པ་དེའི་འོག་ནས་ད་སྔ་ལུས་སེམས་གཉིས་ཀར་དཀའ་ངལ་གང་ཡང་མི་འདུག མ་འོངས་པར་དཀའ་ངལ་ཡོང་སྲིད་པ་རེད། ཡིན་ནའང་། མ་འོངས་པའི་དཀའ་ངལ་དེ་དག་ལ་སོ་སོའི་ངོས་ནས་སྔ་ས་ནས་ཚེ་སྲོག་ཡན་ཆད་གཏའ་མར་བཞག་སྟེ་སྒུག་བསྡད་ཡོད།
དྲི་བ། བལ་ཡུལ་གཞུང་གིས་ཁྱེད་རང་བཙོན་འཇུག་བྱས་དོན། ཁྱེད་ཀྱིས་བལ་གཞུང་གི་དགོས་འདུན་ངོས་ལེན་གནང་མ་ཐུབ་བའི་སྐོར་དེ་བོད་པའི་སྤྱི་ཚོགས་ཁྲོད་གསལ་ཁ་བྱུང་ཡོད་པ་མ་རེད། དེའི་སྐོར་ངོ་སྤྲོད་ཅིག་གནང་རོགས།
ལན། གཙོ་བོ་ལག་ཁྱེར་མེད་པར་ཁོ་ཚོའི་རྒྱལ་ཁབ་ནང་འཛུལ་བའི་ཉེས་འཛུགས་འོག་འཛིན་བཟུང་བྱས་པ་རེད། དེ་ནས་རྒྱུ་མཚན་གསུམ་གྱི་ཐོག་ནས་ང་ད་བར་བཙོན་འཇུག་བྱས་པ་རེད། དེ་དག་ནི་དང་པོ། ང་ལ་ཉེས་ཆད་བལ་སྒོར་ཁྲི་ ༥ སྤྲོད་དགོས་ཟེར། སྐབས་དེར་ངས་ཁོང་ཚོར་ཅི་ཞིག་ལ་སྤྲོད་དགོས་ཀྱི་ཡོད་མེད་དྲིས་པ་ཡིན། གཉིས་པ། ཁོ་ཚོས་ངའི་མི་རིགས་ལ་མཐོང་ཆུང་བྱས་པ་རེད། མི་རིགས་ལ་མཐོང་ཆུང་གི་སྐད་ཆ་དེ་ངས་འཁུར་ཐུབ་མ་སོང་། གསུམ་པ། ད་ནས་བཟུང་ང་ལ་ཞི་བའི་གོམ་བགྲོད་དང་བོད་དོན་ཆེད་ལས་ཀ་ལས་ཆོག་གི་མེད་པའི་ཡི་གེའི་སྟེང་མིང་རྟགས་འགོད་དགོས་ཟེར། དོན་ཚན་དེ་གསུམ་ལས་བོད་དོན་ཞི་བའི་གོམ་བགྲོད་བྱེད་མི་ཆོག་ཟེར་བ་དང་། གཉིས་པ་ང་རང་མི་སྒེར་ལ་མཐོང་ཆུང་བྱས་ན་མི་སྐྱོན་མོད། བལ་གཞུང་གི་ཚད་མཐོའི་ལས་བྱེད་ཅིག་གིས་ངའི་མི་རིགས་ལ་མཐོང་ཆུང་བྱས་པ་དེ་གཉིས་དང་ལེན་བྱེད་ཐུབ་མ་སོང་། དེ་བཞིན། ལག་ཁྱེར་མེད་པའི་ཐད་ཁྲིམས་ཐོག་ནས་བལ་སྒོར་ཁྲི་ ༥ ཡི་ཆད་པ་འབབ་ཀྱི་མེད་སྟབས། ང་རང་ཁྲིམས་ཁང་ནས་ཐེངས་ ༣ ལ་ཁྲིད་དེ་ཐག་གཅོད་བྱེད་གྲབས་ཀྱི་མཚམས་དེར། ལག་ཁྱེར་ཞིབ་བཤེར་ཁང་གིས་ཐག་གཅོད་བྱས་ཟིན། ཁྲིམས་ཁང་གི་ཐག་གཅོད་མིན་ཟེར་བས། ངས་དེ་ངོས་ལེན་བྱས་མེད། ཁོ་ཚོས་ང་ལ་དེ་དག་ངོས་ལེན་མ་བྱས་ན་བཙོན་ཁང་ནང་འགྲོ་དགོས་ཟེར། དེ་ནས་ངས་ལམ་ཁ་དེ་བདམས་པ་ཡིན།
དྲི་བ། ཁྱེད་རང་བལ་གཞུང་བཙོན་ཁང་ནས་ཆ་རྐྱེན་གང་འདྲ་ཞིག་གི་འོག་ནས་བཙོན་གྲོལ་ཐོབ་པ་ཡིན་ནམ།
ལན། ང་རང་བཙོན་དུ་བཅུག་རྗེས། ཕྱི་ལོགས་ནས་རྒྱལ་སྤྱིའི་ཚོགས་སྡེ་དང་མི་སྒེར་མང་པོས་ང་རང་ཕྱིར་འདོན་རྒྱུར་རོགས་རམ་གནང་ཡོང་དུས། ཉེས་ཆད་ཀྱི་དངུལ་འབོར་ཡང་རིམ་པས་ཡར་འཕར་བ་མ་ཟད། མུ་མཐུད་ཞི་བའི་གོམ་བགྲོད་བྱེད་མི་ཆོག་པའི་དགོས་འདུན་དེ་ངེས་པར་དུ་ཁས་ལེན་དགོས་ཟེར། ངས་ཆ་རྐྱེན་དེ་ངོས་ལེན་མ་བྱས་པར་ཟླ་བ་མང་པོ་ཕྱིན་འགྲོ་དུས། ཚོགས་པ་མང་ཞིག་ཕྱི་བཤོལ་མི་བྱེད་རང་བྱེད་ཆགས་སོང་བ་རེད། དེའི་རྗེས་ངས་བཙོན་ཁང་ནང་ཞི་བའི་ངག་བཅད་བྱས་པ་ཡིན། མཐའ་མ་དེར་དོན་ལྡན་གཙོས་བལ་ཡུལ་གྱི་མི་སྣ་ལྷག་བསམ་ཅན་མང་པོ་ཞིག་གིས། གལ་སྲིད་ཁྱོད་ཀྱིས་ས་རྟགས་དེ་གཉིས་རྒྱག་མ་དགོས་པར། དངུལ་གྱི་ཉེས་པ་འཁུར་བཞག་པ་ཡིན་ན་ཀློད་གྲོལ་གཏོང་ཐུབ་ཀྱི་འདུག་ཟེར། མཐར་ཁྲིམས་རྩོད་པ་ཁྲིད་ཡོང་སྟེ་དོན་དག་དེ་ཐག་བཅད་པ་རེད། ཐག་གཅོད་དེའི་སྒང་ལ་ངས་ས་རྟགས་བརྒྱབ་པ་ཡིན། དེ་ནས་ལག་ཁྱེར་ཞིབ་བཤེར་ཁང་དུ་ཡོང་དུས། ཡང་བསྐྱར་ཁོ་ཚོས་ང་ལ་ཁྱོད་ཕྱིར་རྒྱ་གར་ལ་འགྲོ་རྒྱུ་ཁས་ལེན་དགོས་ཟེར། དེ་ངས་ཁས་ལེན་བྱས་རྗེས་ཀློད་གྲོལ་བཏང་སོང་།
དྲི་བ། བལ་ཡུལ་བཙོན་ཁང་ནང་སྡོད་སྐབས་ཁྱེད་ཀྱིས་ཞི་བའི་ངག་བཅད་གནང་དགོས་དོན་གང་ཡིན་ནམ།
ལན། དེ་ལ་རྒྱུ་མཚན་གཉིས་ཡོད། འགྲོ་བ་མིའི་ཐོབ་ཐང་གི་སྒང་ནས་བཤད་ན། སྨྲ་བརྗོད་རང་དབང་བཀག་འགོག་བྱས་པ་དང་སྨྲ་བརྗོད་རང་དབང་མ་སྤྲད་པ་དེ་མཚོན་པ་དང་། ཕྱོགས་གཞན་ཞིག་ནས་སོ་སོ་མི་རིགས་ཀྱི་འཐབ་རྩོད་པ་ཞིག་ཡིན་པའི་ངོས་ནས། བཙོན་ཁང་ནང་བོད་ནང་ཞི་བའི་མེ་ལྕེ་འབར་ཤུགས་ཆེ་རུ་འགྲོ་བཞིན་པའི་གསར་འགྱུར་མཐོང་སྐབས། བཙོན་ཁང་ནང་ལས་དོན་ག་རེ་བསྒྲུབ་ཐུབ་ཀྱི་འདུག་ཟེར་ན། བོད་མི་རིགས་ནི་ཚེ་འདི་ཕྱི་གཉིས་ཀ་ཁས་ལེན་མཁན་ཞིག་ཡིན་པའི་ཆ་ནས། ངས་བཙོན་ཁང་ནང་ངག་བཅད་ལས་འགུལ་སྤེལ་རྒྱུ་དེ་ཐབས་ལམ་ཡག་ཤོས་སུ་མཐོང་སོང་།
དྲི་བ། ཁྱེད་ཀྱིས་ཞི་བའི་གོམ་བགྲོད་སྐབས་རྒྱ་ནག་གི་རྒྱལ་དར་འཕྱར་བ་དེའི་ཐད་ནས། བོད་པའི་སྤྱི་ཚོགས་ནང་གླེང་སློང་སྣ་ཚོགས་ཤིག་བྱུང་ཡོད་པ་རེད། ཁྱེད་ཀྱིས་སྐར་མ་ལྔ་ཅན་གྱི་དར་ཆ་དེར་ངོས་འཛིན་ཅི་འདྲ་ཞིག་གནང་གི་ཡོད་དམ།
ལན། རྒྱ་ནག་གི་རྒྱལ་དར་ཟེར་ན་རེད། ངས་དེའི་མིང་ལ་ཀྲུང་གོའི་རྒྱལ་དར་ལས་རྒྱ་ནག་གི་རྒྱལ་དར་རྗོད་ཀྱི་མེད། རྒྱ་ནག་གི་རྒྱལ་དར་ལབ་ན་མི་རིགས་གཅིག་གི་དར་ཆ་ཆགས་འགྲོ་བ་རེད། དེང་སང་དབྱིན་ཡིག་སྒང་ཆཱ་ཨེ་ནཱ་(China)ཟེར་བ་དེ་རྒྱ་ནག་མི་རིགས་གཅིག་པུར་མ་གཏོགས་གོ་ཐུབ་ཀྱི་མེད། རྒྱ་སྐད་སྟེང་ནས་ཀྲུང་གོ་ཞེས་པ་དེས་མི་རིགས་མང་པོ་འདུས་བསྡད་པའི་རྒྱལ་ཁབ་ཅིག་མཚོན་གྱི་ཡོད། དེའི་དར་ཆ་རྒྱ་མི་རིགས་གཅིག་པུར་དབང་བ་ཞིག་མ་རེད། ཡང་མི་རེ་ཟུང་གིས་གུང་ཁྲན་ཏང་གི་དར་ཆ་རེད་ཟེར་གྱི་འདུག ངས་དེའང་ངོས་ལེན་བྱེད་ཀྱི་མེད། ངས་བོད་མི་རིགས་འདི་ལོ་རྒྱུས་སྟེང་རྒྱ་ནག་གི་དར་ཆའི་འོག་རེད་ཟེར་གྱི་མེད་ལ། བོད་སྔོན་མ་ནས་རྒྱལ་ཁབ་རང་བཙན་མེད་པ་ཞིག་རེད་དེ་བས་ཀྱང་ཟེར་གྱི་མེད། མ་འོངས་པ་ན་དར་ཆ་གཅིག་གི་འོག་ནས། དབུ་མའི་ལམ་བརྒྱུད་དེ་ཆེས་མཐོའི་རང་སྲིད་རང་སྐྱོང་བྱ་རྒྱུའི་ངོས་ལེན་དང་། ང་བོད་མི་སྒེར་བ་ཞིག་གི་ངོས་ནས་དབུ་མའི་ལམ་ལ་ཡིད་ཆེས་གཙང་མ་ཡོད་པ་ཀྲུང་གོའི་སྲིད་གཞུང་ལ་སྔོན་བརྡ་སྟོན་གྱི་ཡོད།
དྲི་བ། ཁྱེད་ཀྱིས་རྒྱ་དམར་གྱི་རྒྱལ་དར་དེ་ངྷ་ས་ནས་མ་འཁྱེར་པར་ལྡི་ལི་ནས་འཕྱར་མགོ་བརྩམས་པའི་ཐོག་མི་མང་པོ་ཞིག་གིས་གཞན་གྱི་བརྒྱུད་སྐུལ་བྱས་བར་དོགས་པ་བྱེད་མཁན་ཡོད་པའི་ཐད་གསལ་བཤད་འདྲ་ཡོད་དམ།
ལན། དེ་ནི་དྲན་མཁན་དང་བཤད་མཁན་ཁོང་ཚོའི་དོགས་པ་རྣམ་རྟོག་རང་རེད། སྤྱིར་དྲན་མཁན་ཚོས་ག་རེ་ཡིན་ཡང་དྲན་ཆོག་གི་རེད་ལ། བཤད་མཁན་དེ་ཚོས་ཀྱང་ག་རེ་ཡིན་ཡང་བཤད་ཆོག་གི་རེད། འོན་ཀྱང་། ད་ལྟའི་དུས་ཚོད་འདིར་བཤད་མཁན་གྱིས་སོ་སོའི་སྐད་ཆར་བདག་པོ་རྒྱག་རྒྱུ་གལ་ཆེན་པོ་རེད། ང་རང་སྒེར་ངོས་ནས་དམིགས་བསལ་ཞུ་རྒྱུ་གང་ཡང་མེད། ང་ལ་སྐྱོན་བརྗོད་བྱས་སོང་བསམ་པའི་སྣང་བ་རྣམ་རྟོག་ཀྱང་མེད། ངས་ཀྲུང་གོའི་རྒྱལ་དར་འཕྱར་རྒྱུའི་གྲ་སྒྲིག་སྔོན་མ་ནས་ཡོད། ཡིན་ནའང་བཞུགས་སྒར་ནས་ཀྲུང་གོའི་རྒྱལ་དར་མ་ཁྱེར་བའི་རྒྱུ་མཚན་ནི། ངའི་ལས་འགུལ་འདི་ལ་བར་ཆད་ཡོང་གི་རེད་བསམ་པ་ཡིན། ངས་སྔོན་མ་ནས་བཤད་ཡོད། ངའི་ལས་འགུལ་འདི་ཞི་བའི་འཐབ་རྩོད་ཡིན། ཞི་བའི་འཐབ་རྩོད་ནང་རིམ་པ་མང་པོ་ཡོད། ཞི་བའི་གོམ་བགྲོད་དང་ཞི་བའི་ངག་བཅད། ཞི་བའི་ཐོག་ནས་རྩོམ་ཡིག་སྤེལ་རྒྱུ་སོགས་ཡོད། ཞི་བའི་འཐབ་རྩོད་ཀྱི་མདོ་རྩ་དེད་ན་སོ་སོའི་མི་ཚེ་ནང་གི་བློས་གཏོང་དང་དམ་བཅའ་བརྟན་པོ་ཞིག་དགོས་པ་དེ་ཡིན། འདི་ངའི་ཚེ་སྲོག་མཇུག་མ་སྒྲིལ་བར་མུ་མཐུད་གནས་རྒྱུ་རེད། ཀྲུང་གོའི་རྒྱལ་དར་ཁྱེར་མ་ཁྱེར་གྱི་གླེང་གཞི་དེ་ནི། ང་རང་ཉིད་ལ་མཚོན་ན་གནད་འགག་ཆེན་པོ་ཞིག་ལ་མཐོང་གི་མེད། ཞི་བའི་འཐབ་རྩོད་འདི་མགོ་ནས་མཇུག་བར་དུ་བསམ་བློ་གཏོང་མཁན་ང་རང་ཉིད་ཡིན་ལ། མགོ་རྩོམ་མཁན་ཡང་ང་རང་ཉིད་ཡིན། དེ་མི་གཞན་སུ་ལའང་འབྲེལ་བ་མེད། དེའི་ནང་བརྒྱུད་སྐུལ་རིགས་རྩ་བ་ནས་མེད། གཉིས་ནས། ངས་ཀྲུང་གོའི་དར་ཆ་ཁྱེར་བ་ལ་བརྟེན་ནས་ངའི་ཞི་བའི་གོམ་བགྲོད་ནང་། མི་མང་མཉམ་ཞུགས་བྱས་མ་སོང་ཟེར་བའི་སྐད་ཆ་ཞིག་ཡོང་གི་ཡོད་པ་དེ་རྩ་བ་ཉིད་ནས་བདེན་པ་མ་རེད། དཔེར་ན། ངྷ་རམ་ས་ལ་ནས་ཀྲུང་གོའི་རྒྱལ་དར་ཁྱེར་ཡོད་པ་མ་རེད། སྐབས་དེ་དུས་ནས་ངེད་མ་བུ་གསུམ་ལ་ཁ་བཏགས་ཀྱི་ལམ་འཇུག་ཙམ་ལས། གཞན་སུ་ཡང་མཉམ་ཞུགས་བྱས་ཡོད་པ་མ་རེད། དེས་ར་སྤྲོད་བྱེད་ཐུབ་ཀྱི་འདུག
དྲི་བ། ཁྱེད་ཀྱིས་ཞི་བའི་གོམ་བགྲོད་སྐབས་རྒྱ་དམར་གྱི་རྒྱལ་དར་འཕྱར་བའི་དབང་གིས། བཙན་བྱོལ་སྤྱི་ཚོགས་ནང་ཁྱེད་ལ་སྐྱོན་བརྗོད་བྱེད་མཁན་བྱུང་པ་དེར་སེམས་ཚོར་ག་རེ་བྱུང་སོང་།
ལན། སྤྱི་ཚོགས་ཤིག་ཡིན་དུས་བསམ་བློ་དང་ནུས་པ། ཉམས་མྱོང་མ་འདྲ་བ་ཡོད། དེ་བཞིན། མི་སོ་སོར་མི་རིགས་ལ་བཅངས་པའི་བསམ་བློའི་འཛིན་སྟངས་དང་ལྟ་བ་འཁྱེར་སྟངས་མ་འདྲ་བ་ཡོང་ངེས་རེད། ཁོ་ཚོས་རང་མི་རིགས་ལ་བཅངས་པའི་ལྷག་བསམ་ལ་རྨ་མེད་པ་ངས་ཡིད་ཆེས་བྱེད་ཀྱི་ཡོད། “ཤ་ཚ་བའི་ཁ་ན་གཏམ་སྙན་པོ་མེད” ཞེས་པ་དེ་ཡིན་རྒྱུ་རེད། ང་རང་ངོས་ནས་ཚད་མཐོའི་མི་རིགས་འདྲ་མཉམ་གྱི་ལྟ་བ་ཞིག་གི་སྒང་ནས། ༸རྒྱལ་བ་རིན་པོ་ཆེ་མཆོག་གིས་བསྟན་བཞག་པའི་དབུ་མའི་ལམ་ཁ་འདིའི་ནང་འགྲོ་བཞིན་ཡོད། ཁོང་ཚོའི་སྐད་ཆ་དེས་ང་ལ་གནོད་དགོས་པ་དང་འགོག་རྐྱེན་ཐེབས་དགོས་པ་གང་ཡང་ཡོད་པ་མ་རེད་ལ། ངས་ཀྱང་ཁོ་ཚོའི་འབོད་སྐུལ་དེ་དག་ལ་ངོ་རྒོལ་བྱས་བཞག་པ་ཞིག་ནམ་ཡང་དྲན་གྱི་མི་འདུག
དྲི་བ། བོད་ནང་རང་ལུས་མེར་བསྲེགས་མཚམས་འཇོག་གི་འབོད་སྐུལ་གནང་རྒྱུའི་ཐོབ་ཐང་ཡོད་མེད་ཐད་གླེང་སློང་སྣ་ཚོགས་ཡོང་གི་ཡོད་པ་རེད། ཁྱེད་རང་བོད་དོན་ལས་འགུལ་བ་ཞིག་གི་ངོས་ནས་དགོངས་ཚུལ་གང་ཡོད།
ལན། ཞི་བའི་མེ་ལྕེ་འབར་སྟངས་དེ་མཚམས་འཇོག་དགོས་མིན་གྱི་སྐད་ཆ་བཤད་པའི་ཐོབ་ཐང་ཡོད་ངས་ཀྱང་བཤད་ཤེས་ཀྱི་མེད། ཡིན་ནའང་། མི་མང་པོ་ཞིག་གིས་བཤད་རྒྱུ་དཀའ་ལས་ཁག་པོ་རེད་ཟེར་ནས་ལས་སླ་བོས་ཕར་གཡུགས་བཞག་ཡོད་པ་རེད། ང་ལ་མཚོན་ན་དེའི་ཐད་ཀྱི་འབོད་སྐུལ་ནི་རང་ཉིད་ཀྱིས་འཐབ་རྩོད་བྱེད་བཞིན་པ་འདི་ཡིན། བོད་ནང་ཞི་བའི་མེ་ལྕེ་འབར་སྟངས་ཀྱི་རྒྱུ་རྐྱེན་ཆ་ཚང་རྒྱ་གཞུང་གི་དབང་སྒྱུར་དང་བཙན་གནོན་ལ་བརྟེན་ནས་བྱུང་བ་ཡིན་ནའང་། ངས་བསམ་ན་བོད་ནང་གི་དཀའ་ངལ་དེ་འགོག་རྒྱུའི་འགན་དེ། ཀྲུང་གོའི་སྲིད་གཞུང་གཅིག་པུའི་སྒང་གཡུགས་བཞག་ན་དེ་ནི་འགན་མ་འཁུར་བའི་རྟགས་རེད་སྙམ། དམིགས་བསལ་གྱིས་བཙན་བྱོལ་རང་དབང་ལུང་པར་ཡོད་པའི་བོད་མི་ཚང་མར་འགན་ཡོད་པ་རེད། དེ་རིང་འབྱུང་བཞིན་པའི་གནས་ཚུལ་དེ་དག་བོད་པ་མི་རེ་ངོ་རེ་སྡོད་ཡུལ་གྱི་རྒྱལ་ཁབ་ཁག་གི་གཞུང་ཚབ་ལ་ཞུ་གཏུག་ཞུ་ཆོག་གི་རེད། ནམ་རྒྱུན་ཉིན་གཅིག་གཉིས་རིང་སྐད་འབོད་དང་མར་མེ་ཁྲོམ་སྐོར་ཙམ་བྱས་པའི་ཕན་ཆེན་པོ་ཐོགས་རྒྱུ་མ་རེད། ཤི་བོ་རྣམས་ཀྱི་ཁ་ཆེམས་ནི་༸རྒྱལ་བ་རིན་པོ་ཆེ་བོད་ལ་ཕེབས་རྒྱུ་དང་། བོད་ལ་རང་དབང་དགོས་པ་དེ་རེད། དེ་ལ་ཕྱི་ནང་གཉིས་ཀྱི་མཐུན་རྐྱེན་ཞིག་འཛོམས་དགོས། ཞི་བའི་མེ་ལྕེ་འབར་མཚམས་འཇོག་ཐུབ་མིན་གྱི་འགན་ཕྱོགས་གཉིས་གར་ཡོད།
དྲི་བ། ཁྱེད་ཀྱིས་ཞི་བའི་གོམ་བགྲོད་ཐེངས་གཉིས་པ་དེ་བསྐྱར་དུ་གནང་རྒྱུའི་གསལ་བསྒྲགས་སྤེལ་ཟིན་པ་རེད། གོམ་བགྲོད་ཐེངས་གཉིས་པའི་སྐབས་སྔར་དང་མ་འདྲ་བའི་འགྱུར་བ་དེ་འདྲ་སོང་ཡོད་དམ།
ལན། ཞི་བའི་འཐབ་རྩོད་ཐོག་འགྱུར་བ་གང་ཡང་ཕྱིན་མེད། ད་རེབ་བལ་ཡུལ་བརྒྱུད་རྒྱུ་མིན། ཐེངས་སྔོན་མར་གོམ་བགྲོད་ནང་ཞུགས་མཁན་ཡོད་ན་ཞུགས་རོགས་ཞེས་ལབ་མེད། ད་ཐེངས་གསལ་བསྒྲགས་ནང་ཚིག་དེ་བཞག་ཡོད། དེའི་རྒྱུ་མཚན་ཐེངས་སྔོན་མར་མི་མང་པོ་ཞིག་གིས་ངས་གསལ་བསྒྲགས་བྱས་མ་སོང་ཟེར་གྱི་འདུག ཡིན་ནའང་གོམ་བགྲོང་ནང་ཞུགས་མཁན་ཚོར་ལོ་ཡི་ཚད་བཀག་བཟོས་ཡོད། ལོ་ ༥༥ མན་དང་ལོ་ ༡༨ ཡན་ནི་འཛམ་གླིང་ཐོག་ལས་ཀ་བྱས་ན་ཁྲིམས་མཐུན་ཆགས་ཡོད། ང་ལ་སྔོན་མ་ཞི་བའི་གོམ་བགྲོད་སྐབས་ཞལ་འདེབས་རག་བསྡད་པ་དེ་དག་གིས་འདང་ཚད་ལ་བེད་སྤྱོད་གཏོང་རྒྱུ་ཡིན། ག་དུས་རྫོགས་ན་སྐབས་མཚམས་སོ་སོར་ཐག་གཅོད་བྱ་རྒྱུ་ཡིན། ལམ་བར་དུ་གང་ཞིག་ནས་བཀག་འགོག་བྱས་ན། ས་དེ་ནས་མ་ཀློད་བར་ཞི་བའི་ཟས་བཅད་དང་ངག་བཅད་བྱ་རྒྱུ་ཡིན། གསལ་བོར་མཁྱེན་དགོས་པ་ཞིག་ལ། ངའི་ཞི་བའི་འཐབ་རྩོད་དང་ཞི་བའི་གོམ་བགྲོད་གཉིས་འདྲ་གི་མ་རེད། ཞི་བའི་འཐབ་རྩོད་ལ་མི་ཚེ་དམ་བཅའ་དང་བློ་གཏོང་གཉིས་ཀ་དགོས་ཀྱི་ཡོད།
དྲི་བ། གོམ་བགྲོད་སྔ་མའི་སྐབས་རྒྱ་ནག་གི་རྒྱལ་དར་འཕྱར་བའི་ཐད་སྐྱོན་བརྗོད་བྱེད་མཁན་དག་ལ་གསལ་འདེབས་འདྲ་ཞུ་རྒྱུ་ཡོད་དམ།
ལན། སྤྱིར་བཏང་ང་རང་ངོས་ནས་བོད་མི་རིགས་ཀྱི་ནང་ཁུལ་དུ་ང་ལ་དགྲ་ཡོད་བསམ་པའི་བློ་དེ་ནམ་ཡང་མེད། དེར་བརྟེན་དམིགས་བསལ་ཁོང་ཚོར་སྐད་ཆ་བཤད་རྒྱུ་གང་ཡང་མེད། ཡིན་ནའང་། མ་འོངས་པར་བཤད་མཁན་དེ་ཚོས་སོ་སོའི་ལག་ནས་གང་ལས་པ་དང་ཁ་ནས་གང་བཤད་པ་དེས་སྤྱི་ཚོགས་ཁྲོད་ནུས་པ་ག་རེ་འཐོན་གྱི་ཡོད་མེད་དང་། དེས་བོད་མི་རིགས་ལ་ཞབས་འདེགས་ཅི་ཞིག་ཞུ་ཐུབ་ཀྱིན་ཡོད་མེད། བོད་མི་རིགས་ཀྱི་རྡོག་རྩ་གཅིག་སྒྲིལ་གྱི་དམ་ཚིག་དང་མཐུན་མི་མཐུན་སོགས་ལ། སོ་སོ་རང་ངོས་ནས་བསམ་བློ་ཞིབ་མོ་ཞིག་གཏོང་རྒྱུ་གལ་ཆེན་པོ་རེད། ང་ལ་མུ་མཐུད་དུ་ནག་ཅན་དང་བསྟན་དགྲ་སོགས་ག་རེ་ལབ་ཀྱང་སྐྱོན་མི་འདུག དེ་འདྲ་ཞིག་གིས་སྐྱོན་སོང་བ་ཡིན་ན། ངས་རང་ཉིད་བོད་མི་ས་ཡ་དྲུག་གི་བུ་ལ་ལངས་རྒྱུ་ཡིན་ཞེས་ནམ་ཡང་ཤོད་ཀྱི་མ་རེད། ངའི་ལུས་ངག་ཡིད་གསུམ་པོ་མ་རྫོགས་པར་དུ་ངས་ལས་ཀ་དེ་མུ་མཐུད་ནས་ལས་རྒྱུ་ཡིན། ང་རང་ཡང་བོད་མི་ས་ཡ་དྲུག་གི་ནང་ནས་བོད་མི་དཀྱུས་མ་གཅིག་ཡིན་སྟབས། བོད་མི་དཀྱུས་མ་ཞིག་གི་འགན་དེ་སོ་སོས་འཁྱེར་ཐུབ་ཚད་ཅིག་ཁུར་ནས་འགྲོ་གི་ཡོད། དེ་ནི་ངའི་འབོད་སྐུལ་ཡིན།
གསར་འགོད་པ། ཚེ་རིང་རྒྱལ།
![A large crowd walks in a market area outside Dadar station in Mumbai, India, Friday, March 17, 2023. [AP Photo/Rajanish Kakade]](https://tibettimes.net/wp-content/uploads/2026/04/Screen-Shot-2026-04-02-at-5.36.58-PM-360x180.png)
ཁོང་གི་ཞི་བའི་འཐབ་རྩོད་དང་གོམ་བགྲོད་གང་གི་ཕྱོགས་ནས་ཡིན་རུང་། ཀྲུང་གོའི་རྒྱལ་དར་འཕྱར་བའི་ལས་དེ་སྲོག་རྩ་ལྟ་བུ་ཞིག་ག་ལ་ཡིན། འོན་ཀྱང་། དེ་ལ་ཁྱད་ཆོས་དང་རེ་བ་མང་དག་ཅིག་ཡོད་པ་དེ་ནི། ཁོང་ལ་མཚོན་ན་བློས་བཏང་མི་ཐུབ་ས་གཙོ་བོ་ཡིན་རྒྱུ་རེད། གང་ལྟར། ད་ནི་མི་མང་གི་བསམ་ཚུལ་ཐོག་ལ་མ་ལྷུང་རང་ལྷུང་བྱུང་བ་རེད། དེས་ན་ད་ཐེངས་རྒྱལ་དར་དེ་ཕྱར་ཐུབ་རྒྱུ་མ་རེད་འདོད་ཀྱི་ཡོད། མཐའ་དོན། བོད་ཀྱི་ཞི་བའི་འཐབ་རྩོད་པ་ཆེན་པོར་ཞུ་རྒྱུ། ཁྱེད་ཀྱི་ཐུན་མིན་བློ་གཤོགས་དེས་ང་ཚོར་བག་ཆགས་བཞག་ཡོད། བཀའའ་དྲིན་ཆེ། ཁྱེད་རྒྱལ་ལོ།།
སྔ་ལོ་གླིང་ཚ་རྡ་ས་ནས་ཐོན་སྐད་ཐོས་སྐབས་སེམས་གཏིང་ནས་ཡིད་སྨོན་བྱས་ཡིན་ལ་བསྔགས་བརྗོད་བྱས་ཡིན། ལམ་ནས་དགྲ་དར་འཁྱེར་བ་ཐོས་སྐབས་འཁང་ར་བྱས་ཡིན་ལ་ཡི་ཆད་ཤོར་སོང་། སྤྱིར་ཁོང་ལ་སྙིང་སྟོབས་ཡོད་པ་ཤེས་ཡོད་ཀྱང་ལང་ཕྱོགས་མི་བརྟན་པའི་མི་བུ་ཞིག་མིན་ནམ་སྙམ་པའི་ཚོར་བ་ཤུགས་ཆེ་བྱུང་། མི་ངན་ཁ་ཤས་ཀྱི་གཡོ་འོག་ནས་དགྲ་བོའི་དར་དམར་འཁྱེར་བ་དེས་གཞོན་ལྷན་དང་དབུ་ལམ་ཚོགས་པའི་བར་ན་ཆིག་སྒྲིལ་མེད་པའི་གནོད་སྐྱོན་མང་པོ་ཐེབས་སོང་ལ་ད་དུང་ཡང་སྡུག་ཏུ་འགྲོ་བའི་ཉེན་ཁ་ཆེ། སྟོབས་ཤུགས་ཀྱི་རྩ་བ་ནི་ཆིག་སྒྲིལ་ཡིན་པ་ཤེས་བཞིན་འདི་ལྟར་གྱི་ལས་འགུལ་སྤེལ་བ་ལས་མ་སྤེལ་ན་བཟང་བར་འཁུམས་སོ། སྔ་ལོ་སྤྱི་འཐུས་ཚོགས་གཙོ་གཙོས་བྱས་ཕལ་མོ་ཆེས་དགྲ་དར་འཁྱེར་བ་ལ་དགག་པ་བྱས་སོང་ལ་དེ་དག་ཀྱང་གནས་ལུགས་ལྡན་པའི་སྐད་ཆ་རེད། གཞིས་ལུས་མི་དམངས་ཀྱི་དགྲ་དར་ཕབ་ནས་མེ་ལ་བསྲེག་བཞིན་པའི་སྐབས་འདི་ནས་དགྲ་དར་འཕྱར་བ་ནི་ཐན་ལྟས་རེད། ཁོང་གིས་དགྲ་དར་འཁྱེར་ཡག་གི་རྒྱུ་མཚན་བཤད་སྐབས་དབུ་ལམ་ལ་རྒྱབ་སྐྱོར་ཡོད་པས་ཡིན་ཟེར། དེ་ནི་གནས་ལུགས་མེད་པའི་སྐད་ཆ་རང་རེད། གལ་དེ་ལྟར་ཡིན་ན་དབུས་བོད་མིའི་སྒྲིག་འཛུགས་ཀྱི་ཁང་སྟེང་ན་དགྲ་དར་འཛུགས་དགོས་པའི་ཚད་ལ་བབ་པ་མ་ཡིན་ནམ། འདི་དག་ནི་ཁོ་བོ་གཅིག་པུའི་བསམ་ཚུལ་མ་ཡིན་པར་ཤེས་ལྡན་མི་སྣ་སུམ་ཅུ་ལྷག་ཙམ་དང་ཁ་བརྡ་བྱས་པའི་གཅིག་མཐུན་གྱི་དྲན་ཚུལ་ཡིན།
ལས་འགུལ་སྤེལ་བ་ཙམ་གྱི་ངོ་གདོང་ནས། ཡག་པོ་མཐོང་སོང་ཡིན་ནའང་རྒྱ་ནག་གི་དར་ཆ་ཕྱར་བ་དེ་ཐབས་སྡུག་དཔེ་མེད་གཅིག་རེད། བོད་མིའི་ཞབས་འདྲེན་མི་ཆགས་པའི་ངེས་པ་མི་འདུག རྗེས་སུ་ལས་འགུལ་སྤེལ་སྐབས་རྒྱ་ནག་གི་དར་ཆ་ཕྱར་ཡོང་ན་ཁྱོད་རང་དཀའ་སྡུག་གང་བྱུང་ཡང་འདི་ནས་སེམས་ཁུར་རྩ་བ་ནས་མེད་ལ་དོ་སྣང་ཙམ་ཡང་བྱེད་མི་འདོད།
ངས་བོད་དོན་འཐབ་རྩོད་ལྷག་བསམ་ལྡན་པའི་གླིང་ཚ་ཁྱེད་ལ་བཀྲིན་བླ་མེད་དུ་ཆེ་ཞུ།། འཐབ་རྩོད་བརྒྱུད་རིམ་གང་འདྲ་ཞིག་སྟེང་གནང་ཡང་བརྒྱབ་སྐྱོར་ཆ་ཚང་ཞུ་རྒྱུ་ཡིན། གང་ལ་ཞེས་ན་དུས་གཉན་ཕྲང་ཅན་འདི་ལྟ་བུ་བྱེས་སུ་བོད་པ་འབུམ་གཅིག་ལྷག་ཙམ་ཡོད་ཀྱང་འཐབ་རྩོད་པ་ནི་ཧ་ཅང་ཉུང་ཉུང་རེད།།།།
མཐར་གླིང་ཚའི་བོད་ཀྱི་དཔའ་བོ་རྣམ་པར་རྒྱལ་གྱུར་ཅིག།།།
ཁྱེད་༧ གོང་ས་མཆོག་གསེར་བཞིན་མཇལ་བ་ཧ་ཅང་བཟང་།།
བདེན་པ་ཉིད་མྱུར་ཏུ་རྒྱལ་གྱུར་ཅིག།།།།།
་་་་་ ལན། ཞི་བའི་འཐབ་རྩོད་ཐོག་འགྱུར་བ་གང་ཡང་ཕྱིན་མེད། ད་རེབ་བལ་ཡུལ་བརྒྱུད་རྒྱུ་མིན། ཐེངས་སྔོན་མར་གོམ་བགྲོད་ནང་ཞུགས་མཁན་ཡོད་ན་ཞུགས་རོགས་ཞེས་ལབ་མེད། ད་ཐེངས་གསལ་བསྒྲགས་ནང་ཚིག་དེ་བཞག་ཡོད། ་་་་་་ཟེར།
ཐོག་མ་གླིང་ཚ་ཚེ་བརྟན་རྡོ་རྗེ་ལགས་ཀྱིས་འདི་ལྟ་བུའི་ལས་འགུལ་རབ་དང་རིམ་པ་སྤེལ་བར་ཐུགས་རྗེ་བསྔགས་བརྗོད་ཞུ་བ་དང་འབྲེལ་ཏེ་དྲི་བ་ཁ་ཤས་ཤིག་འདོན་དགོས་བྱུང་སོང་།
1 རྒྱལ་ཁབ་དང་མི་རིགས། མི་སྒེར་སུ་འདྲ་ཞིག་གིས་འཐབ་རྩོད་ལས་འགུལ་སྤེལ་སྐབས་ཞི་དྲག་གཉིས་ཀྱི་ལམ་ཁ་ཡོད་ཡོད་པ་རེད། དེ་ལས་ལོགས་སུ་ཁྱེད་རང་གིས་ཞི་བའི་འཐབ་རྩོད་ཟེར་བའི་མིང་འདོག་ཅིག་གནང་དགོས་པའི་རྒྱུ་མཚན་རྒྱབ་ལྗོངས་གང་འདྲ་ཡོད་དམ།
2 ཁྱེད་རང་གི་ཞི་བའི་འཐབ་རྩོད་ཟེར་བ་དེར་གཞུང་ལུགས་དང་སྒྲིག་གཞི། ཆ་རྐྱེན་དང་དམིགས་དོན་གང་འདྲ་ཡོད་མེད་ཅིག་གསུང་གནང་རོགས།
3 ཞི་བའི་འཐབ་རྩོད་ཟེར་བ་དེར་ལས་འགུལ་རིགས་གང་དག་ཡོད་མེད་དང་། ཁྱེད་རང་གིས་གྲ་སྒྲིག་གང་འདྲ་གནང་ཡོད་མེད་ཅིག་གསུང་གནང་རོགས།
4 ཐེངས་སྔོན་མར་རྒྱ་ནག་གི་རྒྱལ་དར་འཕྱར་སྐབས་གླེང་སློང་མང་པོ་ཞིག་བྱུང་ཚར་བ་རེད། ད་རེས་ཡང་བསྐྱར་རྒྱ་ནག་གི་རྒྱལ་དར་འཕྱར་རྒྱུ་ཡིན་གསུངས་པ་དེའི་དམིགས་དོན་ག་རེ་ཡིན་པ་དང་། ད་རེས་༧གོང་ས་མཆོག་ལ་གཟིམ་ཆུང་མཇལ་ཁ་རེག་ཡོད་པ་རེད། ༧སྐུ་མདུན་གྱིས་ག་རེ་གསུངས་ཡོད་མེད་རྒྱ་ནག་གི་རྒྱལ་དར་འཕྱར་རྒྱུར་ཐུགས་མོས་གནང་གི་ཡོད་མེད་ཅིག་གནང་གནང་རོགས།
5 མ་གཞི་ཁྱེད་རང་གིས་རྒྱ་ནག་གི་རྒྱལ་དར་འཕྱར་བ་དེ་སོ་སོ་སྒེར་གྱི་ཐག་གཅོད་ཡིན་པ་དང་། དེ་ལ་རྒྱུ་མཚན་མང་པོ་ཡོད་པ་གསུང་གནང་སོང་། དེ་ཡག་པོ་ཞེ་དྲག་རེད། དེ་ནས་མི་གཞན་པ་ཚོས་རྒྱ་ནག་གི་རྒྱལ་དར་འཕྱར་ན་འགྲི་གི་ཡོད་སྐོར་གསུང་མཁན་ཚོས། ཁྱེད་རང་ལ་རྒྱུ་མཚན་རྒྱབ་ལྗོངས་གང་འདྲའི་དབང་གིས་རྒྱ་ནག་གི་རྒྱལ་དར་འཕྱར་ན་ཡག་པོ་ཡོད་ཚུལ་གསུང་གི་འདུག་གམ།
6 ལོ་སྔོན་མའི་གསུམ་བཅུའི་དུས་དྲན་སྐབས་ནས་བཟུང་བོད་ནང་ལ་གོམ་བགྲོད་མགོ་འཛུགས་གནང་སྟེ་རྒྱ་ནག་གི་རྒྱལ་དར་འཕྱར་བ་རེད། མི་མང་པོ་ཞིག་གིས་དགག་བྱ་གནང་མིན་ལ་མ་ལྟོས་པར་རྒྱ་བལ་ས་མཚམས་བར་སྐུ་ངལ་སྐྱོན་པ་མ་ཟད། བལ་ཡུལ་བཙོན་ཁང་ནས་ལོ་གཅིག་མ་ཟིན་ཙམ་རིང་བཞུགས་པ་རེད། བརྒྱུད་རིམ་འདི་དག་ཁྲོད་སོ་སོས་རྒྱ་ནག་གི་རྒྱལ་དར་བ་དེར་བློ་འགྱུར་དང་འགྱོད་སེམས་སྐྱེས་མྱོང་ངམ།
7 གལ་སྲིད་ཁྱེད་རང་གིས་མུ་མཐུད་རྒྱ་ནག་གི་རྒྱལ་དར་འཕྱར་ཏེ་ལས་འགུལ་སྤེལ་ཡང་། དེའི་ནང་མཉམ་ཞུགས་གནང་མཁན་རྩ་བ་ནས་མ་བྱུང་ཚེ་ཁྱེད་རིང་གིས་འགྱུར་བ་གཏོང་སྲིད་དམ། ཡང་ན་སྒེར་གཅིག་པུས་མ་འཆི་བར་མུ་མཐུད་རྒྱུའི་དམ་བཅའ་ཡོད་དམ།
8 ཁྱེད་ཀྱི་ལས་འགུལ་འདི་དང་ལྷག་དོན་དུ་རྒྱ་ནག་གི་རྒྱལ་དར་འཕྱར་བའི་ཐད་བཙན་བྱོལ་བོད་གཞུང་གི་ངོས་ནས་རྣམ་འགྱུར་གང་འདྲ་བསྟན་ཡོད་དམ།
9 བོད་ནང་ཞི་བའི་གོམ་བགྲོད་མ་ཡིན་པའི་ལས་འགུལ་གཞན་པ་གྲ་སྒྲིག་ཡོད་དམ།
10 གལ་སྲིད་ཁྱེད་རང་གིས་རྒྱ་ནག་གི་རྒྱལ་དར་འཕྱར་རྒྱུ་ཕྱིར་འཐེན་བྱེད་པ་དང་། ཡང་ན་དེ་སྔའི་སོ་སོའི་དམ་བཅའ་དང་ལྟ་གྲུབ་ལ་འགྱུར་བ་བཏང་ཚེ་འདས་པའི་ལོ་གཅིག་རིང་དཀའ་ལས་བརྒྱབ་པ་དེ་ཆུད་ཟོས་སུ་བཏང་བ་དང་། སྤྱི་ཚོགས་ནང་ནས་ཀྱང་སོ་སོའི་ལྟ་བ་ལངས་ཕྱོགས་དང་དམ་བཅའ་དེར་སྙིང་བོ་དང་རིན་ཐང་མེད་པ་ཞིག་ཏུ་མཐོང་སྲིད་པར་དགོངས་ཀྱི་ཡོད་དམ།
དྲི་བ་བཅུ་ལ་ལན་འདེབས་ཤིག་གནང་སྐྱོང་ཡོང་བ་ཞུ། ང་རང་སྒེར་ངོས་ནས་རྒྱ་ནག་གི་རྒྱལ་དར་འཕྱར་བར་མོས་མཐུན་དང་དགའ་བསུ་ཞུ་བཞིན་ཡོད། ཐུགས་རྗེ་ཆེ།
གླིང་ཚ་ཚེ་བརྟན་རྡོ་རྗེ་ལགས་ཀྱིས་སྔར་ལོའི་གསུམ་བཅུའི་དུས་དྲན་ཉིན་ཞི་བའི་འཐབ་རྩོད་མགོ་འཛུགས་ཀྱིས་བོད་སྐྱོད་གོམ་བགྲོད་གནང་སྐབས་རྒྱ་ནག་གི་རྒྱལ་དར་འཕྱར་ཡོད་པ་དང་། ད་ལོའི་གསུམ་བཅུའི་དུས་དྲན་ཉིན་སླར་ཡང་རྒྱ་ནག་གི་རྒྱལ་དར་འཕྱར་ཏེ་གོམ་བགྲོད་གནང་རྒྱུ་ཡིན་པའི་གསལ་བསྒྲགས་བསྐྱངས་ཡོད་སྟབས། དུས་བབ་དྲ་བའི་ཟུར་གྱི་༼ བསམ་ཤོག ༽ཚན་པའི་ནང་རྒྱ་ནག་གི་རྒྱལ་དར་འཕྱར་བར་འདོད་པ་ཡོད་མེད་ཐོག བདུན་ཕྲག་གཉིས་རིང་མི་མང་ལ་བསམ་ཚུལ་བསྡུ་རྒྱུ་ཡིན་སྟབས། འདིར་ཕེབས་ནས་ཆ་ཤས་བཞེས་གནང་རོགས།