བོད་ཡིག་བརྡ་འཕྲིན་ཅན་དུ་བསྒྱུར་ཏེ་སྲུང་སྐྱོབ་དར་སྤེལ་གཏོང་དགོས།

ངྷ་སའི་དཔེ་མཛོད་ཚོགས་ཁང་དུ་སྨོན་ལམ་བོད་ཡིག་བརྡ་འཕྲིན་ཞིབ་འཇུག་ཁང་གི་གོ་སྒྲིག་འོག བོད་ཡིག་དཔེ་དེབ་ཇུས་འགོད་དང་ཡིག་གཟུགས་གསར་རྙིང་བརྗེ་བསྒྱུར་སྐོར་ལ་ཉིན་བདུན་རིང་གི་ཟབ་སྦྱོང་ཞིག་མགོ་འཛུགས་བྱས་ཡོད།

དེ་རིང་ཞོགས་པའི་ཆུ་ཚོད་ ༩།༣༠ སྟེང་། གངས་སྐྱིད་བོད་ཀྱི་དཔེ་མཛོད་ཚོགས་ཁང་དུ། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་གོ་སྒྲིག་འོག ངྷ་རམ་ས་ལ་གཙོས་རྒྱ་གར་ལྷོ་ཕྱོགས། ལྡི་ལི། བལ་ཡུལ་བཅས་ཀྱི་རྩོམ་སྒྲིག་ཁང་དང་ཚོགས་སྡེ་ཁག སློབ་གྲྭ་དང་དགོན་པ་བཅས་སྡེ་ཚན་ ༤༢ ཙམ་གྱི་གློག་ཀླད་ཆེད་ལས་པ་ ༨༠ ཙམ་ལ་ཟབ་སྦྱོང་ཞིག་མགོ་འཛུགས་གནང་ཡོད་ཅིང་། ཉིན་ ༧ རིང་གི་ཟབ་སྦྱོང་དེའི་ཐོག གློག་ཀླད་ནང་གི་བོད་ཡིག་གསར་རྙིང་བརྗེ་བསྒྱུར་བྱེད་ཕྱོགས་དང་དཔེ་དེབ་ཇུས་འགོད་སོགས་ཀྱི་ཐད། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་བློ་བཟང་སྨོན་ལམ་ལགས་དང་། བོད་ཀྱི་དཔེ་མཛོད་ཁང་གི་དཔར་སྐྲུན་སྡེ་ཚན་གྱི་འགན་འཛིན་དཔེ་དེབ་ཇུས་འགོད་ཆེད་མཁས་སྐུ་ཞབས་ཚེ་རྣམ་ལགས། བོད་ཀྱི་དཔེ་མཛོད་ཁང་གི་རིག་གཞུང་ཉམས་ཞིབ་སྡེ་ཚན་གྱི་ལས་བྱེད་བློ་བཟང་ཡར་འཕེལ་བཅས་ཀྱིས་ཟབ་འཁྲིད་གནང་རྒྱུ་ཡིན་འདུག

 ཟབ་སྦྱོང་དབུ་འཛུགས་ཐོག སྨོན་ལམ་བརྡ་འཕྲིན་ཞིབ་འཇུག་ཁང་གི་འགན་འཛིན་བློ་བཟང་སྨོན་ལམ་ལགས་ཀྱིས། བོད་ཀྱི་སྐད་ཡིག་ནི་བརྡ་སྤྲོད་བྱེད་ཙམ་མ་ཡིན་པར་བོད་ཀྱི་ལོ་རྒྱུས་དང་རིག་གཞུང་། ནང་བསྟན་ཆོས་ལུགས་སོགས་ལ་སློབ་གཉེར་ཐོག་གལ་ཆེན་ཡིན་སྟབས་བོད་སྐད་ཡིག་སྲུང་སྐྱོབ་དར་སྤེལ་ཐོག་ཚང་མར་འགན་ཡོད་པ་དང་། དེང་སྐབས་བོད་སྐད་ཡིག་དེ་འཛམ་གླིང་ཐོག་ཧ་ཅང་འཇིག་ཉེན་ཅན་ཞིག་ཆགས་ཡོད་སྐོར་བརྗོད་བྱུང་། ཁོང་གིས་མུ་མཐུད་དུས་རབས་ཉེར་གཅིག་པའི་བརྡ་འཕྲིན་བརྒྱུད་ལམ་འདི་ནི་སྐད་ཡིག་དར་སྤེལ་དང་རྒྱུ་འཛིན་ཡོང་ཐབས་ཐོག་ཧ་ཅང་གལ་ཆེན་ཆགས་ཡོད་ཅིང་། བོད་ཀྱི་སྐད་ཡིག་བེད་སྤྱོད་གཏོང་སའི་ཁོར་ཡུག་ལའང་འགྱུར་བ་ཞིག་མི་གཏོང་རང་གཏོང་ཆགས་ཡོད་པ་དང་། བོད་ཡིག་གི་ཡིག་གཟུགས་དང་། དེ་ནས་མིང་དང་ཚིག བརྗོད་པ། སྒྲ་གདངས་སོགས་བརྡ་འཕྲིན་ཅན་དུ་བསྒྱུར་རྒྱུ་ནི་སྔོན་འགྲོའི་ཆ་རྐྱེན་ལྟ་བུ་ཆགས་ཡོད་སྟབས། དེ་ལ་ཚང་མས་འབད་བརྩོན་དང་མཉམ་རུབ་གནང་དགོས་སྐོར་བརྗོད་བྱུང་།   

ཡང་ཁོང་གིས་༧གོང་ས་མཆོག་གིས་ཐེངས་གཉིས་ཙམ་བཀའ་སྐུལ་གནང་བ་ལྟར། ད་ཆར་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་བཙུགས་ཏེ་གཙོ་བོ་ཚིག་མཛོད་ཅིག་རྩོམ་སྒྲིག་བྱེད་ཀྱི་ཡོད་ཅིང་། དེ་ནི་ལོ་ ༩ ཙམ་གྱི་ལས་འཆར་ཞིག་ཡིན་པ་དང་། ལས་གཞི་གཞན་ཞིག་ནི། བོད་པའི་བརྡ་སྤྲོད་དེ་གློག་ཀླད་ནང་དབྱིན་ཡིག་ནང་བཞིན་ཞུ་དག་དང་ཚིག་གྲུབ་བཟོ་ཐུབ་ཐོག་ཞིབ་འཇུག་བྱེད་ཀྱི་ཡོད་སྐོར། ཚིག་མཛོད་ཀྱི་ལས་གཞི་དེ་ནི་མཉམ་ལས་རང་བཞིན་ཞིག་ཡིན་སྟབས་ཚང་མ་མཉམ་ཞུགས་གནང་གལ་ཆེ་བ་དང་། བརྡ་གསར་རྙིང་དང་སོ་སོའི་ལུང་སྐད་རིགས་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་ལ་མཁོ་སྤྲོད་ཡོང་པའི་རེ་སྐུལ་བཅས་གནང་སོང་།

དེའི་རྗེས་ཟབ་སྦྱོང་དབུ་འཛུགས་མཛད་སྒོའི་སྐུ་མགྲོན་གཙོ་བོ་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས། འདས་པའི་ལོ་མང་རིང་ནས་གྲྭ་བློ་བཟང་སྨོན་ལམ་ལགས་ཀྱིས་སོ་སོའི་རྣམ་དཔྱོད་ལ་བརྟེན་ནས་དཀའ་ལས་བརྒྱབ་སྟེ་གྲུབ་འབྲས་ཆེན་པོ་ཐོབ་ཡོད་པ་དང་། ཁོང་གི་གྲུབ་འབྲས་ལ་སྤྱི་ཚོགས་ནང་གདེང་འཇོག་དང་བསྔགས་བརྗོད་ཞུ་ཡུལ་ཞིག་ཆགས་ཡོད་པ། ཁོང་སྒེར་ལ་མཚོན་ན་ལས་གནས་ཀྱི་ངོས་ནས་དཔེ་མཛོད་ཁང་དུ་བོད་པའི་ཆོས་དང་རིག་གཞུང་སྲུང་སྐྱོབ་ཀྱི་འགན་ཡིན་ཡང་། དེང་དུས་ཀྱི་ཤེས་ཡོན་དང་ལྷག་པར་དུ་ཚན་རིག་དང་བརྡ་འཕྲིན་བརྒྱུད་ལམ་རིགས་ལ་སློབ་གཉེར་བེད་སྤྱོད་བྱ་རྒྱུར་ཧ་ལས་པའི་གལ་ཆེན་པོར་བརྩི་བཞིན་ཡོད་སྐོར་བརྗོད་བྱུང་།

ཁོང་གིས་མུ་མཐུད་དུ་བོད་པའི་ཆོས་དང་རིག་གཞུང་། སྐད་ཡིག་སྲུང་སྐྱོབ་དར་སྤེལ་སོགས་ཀྱི་ལས་དོན་དེ་ཉིན་ནས་ཟླ་དང་། ཟླ་ནས་ལོ་བསྟུད་དེ་ཤུགས་རྒྱག་དགོས་པ་ཞིག་ཡིན་པ་ལས། འཕྲལ་སེལ་སྐད་འབོད་དང་ལས་འགུལ་ཙམ་གྱིས་སེལ་ཐུབ་པ་ཞིག་མིན་སྟབས། ཕྱོགས་ཡོངས་ནས་ཤུགས་བརྒྱབ་སྟེ་བོད་ཀྱི་སྐད་ཡིག་བོད་པའི་སྤྱི་ཚོགས་ནང་སྲུང་སྐྱོབ་བེད་སྤྱོད་བྱེད་ཐུབ་པ་ཙམ་མ་ཟད། རྒྱལ་སྤྱིའི་སྟེང་བེད་སྤྱོད་ཀྱི་སྡིངས་ཆ་ཞིག་ཟིན་ཐུབ་པར་བྱ་རྒྱུ་གལ་ཆེན་པོ་ཡིན་པ་དང་། དེང་སྐབས་དགོས་པ་རྒྱུ་མཚན་མང་པོ་ལ་བརྟེན་ནས་ཕྱི་རྒྱལ་བའི་ཁྲོད་བོད་ཀྱི་སྐད་ཡིག་ལ་སློབ་སྦྱོང་བྱེད་མཁན་ཇེ་མང་དུ་འགྲོ་བཞིན་པ་ནི་བོད་ཀྱི་སྐད་ཡིག་རྒྱལ་སྤྱིའི་སྟེང་བེད་སྤྱོད་ཀྱི་ཁོར་ཡུག་ཆེ་རུ་འགྲོ་རྒྱུ་དང་། བོད་ཀྱི་ཆོས་དང་རིག་གཞུང་གིས་འཛམ་གླིང་སྤྱི་ཚོགས་ལ་ཕན་རླབས་བསྐྲུན་ཐུབ་པ་སོགས་ཀྱི་གནད་འགག་ཅིག་ཆགས་ཡོད་སྐོར་བརྗོད་བྱུང་།

ཉིན་བདུན་རིང་གི་ཟབ་སྦྱོང་ཐོག ཡིག་གཟུགས་གསར་རྙིང་བརྗེ་བསྒྱུར་དང་། དཔེ་དེབ་ཇུས་འགོད་མཉེན་ཆས་(InDesign CS3/ CS4/ CS5/ CS6) བཅས་ཀྱི་སྐོར་ལ་ཟབ་སྦྱོང་སྤྲོད་འཆར་ཡོད་འདུག